MATIUS 14
14
Baptis Tei Tita Me Jahja Kidi Wagita
1Okai kou gaa kodo wiijago kabuuda maki jakimake-tai me Herodes kidi Jesus maida make mana juwii.
2Tijake jakei te-tai bageepa eteete mana, „Kii ke baptis tei tita me Jahja kidi, okai bokata bagee jupi make anigojake kouja okai duba bida agijoudo ewaa keete,” etii.
3Herodesja Jahja ejakimakijake wanee owaa duba buda egadimigoo amo eewita kouja, kenekame Pilipus kidi waka Herodiah maida make,
4Jahjaja etita mana kouja, „Umina dá didéé kodo, ebukeemege ko,” etita kouja.
5Herodes wagiine gajake meido weda egai. Okeija ka gai ko Jahja kidi Ugatameja gokobaki tijawiidaiga wega-tai me idaana egajake kouja.
6Kodeja Herodes pata naago kijake, Herodiahja jagamo joka kodo kotuu timakita me jupi gaida-gaida tai. Herodes ide umina egai.
7Okai kouja okaija ediimija agijo meniine tijake Herodes jatogijawita manaida baita makijawii.
8Api kodo ukame ka eti-mene-tijake kouja, Herodespa eteete mana, „Kiija baptis tei tita me Jahja kidi dagi ko tapuja dokouda naimi,” etii.
9Tijake maki jakimake-tai me kidi gaagaa umina. Kodeja baita makijake kouja, daana okai ma enaimo nopaido maida make kouja, mene-tijake me etimakai.
10Okai me ebadikumijake Jahja wanee owaa duba make ogo eduwai.
11Dagi kodo tapuja dokouda jadoke-mejake api kodoopa menii, tijake api kodaa ukame menigou.
12Jahja etope-taido má jato motigojake emakijawii; tijake Jesus ete-uwii.
Me Ida Lima Ribu Naija Agijo Jawudita
13Jesus okai kou mana kodo juwijake, okai kouda kodaa make wo kijake komaidaiga me beuda okainiinii uwii. Kodeja me wedaba kou mana juwijake okeija maki okogoopa make adaidaiga eepeete uwii.
14Jesus adijake me wedaba kotuu timaki-toojogo edou; okai ipa egajake okeija didi bagee beu jaawii.
15Uwaataa kijake etope-taido okaapa mejake eteete mana, „Kiija me beuda makijo, daana uwaataa keega. Meido kodo uwei neetii, maki okogoudoopa naija agijo eda-tita no,” etii.
16Jesus eteete mana, „Me te uwii. Ikii ke naija agijo menii,” etii.
17Okeija eteete mana, „Inii tumaana agijo ma beu, kodeja goti kemo idibi ma, binei ida wija ma to,” etii.
18Tijake Jesus eteete mana, „Aneepa naadoke-mewei,” etii.
19Tijake meido kodo bopu wado animake-tei etii. Daana goti kemo idibi ma, binei ida wija ma motijake epa maida wado dojake mobu ediimai. Goti utijake etope-taido menii, daana etope-taido meidoopa jawudii.
20Okei utoma nojake mobu kai. Utita abu kitaija kodo momotijake edu tapuja wija ma gaati ebetume awimakai.
21Goti nota bagee jame ida muto muto to ko muto, kou wado maija#14:21 lima ribu, daana jagamoudo ma, jokaido ma.
Jesus Uwo Wadouga Ita Uwii
22Okai kou gaa kodaa maija etope-taido koma matake-tijake bida peu kidi etimakai, okei tiga amo ade-tijake; okai kidaa meido uwei eteetigo gaa kodaa.
23Meido kodo uwei etimakijake okai kidi dimiida sembahjang taine wado uwii. Wanee kijake okai kidi to tou.
24Kodeja koma kodo peku epouda awijake ukija tuwai kouja gaagaa umina.
25Awiine jato gaa kodaa Jesus peku wadouga ita meete okeepa mei.
26Peku wadouga ita meete etope-taido edojake gootoki tijake wegaate mana, „Enija!” Okei weda ka emeeme tai.
27Kodeja okai kou gaa kodo Jesus mana oowegajake eteete mana, „Ei, kegepa tipinimakai. Ani no. Weda te gai,” etii.
28Tijake Peterus wo eteete mana, „Ei, Tuhan, maakidi aki kipe ko, akeepa uwo wadouga jawiine mei enii,” etii.
29Tijake Jesus „Mei” etijake Peterus koma duba make mijouwe kijake uwo wadouga Jesuspa ita uwii.
30Kodeja okai ukija kodo dojake weda gai. Gibu taine dani emeeme teete mana, „Ei, Tuhan, naadadai!” etii.
31Jesus kou gaa kodo gane mapido atijake ejakai, eteete mana, „Ei, epaapate maakodo gai beu me, magijo ka aki dimi takaida keege?” etii.
32Komaida wadouwe aakijake ukija kodo duwadoke tai.
33Tijake komaida tota bageido migaakobe eteete mana, „Beu maa kou, aki ki Ugatame Joka,” etii.
34Okei peku adijake Genesaret makijo dakii tai.
35Kou makijo ka bageido kede Jesus edomakijake, kou makijo bobe meido ebadikumijake didi bagee utoma oomei;
36ediimeete mana, okaija bado jato kagaba to jawinikido-tita. Jawinikidota daniija didi beu kidaa tai.
Currently Selected:
MATIUS 14: EKG
Highlight
Share
Copy
Want to have your highlights saved across all your devices? Sign up or sign in
