Lukas 13
13
Kinobabut kwalagidek kalok, watlatluk nuk asugun o,” yiluk yogisasike wene
1Etinem, it akoni amberek nen Yesus yogoko dogolik, men yogokuka,
“Akoni Galilea mende Allah anggo warogo kali kunggonem eranogoat, ap nggok Pilatus nen it inamep inom, Allah anggo wareka mende amep inom, omanggimo wulabogo inake o,” yiluk yogosi waguka. 2Esigit diluk yogosi wagukama, at Yesus nen, men yogisasike,
“Kit kinakla nen,
It ap o Galilea mende pelakngge taʼbokogonat, weyak ʼbugurlagat negen kagako nggorlek, it esigit diluk inake etiat weyak nggokogo kagako lagakama, inobabut paga inaka, yiluk ambaligogi a? 3Dek o. An nen kit yokisak. Kit weyak kagarigogi mende eti togot diyalok kinobabut kwalagidek kalok, it watlagaka kagat, kit esigit dilugat watlatluk nuk asugun o. 4Nen, kit kinakla nen,
O Yerusalem Siloam etoma o nggit mende uwanat mberlarik dagasukasikmo, miyalogo wusa wago dogolik, inebe 18 paga al debelogo sebelinakike etnogo, it akoni pelakngge taʼbokogonat o Yerusalem dogoligogi mende eti weyak ʼbugurlagat negen kagako nggorlek, it al debelogo sebelinakike etiat, weyak nggogat kagako lagukama inobabut paga sebelinakike ambegep a? 5Dek o. An nen kit yokisak. Kit weyak kagarigogi mende eti togot diyalok kinobabut kwalagidek kalok, it watlagaka kagat, kit esigit dilugat watlatluk nuk asugun o,” yiluk yogisasike.
O ara enggen yikidek mende oba lisogo yogisasike wene
6Esigit diluk yogisasikesik nen, wene omanggi oba lisogo men yogisasike,
“Ap omanggi eyabula o ara ai yago welagike. Ai yago werekma,
Enggen yikemo a? Dek a, yiluk ilenggen ʼbika lagike mende, ebe yikidekma. 7Yikidekma ʼbika lagikesik nen, anduwanengge eyabu anggorlem welagike mende omanggi men yogokike,
O ara yi enggen omanggi yikemo a? Dek a, yiluk 3 tahun oba wago lagi mende, enggen mondok yikidek. Eti paga, agat wirlikogo yago dogusak eti mukogo laʼbiyan o, yiluk yogokikemo, 8at anduwanengge mende etnogo nen, men yogokike,
Newe! An nen yorla yebelkik, mogot mbalkik, dogik nen, tahun yi paga mukidek togot duwok o. 9Esigit diluk togot dumo, tahun yabunggane mende paga enggen yiko kalok, pano. Nen, enggen yikidek kalok, kat nen,
Mukogo laʼbiyan o, yiluk yoknetnok nen o, yiluk yogokike,” yiluk Yesus nen yogisasike.
Yesus nen ininggi 7 paga Hari Sabat Allah ake werlegat dogolik, kwe omanggi u kagakike wene
10Esigit diluk yogisasikesik nen, ininggi 7 paga Hari Sabat Allah ake werlegat dogolik, at Yesus o it akoni Yahudi mende sembayan yiligogoma wagikesik nen unggisikesik wene yanggul isasinem, 11kwe omanggi kugi obabut weyak mende akla unggiluk dogolik, amberlak mondok sebek yiluk, motogo melasusak mondok erlok dek werek nggorlek, 18 tahun kagat lagike mende etoma welagike. 12Etoma werekma at Yesus nen, kwe etnogo ilenggen lakalok nen, ane pakasikemo wagikemo nen, men yogokike,
“Niru a! Kat koba u eti arat pano asigin. Kerle negen warek welagan etnogo, arat piyalasin o,” yiluk esigit diluk yogokikesik nen, 13inggi sebelko nggorlek eranogoat, kwe etnogo amberlak mot agikemo, melagikesik, Allah pogorakike. 14Esigit diluk kagakikemo, ap omanggi o sembayan yiligogoma etoma inewe nggok welagike mende eti nen, men yisike,
“Yesus eti nininggi 7 paga Hari Sabat Allah ake werlegat werek nggorlek, kwe eti u pano kagake eti nenaluk kagake,” yiluk akla agaga nen akoni dogalegat yomenogo men yogisasike,
“Yi kagakik, ndi kagakik, kagako dogusak eti ininggi 6 oba eti pagaat kagako dogusak o. Kininggi eti pagaat u kinoba mende kagat kinabuwagaluk wago dogono. Mende, Allah ake werlegat dogolik wisusak dek o,” yiluk esigit diluk yogisasikemo, 15at ninewe Endaganggok nen, ap etnogo men yogokike,
“Kit kinowado pagaat pano salek dogolik, kinendainggen mbere mende yi! Kit kinebe taʼbokogonat nininggi 7 paga Hari Sabat Allah ake werlegat dogolik mende, kinanggo sapi a, keledai a, ai palekma nen, su kuwalogo kerle piyalogo wula ʼbiyalok nen, i nowagaluk wogisek liligogi dek nogo? Wogisek liligogiat o. 16Eti kak, kwe Abraham nen endago mende yi Iblis nen kerle warogo pago werek nggorlek, 18 tahun kagat laga mende yi nininggi 7 paga Hari Sabat Allah ake werlegat dogolik kerle piyalogo ʼbusak dek nogo? Piyalogo ʼbusagat o,” yiluk wene esigit diluk yogokikemo, 17it pelakngge Yesus inaʼit welaguka mende yomenogo taʼbokogonat inenggarli aguka. Mende, it akoni amberek inebe dogalegat yomenogo obogat nen, at Yesus kagako lagike eti taʼbokogonat pasik, inakla arlenggen mondok kasi laguka.
Win ai oba lisogo yogisasike wene
(Matius 13:31-32; Markus 4:30-32)
18Esigit diluk inakla arlenggen kasukama, at Yesus nen, men yogisasike,
“Allah nen apma ʼbiyaligogo eti nena mende negen. An nen nena mende oba lisogo yokisak,” yiluk yogisasikesik nen, omanggi men yogisasike,
19“Allah nen apma ʼbiyaligogo eti ebe win ai negen o. Ap omanggi nen win ai omanggi waganogo wen waganekma pilogo laʼbisikemo, anggu dukisikesik nen, erlo o nggogat kagat lagikemo, inggiloʼbak obangge sewe putluk liligogi mende nen inai pali waguka eti kagat o,” yiluk yogisasike.
Enggen roti pirigogo mende oba lisogo yogisasike wene
(Matius 13:33)
20Esigit diluk yogisasikesik nen, yabunggane omanggi men yogisasike,
“Allah apma ʼbiyaligogo eti ebe, nena mende oba lisogo yokisak. 21Eti, enggen roti akla wusaʼbisinem pirigogo eti kak o. Kwe omanggi nen gandum enggen sagalek tepung wul kak etnogo mende 40 kilo walkalok waganggikesik, enggen roti pisuwagaluk akla wusabigogi mende eti akla wusa ʼbiluk abel dagalogo kagakikemo, ebe mondok pikike eti kagat o,” yiluk yogisasike.
“Kolagambe ʼbugurlagat mende paga unggubagik nen kinobatnerogo kagako dogoni,” yiluk yogisasike wene
(Matius 7:13-14, 21-23)
22Esigit diluk yogisasikesik nen, yabunggane at Yesus o Yerusalem wusasi dogolik, o unggul nggokma unggigik, ʼbugurlagatma unggigik, wene yanggul isalik wusasike. 23Esigit diluk yanggul isalik wusasinem, ap omanggi nen, men yogokike,
“Newe! Allah nen ndilinabigin eti inebe dogalegat a? Mbererlagat a,” yiluk yogokikemo at Yesus nen it akoni etoma welaguka mende yomenogo men yogisasike,
24“It akoni dogalegat, kolagambe ʼbugurlagatma ungguwogoluk walkagun mendeat, erlok dek asigin eti paga, kit kolagambe ʼbugurlagat eti paga unggubagik nen, kinobatnerogo kagako dogoni, yiluk yokisiligogo. 25Nen, o etoma ap ago indewerek mende eti melatluk, su ndetnokogo lako dogumo, kit sikman mendek dogolik, su mbumbu kasi dogolik,
Ninewe! Su kuwal niyan, yiluk yogosugun mende, at nen,
Kit kinebe an nonggodek o. Nggoma nen wagap, yiluk yokisasinem, 26kit nen yogoko dogolik,
Ninago unggul dombok noko dogolik, kimbiri ninom iyago ninggik, i ninggik, wene yanggul nisigik, kagako lagagin mende etnogo, yiluk yogosugun mende, 27at nen,
Kit o nggoma nen wagap. Kinebe an nonggodek o. Kit weyak kagako lagap mende noba unggi wagup o. Kit ya nenat mbiyokogonat lani o, yiluk yokisagin werek o. 28Esigit diluk yokisamo, kit sikmangge dogolik, ap Abraham inom, Yakub inom, Ishak inom, ap pelakngge Allah wene yanggul isasi laguka mende yomenogo inom, Allah apma panoma etoma werekma, kinilenggen nggolagiyagun o. Nen, kirat, su larogo wula ʼbinagumo sikmangge etoma dogolik, kinaik nggirlim makik, di ako de ako kagako mondok dogogun o. 29Nen, it akoni o timur inom, o barat inom, o utara inom, o selatan inom, Allah apma ʼbiyaligogoma etoma iyago nuwogoluk nandorli wisugun o. 30Mende, lakani! It akoni o yogondak inendaga werek mende eti yabunggane inendaga dek asigin o. Nen, it amberek yogondak inendaga dek werek mende eti yabunggane inendaga werek asigin o,” yiluk yogisasike.
At Yesus nen akoni o Yerusalem mende inaʼbuwa kasike wene
(Matius 23:37-39)
31Wene esigit diluk awan yogisasi nggorlek, it ap Farisi mende amberek Yesus oba wagukasik nen, men yogokuka,
“Ap Herodes nen kasigiluk kabok mbaligogo eti o yoma dogusak dek. Lo o werlekma lan o,” yiluk yogokukama 32at Yesus nen, men yogisasike,
“Ap obabut yengge kelo yengge obabut negen eti wene yi ibat yogosi lani o. An nen, o yogondak inom, kubuluk inom, kugi inobabut weyak mende akoni inakla unggiluk werekma mukogo wula ʼbiyigik, u warek mende kalok, pano kagarinakik, kagako dogoluk nen, agangge kalok, an yabu kagasigiluk wagagi mende ilugun arat ndirlipogonat kagasigin o. 33Esigit diluk kagasigin mende, ap Allah wene yogisiligogi mende eti werlekma inasusak dek o. Yerusalem etomaat inasusak eti paga, an yogondak inom, kubuluk inom, agangge inom, etoma lago dogusak ndak-ndagat kigi o.
34“Iya! Kit akoni o Yerusalem mende yi kinaʼbuwa o! Kit nen ap Allah wene yogisiligogi mende inebe inakik, ap Allah nen inayonggo ʼbiluk kinoba laʼbiya wirigogo mende nggit oba ndakmuk-pamukogo inakik, kagarigogi eti kinaʼbuwa o! Sewe ayam inagoya nen eyagi aʼbika akla nandorlogo ʼbiyaligogo eti kak, an kibitngge-yogonggeat kit o yoma dogoligogi mende taʼbokogonat esigit dilugat nandorlogo ʼbinagigiluk nakla ambaligogo mende, kit nen,
Ninaʼit, yiligogi eti kinaʼbuwa o! 35Eti paga, Allah nen kinebe togot dinagumo, kinago palek eti o wumat kagat lasigin o. Kurli yogondak nen, kit nen, an nebe kinilenggen niyigidek dogoluk nen, kit nen yabunggane,
Ninombae Endaganggok Allah nen laʼbagi wagama wagan yi, at nenat panot kabuwak o, (Mzm. 118:26)
yiluk yoknisugun eti kurli kinilenggen niyagun o,” yiluk yogisasike.
Currently Selected:
Lukas 13: DNA
Highlight
Share
Copy
Want to have your highlights saved across all your devices? Sign up or sign in
Lukas 13
13
Kinobabut kwalagidek kalok, watlatluk nuk asugun o,” yiluk yogisasike wene
1Etinem, it akoni amberek nen Yesus yogoko dogolik, men yogokuka,
“Akoni Galilea mende Allah anggo warogo kali kunggonem eranogoat, ap nggok Pilatus nen it inamep inom, Allah anggo wareka mende amep inom, omanggimo wulabogo inake o,” yiluk yogosi waguka. 2Esigit diluk yogosi wagukama, at Yesus nen, men yogisasike,
“Kit kinakla nen,
It ap o Galilea mende pelakngge taʼbokogonat, weyak ʼbugurlagat negen kagako nggorlek, it esigit diluk inake etiat weyak nggokogo kagako lagakama, inobabut paga inaka, yiluk ambaligogi a? 3Dek o. An nen kit yokisak. Kit weyak kagarigogi mende eti togot diyalok kinobabut kwalagidek kalok, it watlagaka kagat, kit esigit dilugat watlatluk nuk asugun o. 4Nen, kit kinakla nen,
O Yerusalem Siloam etoma o nggit mende uwanat mberlarik dagasukasikmo, miyalogo wusa wago dogolik, inebe 18 paga al debelogo sebelinakike etnogo, it akoni pelakngge taʼbokogonat o Yerusalem dogoligogi mende eti weyak ʼbugurlagat negen kagako nggorlek, it al debelogo sebelinakike etiat, weyak nggogat kagako lagukama inobabut paga sebelinakike ambegep a? 5Dek o. An nen kit yokisak. Kit weyak kagarigogi mende eti togot diyalok kinobabut kwalagidek kalok, it watlagaka kagat, kit esigit dilugat watlatluk nuk asugun o,” yiluk yogisasike.
O ara enggen yikidek mende oba lisogo yogisasike wene
6Esigit diluk yogisasikesik nen, wene omanggi oba lisogo men yogisasike,
“Ap omanggi eyabula o ara ai yago welagike. Ai yago werekma,
Enggen yikemo a? Dek a, yiluk ilenggen ʼbika lagike mende, ebe yikidekma. 7Yikidekma ʼbika lagikesik nen, anduwanengge eyabu anggorlem welagike mende omanggi men yogokike,
O ara yi enggen omanggi yikemo a? Dek a, yiluk 3 tahun oba wago lagi mende, enggen mondok yikidek. Eti paga, agat wirlikogo yago dogusak eti mukogo laʼbiyan o, yiluk yogokikemo, 8at anduwanengge mende etnogo nen, men yogokike,
Newe! An nen yorla yebelkik, mogot mbalkik, dogik nen, tahun yi paga mukidek togot duwok o. 9Esigit diluk togot dumo, tahun yabunggane mende paga enggen yiko kalok, pano. Nen, enggen yikidek kalok, kat nen,
Mukogo laʼbiyan o, yiluk yoknetnok nen o, yiluk yogokike,” yiluk Yesus nen yogisasike.
Yesus nen ininggi 7 paga Hari Sabat Allah ake werlegat dogolik, kwe omanggi u kagakike wene
10Esigit diluk yogisasikesik nen, ininggi 7 paga Hari Sabat Allah ake werlegat dogolik, at Yesus o it akoni Yahudi mende sembayan yiligogoma wagikesik nen unggisikesik wene yanggul isasinem, 11kwe omanggi kugi obabut weyak mende akla unggiluk dogolik, amberlak mondok sebek yiluk, motogo melasusak mondok erlok dek werek nggorlek, 18 tahun kagat lagike mende etoma welagike. 12Etoma werekma at Yesus nen, kwe etnogo ilenggen lakalok nen, ane pakasikemo wagikemo nen, men yogokike,
“Niru a! Kat koba u eti arat pano asigin. Kerle negen warek welagan etnogo, arat piyalasin o,” yiluk esigit diluk yogokikesik nen, 13inggi sebelko nggorlek eranogoat, kwe etnogo amberlak mot agikemo, melagikesik, Allah pogorakike. 14Esigit diluk kagakikemo, ap omanggi o sembayan yiligogoma etoma inewe nggok welagike mende eti nen, men yisike,
“Yesus eti nininggi 7 paga Hari Sabat Allah ake werlegat werek nggorlek, kwe eti u pano kagake eti nenaluk kagake,” yiluk akla agaga nen akoni dogalegat yomenogo men yogisasike,
“Yi kagakik, ndi kagakik, kagako dogusak eti ininggi 6 oba eti pagaat kagako dogusak o. Kininggi eti pagaat u kinoba mende kagat kinabuwagaluk wago dogono. Mende, Allah ake werlegat dogolik wisusak dek o,” yiluk esigit diluk yogisasikemo, 15at ninewe Endaganggok nen, ap etnogo men yogokike,
“Kit kinowado pagaat pano salek dogolik, kinendainggen mbere mende yi! Kit kinebe taʼbokogonat nininggi 7 paga Hari Sabat Allah ake werlegat dogolik mende, kinanggo sapi a, keledai a, ai palekma nen, su kuwalogo kerle piyalogo wula ʼbiyalok nen, i nowagaluk wogisek liligogi dek nogo? Wogisek liligogiat o. 16Eti kak, kwe Abraham nen endago mende yi Iblis nen kerle warogo pago werek nggorlek, 18 tahun kagat laga mende yi nininggi 7 paga Hari Sabat Allah ake werlegat dogolik kerle piyalogo ʼbusak dek nogo? Piyalogo ʼbusagat o,” yiluk wene esigit diluk yogokikemo, 17it pelakngge Yesus inaʼit welaguka mende yomenogo taʼbokogonat inenggarli aguka. Mende, it akoni amberek inebe dogalegat yomenogo obogat nen, at Yesus kagako lagike eti taʼbokogonat pasik, inakla arlenggen mondok kasi laguka.
Win ai oba lisogo yogisasike wene
(Matius 13:31-32; Markus 4:30-32)
18Esigit diluk inakla arlenggen kasukama, at Yesus nen, men yogisasike,
“Allah nen apma ʼbiyaligogo eti nena mende negen. An nen nena mende oba lisogo yokisak,” yiluk yogisasikesik nen, omanggi men yogisasike,
19“Allah nen apma ʼbiyaligogo eti ebe win ai negen o. Ap omanggi nen win ai omanggi waganogo wen waganekma pilogo laʼbisikemo, anggu dukisikesik nen, erlo o nggogat kagat lagikemo, inggiloʼbak obangge sewe putluk liligogi mende nen inai pali waguka eti kagat o,” yiluk yogisasike.
Enggen roti pirigogo mende oba lisogo yogisasike wene
(Matius 13:33)
20Esigit diluk yogisasikesik nen, yabunggane omanggi men yogisasike,
“Allah apma ʼbiyaligogo eti ebe, nena mende oba lisogo yokisak. 21Eti, enggen roti akla wusaʼbisinem pirigogo eti kak o. Kwe omanggi nen gandum enggen sagalek tepung wul kak etnogo mende 40 kilo walkalok waganggikesik, enggen roti pisuwagaluk akla wusabigogi mende eti akla wusa ʼbiluk abel dagalogo kagakikemo, ebe mondok pikike eti kagat o,” yiluk yogisasike.
“Kolagambe ʼbugurlagat mende paga unggubagik nen kinobatnerogo kagako dogoni,” yiluk yogisasike wene
(Matius 7:13-14, 21-23)
22Esigit diluk yogisasikesik nen, yabunggane at Yesus o Yerusalem wusasi dogolik, o unggul nggokma unggigik, ʼbugurlagatma unggigik, wene yanggul isalik wusasike. 23Esigit diluk yanggul isalik wusasinem, ap omanggi nen, men yogokike,
“Newe! Allah nen ndilinabigin eti inebe dogalegat a? Mbererlagat a,” yiluk yogokikemo at Yesus nen it akoni etoma welaguka mende yomenogo men yogisasike,
24“It akoni dogalegat, kolagambe ʼbugurlagatma ungguwogoluk walkagun mendeat, erlok dek asigin eti paga, kit kolagambe ʼbugurlagat eti paga unggubagik nen, kinobatnerogo kagako dogoni, yiluk yokisiligogo. 25Nen, o etoma ap ago indewerek mende eti melatluk, su ndetnokogo lako dogumo, kit sikman mendek dogolik, su mbumbu kasi dogolik,
Ninewe! Su kuwal niyan, yiluk yogosugun mende, at nen,
Kit kinebe an nonggodek o. Nggoma nen wagap, yiluk yokisasinem, 26kit nen yogoko dogolik,
Ninago unggul dombok noko dogolik, kimbiri ninom iyago ninggik, i ninggik, wene yanggul nisigik, kagako lagagin mende etnogo, yiluk yogosugun mende, 27at nen,
Kit o nggoma nen wagap. Kinebe an nonggodek o. Kit weyak kagako lagap mende noba unggi wagup o. Kit ya nenat mbiyokogonat lani o, yiluk yokisagin werek o. 28Esigit diluk yokisamo, kit sikmangge dogolik, ap Abraham inom, Yakub inom, Ishak inom, ap pelakngge Allah wene yanggul isasi laguka mende yomenogo inom, Allah apma panoma etoma werekma, kinilenggen nggolagiyagun o. Nen, kirat, su larogo wula ʼbinagumo sikmangge etoma dogolik, kinaik nggirlim makik, di ako de ako kagako mondok dogogun o. 29Nen, it akoni o timur inom, o barat inom, o utara inom, o selatan inom, Allah apma ʼbiyaligogoma etoma iyago nuwogoluk nandorli wisugun o. 30Mende, lakani! It akoni o yogondak inendaga werek mende eti yabunggane inendaga dek asigin o. Nen, it amberek yogondak inendaga dek werek mende eti yabunggane inendaga werek asigin o,” yiluk yogisasike.
At Yesus nen akoni o Yerusalem mende inaʼbuwa kasike wene
(Matius 23:37-39)
31Wene esigit diluk awan yogisasi nggorlek, it ap Farisi mende amberek Yesus oba wagukasik nen, men yogokuka,
“Ap Herodes nen kasigiluk kabok mbaligogo eti o yoma dogusak dek. Lo o werlekma lan o,” yiluk yogokukama 32at Yesus nen, men yogisasike,
“Ap obabut yengge kelo yengge obabut negen eti wene yi ibat yogosi lani o. An nen, o yogondak inom, kubuluk inom, kugi inobabut weyak mende akoni inakla unggiluk werekma mukogo wula ʼbiyigik, u warek mende kalok, pano kagarinakik, kagako dogoluk nen, agangge kalok, an yabu kagasigiluk wagagi mende ilugun arat ndirlipogonat kagasigin o. 33Esigit diluk kagasigin mende, ap Allah wene yogisiligogi mende eti werlekma inasusak dek o. Yerusalem etomaat inasusak eti paga, an yogondak inom, kubuluk inom, agangge inom, etoma lago dogusak ndak-ndagat kigi o.
34“Iya! Kit akoni o Yerusalem mende yi kinaʼbuwa o! Kit nen ap Allah wene yogisiligogi mende inebe inakik, ap Allah nen inayonggo ʼbiluk kinoba laʼbiya wirigogo mende nggit oba ndakmuk-pamukogo inakik, kagarigogi eti kinaʼbuwa o! Sewe ayam inagoya nen eyagi aʼbika akla nandorlogo ʼbiyaligogo eti kak, an kibitngge-yogonggeat kit o yoma dogoligogi mende taʼbokogonat esigit dilugat nandorlogo ʼbinagigiluk nakla ambaligogo mende, kit nen,
Ninaʼit, yiligogi eti kinaʼbuwa o! 35Eti paga, Allah nen kinebe togot dinagumo, kinago palek eti o wumat kagat lasigin o. Kurli yogondak nen, kit nen, an nebe kinilenggen niyigidek dogoluk nen, kit nen yabunggane,
Ninombae Endaganggok Allah nen laʼbagi wagama wagan yi, at nenat panot kabuwak o, (Mzm. 118:26)
yiluk yoknisugun eti kurli kinilenggen niyagun o,” yiluk yogisasike.
Currently Selected:
:
Highlight
Share
Copy
Want to have your highlights saved across all your devices? Sign up or sign in