Matius 17
17
Tifini Yesusmana nenesmer folbana.
(Markus 9:2-13; Lukas 9:28-36)
1Nunu gamjon ga enam, Yesus Jei ga Petrus, ane Yakobuso Yohanes ayana yo osona, ga aftabifele taaren bwalnaiserem jem bolabe. Angtane nensa fas jebe. 2Jepga tifini Yesusmana nenesmer ga aa folbana jem nwenabe. Mirmase Jemna ga aa ge erteibene gwer nafa gamserem, ane fene Jemna ga aa ge sinsinsweibene iris nafa galserem. 3Jewer ga Musa yo Eliya, nabi fwatermana ga taman waaken-giriwer ge fortya, Yesusfar ga aa ge nasbawena. 4Petrus jei Yesus ga bala, “Tuhan, aaiserem samfersus, ai seyafter aare! Afa Aamei asIs bala, ai jatowai nawer-ningna ga as eyebaabili aafe – daamfenna je Ip, daamfenna je Musaf, ane daamfenna je ga Eliyaf.”
5Petrus aa gemer nasounaram, gara nafsususerem ga iritya, ga matabili. Ane gara jeiserem jewer ga taterisi ga aane sarbili, enggam aa jei gutenaram, “Tane aaiserem ba Amnam, Ai Ajes nesiktenerem. Jei ini Amna gam saaser-saasertabana. Seyafter Jei aa jes nasbilirim, aamei jam isa sarbasini!”
6Angtane Yesus aa jei ne tikwebaatinennerem taterisi jeiserem aa galap ne sarbilirim, jei jener ga aa ge janbili mirmase jemna onnap, aam temawer jei jam ge erebili. 7Jengga Yesus ga jela, ga entebaabitena, ane ga balbabili, “Jasa irwe! Ipsama ernerem!” 8Jame aa galap ge anggabilirim, jei afa jam ne damtayan, jengga Yesus Jenfentowai fina jebe.
9Yesus ane angtane Jei aa jei ne tikwebaatinennerem taarenawer jame aa galap ge irebityerem, Yesus ga balbabili ititmer, “Ijama nasipmineneyen angtane nafsife, gwanan ijesa damtabilirim, jamere Ai Tane Angtanemana, Ase fersontyo terewer!”
10Jepga angtane aa jei ne tikwebaatinennerem jei Yesus ga aane tenebana, “Guru-guru Hukumu Nabi Musa aa jes tulistababilim jei aa jei ne towas-towastababuwenaram, jeje bafa jei enggam ga aa ge gubili Nabi Eliya nabala ga jei se fortya?”
11Yesus ga tamawolbaabili, “Bunar, Eliya jei nabala ga jei fortya enggalfe, apgal jigala seyafter gemerserem gam waakentababili. 12Jengga Ai aamei ga isAs balbabili enggame, Eliya bunarsus mesam fortya. Angtane jei jam ge towaswebiyen enggame, angtane jeiserem jeiba Eliyasam, ane angtane jebe mes ne eyeibenent, kapkaiserem ini jemna aa gemer ge folbaminirim jam eyebife. Angtane Ap gemer ga Asene eyeibefe, Ai Tane Angtanemanfe.”
13Jewer ga angtane Jei aa jei ne tikwebaatinennerem ga aane sarbili Yesus Yohanes Pembaptisem temawer ga nasbili.
Yesus bwata kapkaiserem jes surbili, tane aa jei terterwenaram jemniwer.
(Markus 9:14-29; Lukas 9:37-43)
14Yesus ane angtane Jei aa jei ne tikwebaatinennerem jame aa galap ge forobityerem angtane unggwanfer jepserem jemnibe, anggwana aasaje Yesusminip ga jela, ane somwan ga dumem ga nwintena Jemnibe. 15Jei ga gunu, “Uwa, tane aman se nesikte! Jei tane aa jei tersiunennerem; jei bwerasusu. Jei galap-galap tokwanap afa fonap gam janton. 16Ai tanes aftafala angtane Is jei ne tikwebaatinennerem jemnibe, jengga jei tane jeiserem jam ne waakentayan.”
17Yesus tamawolbaabili, “Aamei angtane namwer ijeya gwenaram, aamei Ase ijama tebayan, ane etam-etama imna anesus. Aima ga ibar neya nwini jamere nunu anesus, jengga aamei gemerje Ai Ase ijama tebayan. Ai aamei isa Ajam fibabilibe nunu ga fomera enggalfe aamei Ai As ijeba tebafe? Tane girtowai jeiserem jese aftayal aafre Amnip!” 18Yesus Jei bwat kapka jeiserem ga surbili tane bwernabaraiserem jemniwer. Bwat kapka jeiserem ga mirtetefala, ane tane jes jeberserem ga mes waakenswena.
19Jewer ga angtane Jei aa jei ne tikwebaatinennerem jentowai Yesusminip ga aa ge jalbili, ane ga aane tenebana, “Jeje bafa bwat kapka jeiserem ai ajama surbiyen?”
20Yesus ga tamawolbaabili, “Aamei unggwanfer As ijama tebayan, jega jem temawer aamei bwat kapka jeiserem ijama surbiyen. Ai bunarsus ims towastababili, afa aamei As bastantowaifer isa tebana, nana tan bastantowaisusu gemerserem, aamei samfer taarena igma bala enggame, ‘Se gwisi jewer!’ ane taarena jeiserem ga gam gwisini. Afa aamei Ai As waakenfer igma tebana, aamei jigala jeiserem seyafter ga igama eyebili.” [ 21Bwat kapka aas galserem nele nafsi jeme ijama surbiyen, jengga sembayangemfener igama surbili, ane afa aamei tumilgala ijama tumilyen enggalfe aamei Uwa Sanbagiri igama pujitef.]
Yesus gamjon nasbili, “Ai Asene munbofo.”
(Markus 9:30-32; Lukas 9:43-45)
22Yesus ane angtane Jei aa jei ne tikwebaatinennerem jame aa galap ge betwebilirim ona Galileya je, Yesus ga balbabili, “Babitsim Ai Tane Angtanemana, Ai ga Asene gera angtane sanbakminibe. 23Ga Asene munbofo, jengga nunu nawer-ningna gamjon ga Ai ga As irwefa.”
Jewer ga angtane Jei aa jei ne tikwebaatinennerem ini jemna ga aa ge jenbamini.
Yesus pajak doini Jena Uwa Sanbagirmanaiserem jem armanulf.
24 #
Keluaran 30:11-13
Yesus ane angtane Jei aa jei ne tikwebaatinennerem jame aa galap ge forobilirim kota Kapernaum je, angtane pajak doini Jena Uwa Sanbagirmanaiserem aa jei gane tebabinennerem ga fortya Petrusminibe. Ane jei Petrus ga aane tenebana, “Pajak doi Jena Uwa Sanbagirmana aa jes ne tebabilirim, Guru imna doini jeiserem Jei kese armanulu, afa fas?”
25Petrus ga tamawolbaabili, “Jei se armanulu.”
Petrus aa galap fortyaram jenabe, nalef Petrus jam nasoweyan pajak doim temawer Yesus Jei Petrus ga bala, “Simon Ams towasta, pajak doini aa jes ne tebabinennerem rajafe ogiri aaiserem jebe, pajak doini jeiserem nane armanulu – anggwabura negara jeiserem jep aa jei ge surubilirim, afa anggwabura nafsi?”
26Petrus ga tamawolbana, “Anggwabura nafsi.”
Yesus ga gunu, “Afa ga gam, anggwabura aaf aa jei ge nwinbenerem jei jam ne armanulyon. 27Jes gemerserem aaiserem jegme gemer, doini aa jes ne tebabinennerem Jena Uwa Amnaiserem jebe, Ai doini jeiserem safnant, Ajam armanulyon. Jengga afa nei nejama gaarmiyene doini aa jei ne tebabinennerem jebe, angtane jemna ini ga kabwakfer sege folbamini. Jega jem temawer, nesa armanulu. Se gwi foboganap, gumarna ga is girinstowetna, jigala jep ga is gaartetna. Jigala nabala ijes tebanaram, jemna aarma ga is terelsobana, jem aarmap aamei doini jep ga is damtana. Doini jeiserem jei samfer nei nawersamer pajak doini jeiserem ga nes ne armanulu. Doini jeiserem ga is geserstena, ga is gaarmini angtane pajak doini Jena Uwa Sanbagirmana aa jei ne tebabinennerem jebe.”
Currently Selected:
Matius 17: LAIBKL
Highlight
Share
Copy
Want to have your highlights saved across all your devices? Sign up or sign in
