Lukas 20
20
“Yesus, ap ta nen indewerek dogowagaluk mendagekemo kagarigogon,” yiluk endema wagangguka wene
(Matius 21:23-27; Markus 11:27-33)
1Yabunggane ininggi omanggi paga, at Yesus Allah ago palekma unggisikesik dogolik, akoni wene pano wene yanggul isigik, inasuk wakik, kagakonem, it ap Allah indewerek ineugi nggokndek inom, it ap Allah wene kolal mbalek indewerek mende inom, ap inarluwendek yomenogo inom, at Yesus oba waguka. 2Wagukasik nen, men yogokuka,
“Kat yi kagakik, ndi kagakik, kagarigogon eti nena mende inde agandik kagarigogon. Nen, ap ta nen indewerek dogowagaluk mendagekemo werek. Yoknisan nda,” yiluk yogokukama, 3at Yesus nen,
“An nen, kit nen yoknisubagik nen yiluk, kinok omanggiat wokiyagat o. 4At Yohanes nen ima wusa ʼbiyasi lagike etnogo, Allah mbogot oba mende nen yogokikemo wusa ʼbiyasi lagike a? At te, akoni agat oba mende nen yogokukama wusa ʼbiyasi lagike a. Yoknitni nda,” yiluk yogisasikemo, 5it-it yisi dogolik,
“Allah mbogot oba mende nen yogokikemo wusa ʼbiyasi lagike, yiluk yogosumo, at nen,
Eti paga, kit nen Yohanes ane eberogonat yiluk didigidek welagigip eti nenaluk, yiluk yoknisaunogo. 6Nen,
Akoni nen yanggul ikukama wusa ĘĽbiyasi lagike, yiluk yumo, Iya! It akoni taĘĽbokogonat nen,
Yohanes eti Allah weneat yoknisasi lagike, yiluk ambaligogoma eti paga, ninebe nggit oba mondok ninasunogo,” yiluk yisukasik nen, 7yabunggane Yesus men yogokuka,
“Wene eti erlo nit ninonggodek o,” yiluk yogokukama, 8at Yesus nen, men yogisasike,
“Eti paga, an nen,
Eti mende inde agarik kagarigogo yiluk kit yokisagin degat o,” yiluk yogisasike.
“Ap amberek anggur ai yagoma anggorlem welaguka,” yiluk oba lisogo yogisasike wene
(Matius 21:33-46; Markus 12:1-12)
9At Yesus nen esigit diluk yogisasikesik nen, yabunggane akoni yomenogo wene omanggi oba lisogo men yogisasike,
“Ap omanggi wen waganekma anggur ai yakike. Yaʼbiluk nen it amberek elalma pasik it inaen negen anggorlem dogowagaluk ʼbiyalok nen, o werlekma lalok inggi omanggi inomat dogoluk nen wisigiluk lagike. 10O etoma lagikesik werekma, anggur enggen mbalusak oba arat agikemo, ap eyabu indewerek mende etnogo nen it ap yomenogo nen enggen amberek mbalogo wogosuwagaluk, anduwanengge mende omanggi ap yomenogo inoba laʼbi wagike. Laʼbi wagikemo, it ap wen anggorlem welaguka mende yomenogo inoba wagike mende, ebe ndugi wat diluk nen, enggen mbalikidek werlegat iyogoba laʼbisuka. 11Laʼbisukama lagikemo, yabunggane anduwanengge mende omanggi laʼbi wagikeat. Laʼbi wagikemo, it nen enggarli warogo ndugi wat diluk nen, enggen mbalikidek werlegat iyogoba laʼbisukaat. 12Inggi mbere paga laʼbiya wagike mende esigit diluk kagakuka eti paga, yabunggane anduwanengge mende omanggi laʼbi wagikeat. Mende, at yabunggane laʼbi wagike mende eti wagikemo it nen esigit dilugat ndugi mep wulukogo warogo nen, anggur yagoma nen mbo wula ʼbisuka. 13Esigit diluk mondok kagarinakukama nen, at nggok wen indewerek mende etnogo akla nen,
Yabunggane ninggit diluk kagasik? An nenggaerek naĘĽbut nendainggen kunik mende yiat inoba laĘĽbumo, ebe alon palogo keyagi warogo waganugun kigi, yiluk akla ambasikesik laĘĽbi wagike. 14LaĘĽbi wagikemo wagonem, it ap wen anggorlem welaguka mende yomenogo inilenggen lakasukasik it-it yisi dogolik, men yisuka,
Ombae obalikmo wen indewerek asigin mende etnogo ebe waga eli. Wen yi nirat inde asuwok nen, ebe wasuwok o, yiluk, 15aʼbut etnogo anggur ai yagoma nen mbo leget aka wula ʼbiluk nen, ebe mondok wakuka. It esigit diluk kagakuka eti paga, at nggok wen indewerek etnogo nen, it ap eti ninggit diluk kagarinabigin ambegep. 16At ebe witluk nen, it inebe mondogat warogo ʼbiyalok inobalikmo anggur ai yagoma etnogo anggorlem dogowagaluk, ap ninat mende wogisaginat o,” yiluk yogisasikemo, it yomenogo nen,
“Iya! Esigit diluk kagasusak dek o!” yiluk yogokukama, 17at Yesus nen it yomenogo ilenggen ʼbirisek dogolik, men yogisasike,
“It ap amberek nen kolal mbalogo ʼbisi dogolik,
It ap tukang o nggit mende paligogi mende nen, o ebe palko dogolik,
Nggit yi weyak, yiluk togot diyasuka mende eti o kerlagaat kagat lagama o, (Mzm. 118:22)
yiluk Allah wene kolal mbalogo ʼbisuka eti nena pasik yisuka ambegep? 18Ap ta nen nggit eti paga nggat wusa wago kalok ebe mondok olin ndamelogo ʼbigin o. Nen, nggit eti ta oba sebeli wago kalok, ebe mondok al debelogo wasigin o,” yiluk yogisasike.
“Uang pemerintah inake nggino yisinem wogisausak a? Dek a,” yiluk kinok Yesus oba wagangguka wene
(Matius 22:15-22; Markus 12:13-17)
19At Yesus nen wene esigit diluk yogisasikemo nen, it ap Allah wene kolal mbalek indewerek mende inom, it ap Allah indewerek ineugi nggokndek yomenogo inom, inasuk kolkukasik nen,
“Wene eti nit pasik oba lisogo yokniseke kigi,” yiluk didisukasik etinem, at Yesus ebe pakawogoluk kagakuka mende, akoni yomenogo inayuk nen puk aguka. 20Puk agukasik nen nanonggal, at nen ane yigin oba wene ʼbiluk, at gubernur akoni pagisek dogolik wene inoba ʼbigik, nggokik, kagarigogo indewerek mende nen wene oba ʼbuwagaluk, ap amberek inobabut pano salek Yesus inilenggen waganggo dogowagaluk onggo wogisalok laʼbiya waguka. 21Laʼbiya wagukama Yesus oba wagukasik nen, kinok waganggo dogolik, men yogokuka,
“Ninewe! Kat wene yigik, yanggul isigik, kagarigogon eti eberogonat dombok yisi dogolik, akoni amberek kelokoma ʼbiyigik, amberek komborlikngge ʼbiyigik, kagarigogon dek o. Kane motogo yisi dogolik, Allah akla nen,
Akoni nen yigit diluk ndigit diluk kagako dogowak, yiluk akla ambaligogo mende eberogonat yanggul nisaligogon eti nit ninilu o. 22Eti paga, nit akoni Yahudi mende kagarigogi ndak-ndagat, uang pemerintah inake endaganggok Kaisar wogosusak erlok a? Erlok dek a,” yiluk yogokukama, 23at Yesus nen,
“It ap yi an nuket danuwogoluk inane ʼbindokogo yokneka,” yiluk, enggagat didiyalok nen, men yogisasike,
24“Uang perak yabu ininggi omanggi pasik kagakonem ininggi onggo wogisiligogi etnogo mende omanggi sit niyani,” yiluk yogisasikemo sit kasukama nen,
“Yi ta ebe elokonggen kagarek inom, endaga kolal mbalek inom, werek kegep,” yiluk yogisasikemo, it nen,
“Eti Kaisar kagarek werek o,” yiluk yogokuka. 25Esigit diluk yogokukama at Yesus nen, men yogisasike,
“Kaisar mende kalok Kaisar at wogokik, nen Allah mende kalok, Allah at wogokik kagako dogono,” yiluk yogisasike. 26Esigit diluk yogisasikemo, akoni inil oba ane yisike paga, inilenggen waganogo wene oba ʼbusak dek agikemo, it nen,
“Wene onggo motogonat yeke eti ninayuk a!” yiluk, inane dek puk aguka.
Ap Saduki mende nen akoni watlatluk nen iniluk asugun pasik, Yesus oba kinok wagangguka wene
(Matius 22:23-33; Markus 12:18-27)
27Esigit diluk werek nggorlek, yabunggane it ap Saduki mende nen,
“Akoni watlatluk nen, yabunggane iniluk asugun mondok dek,” yiluk yiligogi mende pelakngge Yesus oba wagukasik oba kinok waganggo dogolik, men yogokuka,
28“Ninewe! At Musa nen men yanggul nisasike,
Ap omanggi age korlalok aĘĽburi endaginakidekma, ebe watlago kalok, obalikmo aĘĽbut omanggi endasuwagaluk, kwe soge eti ap eti agorat waganusak o, (Ul. 25:5-6)
yiluk yoknisasikesik kolal mbalogo ʼbisikemo werek o. 29Esigit diluk yisike mende werekma, ap inebe 7 paga inombae omanggiat nen endago welaguka. Dogolik, inewe mangguya mende eti age waganggikesik, aʼburi endaginakidekma watlagike. 30Watlagikemo, agot omborlik mende nen, kwe soge eti waganggikesik watlagikeat. 31Watlagikemo, yabunggane inagot inomborlik mende eti nen waganggike mende, esigit dilugat aʼburi endaginakidek watlagikeat. Esigit dilugat, it ap inebe 7 paga eti nen, kwe omanggiat etiat waganggik, inaʼburi endaginakidekma watlarik arlek waguka. 32Nen, yabunggane, ebe yabunggane kwe eti ebe watlagikeat. 33Eti paga, it ap inebe 7 paga eti kwe omanggiat etiat waganik wagukasikmo, yabunggane Allah nen akoni warek mende inilugurinabigin etinem, kwe eti ta kak age asigin ambegen,” yiluk kinok wagangguka. 34Esigit diluk kinok waganggukama, at Yesus nen, men yogisasike,
“O yogondak ya agat oba yoma dogolik, ap nen kumi waganggik, it amberek yigisigik, kagarigogi mende, 35it akoni watlatlukmo nen, Allah nen akoni at inom pano mende inilugurinabiluk oba nen, o yabunggane dogogun oba eti erlok dogowak nen yiluk, iniluk mendiyagin mende etoma dogolik, kumi waganggik, it amberek yigisigik, kagako dogogun mondok dek o. 36Akoni watlatlukmo Allah nen inilugurinabigin eti paga, inebe Allah aʼburiat, it malaikat mbogot oba yonggo liligogo mende inom ndak-ndak dogolik, yabunggane watlago dogogun mondok dek o. 37It akoni watlatlukmo Allah nen inilugurinabigogo eti pasik, at Musa nen, o ʼberoat erloma Allah ebe ilenggen kasike wene eti paga men yisike,
Abraham inom, Ishak inom, Yakub inom, inombae Allah at, (Kel. 3:6)
yiluk yisikesik kolal mbalogo ʼbisike o. 38At Allah ilka paga it inebe taʼbokogonat iniluk werek eti paga, Allah ebe, akoni warek mende inombae ʼbuk. Iniluk mende inombae o,” yiluk yogisasike. 39Esigit diluk yogisasikemo, it ap Allah wene kolal mbalek indewerek mende pelakngge nen men yogokuka,
“Ninewe. Kat kane onggo pano yogisegen o,” yiluk yogokukama, 40it amberek nen, kinok waganu inayuk agikemo, kinok waganggidek togot disuka.
“At Kristus eti ebe ta ambegep,” yiluk yogisasike wene
(Matius 22:41-46; Markus 12:35-37)
41Esigit diluk togot disuka mendeat, at Yesus nen it men yogisasike,
“Kristus Allah nen ayonggo ʼbiluk laʼbi wisigin yisike etnogo, ebe Daud nen endago mende o, yiluk yiligogi eti ninggit diluk kalok yiligogi ambegep? 42-43At Daud enggaerek nen Mazmur wene paga men yisike,
Allah Endaganggok nen an newe Endaganggok yogoko dogolik,
Akoni kat kasili mende yomenogo kiyok nen al debelogo ĘĽbiyanok nen, an nen awan koba ĘĽbiya wagidek werek nggorlek, an neragalilu ninggi ebengge korek dogolik kebe nggok dogono, (Mzm. 110:1)
yiluk kolal mbalogo ĘĽbisike o, 44at Daud nen Kristus ebe pasik,
Newe Endaganggok, yiluk yisike mendeat, it akoni nen,
Kristus eti Daud nen endago mende, yiluk ninggit diluk nen yusak ambegep. Esigit diluk yusak erlok dek o,” yiluk yogisasike.
“It ap Allah wene kolal mbalek indewerek mende inobabut eti nen nuket dinagunogo,” yiluk yogisasike wene
(Matius 23:1-36; Markus 12:38-40)
45At Yesus nen wene esigit diluk yogisasinem, akoni taĘĽbokogonat inasuk kolek werek nggorlek, it at agoromi ane waganggo laguka mende yomenogo men yogisasike,
46“It ap Allah wene kolal mbalek indewerek mende inobabut kagarigogi eti nen nuket dinagunogo yiluk, kinobabut kwalogo dogono o. It eti inobabut, iniyom uwandek-mbuwandek mende yikalok pasar onggo waganigogoma etoma akoni nen inane agugurogo keyagi warinabuwak nen yiluk lagik, o akoni Yahudi mende sembayan yiligogoma ap nggokndek korek larigogoma korek lasi unggigik, akoni pesta nggogat iyago nonggonem ap nggokndek korek larigogoma korek lagik, kagako doguat warlok dogoligogi o. 47Esigit diluk dogolik, kumi soge mende inago palek inom, inamende inom, sebelasi dogoligat, akoni nen, inasuk kol diluk,
It pano, inakla ambawagaluk sembayan uwan-awan likalok yiligogi esigit diluk kagakidek dogolepma, Allah nen wene anggin dek negen mende arlek inoba ʼbiluk dogolep. Mende, esigit diluk kagarigogi eti paga, wene anggin mende inoba ʼbiluk weyagarinabigin o,” yiluk yogisasike.
Currently Selected:
Lukas 20: DNA
Highlight
Share
Copy
Want to have your highlights saved across all your devices? Sign up or sign in
