Matius 20
20
Seisya taterisi angtane anggur makanap gwelaiserem jem temawer
1Yesus gamjon ga balbabili, “Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam fala taterisi aaiserem gamserem: Angtane anggur makanabaraiserem jei gwinibenersus sofsa, jei angtanef terelse awelna jep jei gwebif jem anggur makanap. 2Jei angtane ga balbabili enggame, ‘Aamke samfer ai doi perak daamfenna isas kitulmini afa aamei nunu daamfenna awelna jem gwelaiserem?’
Angtane jei ga aa ge gubili, ‘Sya.’
Ane jei ga balbabili, ‘Sa gwi anggur makanap!’
3Gwer anggasyelawer angtane makanabaraiserem jei gamjon ga sofwa, ane jei angtane pasarap ga damtabili jei jafner ge fibili, awelna jemna fas. 4Jei ga balbabili, ‘Sa gwi, awelna aawer ga isa gwebitne am anggur makanabe! Ai doini isas kitulmini waakenfer.’ 5Jepga jei ga aa ge sofobili.
Gwere bolap ane gwere mes afafwena jei gamjon ga eyebili gwanan gamserem. 6Ona jame aa gigitsonaram, jei gamjon ga sofwa, ane angtane nafsiserem ga damtabili jafner ge fibili. Jei angtane jeiserem ga tenebaabili, ‘Jeje bafa aamei gwinibener ijetera fisaram jamer ona gigit? Aamke awelna ke fas?’
7Jei ga aa ge tamawolbili, ‘Angtane awelna ap as jam ne golmiyen.’
Jei ga balbabili, ‘Aamei mese sa gwi, awelna aawer ga isa gwebitne am anggur makanabe!’
8Gwinem angtane anggur makanabaraiserem jei angtane awelna aa jei ne gweyibenerem jem sanbaka ga bala, ‘Angtane awelnap gwelaiserem jam se jenbebi, ane doini jemna ga is kitulmini! Gwanan ga angtane amnup foryalaiserem ga jemniwer is towaiwulu, ane angtane nabal danalaiserem doini jemna ga amnup is kitulmini!’
9Angtane amnup jelaiserem jei ge jalbili, ane angtane jeiserem perak doini daamfen-daamfenneme ga aane tebabili. 10Jepga angtane nabal danalaiserem jei aa galap ge forobityerem, jei jelem iniber ga aa ge gubili, ‘Perak doini amna daamfenyan, amna ane as tebanaram.’ Jengga jeime perak doini daamfen-daamfenneme ga aane tebabili. 11Jemna gajini jeiserem aa galap ne tebananaram, jei angtane anggur makana jemanserem ga aane nasbasnenne. 12Jei ga aa ge gubili, ‘Angtane amnup foryalaiserem awelna jemna jema daamfenna tefner. Jengga ai nabal danalaiserem ai jema unggwanfer awelnap ajeya gwebilirim, gwinibener jeterserem jamer ona gigit. Ai awelna gwer kakalsusube ajeya gwebilirim. Jengga aamei doini ga as armanaber im kitulminirim, jemna gemerserem aman jegme gemer.’
13Angtane anggur makana jemanserem jei angtane daamfenna nabal danalaiserem ga tamawolbana, ‘Am afelna, ai kapka afa is ajam eyeibeyen. Aamei imsam gunu enggame, aamei doi perak daamfenna samfer is taabili afa aamei awelnap jam is gwenaram nunu daamfennaiserem jeme. 14Doini imna se teba, ane ga is sofwa! Ai angtane amnup foryalaiserem jemna gemerserem ip jegme agemer kitulmini. 15Ai as eyebili ini amna gamserem doini amnaiserem. Aamke as ijama nasbana ga aam temawer ai doini unggwanfer angtane nafsife ajewer kitulminirim?’ ”
16Ane Yesus umwef enggam ga balbabili, “Angtane amnumanaiserem ga jei sege danabili, ane angtane nabal danalaiserem jei gamjon amnuwer.”
Yesus nawer-ningnabarf nasbili enggame, “Ai Asene munbofo.”
(Markus 10:32-34; Lukas 18:31-34)
17Yesus ane angtane Jei aa jei ne tikwebaatinennerem aa galap ge wofobilirim nel tawela kota Yerusalemwer, Jei angtane dua belas jeiserem ga aftabifele nel eyebe, ane ga balbabili, 18“Gasa sarsi! Nei gane kota Yerusalemwera tauna. Ane jewer Ai Tane Angtanemana, Ai ga Asene gera angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwefaram jemnibe. Ane jei ga ula Am temawer jewer ga sene nasbili enggalfe Ai Ajam terfe. 19Ane Ai ga Asene gera angtane Yahudimanyanaiserem jemnibe. Jei ga Asene bisobafa, ane ga Asene safsaftana newa utuboroserem jeme, ane Ai Asene munbofo ti salibibe. Jengga nunu nawer-ningnabaraiserem Ai gamjon ga jem As irwefa terewer.”
Yakobuso Yohanes jem eneserem jei Yesus bala.
(Markus 10:35-45)
20Jepga wini Sebedeusmana jei jelem tannawanfar Yesusminip ga aa ge jalbili. Ane jei somwan dumem ga nwintena Yesusem tarnabe enggalfe jei apgal jigala Yesusminiwer gam bilf.
21Yesus ga tenaabili, “Aamei Amniwer As ibas bilibene?”
Jei ga bala, “Tannawan amna aaiserem ke samfer Ibar ge nwinfe, afelna taasfolawer ane afelna ga gwejawer Aamei jame Ijep nwinirim anggwabura seyafter gemerserem jem Sanbakfe?”
22Yesus ga balbabili, “Aamei teisyena Abe As ijesa bilibenerem. Aamke kapkaiserem ke samfer is ge gwirni, Ai gemerserem?”
Jepga aa ge gunu, “Ai samfer.”
23Jepga Yesus ga gitmini, “Jeiserem bunar kapkaiserem is ge gwirni Ai gemerserem. Jengga Am taasfola jei nwiniserem, ane Am gwejawer jei nwiniserem, angtane jeiserem Ai Ajam destabayan. Jeiserem gam ke baabeta Amna, jengga Uwa Sanbagirmana. Angtane jep aa jei ge nwiniserem, Uwa Amna Jener se destamini.”
24Angtane sepulu aa jei ne tikwebaatinennerem afwer jeiserem jei aa galap ne sarbilirim angtane naura jeiserem jei aa jes ge bilirim, jei angtane naura ayana yo osona jeiserem ga aane nasmini. 25Jepga Yesus seyafter ga dupdupbulu, ane ga balbabili, “Aamei tousa, angtane aa jei ge nwinbenerem angtane Yahudimanyanaiserem jem sanbakfe, jei uskamer gam eyeipmini angtane jelemanaiserem jebe. Jei angtane nafis gane baftana enggalfe, angtane nafsi gane damtana jemna baabeta unggwandusa. 26-27Jengga aamei gamyan. Aamei ga enggam isa gwena: Afa angtane imniwer aa jei gam gunurum sanbakef jam gwefe, jei gwanan ga angtane nafsiserem jes gam batobaabili, ane awelna angtane nafsiserem jeman gam eyeipmini. 28Jei enggam gam gwena Ai gamserem. Ai Tane Angtanemana, Ai Ajam jelyan angtane nafsi Ai As jam ne batobafe, jengga Ai enggalf Ai fortya angtane nafsi Agam batobaabif, ane gwela Amnaiserem Agam golmif jamer Ai As tere enggalfe angtane unggwanfer gam aftabunnuf.”
Yesus angtane naura nwe kofaiserem jes waakensona.
(Markus 10:46-52; Lukas 18:35-43)
29Yesus ane angtane Jei aa jei ne tikwebaatinennerem kota Yeriko aa galap ne mirsotefalaram, angtane anesus ga aane onsobaabili. 30Angtane nawan nwe kofa nel eyebe ga jep ge nwini. Jei jame aa galap ge sararam Yesus gase ayinyel, jei ga aa ge gwarenbana enggame, “Uwa, Tane Raja Daudmana, as nesikso!”
31Angtane unggwanfer jeiserem jei ga aane ofsona, ga aane gitmini, “Ja sege tikwe!”
Jengga gamjon unggwanfer ga aa ge gwarna, “Uwa, Tane Raja Daudmana, as nesikso!”
32Jepga Yesus ga aa fyatena, ane ga jenmini. Ane ga taanaamini, “Aamei ibas ge bili Ai ibe isa Ajes eyeipmiliserem?”
33Ga aa ge tamawolbana, “Uwa, ai ajam ge anggasif!”
34Yesus Jei angtane jeiserem ga nesiksona, ane tafna ga tosomuniwili jem nwenabe. Ane jes jeberserem jei waakenfer ga aa ge anggasini, ane Yesus ga aa ge onsobana.
Currently Selected:
Matius 20: LAIBKL
Highlight
Share
Copy
Want to have your highlights saved across all your devices? Sign up or sign in
