Lukas 22
22
Yesus ebe wasuwogoluk abok mbalkuka wene
(Matius 26:1-5; Markus 14:1-2; Yohanes 11:45-53)
1It akoni Yahudi mende pesta endaga Paskah nonggo dogolik, enggen roti pisuwagaluk akla wusabigogi mende wusa ĘĽbigidek mende werago niligogi paga korogat asi wagikemo dogolik, 2it ap Allah indewerek mende ineugi nggokndek inom, it Allah wene kolal mbalek indewerek mende inom, akoni taĘĽbokogonat inayuk nen,
Yesus wene ninggit diluk oba ĘĽbiluk wasuwok, yiluk abok mbalko laguka.
Yudas nen Yesus wasuwagaluk yonggo lagike wene
(Matius 26:14-16; Markus 14:10-11)
3Esigit diluk abok mbalko nggorlek, it Yesus agoromi inebe 12 paga yomenogo mende, omanggi endaga Yudas Iskariot etnogo akla Iblis unggisike. 4Unggisikemo nen, at Yudas, it ap Allah indewerek mende ineugi inom, Allah ago palek anggorlem welaguka mende inom, inoba lagikesik,
“Yesus eti wasubagik nen, kininggimo ninggit diluk ʼbigin,” yiluk inom abok mbalko laguka. 5Abok mbalko lagukasik, it ap yomenogo inakla arlenggen kasi dogolik,
“Onggo uang kurli eti paga wokisugun,” yiluk abok yogokuka. 6Abok yogokukama, at Yudas nen,
“E o,” yiluk yogisasikesik nen,
“Akoni inonggodek werek nggorlek, Yesus asokneat nanonggal pano werekma, ngginem ininggimo ʼbigin,” yiluk akla ambasi dogolik wene munini ebeko lagike.
Domba Paskah nuwogoluk ndugurogo ĘĽbi laguka wene
(Matius 26:17-25; Markus 14:12-21; Yohanes 13:21-30)
7Yudas esigit diluk kagako werekma, enggen roti pisuwagaluk akla wusa ĘĽbiligogo mende akla wusa ĘĽbigidek werago nonggo dogolik, pesta Paskah pasik domba warogo nausak arat asi wagike. 8Arat asi wagikemo, at Yesus nen Petrus Yohanes imbisak laĘĽbiyasi dogolik, men yogisasike,
“Nit pesta Paskah pasik domba ninom nuwok nen, lalok werago ndugurogo ʼbiluk dogono,” yiluk esigit diluk yogisasikemo, 9it nen,
“Nit nen yi mende ndi mende o nggila ndugurogo ʼbiluk dogowak nen yiluk yegen,” yiluk yisukama 10at Yesus nen,
“Kit o kota etoma unggi lalok, ap omanggi iyak agat mende kagarek paga i kenatluk wagonem kinom abuk asugun etnaga. Abuk atluk omborligat lano. Lagonem at aguma unggisi kalok 11ap ago indewerek mende eti oba kinok men yiluk waganino,
At ninewe wene yanggul nisiligogo mende etnogo nen men yeke,
An nagoromi nane waganigogi mende ninom pesta Paskah pasik domba warogo nowagaluk, o ngganggok mbalek nggi kak ʼbanggen, yiluk kinok wagani lani, yiluk laʼbinani wagama wago, yiluk esigit diluk yogokonem, 12at nen o konaimbo o kurli nggogat palekma werago nausak oba obalik mondok kagarekma yanggul kisagin etnaga, etomaat yi mende ndi mende ndugurogo ʼbiluk dogono,” yiluk nen laʼbiyasike. 13Laʼbiyasikemo, it imbisak laguka mende, at nen yisike kagat, esigit diluk werekma ʼbika lagukasik nen, pesta Paskah pasik domba wakukasik nen werago ndugurogo ʼbisuka.
Yesus agoromi inom kimbiri inom, enggen ambusu inom, ilugun oba nasuka wene
(Matius 26:26-30; Markus 14:22-26; 1Korintus 11:23-25)
14Nausak oba arat asi agikemo nen, at Yesus nen agoromi laĘĽbiyagaluk inayonggo ĘĽbisike mende amberek inom lagukasik, inom nuwogoluk korek laguka. 15Korek lagukasik, at nen men yogisasike,
“An yi aik ndi aik kasi nggorlek nasugun eti awan kagat nakidek werek nggorlek, domba Paskah pasik yogondak nugun yi, nagoromi ninom nalep o, yiluk, nakla warlok ambasi lagarik. 16Ninom yiat nalok yabunggane, at Allah nen at apma ʼbiyalok ebe mende nugun eti awan werek nggorlek, yi mende agake ninom ninggidek dogogin o, yiluk eberogonat yokisigi,” yiluk yogisasikesik, 17-18yabunggane iyak enggen ambusu kenago inggimo waganggikesik, Allah keyagi warogo, agoromi wogisasi dogolik, men yogisasike,
“Anggur enggen ambusu yi nalok an yabunggane agake ninggidek dogoluk nen, kurli, at Allah nen apma ʼbiyagin eti kurli, yabunggane nigin. Eti paga, yi waganogo kinenggaerek nen sumbusogo nasi dogobagik nen yiluk wokisigi o,” yiluk yogisasike. 19Esigit diluk yogisasikesik, yabunggane kimbiri roti mende inggimo waganggikesik nen, Allah keyagi warogo nen ebe nggusogo, agoromi sumburisasi dogolik, men yogisasike,
“Yi an nebeat o. [An nebe kit kinake nakonem watlasigin eti an noba eberek dogobagik nen, yigit diluk nasi dogono,” yiluk yogisasikemo, 20arat nasukama nen, iyak enggen ambusu kenago esigit dilugat wogisasi dogolik,
“Yi, an namebat o. Allah nen wene ngget mende warogo wokinabigin, yisike etnogo kit kinake namep wulabogo nasugun eti paga, ebeat asigin o,” yiluk sumbusogo wogisasikesik nen, men yogisasike,]
21“Nagoromi! Lakani! Ap omanggi kimbiri o mberlago paga nimbisak omanggimo niligogi mende nen, an nasuwagaluk yonggo ligin o. 22Yonggo lamo an abat endak lasi wagagi etnogo at Allah nen,
At wasuwak, yiluk akla ambasike ndak-ndagat nasugun mende, at an nasuwagaluk yonggo ligin mende etiat, aʼbuwa o. Weyak asigin o,” yiluk yogisasikemo, 23it-it men yisuka,
“Eti ta kak nen yonggo ligin agama yeke,” yiluk nen, kinok-kinok yilik laguka.
“Kat nggok a? Dek, an nggok ambigi,” yilik laguka wene
24Esigit diluk it-it kinok-kinok waganggo lagukasik nen, nggok ta, yiluk inane sagalko dogolik, men yisuka,
“Kendaganggok kat a? An ambigi,” yiluk, at omanggi nen yigik, at omanggi nen yigik, inane sagalkuka. 25Esigit diluk yisinem, at Yesus nen it men yogisasike,
“It akoni sikmangge mende eti ineugi inendaganggok nen inagoromi pagisek dogolik inane obatnerogonat,
Yi mende kagatno, ndi mende kagatno, yiluk yogisasinem, it inagoromi nen,
Ninewe eti pano paknisek werek, yigik, yiligogi eti kak, 26kit nen, esigit diluk kagasusak mondok dek o. Eti paga, kit mende omanggi nen,
An nendaganggok dogolep, akla ambasi kalok, at eti kinagorat asuwak o. Nen,
An nen pagisek dogolep, yiluk ambasi kalok, kinanduwanenggeat asuwak o. 27Kit kinakla nen ap ta kak nggok werek ambegep. At ap korek dogolik kimbiri niligogo mende eti a? At te, anduwanengge mende nen, at ewe nowagaluk wogosi wirigogo mende eti a. Dek o. Nggok eti, at korek dogolik kimbiri niligogo mende, etiat o. Esigit diluk mende, an kit ninom dogolik kinanduwanengge negen kagarigogo o. 28Weyak nggogat kagat nako nggorlegat, kit yiat, an togot danggidek ninom mondok werek eti paga, 29-30an nombae nen akoni an napma pagisek dogowagaluk mendanggike eti kak, kit nen akoni an napma ʼbiyaginmo etoma kimbiri ninggik, i ninggik, kagako dogolik, kinobalik o mberlago paga nggogat korek dogolik, akoni Israel mende inunggulowak endaga 12 paga yomenogo wene inoba ʼbigik, nggokik, kagasubagik nen, yiluk, kirat mendinagagi o,” yiluk yogisasike.
“Kat nen Yesus nonggodek, yiluk laʼbeligin o,” yiluk Petrus yogokike wene
(Matius 26:31-35; Markus 14:27-31; Yohanes 13:36-38)
31Yesus nen esigit diluk yogisasikesik nen, Petrus men yogokike,
“Simon! Simon! Kinasuk kolin! Gandum amumulengge pulogo togot diyiligogi eti kak, kit taʼbokogonat esigit diluk, at Iblis nen kinebe pul kinabigiluk Allah nggino yogokemo at nen erlok yiluk yogoke mendeat, 32kat kendainggen noba panggot diluk werek mende eti obatne dek asunogo yiluk, kat kebe kake an Allah ayonggo arat ʼbigima. Kobabut kwalagan kalok, kagarlagi yoma kat nen inendainggen ago wat diyasi dogono o,” yiluk yogokike. 33Esigit diluk yogokikemo, at Petrus nen, men yogokike,
“Newe o! O akoni ininggi kerle warogo ʼbiyiligogoma nggola ʼbagagik, kebe mondok kakik, kagat kako kalok, an nimbisagat ninasuwagaluk werek o,” yiluk yogokike mende, 34at Yesus nen,
“Petrus! Yogondak ayam ane awan yigidek werek nggorlek, kat nen,
Yesus eti nonggodek o, yiluk, kinggi kenagan oba laʼbeligin o,” yiluk yogokike.
“Mbirok inom, yi mende ndi mende inom, wolok lano,” yiluk yogisasike wene
35At Yesus nen esigit diluk yogokikesik nen, at Petrus agarlagi pelakngge inom dambukogo men yogisasike,
“An nen alep, kit kinauang dompet inom, kiniyomnggan inom, kinasepatu inom, wolok lagup o, yiluk laʼbinagagi etnogo paga, kit yi mende ndi mende dekma welagigip a?” yiluk yogisasikemo, it nen, men yogokuka,
“Dek o. Erlogat welagagu o,” yiluk yogokukama 36at Yesus nen, men yogisasike,
“Mende, yogondakne kinauang dompet inom, kiniyomnggan inom, werek kalok, korlalok laniat o. Nen, kit amberek mbirok wim abigogo mende etnogo dek kalok, kiniyom sikmangge yirigogi mende onggo waganogo mbirok onggo mbalino. 37An kagat nabugun mende pasik kolal mbalogo ʼbisi dogolik,
At eti akoni inobabut weyak kagarigogi mende inom sabokogo ininggi wenaginaka o, (Yes. 53:12)
yiluk yisuka eti, an noba ndak-ndak kagat lasusak mendeat yogondak kagat larik wirigogo eti paga yokisigi o,” yiluk yogisasikemo, 38it nen, men yogokuka,
“Newe. Nit mende mbirok wim abigogi mende etnogo mbere werek yi ʼbikan!” yiluk inugut kasukama, at Yesus nen,
“Eti erlok werek o,” yiluk yogisasike.
At Yesus ndom Zaitun unggul oba dagisikesik Allah ayonggo ĘĽbisike wene
(Matius 26:36-46; Markus 14:32-42)
39Esigit diluk yogisalok inom dukisukasik nen, o kota etnogo togot diluk nen, at Yesus ndom Zaitun unggul oba dagasi lagike etnogo kagat dagisinem, at agoromi ane waganggo laguka mende yomenogo omborlik dagasuka. 40Arat dagasukasik nen, men yogisasike,
“Weyak kagasuwagaluk kinakla nggagali wisunogo yiluk, sembayanat yisi dogoni o,” yiluk yogisalok nen, 41at ebe asokneat mbontogo korogat nggit mbo laʼbusak ndak-ndagat lagikesik nen, indibagal yunggulogo sembayan yisi dogolik, 42men yisike,
“Nombae o! Kat nen pano ambegen kalok, an weyagat nabugun mende ndil nabino,” yiluk yu kak,
“Enggen ambusu kenago nowagaluk woknisugun eti kat nen an noba nen wokano. Mende, an nakla ambaligogo mende eti dek o. Kat kakla ambegen mende etiat kagat nabino o,” yiluk yogokikemo, 43[it malaikat Allah nen yonggo laʼbiyaligogo mende omanggi mbogot oba nen oba wusa wagikesik nen, endainggen ago wakike. 44Endainggen ago wakike mende, akla mondok weyak dogolik yabunggane sembayan anggintogo yisi dogolik, dikak mep salek ndik-ndik agat oba wusa wagike.] 45Sembayan yiluk melagikesik, agoromi yomenogo inoba wagike mende, it yomenogo inakla mondok weyak agikemo nogo paga, noge yisi werekma ʼbiriya wagike. 46ʼBiriya wagikesik nen, men yogisasike,
“Kit nenaluk noge yiligogi. Weyak kagasuwagaluk kinakla nggagali wisunogo nen, kinebe melatluk sembayan yisi dogoni o,” yiluk yogisasike.
Yesus ebe pakasuka wene
(Matius 26:47-56; Markus 14:43-50; Yohanes 18:3-11)
47At Yesus nen esigit diluk yisi nggorlek eranogoat, at agoromi inebe 12 yomenogo mende omanggi endaga Yudas Iskariot etnogo, yonggo lagikesik nen ap dogalegat wogisek wagikesik nen, at ndak Yesus ambe sarluk keyagi wasigiluk, oba wagike. 48Wagikemo, at Yesus nen, men yogokike,
“Yudas! An abat endak lasi wagagi etnogo, akoni nen didaniluk nasuwagaluk, kat nen keyagi kambe sarluk warogo nebe ininggi paga ʼbigiluk wagan a?” yiluk yogokikemo, 49it ap Yesus inom welaguka mende yomenogo nen, it waguka mende yomenogo inilenggen iyalok inakla nen,
Esigit diluk kagasugun kigi, ambasukasik, Yesus men yogokuka,
“Ninewe! Nit mbirok oba inasuwok a? Dek a,” yiluk, kinok waganggo dogolik eranogoat, 50Yesus agot omanggi nen ap Allah indewerek mende inewe nggok anduwanengge omanggi asuk ebengge mondok mbirok oba taʼbokogo laʼbisike. 51Esigit diluk taʼbokogo laʼbisike mende, at Yesus nen,
“Pugasin! Arat o,” yiluk, ap etnogo asuk inggi pakalok nen, kun disike. 52Esigit diluk kun disikesik at Yesus nen, it ap Allah indewerek ineugi nggokndek inom, it Allah ago palek anggorlem dogoligogi mende inom, it ap inarluwendek inom, at ebe pakawogoluk waguka mende taʼbokogonat men yogisasike,
“Ap ininggi abusak waganggonem paginabi wirigogi kak, kit nen an esigit dilugat pak nabuwogoluk mbirok inom, mbayok inom, wolok wagap yi! 53Kibitngge-yogonggeat Allah ago palekma an kit ninom dogolik paknakidek welagagisip mende, yogondak yiat, o amum inde dogoligogo mende etnogo obatne agama nen, kit nen pak nabusak ndak-ndak oba arat wagap yi o,” yiluk yogisasike.
Petrus nen, “Yesus eti nonggodek,” yiluk laʼbelkike wene
(Matius 26:57-58, 69-75; Markus 14:53-54, 66-72; Yohanes 18:12-18, 25-27)
54At Yesus nen esigit diluk yogisasikemo, it nen at ebe pakasukasik nen, ap Allah indewerek inewe nggok mende etnogo aguma wolok lagonem, at Petrus yabunggane inomborlik yenoĘĽbok walegat lagike. 55Esigit diluk lago lagikesik, ap nggok etnogo ago silimo akoni kindu kun diluk sogi werako korek werekma, at Petrus etnogo yabunggane lagikesik inakla korek lagike. 56Korek werekma kindu amulok yibarlogo dagisinem, at korlak inanduwanengge omanggi ilenggen Petrus lakasikesik nen, ilenggen oba durlu dogolik men yogisasike,
“Ap yi ebe, at Yesus inom welagaka mendeat o,” yiluk yogisasikemo 57at Petrus nen laʼbelko dogolik, men yogokike,
“Dek o. Korlak yi! Ap eti ebe an nonggodek o,” yiluk yogokike. 58Esigit diluk yogokikesik oba nen, dogoluk degat, ap omanggi nen Petrus ilenggen kalok nen, men yogokike,
“Kat yi, it mendeat ambigi,” yiluk yogokike mende, at nen,
“Newe. An dek o,” yiluk yogokike. 59Esigit diluk yogokikemo yabunggane satu jam negen welagukasik nen, ap omanggi nen ane obatnerogo it akoni yomenogo men yogisasike,
“Ap yi ebe Galilea mendeatma, eberogonat Yesus inom noko lagaka mendeat o,” yiluk yogisasikemo, 60at Petrus nen,
“Newe! Kat yegen eti ninggit diluk mende yegen. An nonggodek o,” yiluk yisi nggorlek eranogoat ayam ane yisike. 61Yisikemo nen, Yesus eloke mirlokogo ilenggen Petrus lakasinem, at Petrus akla nen, men ambasike,
“Iya! Yesus nen an yoknoko dogolik,
O yogondak sewe ayam ane awan yigidek werek nggorlek, kat nen,
Yesus nonggodek o, yiluk, kinggi kenagan oba laʼbel nabigin, yiluk yokneke mende etnogo ebe arat laʼbelki yi,” yiluk akla ebekike. 62Akla ebet diluk sikman dukisikesik nen, de mondok nggogat endainggen pisogo de akike.
Yesus ndugi wakik, inane aik dagok yogokik, kagakuka wene
(Matius 22:67-68; Markus 14:65)
63At Petrus esigit diluk de ako nggorlek, it ap Yesus ebe pago welaguka mende yomenogo nen inane aik dagok yogokik, ndugi wakik, kagakuka. Esigit diluk kagako dogolik, 64ilenggen labet diluk nen,
“Ta nen kake nogo. Yoknisan nda!” yiluk yogokik, 65inane aik dagok dogalegat enggarli wako laguka.
Yesus endema wagangguka wene
(Matius 26:59-66; Markus 14:55-64; Yohanes 18:19-24)
66Esigit diluk yogoko werekma, o wi disikemo nen, ap Yahudi inarluwendek yomenogo inom, Allah indewerek mende ineugi nggokndek yomenogo inom, ap Allah wene kolal mbalek indewerek yomenogo inom, nandokuka. Nandokukasik nen, wene Allah wene pasik erlo mbileligogoma etoma werekma, Yesus wolok inoba unggisukama 67it nen men yogokuka,
“Allah nen Kristus ayonggo ʼbiluk laʼbi wisigin yisike etnogo karat a? Karat kalok, yoknisan o,” yiluk yogokukama at Yesus nen, men yogisasike,
“An nen yokisasinem, eberogonat yiluk kinakla didugun a? 68Nen, an nen kinok wokiyasinem, onggo yoknisugun a? Dek o,” yiluk yogisasikesik, omanggi men yogisasike,
69“Kurli yogondak yi nen, yabunggane an nombae Allah obatneyak yi mende ndi mende kagasusak arlek etnogo inggi ebengge nggogat korek dogogin o,” yiluk yogisasikemo, 70it taʼbokogonat nen, men yogokuka,
“Eti paga, kat Allah aʼbut a?” yiluk yogokukama, at Yesus nen,
“Kit kinenggaerek nen yegep etiat o,” yiluk yogisasikemo, 71it nen, men yogokuka,
“Akoni nen at weyak kagakonem inilenggen kaga mende wene ʼbukakogo yuwagaluk nenaluk anggorlem dogogun. Wene at enggaerek nen yeke mende arat ninasuk kolko yoma!” yiluk yisuka.
Currently Selected:
Lukas 22: DNA
Highlight
Share
Copy
Want to have your highlights saved across all your devices? Sign up or sign in
