Yohanes 12

Kwe Maria nen ambusu obasi pano mende Yesus iyok oba wat disike wene

(Matius 26:6-13; Markus 14:3-9)

1Wene esigit diluk yisukasik werek nggorlek, ininggi 5 paga dogoluk nen, omanggi paga pesta Paskah etnogo nuwogoluk awan werek nggorlek, at Yesus o Betania ap Lazarus watlagikesikmo nen ilugut disike mende etnogo aguma wagike. 2Wagikemo, it akoni etoma nen iyago iyakukama, kwe Marta nen kimbiri wogisasi nggorlek, Lazarus inom, akoni inayonggo ʼbisuka mende inom, Yesus inom nasuka. 3Esigit diluk nasi nggorlek, at kwe Maria nen ambusu endaga narwastu obasi pano mende onggo nggogat mbaligogi mende, setengah liter waganogo Yesus iyok oba wat disikesik nen, at Maria enggaerek isi paga kokike. Esigit diluk kagakikemo, uma etnogo obasi mondok yik-mikogo kagat lagike. 4Esigit diluk kagat lagikemo, at Yesus agoromi ane waganggo laguka mende omanggi endaga Yudas Iskariot, yabunggane Yesus wasuwagaluk yonggo lagike mende etnogo nen, men yisike,

5“Ambusu narwastu eti paga akoni yabu ininggi omanggi pasik kagakonem ininggi onggo omanggindek wogisiligogi etnogo mende 300 waganiluk nen, it akoni inamende dek mende sumburisausak mendeat, ambusu elam wake eti nenaluk,” yiluk, wenemuk mbalkike. 6Esigit diluk wenemuk mbalkike eti akoni inamende dek mende eti inaʼbuwa nen yisike ʼbuk. At agarlagi inom taʼbokogonat inauang dompet kisogo mende pago dogolik, at enggaerek ake limago korlasi lagike eti paga wenemuk esigit diluk yisike. 7Esigit diluk yisikemo, at Yesus nen, men yogokike,

“Kwe yi nen ambusu wat dangge eti pasik, wenemuk mbereko ʼbuk o. An yabunggane nakonem watlasumo nebe warek agatma sal danuwogoluk ambusu wat danu kagat pago welagasik wat dangge o. 8Nen, it akoni inamende dek mende eti kit kinom mondogat dogogun mende, an, kit ninom mondok dogogun dek o,” yiluk yogisasike.

It ap Allah indewerek mende nen Lazarus ebe wasuwogoluk abok mbalkuka wene

9At Yesus nen esigit diluk yogisasikesik werekma, akoni nen,

“At Yesus o Betania werek o,” yiluk yisukama, it akoni Yahudi mende inebe dogalegat inasuk kolkukasik laguka. Esigit diluk laguka eti at Yesus arligat inilenggen kuwogoluk laguka ʼbuk. Mende, Lazarus warek mende Yesus nen ilugut disike etnogo imbisagat inilenggen iyawogoluk laguka. 10-11Lagukama, it ap Allah indewerek ineugi nggokndek mende yomenogo nen, men yisuka,

“Lazarus warek mende Yesus nen ilugut deke eti paga, akoni Yahudi mende inebe dogalegat nit ninane togot diyalok inendainggen Yesus oba panggot diligogi,” yiluk, Lazarus wasuwogoluk abok mbalkukaat.

Yesus ebe o Yerusalem unggisinem pogorakuka wene

(Matius 21:1-11; Markus 11:1-11; Lukas 19:28-40)

12Esigit diluk yisukasik werek nggorlek, kubengge, it akoni nen,

“At Yesus o Yerusalem wisigiluk wirigogo,” yiluk yisukama, it akoni dogalegat pesta Paskah nonggonem nandokuka mende yomenogo inasuk kolkukasik nen, 13sarluka engga salek mende mbalkigik wolok, Yesus elokoma amitmit luk-luk duki wago dogolik, men yisuka,

“Wa! Wa! Wa!” yiluk yu kak,

“Hosana! Ninombae Allah Endaganggok nen nit akoni Israel mende ninewe endaganggok laʼbagi wagama wagan yi, at nenat panot kabuwak o,” (Mzm. 118:26)

yiluk endai warik warik duki waguka. 14Duki wagonem, at Yesus wam keledai eyak ngget awan mende omanggi waganggikesik, ambot oba yasuk lagikesik unggisike. Unggisike eti Allah nen pagane men yisikemo kolal yigit diluk mbalek werek,

15“Kit akoni o kota Sion dogoligogi mende kinayuk agup o! Kinewe endaganggok wam keledai eyak ngget awan mende ambot oba yasuk latluk wirigogo eli kinilenggen lakani o!” (Zak. 9:9)

yiluk yisike ndak-ndagat kagakike o. 16Esigit diluk unggisike mende, etinem, it at agoromi ane waganigogo mende yomenogo nen, wene kagat lagike mende eti didigidek. Mende, at Yesus watlagikesikmo nen yabunggane Allah nen ilugut disikesik nggogot disikesikmo nen, inakla ebekukasik men yisuka,

“At pasik Allah wene kolal mbalek weregat o. Nen, wene eti mbalek werek ndak-ndagat, it akoni nen at ake kagakonem ninilenggen kago,” yiluk inakla ebekuka. 17Nen, at Lazarus warek salkukasikmo nen, at Yesus nen waikikemo ebe iluk agikesik duki wagonem, it akoni inilenggen kasuka mende yomenogo nen, it amberek men yogisasi laguka,

18“At Yesus ebe diduwagaluk elalin mende esigit diluk kagake,” yiluk yisukama akoni inebe dogalegat inasuk kolkukasikmo nogo nen, Yesus elokoma duki waguka. 19Esigit diluk duki waguka eti paga, it ap Farisi mende it-it wene yisi dogolik,

“Warligi yi. Yi akoni ndi akoni taʼbokogonat, at omborlik mondok liligogi eti paga, nit nen kagako lago etnogo kagakonem, ninane nggok asigin ambaligogi a? Mondok dek o,” yiluk yisuka.

It ap Yunani mende nen Yesus kweyarik waguka wene

20It akoni pesta iyago nasi dogolik Allah pogorasuwogoluk waguka eti, it ap Yunani mende amberek inom waguka. 21It ap eti wagukasik nen, ap Filipus ago o Galilea unggul endaga Betsaida mende wusa wagikesik werekma, oba wagukasik men yogokuka,

“Ninewe. Nit Yesus ninil kau warlok nen wago o,” yiluk yisukama, 22at Filipus nen wene yisuka mende eti at Andreas yogosi lagikesik imbisak nen yabunggane Yesus yogosi laguka. 23Esigit diluk yogosi lagukama, at Yesus nen, men yogisasike,

“An abat endak lasi wagagi etnogo, nebe pogot nabugun oba arat asi waga o. 24Nen, akoni nen, gandum enggen ai agatma yakidekma, akoni watlarigogi eti kak, owado alep mende pirli atluk ngget mende dagagidek kalok, enggen omanggiat ai yasugun mende etiat dogogin o. Mende, enggen eti agatma yatlukmo, akoni watlarigogi kak, owado alep mende eti pirli atluk, yabunggane ngget mende dagaluk enggen dogalegat yirigogo o,” yiluk yogisasike.

25Esigit diluk yogisasikesik, wene omanggi men yogisasike,

“At ta nen akla nen,

An nen agat oba yoma nebe niluk dogusak warlok, yiluk ambasi kalok, yabunggane ebe iluk mondok dogusak mende pasik nuk asigin o. Mende, ap ta nen akla nen,

Agat oba yoma niluk dogusak naʼit, yiluk ambasi kalok, at eti yabunggane ebe nuk asigin dek, iluk mondok dogogin o. 26Nen, at ta nen an nanduwanengge dogolik, akla nen,

An Yesus ake kagako dogogin, yiluk ambasi kalok, an dogoginmo etoma nimbisagat mondok doguwogoluk nomborlik wago dogusak o. Nen, at ta nen an nake kagako dogogin mende eti nombae nen at ebe alon paligin o, yiluk nane eberogonat yokisigi o,” yiluk yogisasike.

Yesus nen, “An nasugun,” yiluk kusumbi yogisasike wene

27At Yesus nen wene esigit diluk yogisasikesik sembayan omanggi men yisike,

“Nombae. Yogondakne nendainggen weyak mondok arigogo yi ninggit diluk yik? An nen yigit diluk yik. Nombae. An yi aik ndi aik kigin eti kat nen nebe ndil nabin o, yiluk yokisusak mende, esigit diluk kagat nabuwagalugat wagagisikmo nogo nen, esigit diluk yigin dek o, nombae. 28Eti paga, Nombae, kat kendaga kenggaerek nen nggogot dakan o,” yiluk yisinem mbogot oba nen ane yisi dogolik, men yisike,

“Arat nggogot dakigirik, yabunggane nggogot dakaginat o,” yiluk ane yisinem, 29it akoni inebe dogalegat etoma mendek welaguka mendek nen, inasuk kolkukasik, it amberek nen, men yisuka,

“Mbogot ane luk-luk yiligogo,” yigik, nen it amberek nen,

“Dek o. It malaikat mbogot oba yonggo liligogi mende omanggi nen ane pakeke o,” yigik, yisuka. 30Esigit diluk yugun ambasuka at Yesus nen, men yogisasike,

“Ane yisinem kinasuk kolkep eti an nake ʼbuk. Kit kinake yeke o. 31Yogondak Allah nen, akoni agat oba mende wene inoba ʼbigik, nggokik, kagako dogolik, ap endaganggok agat oba mende etnogo mukogo wula ʼbiyigik, kagasigin oba arat asi waga o. 32An nebe agat oba yoma mendanumo, an nen akoni taʼbokogonat lit-lit wogisek nenggaerek noba ʼbiya wisigin o,” yiluk yogisasike. 33Esigit diluk yogisasike eti ebe,

“An yabunggane akoni nen esigit diluk mendaniluk nasugun,” yiluk yu kak yisike. 34Esigit diluk yisikemo, it akoni dogalegat yomenogo nen, men yogokuka,

“Wene Allah nen ninasuk wakike wene eti paga, nit akoni ndil ninabuwagaluk Allah nen Kristus laʼbi wisigin eti ebe witluk nen, iluk mondok dogogin, yiluk yisikemo ninasuk koligogi mende, kat nen yisi dogolik,

An abat endak lasi wagagi etnogo akoni nen agat oba yoma mendanugun, yiluk yiligogon eti ap omanggi ebe abat endak lasi wisigin yisike eti ebe ta pasik yisikemo nen yegen,” yiluk yogokuka. 35Esigit diluk yogokukama, at Yesus nen, men yogisasike,

“An nebe o liyarinabigogo mende etnogo we ʼbugurlagat ninom dogogun o. At ta nen o kibanggo amummo lago kalok, o nggoma liligogo salek, onggodegat liligogo eti paga, kit lagonem o amum asunogo, yiluk, an o liyarinabigogo mende ninom werek nggorlek yaat liya paga lago dogoni o. 36Kit kinebe an o liyarinabigogo mende naʼburi asubagik nen, an ninom werek nggorlek yaat, nebe didaniluk kinendainggen noba panggot disi dogoni o,” yiluk yogisasike. Wene esigit diluk arat yogisalok nen, at Yesus it togot diyalok, ebe werlekmangge limak lasi lagike.

It akoni Yahudi mende Yesus eberogonat yiluk, ebe didigidek welaguka wene

37At Yesus ebe it nen diduwagaluk elalin dogalegat inil oba kagako lagike mende, it nen,

“At eberogonat,” yiluk, ebe didisi laguka mondok dek o. 38It esigit diluk kagako laguka eti, ap Yesaya Allah wene yogisasi lagike mende nen yisi dogolik, men yisike,

“Allah Kendaganggok mende, Nombae. Nit nen kat kane yogisasinem, ta nen wene eti eberogonat yiluk didisike nogo. Kat kinggi obatne inilenggen kowagaluk elalin mende kagarigogon etnogo ebe kagakonem, ta nen ilenggen kalok didisike nogo. Dek o,” (Yes. 53:1)

yiluk yisike mende kolal mbalek werek eti ebeat asuwagaluk, esigit diluk kagako laguka o. 39At Allah nen esigit diluk kagarinakike eti paga, it esigit diluk eberogonat yiluk didigidek kagako laguka, yiluk Yesaya nen omanggi men yisike.

40“At Allah nen, it inilenggen nen dikogo kalok, inakla ebet diluk inobabut kwalatluk, an napma wagonem, an nen it pano kagarinabunogo yiluk, an nenat it inilenggen mbugut diyigik, inakla mbugut diyigik, kagat diyigi o,” (Yes. 6:10)

yiluk yisikemo, Yesaya nen kolal mbalogo ʼbisikemo werek o. 41At Yesaya nen wene esigit diluk yisike eti, at Yesus yabunggane kagakonem ebe pogorasugun mende pasik ilenggen kasikesik nen, at abok yisike o. 42Wene esigit diluk yisikemo kolal mbalek werek mende, it ap nggokndek Yahudi mende amberek inebe dogalegat, inendainggen Yesus oba panggot disuka mende, it nen yigit diluk kagako laguka,

“It ap Farisi mende nen o sembayan yiligogoma nen nininggi nggorlo nggigilogo wula ʼbinanunogo, yiluk, ninendainggen Yesus oba panggot dogo,” yiluk akoni inil oba ʼbukakogo yisi laguka dek. 43It eti Allah nen pogorinabuwagaluk kagako laguka dek o. Akoni nen pogorinako dogu warlok nen kagako laguka o.

Yesus ane eti paga wene inoba ʼbigik, nggokik, kagarigogo wene

44It esigit diluk kagako laguka mende, at Yesus nen ane nggokogo men yogisasike,

“At ta nen endainggen an noba panggot digin kalok, an noba panggot digin ʼbuk. Dek o. At an laʼbani wagike mende etnogo oba endainggen panggot digin o. 45Nen, at ta nen, ilenggen an niyasi kalok, an laʼbani wagike mende etnogoat ilenggen kigin o. 46Nen, it akoni inendainggen an noba panggot dugun mende taʼbokogonat, o amum oba dogunogo yiluk, liyarinabigiluk an nebe liyarinabigogo mende agat oba yoma wusa wagagi o. 47An agat oba yoma wusa wagagi eti akoni wene inoba ʼbigiluk wusa wagagi ʼbuk. At te, inebe ndil inabigiluk wusa wagagi eti paga, at ta nen an nane asuk kol diluk nen, nane kologo kagakidek kalok, an nenat wene oba ʼbigin ʼbuk. Dek o. 48At eti an nebe woknabu aʼit, nen nane panorogo waganusak aʼit, eti paga, at eti wene oba ʼbigin mende werek o. Wene oba ʼbigin eti o ilugun kurli paga nggarelinabigin eti paga, an nen wene yokisiligogo eti pagaat wene oba asigin o, yiluk esigit diluk yokisiligogo. 49An nakla nen nggagalogo yokisiligogo ʼbuk. Dek o. An nen yokisawagaluk an nombae laʼbani wagike mende etnogo nenat nasuk warogo,

Yigit diluk yin, ndigit diluk yin, yiluk yoknoko nggorlegat yokisiligogo o. 50Nen, at nen wene,

Yigit diluk kagatno, ndigit diluk kagatno, yiluk ninasuk warogo yoknisiligogo eti nit niniluk mondok dogowagaluk yoknisiligogo, yiluk an nilu o. At Nombae nen wene yoknirigogo mendeat yokisaligogo o,” yiluk yogisasike.

Currently Selected:

Yohanes 12: DNA

Highlight

Copy