Lukas 21

He thoge ameke dek meke ageikhe Allah ake 'bisikhe wene

(Markus 12:41-44)

1At Yesus nen itithogon yogeisasikhesik nen, elokhe hebenokhogon ileken lageisasikhe meke, Allah ai halekma ap inikierek werek meke aperek uang Allah hasik peti akla 'begarekma kolakhunem ileken lageisekhe lageikhe. 2Lageisik werekma, at he thoge ameke dek meke ageikhe wageikhesik nen, uang motok 'bugurlagat sen meke pere anek kolakhunem ileken hasikheat. 3-4Itithogon kolakhunem ileken lageisasikhesik nen, akhuni men yogeisasikhe,

“It akhuni inauang doalegatma oba hiakhogon 'biliogei meke iti, pererlagat negen o. Meke re, at he thoge meke ameke dek meke iti herlekha'bugat apiri oko palogo nausak meke tha'bokhogon motok 'bisekhe iti anek he, motok kok negenat 'bisekhe o, iluk eberogonat yokhisigi,” iluk yogeisasikhe.

“Allah ai halek akhuni nen motok misalugun o,” iluk yogeisasikhe wene

(Matius 24:1-2; Markus 13:1-2)

5Itithogon yogeisasikhesik, Allah ai helekit elokhoken hano halhukha meke inom, o elokhoken hanorogon obake waganogo yi meke ti meke Allah hasik 'bisasukha meke inom, inileken 'birogo dogolik hogorakhunem, at Yesus nen, men yogeisasikhe,

6“Hit o hinileken lakhekhe lagap ethoma, yabokane helekit ageikhe thogotdigidek motok misak-dapukhogon la'isugun oba werek o,” iluk yogeisasikhe.

“Alebageik itithogon weak hagathinabugun,” iluk yogeisasikhe wene

(Matius 24:3-14; Markus 13:3-13)

7Wene itithogon yogeisasikhemo, it nen, at Yesus oba hinok waganhe dogolik, men yogokhukha,

“Noe! Wene yoknisegen iti mera nen hagatlasigin. Ebe hagatlasigiluk hagakhe korlek, ki meke hagatlagunem ninetai ekerlogo dogogun,” iluk yogokhukhama, 8at Yesus nen, men yogeisasikhe,

“Akhuni nen nukhetdinageinogo nen, hinobabut hebelogo dogono o. It akhuni inebe doalegat nen, inetaga an netaga meke thalogo nen men ilik wisugun,

At wisigin isukha etnogo an nebe wagei yiat o, igik,

Hagatlasigin etnogo arat hakok i aga, igik, ilik wisugun etnaga, it iti inane hinasuk holiluk inoporlik lagup o. 9It aperek nen,

Wim yabiogei, igik,

Inebe opakiat meke nen horlim kagalogo mukhogo ula'isiliogei, igik, iluk isi halok he,hinakmaken lalok hinetaiken aborlok ugup o. Alebageik itithogon hagatlasigin mekeat he, o ilugun hurli baga hagatlasigin meke iti ibat hagatlasigin dek o,” iluk yogeisasikhe. 10Itithogon yogeisasikhesik nen, wene ageikhe men yogeisasikhe,

“Akhuni inukuloak etaga tomok wim kagalhik, ap inetagapogot inagarumi inapma meke tomok wim kagalhik, kagaldiluk yakhe korlek, 11dugul kok inayuk meke luk-lagathigik, o yi ai ti ai hipiri motok no ageik, u obabut weak meke inoba ageik, yi meke ti meke inayuk meke hagatlageik, pogot oba nen hagasusak dek meke elalageik, hagasigin o.

12Meke re, iti tha'bokhogonat aban hagatlageidek werek korlek, alebageik akhuni nen hinebe ha'inageiluk, yi aik ti aik hagathinakhik, o it akhuni Yahudi meke sembayan egarekma wokhisik lageik, herle warogo 'bisegarekma kola'inagagik, ap inetagapogot men, ap koktek gubernur lak men, inoba wokhisik lageik, hagasugun iti, it nen, an netaga ekhe dogolik,

Hit at agarumi, iluk itithogon hagathinabugun o. 13Itithogon hagathinabugun iti baga, an hagakhunem hinileken neekhe lagap meke yi abok pakhogon yogosoagalugat, hano iti bagaat hagatlasigin o. 14-15Itinem, hit nen wene oko yogeisagun meke, an nen hinakla kagalogo yokhisaumo, it ukum hinoba 'bugun meke iti nen,

Hit hinane iti dek o, iluk oko 'busak dek asigin. Iti nen aban hagathinakhidek werek korlek, hit hinakla nen,

Wene itithogon meke noba 'bisi halok, nebe nirlirli horlagaluk oko ki meke yogeisagein, iluk hinelabut hikhidegat dogono. 16Nen, hinagosa hinopase lak nen, hinougi hinagarumi nen, hinagarlak lak nen, hit wokhisik, o ukum inoba 'bigik, kokhik, 'begarekma 'binagei lageik, hinebe aperek motok hinakhik, hagasugun o. 17Nen, it akhuni tha'bokhogonat nen, an netaga ilik,

Hit at agarumi, iluk hinebe ina'it motok hisagun. 18Meke re, hinebe nuk asugun dek u hak, hinisi hinukuloakma etoma opakiat halok ageikhe nalasigin motok dek o. 19Halok he, hinetaiken hapugutdakhalok nen, hinakla pukhogonat dogogun iti baga hinoado tilhinabigin o,” iluk yogeisasikhe.

O Yerusalem akhuni itikmanke meke nen thebelugun isikhe wene

(Matius 24:15-21; Markus 13:14-19)

20At Yesus nen itithogon yogeisasikhesik, wene ageikhe men yogeisasikhe,

“It ap tentara meke nen o kota Yerusalem ithi motok yukha warogo 'biluk nen,

O larogo wuleleken tagalogo ninasugun etnogo arat horok asi aga higi o, iluk, hinakla apano. 21-22Itinem he, yigithogon hagatlasigin, tigithogon hagatlasigin, iluk, it ap Allah ane holal waganogo 'bisukha meke emenogo nen isukha iti ipisak tak-tak asuagaluk, akhuni weak hagariogei meke ukum yogotak ya baga wogeisagein iti nen, hit o Yudea ya ta dogogun meke halok he, tom oba lo dageigik, o Yerusalem dogogun meke halok, o kota here'isalok lo dukhigik, hagatni o. Nen, o itikmanke dogogun meke halo, o kota ukugup o. 23Itinem he, o yoma motok wiik-weakhogon hagarinakhik, Allah akla aga akhuni yoma inoba 'bigik, hagatlasigin iti nen, it humi ineagei inakla meke inom, ineagei ket itago inirlak aban niliogei meke inom, weak hugun iti, eiye! Nakmu lak e! 24Akhuni aperek karok oba inakhik, aperek herle warogo o yi ai ti ai 'bisa lageik, hagasugun o. Nen, o kota Yerusalem ithi, akhuni itikmanke meke inisok nen al debelogo 'biluk, o thebeli ukitluk dogogun mekeat, motok thebelek dogogun dek o. At Allah nen,

It akhuni itikmanke meke, o Yerusalem hurli iti hurli bagaat thebelek dogogun, iluk akla apasikhe tak-tagat dogogun o,” iluk Yesus nen yogeisasikhe.

“An abat itaklasi agagi etnogo yabokane wisigiluk hagakhe korlek, itithogon hagatlasigin,” iluk yogeisasikhe wene

(Matius 24:29-31; Markus 13:24-27)

25At Yesus nen itithogon yogeisasikhesik nen, yabokane ageikhe men yogeisasikhe,

“Hinetaiken ekerlogo, mo inom, tugi inom, husagal inom, iti ninat meke elalagunem hugun o. Nen, agat oba yoma i laut kok yekelek welagarek etnogo hoklabu obatnerogon waga dogolik, i isok ane kokhogon ekhe dogoumo nen, it akhuni inukuloak etaga tomok inayuk atluk inelabut hisugun o. 26Nen, pogot oba inobatneak meke inaborlogothekhe dogoumo, akhuni nen,

Yi hagatlageik, ti hagatlageik, hagasigin etnogo arat hagatlasigin higi, iluk inayuk nen inetaiken motok dek asigin o. 27Itinem an abat itaklasi agagi etnogo nobatnerogon oisa akla usa'agunem, inileken nealok motok hogotnabugun o. 28Wene tha'bokhogonat hagatlasigin igi iti, erlo baga marelaga halok, hit hinakla nen,

Tilninabigin etnogo arat horok asi aga o, iluk, hinebe melatluk hinut oak lekhogo dogono,” iluk yogeisasikhe.

Wene o ara oba lisogon yogeisasikhe wene

(Matius 24:32-35; Markus 13:28-31)

29At Yesus nen itithogon yogeisasikhesik, wene ageikhe oba lisogon men yogeisasikhe,

“Yi o ti o men, o ara men, hagakherek etnogo hutdini o! 30O iti eka lologo ukekherethek yabokane eka dabelho halok,

Yogo. O yogotak hibi asigin higi, iluk hinabusagat hinakla nen hutdegethep apigi. 31Iti hak, an nen,

Yigithogon hagatlasigin, tigithogon hagatlasigin, iluk yokhisigi etnogo ebe hagatlagunem hinileken halok hinakla nen,

Allah nen apma 'binanigin etnogo arat hakok i aga higi, iluk hinakla apano. 32Yigithogon hagatlasigin, tigithogon hagatlasigin, iluk yokhisigi iti, akhuni o yogotak werek meke inebe dek ageidek aban werek korlegat, tha'bokhogonat hagatlasigin o, iluk eberogonat yokhisigi. 33Pogot inom, agat inom, dek asigin meke re, an nane iti dek asigin motok dek o,” iluk yogeisasikhe.

Inobabut hebelogo dogoagaluk inasuk wakhikhe wene

34At Yesus nen wene itithogon yogeisasikhesik nen, ageikhe men yogeisasikhe,

“Yi meke ti meke isago werago hinelabut urogo nikik, apusu hunu-hunu asuogoluk nekarek meke nikik, yi meke ti meke agat oba meke hasik wene munini uan 'bero ebekhik, itithogon hagarik nekhe dogolik hinobabut hebelek dek akhirak werekma, 35'bagei herle nen al debelogo wakherek hak, an wene igi iti opaki hasik hagakhe dogolik, akhuni agat oba meke tha'bokhogonat motogat weagarinakhe dogolik, hit hinom weagathinabinogo nen, hinobabut hebelogo dogono o. 36Yigithogon tigithogon tha'bokhognat hagatlasigin igi etnogo hagatlaga korlek, hinobatnerogon hinakla puk dogoluk, hinekarli degat nelokhoma metek werekma, an abat itaklasi agagi etnogo 'bithisasik nen hibiku-yogoku sembayanat ekhe dogolik, hinobabut hebelogo dogono o,” iluk yogeisasikhe. 37Wene itithogon yogeisasikhesik nen, yabokane, at Yesus o wi agunem Allah ai halekma, wene yakulisigik, o hi isinem tom Zaitun ukul oba dageigik, hagakhe lageikhe. 38Itithogon isinem, akhuni tha'bokhogonat emenogo at ane holuogoluk, Allah ai halekma huben siakhogon natogosi aga lagoukha.

Currently Selected:

Lukas 21: LAIDNT

Highlight

Copy