1 Musa 14
14
Si Abram mengurupi si Lot
1Lot mo empat raja, imo: Raja Amrafel kan Babilonia nai, raja Ariokh i Elasar nai, raja Kedorlaomer i Elam nai dekket raja Tideal i Goyim nai, 2mergeraha mengalo lima raja sidèban, imo: Raja Bera i Sodom nai, raja Birsya i Gomora nai, raja Syinab i Adma nai, raja Semeber i Zeboim nai dekket raja i Bela nai sinidokkenna ma Zoar. 3Kongsi mo raja si lima i, janah ipedèmpu mo soridaduna i i napa Sidim, imo i laut Matè sibagèndari. 4Sipuluh dua tahun dekkah kalak i irajai raja Kedorlaomer, tapi tahun pesipuluh telluken memberontak mo kalak i tabasa. 5I tahun pesipuluh empatken, roh mo raja Kedorlaomer rebbak dekket denganna sada arih bak soridaduna, italuken kalak i mo kalak Refaim i Asyterot-Karnaim, kalak Zuzim i Ham, kalak Emim i Syawe-Kiryataim, 6dekket kalak Hori i uruk Edom, nai ijalang mo kalak i ndaoh soh mi El-Paran i biding gurun pasir. 7Nai balik nola mo simenjalang i mi En-Mispat, gerarna begèndari imo Kades. Italuken kalak i ngo karina tanoh Amalek janah italuken kalak i mo kalak Amori simerian i Hazezon-Tamar.
8Nai ipetaram raja Sodom, Gomora, Adma, Zeboim dekket raja Bela mo soridaduna i napa Sidim lako geraha 9mengalo raja-raja kalak Elam, Goyim, Babilonia, dekket raja kalak Elasar; jadi lima raja mengalo empat raja. 10Dom ngo sumur aspal i napa i, janmah tikan naing mperrus raja Sodom dekket Gomora i pergerahaen i nai, merdabuhen mo kalak i mi sumur i. Ukum raja sitellu nai mperrus ngo laus mi delleng. 11Siempat raja simennang i, itaban mo karina silot i Sodom dekket Gomora bagi ma dekket pangaen, nai laus mo kalak i. 12Si Lot anak dedahen si Abram merian i Sodom ngo tikanna i, jadi dekket ngo ia itaban musuh i rebbak dekket karina hartana.
13Tapi lot mo sada kalak maluah, ibagahken mo karina simasa i taba si Abram kalak Heber i. Merian i gembar kayu keramat bekkas mersembah kalak Mamre imo sada kalak Amori. Ukum si Mamre, dekket kaka-anggina, imo si Eskol dekket si Aner supan-supan si Abram ngo. 14Idengkoh si Abram kessa mo, tertaban si Lot ipepulung mo karina naposona sipandè geraha, buèna tellu ratus sipuluh ualuh kalak, nai iayaki mo raja siempat i soh mi kuta Dan. 15I sidi mo ibagi si Abram naposona i gabè piga-piga nuhnuhen, nai ialo mo musuh i tikan berngin janah italuken. Ipellet ngo kalak i soh mi Hoba kan utara kuta Damaskus. 16Irampas si Abram ngo harta-harta sienggo itaban i, bagi dekket si Lot bak karina hartana, bagi dekket daberru nitaban kalak i.
Ipasu-pasu si Melkisedek si Abram
17Enggo kessa italuken Raja Kedorlaomer dekket raja denganna kongsi, balik mo si Abram. Nai isimbak-simbak raja Sodom mo ia i Napa Syawe sinigerarenna ma Napa Raja. 18#Heb. 7:1-10 Si Melkisedek Raja Salem janah ma imam Dèbata Sintèmbul i, merembah roti dekket anggur bai si Abram, 19nai ipasu-pasu mo si Abram, nina mo, “Dak ipasu-pasu Dèbata Sintèmbul i janah simenghanaken langit dekket tanoh èn mo si Abram. 20Nipoji mo Dèbata Sintèmbul i sienggo merèken kemenangen bamu mengalo musuhmu.” Kessa i iberèken si Abram mo taba si Melkisedek nipersipuluh karina harta sinirampasenna i sienggo iembah balik.
21Nai nina raja Sodom mo taba si Abram, “Bamu mo harta sienggo terampasen i, tapi paduè mo balik taba aku karina orangku.”
22Ialoi si Abram mo, “Kusumpahken mo i hadeppen Jahowa, Dèbata Sintèmbul i, simenghanaken langit dekket tanoh, 23oda kubuat barang kadè hartamu, agia sirambar bennang barang sembikbik tinali solop pè oda. Merkitè bagidi, ‘oda terdokken kono, aku maing bèak si Abram.’ 24Oda uè aku muat barang kadè pè lako bangku. Pellin sienggo ipakkè naposongku i mo kessa uè aku menjalo sikira bangku. Tapi ukum supan-supanku si Aner, si Eskol dekket si Mamre, ibuat mo bagianna.”
Currently Selected:
1 Musa 14: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
