Matius 19
19
Yesus enggam gunu, “Anggwana wini jemnaiserem jei baife jam gwebiyen.”
(Markus 10:1-12)
1Yesus aa galap tabanulurum seyafter aa jes towas-towasulminirim, Jei ona Galileya ga mirsotefala, gamjon ga ona Yudeyaminip ga sofwa, fona Yordan jimwer. 2Ane angtane uskambar Yesus ga aane onsobana, ane Yesus Jei angtane bwernabara jep ga waakentababili.
3Jepga angtane safna Farisimana afweraiserem ga aa ge jalbili Jemnibe enggalfe, jei Yesus jam ne unggwasbaf. Jega jem temawer jei Yesus ga aane tenebana, “Fuma Nabi Musa jei aa gam tulisulum Hukumube? Anggwana wini baife aa jei gam gwebilirim ke samfer gangge syanwena, afa fas?”
4 #
Kejadian 1:27
Yesus ga tamawolbaabili, “Aamke Taterisi Uwa Sanbagirmana ke gemerje ijama gerabisteyan, ayata jep aa gam baatultelam ga enggam:
‘Gwanan galapserem Uwa Sanbagiri Jei angtane naura gam eyemil, anggwana yo wini.’
5 #
Kejadian 2:24
Ane Uwa Sanbagiri ga gul:
‘Ga jem temawer anggwana ga ene yo jeta ga gam mirsona, ane winabar daamfen jenaber ga gangge nwini.
Ane jepga nawersamer daamfennaber ga gangge tawena.’
6Gam jega jei tifni naweryan, jengga daamfenna. Ga jem temawer Uwa Sanbagiri Jei wini yo anggwana aa jes gam batsonaram jei ga tifni daamfenna, angtane jei wini yo anggwana jeiserem jam ne syansosiyen.”
7Jei gamjon aane tenebana, “Afa ga gam, Nabi Musa jei ula enggame baf tulisul, anggwana wini aa jei gam bilirim jebar jam ge syanwefe, anggwana jeiserem jei gwanan surta syanwels gam eyebili?”
8Yesus ga tamawolbaabili, “Nabi Musa jei enggam gul, sya jei safnant wini jelemanaiserem jebar ge nwinfe, aam temawer ini imna kekelna, aamei taterisi Uwa Sanbagirmana ijama taabiyen. Jengga gwanan-gwanansus jes jepserem je gamyan. 9Ai ims towastababili, afa anggwana jei wini baif aa jei gam gwebilirim, ane wini jeiserem jei etam-etama kapka maaryenf gwelaiserem jei jam eyebiyen, afa anggwana jeiserem jei gamjon wini nafsi ga gam gula, afa ga gam jes gemerserem, gam jega jei etam-etama unggwandwasususerem ga jes gam eyebili, jei maaryens gam eyebili.”
10Angtane Jei aa jei ne tikwebaatinennerem ga aane bala Jebe, “Afa ga gam wini yo anggwana jem temawer, gam jega samfer afa anggwana yo wini jena jam ge tetyen.”
11Yesus ga tamawolbaabili, “Angtane seyafter taterisi aaiserem jam ne taabiyen, jengga angtane enggal tefner, angtane Uwa Sanbagiri aa jes balbabilirim, jei safnant wini jam ne ketebaabiyen. 12Anggwana afweraiserem jei wini jam ne ketebaabiyen, aam temawer jei gemer gam surnu jei wifar jam ge tabayan. Anggwana afweraiserem jei wini jam ne ketebaabiyen, aam temawer angtane nafsi ga gemer gane eyebana jega jei wifar jam ge tabayan. Ane anggwana afweraiserem jei wini jam ne ketebaabiyen enggalfe, jei Uwa Sanbagirem gwonap gam gwefe, ane Uwa Sanbagiri Jei jem Sanbakf gam gwena. Angtane aasaje jam gam gunurum taterisi wini yo anggwana jena jam ge tetem temawer, taterisi jeiserem jam taabife, jei taterisi jeiserem saf gam taabili.”
Yesus Jei enggam gunu, “Tantantane samfer jei ge jalbi Amnibe.”
(Markus 10:13-16; Lukas 18:15-17)
13Jepga angtane jei tane basantantana Yesusminip ga aane aftabuwena enggalfe, Yesus tafna Jelemanaiserem jem dwak sagap gam tosoniwife, ane Yesus ga sembayanga gam gwebamif tane jeiserem jem temawer. Jengga angtane Yesus aa jei ne tikwebaatinennerem jei angtane tane aa jei ne aftabuwenaram Yesusminibe ga aane uftabili. 14Jega jem temawer Yesus ga balbabili, “Tantantane jei samfer jei ge jalbili Amnibe. Ipsama uftabilirim, aam temawer angtane enggalaiserem tanna aas galserem, jei samfer se naawena Uwa Sanbagirfar, ane Uwa Sanbagiri Jei ga jem Sanbakf se gwena.”
15Jepga Yesus tafna Jelemanaiserem tantantane jeiserem jem dwak sagap ga bunulniwili, ga mirtebitefala.
Tansi galgalabaraiserem Yesus tenebana waakenfer gwelaiserem jamer abak-abaksus jem temawer.
(Markus 10:17-31; Lukas 18:18-30)
16Angtane aasaje ga jela Yesusminibe, ane ga tenebana, “Guru, ai waakenaiserem ga basas eyebili enggalfe, ai waakenfer gwelaiserem jamer abak-abaksus agam domolfe?”
17Yesus ga tamalwolbana, “Jeje bafa aam ga Asim tenebana waakenfer eyebiliserem jem temawer? Jengga waakenaiserem ga daamfenna tefner, jeiserem ga Uwa Sanbagiri. Jengga afa aamei enggam is gunurum, ‘Ai waakenfer gwelaiserem jamer abak-abaksus agam domolf’, seyafter Uwa Sanbagiri aa jes bilim, ga jes is onsobili!”
18Angtane jeiserem jei Yesus ga tenebana, “Ijes bilirim ga fwersa?”
Yesus ga tamawolbana, “Aamei angtane ipsam tat. Maaryena ipsam gwebit. Apgal jigala angtanemana ipsam komkomulsit. Angtane nensa syefer ipsam balt. 19Iye yo uwa imna, taterisi jemna ga jamer igam tasyipmini. Angtane nafsiserem ga jam is nesiktababili, in ina gemer igam nesiktenerem.”
20Tansi jeiserem ga gunu, “Taterisi seyafter jeiserem ai amsam tikwebitinint. Ga fwersa ajam eyebiyene?”
21Yesus ga tamawolbana, “Afa aamei angtane waakenf gwefe, gase gwi, ane galgala imna seyafter ga jam is jualtababili, ane doini ga angtane galgalyenaiserem ga jep is kitulmini, ane aamei waakenfer gwelaiserem ga is domola jamer abak-abaksus. Afa jeiserem jam is eyebilirim jamer taban, aamei ga is jela Amnibe, ane Ai ga Asis tikwebaatini.”
22Tansi jeiserem taterisi Yesusmana jeiserem jam aa galap saribenerem, jei ga sofwa ane ini jemna ga jenbana, aam temawer jei ga gunu, “Apgal jigala amnaiserem gam ke bastantowaifer, apgal jigala amna unggwanfersusu.”
23Yesus ga angtane Jei aa jei ne tikwebaatinennerem ga balbabili, “Ai bunarsus ims balbabili, angtane galgalabaraiserem jei ini galgalapfener gam folbana, ini jemna Uwa Sanbagirminip jam folbayan. Afa ini angtanemana jes gemerserem gemer gam folbanaram, afa jei fas jam irfweyanaye ini kapka jeiserem jewer, gam jega Uwa Sanbagiri Jei jem Sanbakfe Jam gweyan. 24Jengga gamjon Ai ims balbabili, bunar-bunarsus twena unggwan-giri jei jam kaweteyan burum mwonabe. Jes gamserem aaiserem jegme gemer, angtane afa ini jemna galgalapfener aa jemanem gam folbanaram, angtane jeiserem jei Uwa Sanbagirfer daamfennaber jam ge gweyan, ane Uwa Sanbagiri Jei jem Sanbakfe Jam nwinyen.”
25Angtane Jei aa jei ne tikwebaatinennerem taterisi jeiserem jam aa galap ne sarbilirim, jei uskambar ga aa ge bitbitwebili, ga aane tenebana, “Afa ga gam jes gamserem, gam jega nan se waakentaasini?”
26Yesus angtane Jei aa jei ne tikwebaatinennerem ga gerebaabili, ane ga gutena, “Angtane jen jena jam waakentaasiyen, jengga Uwa Sanbagiri seyafter gemerserem jei gam eyebili.”
27Jepga Petrus jei Yesus ga bala, “Ai seyafter ajesa damtabilirim amsa mirtebitefala enggalfe, ai Aamei Is agma tikwebaatif. Uwa Sanbagiri Jei as bas golmifi?”
28Yesus ga balbabili, “Ai bunarsus ims towas-towastababili, ogiri ibirmi aa jep etamwenaram, Ai Tane Angtanemana, galap Ai Ajep nontesaram kursini rajamanaiserem jebe. Jes jepserem Ai ga As nwini angtane seyafter gamserem jem Sanbakfe. Ane aamei angtane Ams tikwebaatiliserem, aamei ga isa nontesa kursini rajamana dua belas jebe. Jes jepserem aamei isa nwini tewe Israelmana dua belas jeiserem jem sanbakfe. 29Ane angtane seyafter gemerserem ja, afa ayana, afa osona, afa ene, afa jeta, afa tane, afa makan, afa jei jeiserem jam gam mirtebitefalaram aam temawer jei Ai As jewer gane onsobanaram, angtane jes galserem jemna fwaina 100 kali ga gemer gam damtabili gwanan aa jes gam damtabilirim jewer, ane nunu gamjon jepserem jei gwela waakena jamer abak-abaksus gase domola. 30Jengga angtane unggwanfer namwer nabal danalaiserem, angtane jeiserem galap amnup sene bunulu. Ane angtane unggwanfer namwer amunemanaiserem, galap ga jei sege danabifi.”
Currently Selected:
Matius 19: LAIBKL
Highlight
Share
Copy
Want to have your highlights saved across all your devices? Sign up or sign in
