Luka 10

Kurumwa ka vagondiswa va 72

1Msana keto, Mkoma a to sawula vamwani vagondiswa va mtxhanu wa magumi ni magumi mambidi, ni vagondiswa vambidi, a txi va rumela, ngu vambidi-vambidi, a txi va thangetisa masoni kwakwe, kuya ka yotshe miti ni otshe makhalo awa Ene a nga ti fanela kuya. 2A txi va gela ku khene: “Kuelula nga hombe, aniko sithumi nzidotho. Ngu toneto, kombelani ka Nyamne wa kuelula, ti to e rumela sithumi thembweni kwakwe. 3#Wona ni ka: Mat. 10:16. Tsulani. Na mi ruma nga kule ka sinvutana hagari ka maxolwa. 4#Wona ni ka: Mat. 10:7-14; Mar. 6:8-11; Luk. 9:3-5. Mi nga tekeni txikhwama, hambi msava, hambi masandazi, kambe mi nga khambisaneni thenga hanzila. 5Ka nyumba yihi ni yihi mi no wulela ka yona, khatani ngu ku khanu: ‘Kudikha ku nave ka nyumba yiya.’ 6Se ngako a diho m'thu wa kudikha, kudikha kwanu ku na ya zumba kwakwe; ngako a di walo, kudikha kwanu ku na tshumelela kwanu. 7Zumbani ka yoneyo nyumba, dyanani mi txi sela asi va ku naso, nguko txithumi txi ni fanelo ya muholo wa txona. Mi nga tsimbileni ka nyumba ni nyumba. 8Ka didhoropa dihi ni dihi mi no wulela va txi mi amukela, dyanani eso va no mi ha, 9Hanyisani valwali va va ku konemo, mi txi gela vathu ku khanu: ‘Mfumo wa Txizimu wu hafuhi kwanu.’ 10#Wona ni ka: Mith. 13:51. Aniko ka didhoropa dihi ni dihi mi no wulela, mi si amukelwi, humani mithandani mi txi gela vathu ku khanu: 11‘Hambi lithulu la didhoropa danu, li nga hi namarela mikondoni, ha li huphuta kasiku mi txi sala nalo. Aniko ti ziveni ti to Mfumo wa Txizimu wu hafuhi.’ 12Na mi gela ku khani ka Ditshiku dileya da kulamulwa, Sodhoma a nata hehukiselwa kupinda didhoropa donedo.”

Kusolwa ka Madhoropa o mbi lava kuhunduluka

(Matewu 11:20-24)

13“U na ni dikhombo awe Korazini! U na ni dikhombo awe Bhetsayidha! Nguko sixamaliso si si nga mahwa hagari kwanu, idiku si mahilwe Tiro ni Sidhoni, madhoropa awa, nga ma di hundulukile kale ngu kuphamba masaka ni kuzumba ha dikhumani. 14Ngu konaho kulamulwani, madhoropa a Tiro ni Sidhoni ma nata hehukiselwa kupinda anu. 15Awe Kapernawume, u na guletwa nzumani kani? Lambi! U na reletwa hahatshi Diphalani ka vafi. 16Awu a mi engisako a engisa ani; awu a mi nyenyako, a nyenya ani; se awu a nyenyako ani, a nyenya wu a nga ni ruma.”

17Avale va mtxhanu wa magumi ni magumi mambidi, ni vagondiswa vambidi, va to wuya va txi tsaka, va txi kha vona: “Mkoma, hambi mimoya yo biha yi ti hi thava ngu mhaka ya ditina dako.” 18Ene a to va gela ku khene: “Ani ni woni Sathani a txi wa nga kukeluka ka nzuma. 19Wonani, ni mi ningile mtamo wa kukanda timamba, tihume, ni kuxula wotshe wurena wa Mlala, kuwalo txilo txi no sikota ku mi mahela to biha. 20Kambe, mi nga tsakeni ngu kuva mimoya yi mi thava, aniko tsakani nguko matina anu ma bhatwe nzumani.”

Litsako la Jesu

(Matewu 11:25-27; 13:16-17)

21Ka yoneyo mbimo, Jesu a to tala ngu kutsaka, ngu Moya wo Sawuleka, a txi khene: “Na ku bonga, Tata, Mkoma wa nzuma ni mafu, nguko u sisete titxhari ni va va pimako timhaka tiya, u txi ti wonekisa ka va vavadotho. Ina, Tata, nguko u ti lavisile toneto. 22#Wona ni ka: Joh. 3:35; 10:15. Sotshe ni ningilwe ngu Tate; se kha nga ho wu a zivako ku Mwanana i mani hahanze ka Tate ekha, ni ku Tate i mani, hahanze ka Mwanana ekha, ni wule ene Mwanana a lavako ku mu wonekisa kwakwe.” 23Ene a to rendekela vagondiswa vakwe, a txi va gela vona vokha ku khene: “Va katekile avale va wonako ati mi ti wonako. 24Vaprofeti votala ni vafumeli votala va randile kuwona ti mi ti wonako, kambe kha va ti wona, ni kuengisa ti mi ti engisako, aniko kha va tiengisa.”

Txirumo txa hombe txa mlayo

(Matewu 22:34-40; Marku 12:28-31)

25M'gondisi wokari wa Mlayo, a to khukha a txi mu duka ngu mapswi awa: “M'gondisi, nji txani ni fanelako ku txi maha, kasiku ni mana wutomi wo mbi guma kani?” 26Jesu a xamute a txi khene: “Ti bhatwe to txani amu ka Mlayo? Kasi awe u gondisa kutxani kani?” 27Ene a to xamula a txi khene: “Randa Mkoma Txizimu txako, ngu yotshe mbilu yako, ngu wotshe moya wako, ngu yotshe mitamo yako ni otshe mapimo ako; u na randa kambe muakelani nga ti u ti randisako tona awe.” 28Se Jesu a nje khene kwakwe: “U xamute ta tinene; maha toneto, u na mana wutomi.”

Txidinganiso txa Msamariya wamnene

29Aniko ene, ngu kulava ku ti maha wamnene, a to womba tiya ka Jesu: “Ngu mani muakelani wangu kani?” 30Se Jesu a txi khene: “M'thu wokari a ti relela ngu Jerusalema a txi ya Jeriko, se a to wa manzani ka makhamba, ayawa ma nga mu honyolela sotshe si a nga ti naso, se kugwita ka ku mu peketela, ma to khukha ma txi mu leka a di tsivate. 31Sekoko, a to thuka e pinda ngu yona nzila yile mphaxeli wokari; aniko ngako a di mu woni, a to vayilela. 32A hokile kambe hafuhi ka wona wukhalo wule mmwani, i nga ti Mulevhi, aniko a di mu woni, a to vayilela nene. 33Se ngu msana keto, a to pinda ngu kona haleya Msamariya wokari, a nga txi enda ngu yona nzila yile, se a di mu woni, a to mu pfela wusiwana. 34Se a di mu tshuketete, a to mu bhanditxha silonda sakwe, msana ko si thela mafura ni vhinya; se a di mu gadhisile ha mbongolani kwakwe, a mu heleketile ka nyumba ya vapfhumba, eya mu xayisa kona. 35Se mangwanani ka kona, a humisile matxheleni mambidi, a txi ninga nyamne wa nyumba ya vapfhumba, a txi khene kwakwe: ‘Mu xayise, nata kudihela kambe sotshe, mbimo yi ni no wuya.’ 36Se ngu wuhi ka vale va vararu awu a nga va muakelani wa wule a nga ti wile manzani ka makhamba kani?” 37Se ene a nje khene: “Ngu wule a nga mu pfela wusiwana.” Se Jesu a nje khene kwakwe: “Tsula, maha toneto nawe.”

Jesu ngako a txi endela Mariya ni Marta

38 # Wona ni ka: Joh. 11:1. Ngako a txi tsimbila, ene a to ya wulela ka m'ti wokari, se mmweyo wamsikati, ditina dakwe a nga ti dhanwa ku i Marta, a to mu amukela nyumbani kwakwe. 39Ene a ti ni mwanawe, a nga ti dhanwa ku i Mariya, awu a nga khalahatsha hafuhi ni Jesu, atxi engisela mapswi akwe. 40Aniko Marta ene a ti karatwa ngu mithumo yayingi. Ene a to ta, a ta khene: “Mkoma, ina hi nga txilo kwako, akuwa mwanathu a ni lekako ni txi thuma nokhalela kani? Mu gele a txi ta ni vhuneta.” 41Aniko Mkoma a to mu xamula a txi khene: “Marta, Marta, u vilela u txi ti karata ngu sasingi; 42aniko njilo tximwetxo dwe txi lavekako. Mariya ngene a nga sawula txi i ku txa txinene ngutu, atxi a no mbi tekelwa ngu m'thu.”

Currently Selected:

Luka 10: BEC2016

Highlight

Copy