Lukas 18

He thoge meke inom, ap kok wene 'bigik, kokhik, hagakherek meke inom, inoba lisogon yogeisasikhe wene

1Itithogon yogeisasikhesik nen, at Yesus agarumi ane waganhe lagoukha meke emenogo sembayan ekhe dogoluk nen inakla puk atluk here'igidek, hunik-hunigat ekhe dogoagaluk, wene ageikhe oba lisogon men yogeisasikhe,

2“O ukul ageikhe, ap kok meke wene inoba 'bigik, kokhik, hagakherek meke ageikhe Allah ayuk degat dogolik akhuni agugurogo akmurinakhidegat welageikhe. 3Itithogon werekma, he thoge meke ageikhe o ukul itila welageikheat. Dogolik, at he iti hibiku-yogoku ap etnogo oba motok waga dogolik nen, men yogokhe lageikhe,

Ap ageikhe an nipisak weak meke hat nen nirlirli woknabinok nen wagei o, iluk yogosi aga lageikhe. 4Itithogon yogosi agunem, ap kok etnogo nen alebageik ane holhidek a'it hekhe lageikhe mekeat, yabokane akla ebekhe dogolik,

An nobabut, Allah nayuk degat dogolik, akhuni agugurogo nakmurinakhidek mekeat, 5at he thoge meke yi, ane noba tiologo yoknesiriogo yi, awene palikhidek thogotdisaumo re, noba wago motok dogolik nakla mep dageik-dagokhogo hagakhe dogunogo iluk, awene iti palisigin, iluk akla apasikhe o,” iluk Yesus nen yogeisasikhe.

6Itithogon yogeisasikhesik nen, at Yesus ninoe Etagapogot nen, ageikhe men yogeisasikhe,

“Ap obabut korlo dogolik wene akhuni inoba 'bigik, kokhik, ekherek meke ekhe iti hutdini o. 7Iti hakene, at Allah nen a'buri wenago 'bisasikhe meke nen dikene hibako inane obatnerogon ayoko 'bisi halok, inirlirli woginabigin dek nogo? Inane konhe dogoluk nen, yabokane halok inirlirli woginabigin nogo? 8Dek o. Ibarat inirlirli woginabigin o, iluk eberogonat yokhisigi. Itithogon hagarinabigin mekeat he, an abat itaklasi agagi etnogo yabokane witluk nen, akhuni agat oba meke yoma aperek inetaiken noba hakotdiluk werekma hisa isigin a? Dek a,” iluk yogeisasikhe.

Ap Farisi meke inom, ap pemerintah hasik uang kino iluk natogokharek meke inom, inoba lisogon yogeisasikhe wene

9Itithogon yogeisasikhemo, it akhuni aperek emenogo inakla nen, men apekhe lagoukha,

“It akhuni tha'bokhogonat yoma erlok dek negen mekeat he, nit yi anek he, ninebe kok dogolik mothogon hagakhe lago,” iluk apekhe lagoukhama re, at Yesus nen wene oba lisogon men yogeisasikhe,

10“Ap inebe pere meke sembayan uogoluk, Allah ai halekma uki lagoukha. Ap ageikhe, Farisi meke. Nen, ap ageikhe, pemerintah hasik uang kino iluk natogokherek meke. 11Ipisak uki lagoukhasik nen, ap Farisi meke etnogo asokne hekhogon melasi lageikhesik sembayan ekhe dogolik, men isikhe,

Allah nopase o! An nobabut akhuni tha'bokhogonat inobabut hakene dek o. It akhuni yugunat iniki abusak waganharek meke men, korlo hagakharek meke men, humi param hagarinabiogei meke men, ap pemerintah hasik uang kino iluk natogokharek meke yi men, inobabut iti hakene, an itithogon motok dek nogo nen he, heagei wathakhe lagei o. 12An he, minggu opakiat oba niki pere baga hipiri nikidek hean negen 'biluk welageik, nameke yi meke ti meke hago welagarek meke, tha'bokhogonat niki wenago, 10 asi agunem, ageikhe hat hobasik 'bagagik, hagakherek o. Nopase, iluk isikhe meke re, 13at ap pemerintah hasik uang kino iluk natogokherek meke etnogo anek he, ebe walegat metek dogolik uroak usageik ileken pogot oba liakhigidek ayukhogon dogolik, iki nen etaiken huselekhe dogolik, men isikhe,

Allah nopase o! An weak hagakherek meke yi, hakmu nean o, iluk yogokhikhe. 14It sembayan itithogon isukha iti hasik, an wene ageikhe yokhisak. Ap tha nen etaiken siatdakhalok hogorakhekhe halok he, Allah nen thebeldekherek o. Nen ap tha nen etaiken thebeldakhalok,

An erlok dek, akla apekhe halok he, Allah nen siatdekherek iti nen, at ap sembayan alebageik ekhe meke iti, Allah nen wene oba meke thagalogo degetdigidek thogotdisikhe. Mekeat he, at ap sembayan yabokane isikhe meke iti anek he, Allah nen wene oba meke thagalogo degetdisikhemo aila lageikhe, iluk yokhisigi,” iluk yogeisasikhe.

Yesus nen, “Yekerugi 'bugurlaktek iti noba wetnek,” iluk yogeisasikhe wene

(Matius 19:13-15; Markus 10:13-16)

15At Yesus nen itithogon yogeisasikhesik werekma, yabokane akhuni nen ina'buri yekerugi 'bugurlaktek meke Yesus nen iki hageinabuagaluk, oba wogosik wagoukha. Itithogon wogosik wagunem, at Yesus agarumi ane waganhe lagoukha meke emenogo nen inileken hisalok nen wenageisasukha. 16Itithogon wenageisasukha mekeat, at Yesus nen yekerugi 'bugurlaktek emenogo wisuagaluk waisasikhemo waga korlek, at ane waganhe lagoukha meke emenogo men yogeisasikhe,

“Akhuni inobabut it yekerugi ithi inobabut iti hakene hagatlasugun halok he, Allah nen apma 'bisekherekma etoma iteerek asugun iti nen, yekerugi 'bugurlaktek ethoma an noba wetnek. Wene palhe 'buk o. 17Tha nen, yekerugi 'bugurlaktek meke Allah nen apma 'bisekherek wene waganiluk ukegarek iti hak ukigidek halok he, ukigin motok dek o, iluk eberogonat yokhisigi,” iluk yogeisasikhe.

Ap kok ameke doalegat meke Yesus oba wageikhe wene

(Matius 19:16-30; Markus 10:17-31)

18Itithogon yogeisekhe lageikhemo, it akhuni Yahudi meke inoe kok ageikhe nen Yesus men yogokhikhe,

“Noe. Wene yakulnisekhe lagan iti, hat hano o. An naburlal-haburlal ite asik nen, an nobabut nikithogon hagakhe dogosak,” iluk yogokhikhemo, 19at Yesus nen, men yogokhikhe,

“Hat hano, iluk yoknekhen iti nikithogon nen yoknekhen. At ageikhe hano dek o. At Allah arligat hano o. 20#Keluaran 20:12-16; Ulangan 5:16-20 Wene Allah nen,

Yigithogon hagatno, tigithogon hagatno, iluk ninasuk wakhe dogolik, men isikhemo werek,

Param hagasusak dek o.

Akhuni inasusak dek o.

Hiniki abusak waganusak dek o.

Hinekalat inabok palusak dek o.

Hinagosa hinopase inalon halinakhe dogosak o,

iluk ninasuk wakhikhe etnogo hat hiluat o,” iluk yogokhikhemo, 21at ap etnogo nen, men yogokhikhe,

“Wene yoknekhen iti tha'bokhogonat, an nebe yekerek oba nenat nasuk hologo mothogon hagakherek mekeat o,” iluk yogokhikhemo, 22at Yesus asuk holhikhesik, men yogokhikhe,

“Wene opakiat anek ageikhe hagasusak meke re, hagakhidek welagan o. Hat hameke etoma tha'bokhogon it ageikhe inoba oko pali lano. Paliluk oko wokhesugun meke uang iti it akhuni inameke dek inerlageik meke iti motok supurisa lan o. Itithogon arat hagakhen halok he, hat pogot oba meke kogat iteerek asigin o. Halok he, itithogon arat supurogo wogeisalok nen, an noporlik nekhe dogonok nen wetno,” iluk yogokhikhemo, 23at ap etnogo asuk holhikhesik nen, ameke motok doalegat etnogo nen he, akla motok weak ageikhe. 24Akla itithogon motok weak ageikhemo, at Yesus nen ileken ekagat hutdiluk nen, agarumi men yogeisasikhe,

“Eiye. Nayuk e. Akhuni inameke doalegat meke Allah nen apma 'bisekherekma etoma nikithogon uku heat o. 25Wam unta kok muluk meke iti disu elo horlelekma kola'umo erlok lelokhogon ukusak mekeat he, it akhuni inameke doalegat meke Allah nen apma 'bisekherekma etoma ukusak motok erlok dek o,” iluk yogeisasikhe. 26Itithogon yogeisasikhemo, it emenogo inasuk holhukhasik at Yesus men yogokhukha,

“Halok he, Allah nen akhuni thani hak erlok tilinabusak he,” iluk yogokhukhama 27at Yesus nen, men yogeisasikhe,

“Akhuni nen hagasusak motok erlok dek mekeat, at Allah hagasusak erlok o,” iluk yogeisasikhe.

28Itithogon yogeisasikhemo, at Petrus nen, men yogokhikhe,

“Meke re, nit hat hoporlik nekhe dogouogoluk ninameke yi meke ti meke here'isalok wagosik nekhe lago meke yi anek, nikirlik,” iluk yogokhikhemo, 29-30at Yesus nen, men isikhe,

“At tha nen Allah apma dogeigiluk ai halek men, age men, oe agot men, agosa opase men, a'buri men, here'isalok waga halok he, o yogotak ya dogolik obolukmo motok doalegat oba dukhogon wogosigin o. Nen, o yabokane hagatlasigin etnogo dogolik, naburlal-haburlal wogosiginat o, iluk eberogonat yokhisigi,” iluk yogeisasikhe.

At Yesus nen, “Nasugun o,” iluk iki pere baga yogeisasikhesik yabokane ageikhe dagakhogon yogeisasikhe wene

(Matius 20:17-19; Markus 10:32-34)

31At Yesus wene itithogon yogeisasikhesik nen, agarumi inebe 12 oba emenogo wogosik, inasokne ponhogo lageikhesik men yogeisasikhe,

“Nagarumi. Nit yogotak o Yerusalem usa lago. Nen, arat usa lalokma nen, it ap alep Allah ane yogeisekhe lagoukha meke emenogo nen, an abat itaklasi agagi etnogo yabokane hagatnabugun meke holal waganogo 'bisukha meke tak-tagat hagatnabugun o. 32Nebe nasuagaluk, yoko lalok it akhuni itikmanke meke iniki baga 'banugun o. 'Banumo, inane aik dagok yoknikhik, wosi 'banhik, 33la'bisoko tugi nakhik, hagatluk nebe motok nasugun o. Nasugun mekeat he, niki pere warek dogoluk nen, niki ageikhe baga yi nen, niluk asigin o,” iluk, 34itithogon pakhogon yogeisasikhe mekeat, limago meke ekhe thalek, at agarumi emenogo nikithogon meke hasik ekhe heat inokodek welagoukha.

Yesus nen ap ileken puk meke ageikhe hano hagakhikhe wene

(Matius 20:29-34; Markus 10:46-52)

35At Yesus o Yeriko ukuagaluk horokhogon asi lageikhe hak, ap ageikhe ileken puk dogolik ape kino weak ekhe lageikhe meke holagarlem eranogo hurek werekma, 36akhuni inane doalegat ilik lagunem asuk holhikhesik nen, men yogeisasikhe,

“Inane ethoma, nikithogon halok ilik wiriogei,” iluk hinok waganhikhe. 37Hinok waganhikhemo, it akhuni nen, men yogokhukha,

“Dek o. Yesus ai Nazaret meke etnogo holak yike wiriogo nen iliogei o,” iluk yogokhukhama, 38ap etnogo nen ane kokhogon ekhe dogolik, Yesus men yogokhikhe,

“Yesus Daud nen itago meke noe a! Hakmu nean o,” iluk yogokhikhemo, 39it akhuni alebageik lagoukha meke emenogo nen,

“Hane!” iluk wenagakhukha mekeat he, yabokane ebenageik ane kokhogon men yogokhikhe,

“Daud nen itago meke noe a! Hakmu nean o,” iluk yogokhikhemo 40at Yesus huk ageikhesik nen, akhuni emenogo men yogeisasikhe,

“Ap iti wolok witni o,” iluk yogeisasikhemo, ebe Yesus alilu 'bi agoukhama nen, at nen hinom wokhekhe dogolik,

41“An nen nikithogon hagathabuagaluk yoknekhen,” iluk yogokhikhemo, at ap etnogo nen, men yogokhikhe.

“Noe o. Nileken weak yi hano hagatnabinogoluk yokhikhi o,” iluk yogokhikhemo, 42at Yesus nen, men yogokhikhe,

“Hileken puk ithi hano asin o. Hat hetaiken noba hakotdegen iti bagaat hano agan o,” 43iluk yogokhe korlek eranogoat, ileken puk meke etnogo hano ageikhesik, Yesus oporlik laga dogolik, Allah hogorarik lageikhe. Nen, it akhuni tha'bokhogonat emenogo Yesus nen hagakhikhe meke iti inileken hasukhasik nen, Allah hogorakhukhaat.

Currently Selected:

Lukas 18: LAIDNT

Highlight

Copy