Lukas 24

Yesus ebe iluk agike wene

(Matius 28:1-10; Markus 16:1-8; Yohanes 20:1-10)

1Ininggi 7 paga hari Sabat Allah ake werlegat welagukasik, kubengge hari Minggu paga kuben siyakogonat it kumi yomenogo nen ambusu ndugurogo ʼbisuka mende yomenogo wolok oila warek ʼbisukama etnogo waguka. 2Wagukasik inilenggen ʼbikasuka mende, oila warek ʼbisukama su nggit mende ndetnokogo larogo ʼbisuka etnogo dimbilogo laʼbisukama su kuwalek werekma inilenggen kasuka. 3Kasukasik inebe oila unggi laguka mende, at ninewe Endaganggok Yesus warek ebe dekma inilenggen kasuka. 4Warek ebe dekma kasukasik nen,

“Yi ninggit diluk kagat lagama,” yiluk inobaka nbalatluk inakla munini ebekonem, ap inebe mbere iniyom aʼbigil weyak mende yugu it kumi inil oba eranogo ngga nen salegat ineragalilu melasi waguka. 5Wagukama nen, it kumi yomenogo inayuk nen inut somaksek werekma, it ap mbere eranogo nen kumi yomenogo men yogisasuka,

“Kit at iluk dogoligogo mende etnogo akoni warek mende dogoligogoma nenaluk kweyarigogi. 6At ebe yoma dek o. Allah nen ilugut dekemo o. 7At alep kit kinom o Galilea dogolik, men yokisasike mende etnogo kinakla ebetni. At nen,

An abat endak lasi wagagi etnogo nasuwagaluk nebe ap weyak mende ininggi paga ʼbanumo, o paga mendaniluk nasumo, ninggi mbere warek dogoluk nen, ninggi omanggi yi paga nen niluk asigin o, yiluk yokisasike etnogo kinakla ebetni o,” yiluk yogisasikemo, 8it kumi yomenogo yabunggane wene Yesus nen yogisasike mende etnogo inakla ebekuka. 9Inakla ebet diluk oila etoma nen iniyogoba uma lagukasik nen, it ap inebe 11 paga yomenogo inom, it inagarlagi pelakngge yomenogo inom, mbilelogo yogisa laguka. 10It kumi yomenogo inebe, Maria ago Magdalena mende etnogo inom, Yohana inom, Maria Yakobus agoya inom, kumi amberek yomenogo inomat inebe taʼbokogonat nen mbilelogo Yesus agoromi laʼbiyagaluk inayonggo ʼbisike mende yomenogo yogisa laguka. 11Esigit diluk yogisa laguka mende, it yomenogo eberogonat yiluk inakla ebekidek. Inenggalat yiligogi, yiluk ambasuka mende, 12at Petrus etnogo arligat, mendokogo melagikesik dukiluk, mbirirli oila warek ʼbisukama etnogo ilenggen ʼbika lagike. Lagikesik ut soma yiluk ilenggen nggolakasike mende, su kain lenan mende ebe warek yilogo ʼbisuka mende etnogo arligat nonggorlek werekma kasike. Werekma ilenggen kalok nen,

“Yi ninggit diluk kagat laga. Nayuk o,” yiluk akla eberik uma wagike.

Ap inebe mbere Yesus inom o Emaus wago dogolik ebe inuguriyasike wene

(Markus 16:12-13)

13O etinem dinggaganeat Yesus agoromi ane waganggo laguka mende yomenogo inebe mbere o Yerusalem nen o endaga Emaus etoma, 3 jam negen liligogoma wisuwogoluk waguka. 14Wago dogolik, yi mende ndi mende taʼbokogonat kagat lagike mende yomenogo abok mbilelik waguka. 15Wene abok mbilelik wago dogolik, at omanggi nen, at omanggi yogokik, at omanggi nen, at omanggi yogokik, yilik wagonem at Yesus inae paka wagikesik inomat waguka. 16Inom waguka mende, it ap eranogo nen enggagat didunogo yiluk inilenggen agot agikemo, ebe enggagat didigidek. 17Didigidek wagonem, at Yesus nen, it eranogo men yogisasike,

“Kit kimbisak kolagarlemngge lago dogolik, wene nena wene yilik liligogi,” yiluk yogisasikemo inelokonggen ʼbusuk yiluk puk aguka. 18Puk agukasik nen, it eranogo, at omanggi endaga Kleopas nen, men yogokike,

“Wene age yiat kagat laga eti it ap kuso mende o Yerusalem witluk elalma pasik werek mende amberek taʼbokogonat inilu mendeat, kat yi karligat konggodek welaganma kigi,” yiluk yogokikemo 19at Yesus nen,

“Wene eti ninggit diluk kagat laga mende yegen,” yiluk yogokikemo it eranogo nen, men yogokuka,

“Ap endaga Yesus, ago Nazaret mende eti ebe Allah wene yogisaligogo mendeat dogolik, Allah il oba, nit akoni taʼbokogonat ninil oba, obatne paga wene yogisigik, yi mende ndi mende kagakik, obatnerogo kagako laga mende, 20it ap Allah indewerek mende ineugi nggokndek inom, nit nineugi nggokndek inom, wene oba ʼbiluk o paga mendiluk wasuwagaluk ininggi paga ʼbegama waka o. 21Nit akoni Israel mende, at nen ndil ninabigin yiluk ninakla ambasi lago mende, iya! Esigit diluk arat kagat lagasikmo nen, nininggi mbere noge yogo yi o. 22Nen, it kumi nit mende amberek nen ninagut lagabi wagakaat o. It eti kuben siyakogonat oila warek ʼbegama wagaka mende, 23ebe warek etnogo dekma kega o. Ebe dekma inilenggen kalok lagakasik wene yoknisasi dogolik,

Malaikat mbogot oba mende inom,

Dek o. At ebe iluk agama, yiluk yoknisegama wago, yiluk, esigit diluk yegama ninagut laga o. 24Nen, nit ninagarlagi amberek oila warek ʼbegama eti ʼbika wagaka mende, ebe dekma,

Kumi yoknisa lagaka etnogo eberogonat kigi, yiluk, Yesus ebe inilenggen kalok dek lagaka,” yiluk Yesus yogokuka. 25Esigit diluk yogokukama, at Yesus nen,

“Iya! Kinebe nggembu a? Ap Allah wene yogisasi laguka mende yomenogo nen wene taʼbokogonat yogisasi laguka etnogo eberogonat yiluk kit ibat diduʼbuk welagap yi! 26At Kristus Allah nen ayonggo ʼbisike etnogo, yi aik ndi aik kigidek pogorasusak a? Dek o. Kasinem nen pogorasusak o. Kit nen yegep eti kagasusak ndak-ndagat kagaka o,” yiluk yogisasike. 27Esigit diluk yogisasikesik nen, at enggaerek ake Musa nen kolal mbalkike yomenogo kurli nen logat, it Allah wene yogisasi laguka mende nen kolal mbalkuka yomenogo, taʼbokogonat dikogo mbilelogo yogisasike.

28Esigit diluk yogisasikesik, o Emaus wisuwogoluk waguka etnogo arat asi wagukasik nen, at Yesus kolak mbiyokogo wisigiluk kagakike. 29Esigit diluk kagakikemo it ap etnogo nen, men yogokuka,

“A! O ki asigiluk, mo arat nggorokogo laga yoma, ninom yoma noge yuwok o,” yiluk, pakasukama inom noge yuwogoluk uma unggisuka. 30Unggisukasik inom kimbiri nuwogoluk nen korek lagikesik roti inggimo waganggikesik nen, Allah keyagi warogo nggusogo it etnogo wogisasike. 31Esigit diluk kagakonem, it etnogo alep inilenggen amukak salkike mende ʼbunggal agikesik nen, enggagat didisuka. Enggagat didisuka mende, at ebe it inakla nen ngga laga salegat dek agike. 32Esigit diluk dek agikemo, it-it men yisuka,

“Iya! Kolagarlem wago dogolik nen, wene Allah wene kolal mbalek mende mbilelogo yoknisasi nggorlek, ninendainggen aganggen atluk ninakla nggaguk yeke etnogo dek?” yiluk yisuka. 33Esigit diluk yisukasik nen, puk dogoluk dek it etnogo imbisagat mendokogo melatluk iniyogoba o Yerusalem laguka. Laguka mende, at Yesus agoromi inebe 11 yomenogo inom, inagarlagi amberek inom, nandot diluk men yisinem ʼbiriya laguka,

34“Yesus Simon elokoma winam atluk ilenggen keke eti eberogonat ilugut dekemo werek,” yiluk wene mbilelkonem laguka. 35Lagukasik, it inebe mbere etnogo nen kolagarlem wago dogolik Yesus inom kagakuka mende inom, kimbiri nggusogo melagisasinem ebe didisuka mende etnogo inom, mondok mbilelogo yogisasuka.

At Yesus ebe agoromi taʼbokogonat nen inilenggen kasuka wene

(Matius 28:16-20; Markus 16:14-18; Yohanes 20:19-23; Laʼbiyasike 1:6-8)

36Wene etnogo awan mbilelogo yisinem, at Yesus ebe ngga nen salek inakla melagikesik nen,

“Nagoromi. Kinagurakma,” yiluk keyagi warinakonem 37it yomenogo inagut lagukasik nen,

“Yi monggat a?” yiluk inayuk aguka. 38Inayuk mondok agukama, at Yesus nen it agoromi men yogisasike,

“Kit nen, nenaluk kinayuk atluk eberogonat ambigidek kinendainggen mbere werek. 39An nebeat o. Ninggi niyok yoma kinilenggen ʼbikani! An, nino inom, nowak inom, werek eti kak, it monggat eti esigit diluk mondok dek o. Eti paga, kininggi pak niyigik, kinilenggen niyigik, kagako dogolik,

Yesus ebeat, yiluk kinakla ambani o,” yiluk, 40esigit diluk yogisasi dogolik, at inggi iyok yomenogo inuguriyasike. 41Esigit diluk inuguriyasinem, it yomenogo nen,

“Iya!” yiluk pogorako dogolik, inakla arlenggen nen, eberogonat yiluk awan didigidek werekma, at nen it yomenogo yogisasi dogolik,

“Kit kimbiri omanggi yoma ʼbegepma a? Dek a,” yiluk yogisasikemo, 42it nen ikan werago mbalek mende omanggi wogokukama, 43at nen waganggikesik, it yomenogo inil obaat nasike.

44Nalok nen, it yomenogo men yogisasike,

“An kit ninom dogolik yokisasi dogolik,

An kagat nabugun mende kolal Musa nen mbalkik, ap Allah wene yogisasi laguka mende yomenogo nen mbalkik, it amberek nen buku Mazmur paga mbalkik, kolal mbalogo ʼbisuka eti ndak-ndagat, an arat kagat nabugun, yiluk yokisasi lagi etnogo ebe arat kagat laga yi o,” yiluk, 45Allah wene kolal mbalek diduwagaluk, it yomenogo wene inendainggen nggagalogo yogisasikemo didisuka. 46Esigit diluk inendainggen nggagalogo yogisasi dogolik,

“Allah nen Kristus ayonggo ʼbiluk laʼbi wisigin yisike mende kolal men yiluk mbalek werek,

Yi aik ndi aik kilik-kilik watlatluk nen, inggi mbere warek dogoluk inggi omanggi paga yi nen, watlatluk liligogoma nen iluk asigin o, yiluk kolal mbalek werek. 47Nen, omanggi men yiluk kolal mbalek weregat,

Kit akoni weyak kagarigogi mende eti togot diyalok kinobabut kwalago kalok, Allah nen sagalogo deget digin o, yiluk, at endaga mbalogo wene yisi dogolik, erlo o Yerusalem kurli nen yogisilik, logat kurli o yi ai ndi ai akoni inunggulowak endaga dombok mondok yogisilik lago dogono, yiluk Allah wene kolal mbalek weregat o. 48Wene kolal mbalek werek eti kak, ebe kagat laga mende kit kinilenggen kegep mende nenat, it akoni yogisilik lago dogono. 49Nen, an nombae nen kit wokisagin, yiluk abok yokisasike etnogo, yogo. An nenat kinoba wusa ʼbi wisigin o. Mende, Allah obatne mbogot oba nen kinoba awan wusa ʼbi wagidek werek nggorlek ya, kinebe o kota yomaat dogono,” yiluk wene yogisasike.

Allah nen Yesus mbogot oba wolok dagasike wene

(Markus 16:19-20; Laʼbiyasike 1:9-11)

50At Yesus nen wene esigit diluk yogisasikesik it agoromi yomenogo o kota nggokma nen wogisek dukisikesik, o Baitania korokogo etoma lagike. Lagikesik, inggi liyaʼbiluk nen,

“Allah nen kinanggorlem dogolik panot kinako dogowak o,” yiluk keyagi warinakike. 51Esigit diluk keyagi warinako nggorlek eranogoat, it eta werek nggorlek, Allah nen, at ebe lekogo mbogot oba wolok dagasike. 52Dagisinem, it agoromi yomenogo inindibagal yunggulogo pogoratluk nen, inakla arlenggen nggokogo kilik, o Yerusalem iniyogoba waguka. 53Wagukasik, o Allah ago palekmaat dogolik, Allah pogorako mondok welaguka.

Currently Selected:

Lukas 24: DNA

Highlight

Copy