KEJADIAN 15
15
Allah nen Abram wene waretikhe wene
1A'nogo hilingitukwasik oba nen, At Tuhan nen Abram elokhoma weinam asi wagaikhesik ane yagati logoik: ”Abram, hailo agun o. Hoasuogeluk ugu halok An nen fetharek logolik, onggo hokho mene wokhesigin o,” iluk yagatikhe. 2-3A'nogo yagatikhe meneat he, at Abram en mel yagatikhe: ”Neisena Tuhan Allah Lego Mondok welagarek mene a'nogo nen, an namlogo ekhe wo'neti'lego. Andi nen, an namingmingengge Eliezer aiba Damsyik mene a'nogo eise asiginmo re, haren alomarogo onggo andi nenahalok wo'nesigeluk egen,” iluk yagatikhe.
4A'nogo yagatikhemo nen, Tuhan nen Abram mel yagatikhe: ”Hat halolegengge andi re, hamingmingengge andi nen helagain lego. We, hat honggwarek hamlogo nen helagain o,” iluk yagatunem esanggo holhikhe. 5A'nogo yagatikhesik, At Tuhan nen Abram ebe waluk olulu wulifikhesik he, mel yagatikhe: ”Heilenggen pogoroba liakhambik he, hesagal henggi higit wenasigin a? Lega? Walhan o. Walhamo re, haren tagongge mene re, hesagal hokhorogo liakhegen andi hangge sik-pik ugun o,” iluk yagatikhe.#Rm. 4:18; Ibr. 11:12 6A'nogo yagatikhemo re, at Abram endawinggen Tuhan oba himbiretfesikhe andi nen, At Tuhan nen he, ”Hat hobabut higithogo hilingiti lagen hak, hendawinggen An noba eberogoat himbiret fegen andiba, wene hoba mene korogo wokhigirik, hambotkwe hunogo hobagagi andi aro,” iluk wanhikhe.#Rm. 4:3; Gal. 3:6; Yak. 2:23
7Hobuk Tuhan nen he, mel yagatikheat: ”An Tuhan nen hat o Ur Babylonia andoma nen kweang yoma hat eise a'nogen iluk wokhesigeluk wokharek wagi o,” iluk yagatikhe. 8A'nogo yagatikhe meneat he, at Abram en heinok wokhikhi logolik, mel yagatikhe: ”Tuhan Henupogot esin mene neisena. Kweang yoma an eise asigin, iluk ninggi'nogo nen nelu asigin?” iluk yagatikhe.
9A'nogo heinok wokhasikhemo re, At Tuhan nen he, onggo yi'nogo yagatikhe: ”Haren An faget he, wam sapi holou mene ekhe, kambing holou mene ekhe, domba ai mene ekhe, ebe lombok he, ebe umur 3 tahun mene halok wanhi logolik he, sue abiang hangge ekhe inom, nen pel eak hangge ekhe inom, wendeberogo wanin o,” iluk yagatikhe. 10A'nogo yagatikhemo, Abram en he, wam, sue andi Allah faget fisasikhe. A'nogo fisasikhesik, sapi inom, kambing inom, domba inom, ebe lombok warogo heirogo hibit hikhik fesikhe. A'nogo fesikhe meneat he, sue nek he abirengge fesikhe. 11A'nogo fesikhemo, sue obabut weak mene yi mene ti mene warek ninggerek mene omanogo we'luk wam senggelogo fesukwa mene omanogo eino libikhigik nagaluk oba labok i wagunem he, Abram en silogo lakfisikhi lagaikhe.
12A'nogo hilingiti lagaikhesik, o mo ubuk i lagu kwelek, Abram nogo obabe lekhogo nogo isikhe. Nogo ikhi logolik were'ma ferekhogo arem nogoat alilip agailekesik ailo hokho mene agarikhe.#Ayb. 4:13, 14 13A'nogo ailo agaikhesik were'ma, Tuhan nen he, wene mel yagatikhe: ”Haren tagongge mene re, afuni ekhe inaiba laluk inebe andoma logolik, afuni inawiwerek mene andoma nen inamingmingengge hilinginabimbik he, 400 tahun yi enggin ti enggin hilinginafi logogun a'naga hendawimo eberek logoino o.#Kel. 1:1-14; Kis. 7:6 14A'nogo meneat he, it afuni inawiwerek mene nen, haren tagongge mene inamingmingengge hilinginabimbik logogun mene andi, An nen wene inoba fagain o. Fugunem haren tagongge mene o andoma herakfisaluk wulibi waga logolik, it inawi werek mene inangge yi mene ti mene hokhorogo helaluk wulibi wesugun o.#Kel. 12:40-41; Kis. 7:7 15Hat hebe umur uanat logombigen hendawinggen yamuksegat logombik wa'lagunem, warek salhabugun o. 16Afuni Amori mene inobabut mondok weak hilingitunem wene inoba fagain mene oan welagi andi nen he, haren tagongge mene re, huli inebe enggaminogoba ta'lasimbigen hat hombalak inambotkwe o yoma wesugun o,” iluk yagatikhe.
17A'nogo yagatikhemo, o arat hubagaikhemo, ferekhogo endu amulok hule susu esage ibilogo waluk koma nen heat weinam agaikhesik he, wam senggelek omanogo erarogo were'ma tulem wagaikhe. 18A'nogo waga logolik aremnogoat, Tuhan nen Abram wene mel waretikhe: ”An nen haren tagongge mene inoba kweang yi mondogat wogisagain o. Wogisagain andi re, o Mesir huli welagaikharek oba nen pikhit i Efrat huli,#Kis. 7:5 19afuni Keni mene inaiba inom, Kenas mene inaiba inom, Kadmon mene inaiba inom, 20Het mene inaiba inom, Feris mene inaiba inom, Refaim mene inaiba inom, 21Amori mene inaiba inom, Kanaan mene inaiba inom, Girgasi mene inaiba inom, Yebus mene inaiba inom, mondogat wogisagain o,” iluk wene waretikhe.
Currently Selected:
KEJADIAN 15: inohap
Highlight
Share
Copy
Want to have your highlights saved across all your devices? Sign up or sign in
