Matius 14

Yohanes ima usa'isekhe lageikhe meke etnogo ebe wakhukha wene

(Markus 6:14-29; Lukas 9:7-9)

1O eta baga, at Herodes o Galilea eloke kok etagapogot welageikhe meke iti, Yesus nen hagakhe lageikhe meke asuk holhikhesik nen, 2at agarumi men yogeisasikhe,

“Yohanes ima usa'isekhe lageikhe meke ebe wakhima watlaga etnogo yabokane iluk agasik iti nen, hagasusak dek meke elalinat hagarik liliogo iti higi,” iluk ebe Yesus hagakhe lageikhe mekeat isikhe iti. 3At kok Herodes nen agot Filipus age he Herodias iti tilogo waganhikhe iti baga Yohanes iki herle warogo iniki herle warogo 'bisegarekma kola'isikhe. 4Kola'isikhe iti, alebageik at Yohanes nen Herodes etnogo yogokhe dogolik,

“He waganusak dekmaat waganhetikmo iti, hipisak dogosak erlok dek o,” 5iluk yogokhikhemo, at Herodes nen Yohanes iti wasigin iluk akla apasikhemo it akhuni aperek nen,

“Yohanes iti Allah ane yogeisekherek meke,” iluk ekhe lagoukhama, wasusak ayuk ageikhe.

6Mekeat he, o at kok Herodes iti ebe itaklageikhe baga tak-tak asi ageikhemo nen, pesta hagakhe dogolik, at he Herodias eak tharlisik meke iti, akhuni doalegat inelokhoma nen etai uak sa'bik sa'bok wakhunem, at kok Herodes iti akla arleken akhasikhe. 7Akla arleken akhasikhesik Allah etaga hupuk palogo, horlak etnogo yogokhe dogolik,

“Hat nen nena meke kino yoknekhen halok he, wokhesiginat o. Halok he, ageikhe kino yoknom o,” iluk yogokhikhe. 8Itithogon yogokhikhemo horlak iti agosa nen asuk arat wakhikhesikmo nogo nen he, men yogokhikhe,

“Nopase, at Yohanes ima usa'inekherek meke etnogo ukuloak palogo, piring thabia oba temerogo woknetnok o,” iluk yogokhikhe. 9Itithogon yogokhikhemo, at kok Herodes etnogo akla weak ageikhe meke re, Allah etaga hupuk palhunem akhuni doalegat pesta isago nuogoluk natogorli agoukha meke emenogo arat inasuk holhukhasikmo iluk, agarumi nen horlak etnogo nen isikhe tak-tagat hagarogo wogosi loagaluk yogeisasikhe. 10Itithogon yogeisaiskhemo lagoukhasik nen, Yohanes etnogo akhuni iniki herle warogo 'bisegarekma werekma ukisikhesik nen, arlokop ade 'bogokhogon wakhukha. 11Arlokop ade 'bogokhogon warogo, ukuloak palek piring thabia baga temerogo wolok wageikhemo horlak tharlisik etnogo wogokhikhe. Wogokhikhemo, horlak etnogo nen, agosa wogosi lageikhe. 12Itithogon hagakhukhama, at Yohanes agarumi wagoukhasik nen, ebe warek etnogo agatma thaldiluk nen, Yesus yogosi lagoukha.

Itithogon hagakhukhasik dogolik, at Herodes nen Yesus abok holhikhesik,

“Yohanes iluk agasik hagariogo higi,” iluk isikhe iti.

Yesus nen akhuni inebe 5.000 meke hipiri titurogon melageisasikhe wene

(Markus 6:30-44; Lukas 9:10-17; Yohanes 6:1-14)

13Akhuni aperek nen,

“Herodes nen Yohanes wakhe,” iluk isukhama, Yesus asuk holhikhesik nen, o etoma thogotdiluk, imake ku warogo arligat tekhogon o akhuni inaren dekma etoma lageikhemo, akhuni inebe motok doalegat inasuk holiluk, inaila ukul dopok nen i aik obake nen oporlik lagoukha. 14It alebageik lagoukhasik werekma, at Yesus imake ku warogo laga lageikhesik, ku akla nen inoba dukhisikhesik, akhuni doalegat emenogo ileken lageisalok akmurinabiluk nen, it u warek meke emenogo hano hagarinakhikhe. 15Itithogon u hano hagarinakhe korlek, o arat liok isikhemo nen, at ane waganhe lagoukha meke emenogo Yesus oba wagoukhasik, men yogokhukha,

“Nit o yoma akhuni inaren dekma werekma, o arat liok ekhe yoma, akhuni doalegat yoma inapiri inekaerek oko paloak nen he, o yoma aliluke o ukul 'bugurlagatmake la'isan o,” iluk yogokhukhama, 16at Yesus nen,

“It yoma nen lausak dek o. Inapiri nausak meke hit nenat melageisani o,” iluk yogeisasikhe. 17Itithogon yogeisasikhemo, it nen,

“Nit he, hipiri roti meke 5. Nen, ikan he, pere. Eta anek hago welago o,” iluk yogokhukha. 18Itithogon yogokhukhama, at Yesus nen he,

“Etaat woknisitni o,” iluk yogeisasikhe.

19Yogeisasikhemo, wogosi agoukhama, at Yesus nen akhuni doalegat emenogo men yogeisasikhe,

“Pipuk ekamake ethoma hureklarik lani o,” iluk yogeisasikhemo hureklarik lagoukhama nen, roti 5 eranogo inom, ikan pere eranogo inom, ikimo waganhikhesik nen, ileken pogot oba liakhasikhesik, Allah heagei warogo nen, roti kusogo agarumi ane waganhe lagoukha meke emenogo nen supurisoagaluk wogeisasikhemo it nen supurisasukha. 20Supurisasukhama, it inebe tha'bokhogonat hipira ina'ithogon nasukhasik titurogon, mul yago 12 oba apem hethokhogon ukharlogo 'bisukha. 21Akhuni inebe tha'bokhogonat nasukha meke iti, yekerugi inom, humi inom, iniki wenageinakhidek. Ap inarluetek anek he, inebe 5.000 meke wenageinakhukha.

Yesus isok i agoum obake holak wageikhe wene

(Markus 6:45-52; Yohanes 6:16-21)

22Itithogon arat nasukhama nen, at Yesus nen at agarumi ane waganhe lagoukha meke emenogo men yogeisasikhe,

“An akhuni doalegat yoma la'isak nen, hit tak ku akla ukiluk i aik ilibaganke italhe dogoni o,” iluk ane obatnerogon yogeisasikhe. 23Itithogon yogeisasikhemo nen, itali aga korlek, at Yesus nen akhuni emenogo inailake tomok la'isasikhesik nen, at arligat anek tom oba sembayan igiluk dageisikhesik werekma o hi ageikhemo, arligat etoma welageikhe. 24Werek korlek, agarumi emenogo imake ku warogo walegat i tumo heisogon asi wagoukhasikmo, hisakne obatnerogon inelokhomake nen hubetha ageikhemo, i hoklabu apigat hulalogo-dekalogo waga dogolik, ku etnogo abel dekak-hekakhogon hagakhe lageikhe. 25Itithogon hagakhe korlek, o wik-wik jam 3 hakene a, jam 6 hakene a, at Yesus inoba wisigiluk, i agoum obake isok 'bilik wageikhe. 26Itithogon isok i agoum obake 'bilik wagunem, it agarumi ane waganhe lagoukha meke emenogo inileken lakhasukhasik nen, inakmaken lagoukhasik, inayuk nen,

“Eiye! Mokat waga ithi,” iluk, inane naik-waik isukha. 27Itithogon isukhama, at Yesus nen he,

“Hinagot akma. Nagarumi. An nebeat waga lagei. Halok he, hinayuk agup o,” iluk yogeisasikhemo, 28At Petrus nen he,

“Noe. Hat hebeat halok he, an hoba i agoum obake wisik nen he,

Eme o, iluk yoknom,” iluk yogokhikhemo 29at Yesus nen,

“Eme o,” iluk yogokhikhemo, at Petrus etnogo ku akla nen dukhisikhesik nen, i agoum obake Yesus oba lageikhe. 30Lagunem nen, hisakne obatnerogon hubetha ageikhemo, ileken halok ayuk ageikhesik, ima na'bukhogon usagein thalekma, ane naik ekhe dogolik,

“Eiye! Noe! Tilnabi me o,” isinem eranogoat, 31Yesus nen iki hago meldekhe dogolik,

“Hat hetaiken noba hakotdigidek, hetaiken pere welaganma iti nenaluk,” iluk yogokhikhesik, 32it ipisak ku akla ukisukha hak, hisakne etnogo dek ageikhe. 33Dek ageikhemo, it ku akla welagoukha meke emenogo nen Yesus hogorakhe dogolik,

“Hat eberogonat Allah a'but heogo o,” iluk yogokhukha.

Yesus nen akhuni o Genesaret meke u hano hagarinakhikhe wene

(Markus 6:53-56)

34Itithogon hagatluk, etoma nen ku warogo itali aga lagoukhasik nen, o Genesaret eta mot-mot asi agoukha. 35Wagunem nen, it akhuni etoma meke nen Yesus ebe arat hutdisukhasik nen, at abok o ukul dopok yogeisilik lagoukha. Yogeisilik lagoukhama, akhuni u warek meke tha'bokhogonat wogosik Yesus oba wagoukhma, 36it nen Yesus asu ilugun anek iniki hakhauwogoluk kino iluk asu etnogo iniki hakhasukha meke inoba hano agoukha.

Currently Selected:

Matius 14: LAIDNT

Highlight

Copy