Markus 6
6
Akhuni o Nazaret meke nen, Yesus inakla meanetdisukha wene
(Matius 13:53-58; Lukas 4:16-30)
1Yabokane, at Yesus o etoma nen dukhisikhesik, ekaerek ai erloma lageikhe. Lagunem, agarumi ane waganhe lagoukha meke emenogo oporlik lagoukha. 2Lagoukhasik, iniki 7 baga Allah hasik werlegat dogolik, o akhuni Yahudi meke sembayan egarekma inebe doalegat werekma inoba ukisikhesik, wene yakulisasikhe. Yakulisugunem, it inebe doalegat emenogo nen, men isukha,
“Eiye! Nayuk o. Ap yi itithogon hagarik liliogo iti, koma nen yakulhesik hagariogo. Akla kagalek motok iti, wene nena wene akla dogolik yoknisiliogo. Iki hageisugunem elalinat hagarinabiogo iti, nikithogon hagarinabiogo. 3At ebe he Maria eak o halherek meke etnogo dek? Agarumi oporlik meke, Yakobus men, Yoses men, Yudas men, Simon men, apigi. Nen, erugi nit ninom welago yoma dek?” iluk inakla meanetdisukhasik kolelogo thogotdisukha. 4Inakla meanetdisukhama, at Yesus nen men yogeisasikhe,
“It ap Allah ane yogeisegarek meke iti, o yi ai ti ai lagunem, akhuni aperek nen inalon halinakharek mekeat he, o inekaerek inai erloma lagunem it inougi inageikhugi men, inai opakimo welageikharek meke men, it nen anek he, inalon halinakharek dek o,” iluk yogeisasikhe. 5Itithogon hagakhukha iti nen, at Yesus o etoma dogolik elalin meke ageikhe hagakhidek thogotdisikhe. It akhuni u inoba meke inebe pererlagat anek iki hageisalok hano hagarinakhikhe. 6Hagarinakhikhesik, it akhuni etoma meke nen at ebe inakla meanetdisukha iti hasik, at akla nen,
“Eiye! Nayuk o,” iluk apasikhesik yabokane o etoma aliluke o halekmake wene yakulisilik nekhe lageikhe.
Yesus nen, ap inebe 12 oba inayoko 'biluk la'isasikhe wene
(Matius 10:5-15; Lukas 9:1-6)
7Itithogon yakulisilik nekhe dogolik, ap inebe 12 nen emenogo waisasikhemo wagoukhama, inebe peretek dopokhigik la'isagaluk inayoko 'biluk, mokat inobabut weak meke akhuni inakla ukisukhasik werekma mukhogo ula'isilik loagaluk, at obatne wogeisasikhe. 8Wogeisasikhesik inasuk wakhe dogolik, men yogeisasikhe,
“Hit he, holagarlem meke hasik yi meke ti meke ageikhe motok wolok lagup o. Thegerluk anek wolok lano. Wolok laga dogolik, hipiri men, holagarlemke kino ilik su ukhasusak meke men, uang men, ageikhe motok waganhup o. 9Hinisok agot anek ikhogo laga dogolik, hinoado baga su peretek ikhidek opakiat anek ikhogo lano,” iluk yogeisilik ageikhe men yogeisasikhe,
10“Akhuni inoba lalok, o ya ukigik, ta ukigik, ukekhe dogogup o. Ukugun oba etomaat dogoluk o ninmo luogoluk halok etoma nenat dukhitluk lano o. 11It akhuni o ageikhe nen hinebe wokhinakhik, hinane holhik, hagakhidek halok he, o iti nen dukhi aga dogolik, it o etoma meke inakla hutduagaluk, hinisok hola negen horogo 'biluk dukhitno,” iluk inasuk warogo la'isasikhe. 12It emenogo itithogon la'isasikhemo laga dogolik, akhuni men yogeisilik lagoukha,
“Hit weak hagakhe lagap meke iti here'isalok hinobabut hebelatni o,” iluk yogeisilik nekhe dogolik, 13mokat inobabut weak meke doalegat akhuni inakla ukiluk werekma mukhogo ula'isigik, u inoba welagoukha meke inebe doalegat minyak eken apusu inukuloak oba usabogo hano hagarinakhik, hagarik lagoukha.
Yohanes ima usa'isekhe lageikhe meke etnogo ebe wakhukha wene
(Matius 14:1-12; Lukas 9:7-9)
14Yesus agarumi nen itithogon hagarinabik lagunem, at Yesus etaga akhuni o ya ta etoma inilu agoukhasik abok ugunem, at kok etagapogot Herodes asuk holhikheat. Itithogon hagakhunem it akhuni aperek nen men ekhe lagoukha,
“Yohanes ima usa'inakhe lageikhe meke ebe wakhama watlaga etnogo iluk agasik waga higi. Itithogon iluk agasik iti nen hagasusak dek meke elalinat hagariogo iti,” igik, 15nen, it aperek nen,
“Dek o. Iti at Elia ebeat o,” igik, it aperek nen,
“Dek o. It ap haganeat Allah ane yogeisekhe lagoukha meke nen yogeisekhe lagoukha hagat, yogeisilik liliogo iti, at ebe it iti meke ageikhe thelekma agasik liliogo,” igik, ebe Yesus mekeat itithogon ekhe lagoukha iti. 16Itithogon ugunem abok at Herodes asuk holhikhesik men isikhe,
“Dek o. At Yohanes arlokop ade palogo wakhima watlaga etnogo yabokane iluk agasik hagariogo itiat o,” iluk isikhe. 17-18Itithogon isikhe iti, haganeat at Herodes nen agot Filipus age etaga Herodias iti waganhikhemo at Yohanes nen men yogokhe lageikhe,
“Hat nen hagot age waganusak dekma waganhen iti waganek dogosak erlok dek o,” iluk eran-alep ekarli warogo yogokhe lageikhe iti nen, at nen ap inayoko 'bisikhemo Yohanes ebe hakha lagoukhasik wolok wagoukhasik iki herle warogo o iniki herle warogo 'bisegarekma kola'isukha. 19-20Kola'isukhama werekma, at he Herodias nen, at akla ua iluk dogolik,
“Yohanes iti motok na'it,” iluk at Herodes nen wasuagaluk akla kagalhe lageikhe mekeat he, at Herodes akla nen men apekhe lageikhe,
“At Yohanes ebe Allah nen la'i ageikhemo dogolik obabut morat hagariogo,” iluk obabut palogo ebe alon halhe dogolik wasusak erlok dek ageikhemo, ebe irlirli waganogo hago welageikhe. Hago dogolik, ane holhe dogou warlok nen holhe lageikhe mekeat he, holhe dogolik, wene munini doalegat ebekhe lageikhe. 21Itithogon ebekho werekma, at Herodes ebe itaklageikhe baga hurli arat asi ageikhemo, pesta kok isago nuogoluk, agarumi pemerintah meke kaintek men, ap tentara inougi men, ap inetaga werek o Galilea eloke meke men, inom isago nuogoluk inayoko 'bisikhemo natogokhukha itinem, at he Herodias akla nen,
“An nen Yohanes motok na'it wasuak apekhe lagei etnogo yogotak erlok yi baga wasuak,” iluk apasikhe. 22Itithogon apasikhesik, pesta isago nukunem, at eak horlak tharlisik meke kola'isikhemo ukisikhesik etai uak sa'bik sa'bok wakhe dogolik, hano motok wakhikhemo, at Herodes ebe men, ap ukisukha meke emenogo men, inakla arleken agoukha. Inakla arleken agoukhama, at kok etagapogot Herodes iti nen men yogokhikhe,
“Hat nen nena meke kino yoknekhen halok wokhesiginat o. 23O yoma an kok dogolik hagasik welagarethekma hat nen,
Iti meke warlok, egen halok he, heisogon mikirlogo ebelake wokhesiginat o,” iluk Allah etaga hupuk palogo yogokhikhe. 24Yogokhikhemo at horlak tharlisik etnogo dukhisikhesik agosa oba lageikhesik men yogokhikhe,
“An nen nena meke kino ik,” iluk yogokhikhemo at nen, men yogokhikhe,
“At Yohanes ima usa'inakherek meke etnogo ukuloak palogo wokhesuak nen, kino yogotno,” iluk yogokhikhe. 25Itithogon yogokhikhemo eranogoat, at kok etagapogot etnogo 'bikha lageikhesik men yogokhikhe,
“Nopase, at Yohanes ima usa'inakherek meke etnogo ukuloak palogo piring kok thabia baga temerogo yogotak yaat woknetnok o. An itiat warlok,” iluk yogokhikhemo, 26at kok Herodes etnogo akla motok weak ageikhe. Itithogon weak ageikhe mekeat he,
“An nen nagarumi ninom pesta isago neke dogolik inilhanem,
Allah etaga hupuk palogo eberogonat wokhesigin o, iluk abok yogokhirikmo, kamotdusak na'it o. Wogosiginat o,” iluk akla apasikhe. 27Itithogon akla apasikhesik, ap tentara meke akhuni iniki herle warek hagasik welagoukha meke ageikhe men yogokhikhe,
“Yohanes etnogo arlokop ade tekhogon ukuloak palogo wolok wetno,” iluk la'isikhe. La'isikhemo o iniki herle warogo 'bisegarekma lageikhesik, Yohanes ebe arlokop ade tekhogon wakhikhesik ukuloak palhikhe. 28Palhikhesik, ukuloak palek piring kok thabia meke baga temerogo horlak tharlisik etnogo wogosi ageikhe. Wogokhikhemo at nen, agosa wogosi lageikhe. 29Itithogon hagakhukhama, akhuni nen he,
“Yohanes itithogon wakhama warek werek,” iluk isukhama, it Yohanes agarumi ane waganhe lagoukha meke emenogo inasuk holhukhasik ebe warek etnogo wagani agoukhasik, oila warek 'bisegarekma 'bi lagoukhasik werekma nen, at Herodes nen Yesus abok holhikhesik,
“Yohanes iluk agasik hagariogo higi,” iluk isikhe iti.
Akhuni inebe 5.000 oba Yesus nen hipiri tituherle melageisasikhe wene
(Matius 14:13-21; Lukas 9:10-17; Yohanes 6:1-14)
30It ap Yesus nen inayoko 'biluk la'isasikhe meke emenogo inapuke at oba natogosi agoukhasik nen, men yogokhukha,
“Nit nen yigithogon hagakho, tigithogon hagakho. Wene yigithogon yakulisogo, tigithogon yakulisogo,” iluk motok pilinogo yogokhukha. 31Itithogon yogokhunem, akhuni doalegat etoma lageik, wageik, hagakhunem hipiri nikithogon nau heat hagatlageikhemo, at Yesus nen agarumi men yogeisasikhe,
“Thet herlekha'bugat walubageik nen, o akhuni inaren dekma ninasokneat ponhogo luok o,” iluk yogeisasikhe. 32Itithogon yogeisasikhesik at ebe inom it inasokneat ku warogo, o akhuni inaren dekma italhukha. 33Italhunem, it akhuni doalegat inileken lageisalok nen,
“It etnogo iti higi,” iluk hutdisasukha. Hutdisalok, it o yi ai ti ai dopok tha'bokhogonat nen i arlo bagake pirlirli alebageik inelokhoma natogosi lagoukhasik werekma, it Yesus lak emenogo yabokane italhukha. 34Italhukhasik, at Yesus ku akla nen dukhekhe dogolik, akhuni doalegat emenogo ileken lageisalok nen akmurinakhikhesik men isikhe,
“Domba hagasik welageikharek hak, it yoma hagasik dogou meke inebe dek nen werek yi. Nakmu lak o,” iluk yi wene ti wene doalegat yakulisekhe lageikhe. 35Yakulisekhe korlek, o liok isikhemo, Yesus agarumi ane waganhe lagoukha meke emenogo oba wagoukhasik nen, men yogokhukha,
“Nit o yoma akhuni inaren dekma werekma, o arat liok ekhe yi. 36Halok he, akhuni yoma, aliluke o ukul kokmake 'bugurlagatmake inapiri inekaerek hasik oko pali loak nen, la'isan o,” iluk yogokhukha. 37Itithogon yogokhukhama, at Yesus nen,
“Hit nenat melageisani o,” iluk yogeisasikhemo, it nen men yogokhukha,
“Eiye! Akhuni nen yabu iniki opaki hasik hagakhunem, iniki oko uang wogeisegarek iti hakene meke, nit nen 200 wolok, roti oko palogo akhuni yigirlikmo erlok melageisoagaluk ekhe lagan? Erlok dek o,” iluk yogokhukha. 38Itithogon yogokhukhama, at Yesus nen, men yogeisasikhe,
“Hit hipiri roti meke meren werek. Hinileken 'bikha lani o,” iluk yogeisasikhemo, it inileken 'bikha lalok nen wagoukhasik,
“Hipiri roti meke 5. Nen, ikan pere,” iluk yogosi agoukha. 39Yogosi agoukhama, at nen, men yogeisasikhe,
“Akhuni yoma inebe pipuk ekama thabuleka talek motokma ethoma amun waganhigik hureklarik loak nen yogeisani o,” iluk agarumi yogeisasikhemo 40it nen akhuni doalegat emenogo yogeisasukhama inebe thelalik thelalik hureklarik lagoukhama inebe aperek 100, aperek 50, amun waganhigik hureklarik lagoukha iti. 41Itithogon arat hureklasi lagoukhama, at Yesus nen hipiri roti meke 5 eranogo inom, ikan pere eranogo inom, ikimo waganhikhesik nen ileken pogot oba liakhasikhesik nen, Allah heagei warogo roti eranogo kusogo, agarumi ane waganhe lagoukha meke nen akhuni doalegat emenogo supurisoagaluk wogeisasikhe. Nen, ikan pere eranogo itithogonat it tha'bokhogonat supurisoagaluk palogo wogeisasikheat. 42Supurisasukhama, it inebe tha'bokhogonat ina'ithogonat nasukha. 43Itithogon nasukhasik nen, roti kusik ato inom, ikan palek ato inom, titurogo 'bisukhama Yesus agarumi nen natogorlogo mul yago meke 12 oba apem hethokhigik ukharlogo 'bisukha. 44Hipiri roti meke nasukha iti, ap anek inebe 5.000 nasukha.
Yesus isok i agoum obake holak wageikhe wene
(Matius 14:22-33; Yohanes 6:15-21)
45Itithogon arat nasukhama eranogo nen, at Yesus nen, agarumi ane waganhe lagoukha meke emenogo men yogeisasikhe,
“An akhuni doalegat yoma la'isak nen, hit tak ku akla ukiluk, o Betsaida aik ilibaganke etoma itali lani o,” iluk ane obatnerogonat yogeisasikhe. 46Itithogon yogeisasikhemo itali aga korlek, at Yesus nen it akhuni emenogo arat la'isalok, at sembayan igiluk tom oba dageisikhe. 47Dageisikhesik at agarumi emenogo i yekelekma ku warogo turlem heisogo werek korlek, Yesus arligat tom oba werekma o arat hi ageikhe. 48O hi ageikhemo nen, hisakne inelokhomake nen hubetha agunem, it ku aninirogon warik wagunem, Yesus ileken lageisasikhe. Ileken lageisalok nen, o wi igiluk jam 3 jam 4 negen, at isok i agoum obake 'bilik inoba wageikhesik nen, inaliluke piokhogon lagaluk negen hagakhikhe. 49-50Itithogon hagakhunem, it tha'bokhogonat nen at isok i agoum obake 'bilik wagunem inileken lakhalok ebe mokat thalek inakmaken lalok inayuk nen inane naik isukha. Itithogon ugunem eranogoat, at Yesus nen men yogeisasikhe,
“Nagarumi, hinagorakma. An nebeat waga lagei. Halok he, hinayuk agup o,” iluk yogeisasikhe. 51Itithogon ane hageinabiluk nen ku baga inoba ukisikhemo, hisakne etnogo dek ageikhe. Dek ageikhemo, it nen,
“Eiye. Nayuk o,” iluk motok hogorakhukha. 52Itithogon hogorakhukha iti, alebat roti titurogon wogeisasikhe etnogo hutdigidek inakla pugat dogolik, yabokane hisakne dek ageikhemo hogorakhukha iti.
Yesus nen akhuni o Genesaret meke inoba u hano hagarinakhikhe wene
(Matius 14:34-36)
53Itithogon hagakhukhama, at Yesus lak o Genesaret, i yekelek etnogo aik ilibaganke itali agoukhasik nen, ku etnogo hol o tilogo 'bisukha. 54Ku hol o tilogo 'biluk dukhi agunem, it akhuni etoma meke nen eranogoat,
“Yesus lak ithi,” iluk hutdisasukha. 55Hutdisukhasik nen, pirlirli o ya ta etoma lagoukhasik it aperek nen,
“Yesus o etoma werek,” iluk, ugunem inasuk holhukhasik, akhuni inoba u warek meke o perlago Yesus oba wogosik waga lagoukha. 56At Yesus ebe o ukul kokma ukigik, o 'bugurlagatma ukigik, o asokneat ponhogo halekma ukigik, hagakhunem, it akhuni nen it aperek inoba u warek meke wogosik o silimo 'bisa aga lagoukha. 'Bisa aga lagoukhama it nen,
“Yesus, hasu ilugun anek niniki hakhauwok a?” iluk inane ina'buarek inane yogokhukhasik, it at asu iniki hakhasukha meke tha'bokhogonat inoba hano agoukha.
Currently Selected:
Markus 6: LAIDNT
Highlight
Share
Copy
Want to have your highlights saved across all your devices? Sign up or sign in
Markus 6
6
Akhuni o Nazaret meke nen, Yesus inakla meanetdisukha wene
(Matius 13:53-58; Lukas 4:16-30)
1Yabokane, at Yesus o etoma nen dukhisikhesik, ekaerek ai erloma lageikhe. Lagunem, agarumi ane waganhe lagoukha meke emenogo oporlik lagoukha. 2Lagoukhasik, iniki 7 baga Allah hasik werlegat dogolik, o akhuni Yahudi meke sembayan egarekma inebe doalegat werekma inoba ukisikhesik, wene yakulisasikhe. Yakulisugunem, it inebe doalegat emenogo nen, men isukha,
“Eiye! Nayuk o. Ap yi itithogon hagarik liliogo iti, koma nen yakulhesik hagariogo. Akla kagalek motok iti, wene nena wene akla dogolik yoknisiliogo. Iki hageisugunem elalinat hagarinabiogo iti, nikithogon hagarinabiogo. 3At ebe he Maria eak o halherek meke etnogo dek? Agarumi oporlik meke, Yakobus men, Yoses men, Yudas men, Simon men, apigi. Nen, erugi nit ninom welago yoma dek?” iluk inakla meanetdisukhasik kolelogo thogotdisukha. 4Inakla meanetdisukhama, at Yesus nen men yogeisasikhe,
“It ap Allah ane yogeisegarek meke iti, o yi ai ti ai lagunem, akhuni aperek nen inalon halinakharek mekeat he, o inekaerek inai erloma lagunem it inougi inageikhugi men, inai opakimo welageikharek meke men, it nen anek he, inalon halinakharek dek o,” iluk yogeisasikhe. 5Itithogon hagakhukha iti nen, at Yesus o etoma dogolik elalin meke ageikhe hagakhidek thogotdisikhe. It akhuni u inoba meke inebe pererlagat anek iki hageisalok hano hagarinakhikhe. 6Hagarinakhikhesik, it akhuni etoma meke nen at ebe inakla meanetdisukha iti hasik, at akla nen,
“Eiye! Nayuk o,” iluk apasikhesik yabokane o etoma aliluke o halekmake wene yakulisilik nekhe lageikhe.
Yesus nen, ap inebe 12 oba inayoko 'biluk la'isasikhe wene
(Matius 10:5-15; Lukas 9:1-6)
7Itithogon yakulisilik nekhe dogolik, ap inebe 12 nen emenogo waisasikhemo wagoukhama, inebe peretek dopokhigik la'isagaluk inayoko 'biluk, mokat inobabut weak meke akhuni inakla ukisukhasik werekma mukhogo ula'isilik loagaluk, at obatne wogeisasikhe. 8Wogeisasikhesik inasuk wakhe dogolik, men yogeisasikhe,
“Hit he, holagarlem meke hasik yi meke ti meke ageikhe motok wolok lagup o. Thegerluk anek wolok lano. Wolok laga dogolik, hipiri men, holagarlemke kino ilik su ukhasusak meke men, uang men, ageikhe motok waganhup o. 9Hinisok agot anek ikhogo laga dogolik, hinoado baga su peretek ikhidek opakiat anek ikhogo lano,” iluk yogeisilik ageikhe men yogeisasikhe,
10“Akhuni inoba lalok, o ya ukigik, ta ukigik, ukekhe dogogup o. Ukugun oba etomaat dogoluk o ninmo luogoluk halok etoma nenat dukhitluk lano o. 11It akhuni o ageikhe nen hinebe wokhinakhik, hinane holhik, hagakhidek halok he, o iti nen dukhi aga dogolik, it o etoma meke inakla hutduagaluk, hinisok hola negen horogo 'biluk dukhitno,” iluk inasuk warogo la'isasikhe. 12It emenogo itithogon la'isasikhemo laga dogolik, akhuni men yogeisilik lagoukha,
“Hit weak hagakhe lagap meke iti here'isalok hinobabut hebelatni o,” iluk yogeisilik nekhe dogolik, 13mokat inobabut weak meke doalegat akhuni inakla ukiluk werekma mukhogo ula'isigik, u inoba welagoukha meke inebe doalegat minyak eken apusu inukuloak oba usabogo hano hagarinakhik, hagarik lagoukha.
Yohanes ima usa'isekhe lageikhe meke etnogo ebe wakhukha wene
(Matius 14:1-12; Lukas 9:7-9)
14Yesus agarumi nen itithogon hagarinabik lagunem, at Yesus etaga akhuni o ya ta etoma inilu agoukhasik abok ugunem, at kok etagapogot Herodes asuk holhikheat. Itithogon hagakhunem it akhuni aperek nen men ekhe lagoukha,
“Yohanes ima usa'inakhe lageikhe meke ebe wakhama watlaga etnogo iluk agasik waga higi. Itithogon iluk agasik iti nen hagasusak dek meke elalinat hagariogo iti,” igik, 15nen, it aperek nen,
“Dek o. Iti at Elia ebeat o,” igik, it aperek nen,
“Dek o. It ap haganeat Allah ane yogeisekhe lagoukha meke nen yogeisekhe lagoukha hagat, yogeisilik liliogo iti, at ebe it iti meke ageikhe thelekma agasik liliogo,” igik, ebe Yesus mekeat itithogon ekhe lagoukha iti. 16Itithogon ugunem abok at Herodes asuk holhikhesik men isikhe,
“Dek o. At Yohanes arlokop ade palogo wakhima watlaga etnogo yabokane iluk agasik hagariogo itiat o,” iluk isikhe. 17-18Itithogon isikhe iti, haganeat at Herodes nen agot Filipus age etaga Herodias iti waganhikhemo at Yohanes nen men yogokhe lageikhe,
“Hat nen hagot age waganusak dekma waganhen iti waganek dogosak erlok dek o,” iluk eran-alep ekarli warogo yogokhe lageikhe iti nen, at nen ap inayoko 'bisikhemo Yohanes ebe hakha lagoukhasik wolok wagoukhasik iki herle warogo o iniki herle warogo 'bisegarekma kola'isukha. 19-20Kola'isukhama werekma, at he Herodias nen, at akla ua iluk dogolik,
“Yohanes iti motok na'it,” iluk at Herodes nen wasuagaluk akla kagalhe lageikhe mekeat he, at Herodes akla nen men apekhe lageikhe,
“At Yohanes ebe Allah nen la'i ageikhemo dogolik obabut morat hagariogo,” iluk obabut palogo ebe alon halhe dogolik wasusak erlok dek ageikhemo, ebe irlirli waganogo hago welageikhe. Hago dogolik, ane holhe dogou warlok nen holhe lageikhe mekeat he, holhe dogolik, wene munini doalegat ebekhe lageikhe. 21Itithogon ebekho werekma, at Herodes ebe itaklageikhe baga hurli arat asi ageikhemo, pesta kok isago nuogoluk, agarumi pemerintah meke kaintek men, ap tentara inougi men, ap inetaga werek o Galilea eloke meke men, inom isago nuogoluk inayoko 'bisikhemo natogokhukha itinem, at he Herodias akla nen,
“An nen Yohanes motok na'it wasuak apekhe lagei etnogo yogotak erlok yi baga wasuak,” iluk apasikhe. 22Itithogon apasikhesik, pesta isago nukunem, at eak horlak tharlisik meke kola'isikhemo ukisikhesik etai uak sa'bik sa'bok wakhe dogolik, hano motok wakhikhemo, at Herodes ebe men, ap ukisukha meke emenogo men, inakla arleken agoukha. Inakla arleken agoukhama, at kok etagapogot Herodes iti nen men yogokhikhe,
“Hat nen nena meke kino yoknekhen halok wokhesiginat o. 23O yoma an kok dogolik hagasik welagarethekma hat nen,
Iti meke warlok, egen halok he, heisogon mikirlogo ebelake wokhesiginat o,” iluk Allah etaga hupuk palogo yogokhikhe. 24Yogokhikhemo at horlak tharlisik etnogo dukhisikhesik agosa oba lageikhesik men yogokhikhe,
“An nen nena meke kino ik,” iluk yogokhikhemo at nen, men yogokhikhe,
“At Yohanes ima usa'inakherek meke etnogo ukuloak palogo wokhesuak nen, kino yogotno,” iluk yogokhikhe. 25Itithogon yogokhikhemo eranogoat, at kok etagapogot etnogo 'bikha lageikhesik men yogokhikhe,
“Nopase, at Yohanes ima usa'inakherek meke etnogo ukuloak palogo piring kok thabia baga temerogo yogotak yaat woknetnok o. An itiat warlok,” iluk yogokhikhemo, 26at kok Herodes etnogo akla motok weak ageikhe. Itithogon weak ageikhe mekeat he,
“An nen nagarumi ninom pesta isago neke dogolik inilhanem,
Allah etaga hupuk palogo eberogonat wokhesigin o, iluk abok yogokhirikmo, kamotdusak na'it o. Wogosiginat o,” iluk akla apasikhe. 27Itithogon akla apasikhesik, ap tentara meke akhuni iniki herle warek hagasik welagoukha meke ageikhe men yogokhikhe,
“Yohanes etnogo arlokop ade tekhogon ukuloak palogo wolok wetno,” iluk la'isikhe. La'isikhemo o iniki herle warogo 'bisegarekma lageikhesik, Yohanes ebe arlokop ade tekhogon wakhikhesik ukuloak palhikhe. 28Palhikhesik, ukuloak palek piring kok thabia meke baga temerogo horlak tharlisik etnogo wogosi ageikhe. Wogokhikhemo at nen, agosa wogosi lageikhe. 29Itithogon hagakhukhama, akhuni nen he,
“Yohanes itithogon wakhama warek werek,” iluk isukhama, it Yohanes agarumi ane waganhe lagoukha meke emenogo inasuk holhukhasik ebe warek etnogo wagani agoukhasik, oila warek 'bisegarekma 'bi lagoukhasik werekma nen, at Herodes nen Yesus abok holhikhesik,
“Yohanes iluk agasik hagariogo higi,” iluk isikhe iti.
Akhuni inebe 5.000 oba Yesus nen hipiri tituherle melageisasikhe wene
(Matius 14:13-21; Lukas 9:10-17; Yohanes 6:1-14)
30It ap Yesus nen inayoko 'biluk la'isasikhe meke emenogo inapuke at oba natogosi agoukhasik nen, men yogokhukha,
“Nit nen yigithogon hagakho, tigithogon hagakho. Wene yigithogon yakulisogo, tigithogon yakulisogo,” iluk motok pilinogo yogokhukha. 31Itithogon yogokhunem, akhuni doalegat etoma lageik, wageik, hagakhunem hipiri nikithogon nau heat hagatlageikhemo, at Yesus nen agarumi men yogeisasikhe,
“Thet herlekha'bugat walubageik nen, o akhuni inaren dekma ninasokneat ponhogo luok o,” iluk yogeisasikhe. 32Itithogon yogeisasikhesik at ebe inom it inasokneat ku warogo, o akhuni inaren dekma italhukha. 33Italhunem, it akhuni doalegat inileken lageisalok nen,
“It etnogo iti higi,” iluk hutdisasukha. Hutdisalok, it o yi ai ti ai dopok tha'bokhogonat nen i arlo bagake pirlirli alebageik inelokhoma natogosi lagoukhasik werekma, it Yesus lak emenogo yabokane italhukha. 34Italhukhasik, at Yesus ku akla nen dukhekhe dogolik, akhuni doalegat emenogo ileken lageisalok nen akmurinakhikhesik men isikhe,
“Domba hagasik welageikharek hak, it yoma hagasik dogou meke inebe dek nen werek yi. Nakmu lak o,” iluk yi wene ti wene doalegat yakulisekhe lageikhe. 35Yakulisekhe korlek, o liok isikhemo, Yesus agarumi ane waganhe lagoukha meke emenogo oba wagoukhasik nen, men yogokhukha,
“Nit o yoma akhuni inaren dekma werekma, o arat liok ekhe yi. 36Halok he, akhuni yoma, aliluke o ukul kokmake 'bugurlagatmake inapiri inekaerek hasik oko pali loak nen, la'isan o,” iluk yogokhukha. 37Itithogon yogokhukhama, at Yesus nen,
“Hit nenat melageisani o,” iluk yogeisasikhemo, it nen men yogokhukha,
“Eiye! Akhuni nen yabu iniki opaki hasik hagakhunem, iniki oko uang wogeisegarek iti hakene meke, nit nen 200 wolok, roti oko palogo akhuni yigirlikmo erlok melageisoagaluk ekhe lagan? Erlok dek o,” iluk yogokhukha. 38Itithogon yogokhukhama, at Yesus nen, men yogeisasikhe,
“Hit hipiri roti meke meren werek. Hinileken 'bikha lani o,” iluk yogeisasikhemo, it inileken 'bikha lalok nen wagoukhasik,
“Hipiri roti meke 5. Nen, ikan pere,” iluk yogosi agoukha. 39Yogosi agoukhama, at nen, men yogeisasikhe,
“Akhuni yoma inebe pipuk ekama thabuleka talek motokma ethoma amun waganhigik hureklarik loak nen yogeisani o,” iluk agarumi yogeisasikhemo 40it nen akhuni doalegat emenogo yogeisasukhama inebe thelalik thelalik hureklarik lagoukhama inebe aperek 100, aperek 50, amun waganhigik hureklarik lagoukha iti. 41Itithogon arat hureklasi lagoukhama, at Yesus nen hipiri roti meke 5 eranogo inom, ikan pere eranogo inom, ikimo waganhikhesik nen ileken pogot oba liakhasikhesik nen, Allah heagei warogo roti eranogo kusogo, agarumi ane waganhe lagoukha meke nen akhuni doalegat emenogo supurisoagaluk wogeisasikhe. Nen, ikan pere eranogo itithogonat it tha'bokhogonat supurisoagaluk palogo wogeisasikheat. 42Supurisasukhama, it inebe tha'bokhogonat ina'ithogonat nasukha. 43Itithogon nasukhasik nen, roti kusik ato inom, ikan palek ato inom, titurogo 'bisukhama Yesus agarumi nen natogorlogo mul yago meke 12 oba apem hethokhigik ukharlogo 'bisukha. 44Hipiri roti meke nasukha iti, ap anek inebe 5.000 nasukha.
Yesus isok i agoum obake holak wageikhe wene
(Matius 14:22-33; Yohanes 6:15-21)
45Itithogon arat nasukhama eranogo nen, at Yesus nen, agarumi ane waganhe lagoukha meke emenogo men yogeisasikhe,
“An akhuni doalegat yoma la'isak nen, hit tak ku akla ukiluk, o Betsaida aik ilibaganke etoma itali lani o,” iluk ane obatnerogonat yogeisasikhe. 46Itithogon yogeisasikhemo itali aga korlek, at Yesus nen it akhuni emenogo arat la'isalok, at sembayan igiluk tom oba dageisikhe. 47Dageisikhesik at agarumi emenogo i yekelekma ku warogo turlem heisogo werek korlek, Yesus arligat tom oba werekma o arat hi ageikhe. 48O hi ageikhemo nen, hisakne inelokhomake nen hubetha agunem, it ku aninirogon warik wagunem, Yesus ileken lageisasikhe. Ileken lageisalok nen, o wi igiluk jam 3 jam 4 negen, at isok i agoum obake 'bilik inoba wageikhesik nen, inaliluke piokhogon lagaluk negen hagakhikhe. 49-50Itithogon hagakhunem, it tha'bokhogonat nen at isok i agoum obake 'bilik wagunem inileken lakhalok ebe mokat thalek inakmaken lalok inayuk nen inane naik isukha. Itithogon ugunem eranogoat, at Yesus nen men yogeisasikhe,
“Nagarumi, hinagorakma. An nebeat waga lagei. Halok he, hinayuk agup o,” iluk yogeisasikhe. 51Itithogon ane hageinabiluk nen ku baga inoba ukisikhemo, hisakne etnogo dek ageikhe. Dek ageikhemo, it nen,
“Eiye. Nayuk o,” iluk motok hogorakhukha. 52Itithogon hogorakhukha iti, alebat roti titurogon wogeisasikhe etnogo hutdigidek inakla pugat dogolik, yabokane hisakne dek ageikhemo hogorakhukha iti.
Yesus nen akhuni o Genesaret meke inoba u hano hagarinakhikhe wene
(Matius 14:34-36)
53Itithogon hagakhukhama, at Yesus lak o Genesaret, i yekelek etnogo aik ilibaganke itali agoukhasik nen, ku etnogo hol o tilogo 'bisukha. 54Ku hol o tilogo 'biluk dukhi agunem, it akhuni etoma meke nen eranogoat,
“Yesus lak ithi,” iluk hutdisasukha. 55Hutdisukhasik nen, pirlirli o ya ta etoma lagoukhasik it aperek nen,
“Yesus o etoma werek,” iluk, ugunem inasuk holhukhasik, akhuni inoba u warek meke o perlago Yesus oba wogosik waga lagoukha. 56At Yesus ebe o ukul kokma ukigik, o 'bugurlagatma ukigik, o asokneat ponhogo halekma ukigik, hagakhunem, it akhuni nen it aperek inoba u warek meke wogosik o silimo 'bisa aga lagoukha. 'Bisa aga lagoukhama it nen,
“Yesus, hasu ilugun anek niniki hakhauwok a?” iluk inane ina'buarek inane yogokhukhasik, it at asu iniki hakhasukha meke tha'bokhogonat inoba hano agoukha.
Currently Selected:
:
Highlight
Share
Copy
Want to have your highlights saved across all your devices? Sign up or sign in