KEJADIAN 39
39
Yusuf Potifar eabu hilingitunem, agwe nen laligiluk isikhe wene
1At Yusuf it afuni Ismael mene nen o Mesir waluk lagaukwasik, it at raja Firaun aiba serogo logolik yabu hilingiti lagaukwa mene inoe enu Potifar oba onggo wanhukwama onggo palhikhe. 2Onggo palhikhemo, Yusuf Potifar o Mesir mene andi amingmingengge logolik, aiba andoma yi yabu ti yabu hilingitunem nineisena Tuhan nen serogo logolik lebethikhi lagaikhe andi nen he, higithogo nek hilinglaga lagaikhe.#Kis. 7:9 3-4Yi yabu ti yabu fano nek hilingitunem, at Potifar en, ”Egi! Heisena Tuhan Allah nen set harek logolik lebethili'logo higi,” iluk Yusuf oba liogeratikhesik at eabu faget hilingiti logouwageluk menfesikhe. Menfesikhesik, angge yi mene ti mene enggiba logolik, againafuri tegelinafi logouwageluk eabu wogotikhe. 5Eabu wogotikhemo, huli andi nen, At eisena Tuhan nen Yusuf alisikhogo ap aiba Mesir mene a'nogo againafuri inom inebe fanorinafik, angge yi mene ti mene oloba mene inom, yabu kwe yago mene inom, fanotfigik, ikhi lagaikhe. 6At Potifar angge yi mene ti mene mondogat at Yusuf enggiba fesikhe andi. A'nogo enggiba fesikhemo at Yusuf en hilingitu kwelek he, Potifar en yi mene ti mene aiba mene hilingisigin oba ebeti'lek endawinggen menenei sikhiphogo logolik, we, amburu nagain mene nek eberek welagaikhe. At Yusuf ebe re, omame hokho eil alili mondok fano agun welagaikhe. 7A'nogo were'ma at he Potifar agwe andi endawimo nen he, ”Yusuf en faknobagailebe,” iluk anggikhi lagaikhesik, ”Nemberek nogo uok,” iluk yagatikhe. 8A'nogo yagatikhe meneat he, at Yusuf a'nogo hilingisu abiren he, mel yagatikhe: ”Nagaisa e. Noe Potifar en angge yi mene ti mene aiba welagarek mene mondogat an halhi logouwageluk nenggiba fikhemo re, at endawinggen menenei ebeti'lek katokhogo werek andi nen he, haren a'nogo yaganetun o, nagaisa. 9Oloba yi mene ti mene yoma, at eisewerek welagarek hagat, an eisewerek nobagaikhemo, an nen higit hilingisigin enek meneat he, hat hebe nek he, at agwe welagenma re, an nenggiba figi'lego. Allah eilhanem at ane sagalogo an a'nogo weak hilingisigin mondok elo'lego,” iluk yagatikhe. 10A'nogo yagatikhe meneat he, at he Potifar agwe andi nen he, ”Yusuf, nemberek nogouwogo,” iluk hundik-handik endawimo kagalhu welagaikhe meneat he, Yusuf at emberek nogo u mondok abit welagaikhe.
11Inenggi ekhe sambul he, at Yusuf Potifar aiba andoma yabu hilingisigiluk afuni ekhe mondok le'ma amunek kwisikhe. 12Kwisikhemo, at Potifar agwe a'nogo nen he, Yusuf asu jubah lisogo fakfesikhesik he, mel yagatikhe: ”Nemberek nogouwogo,” iluk yagatikhemo Yusuf abiren kwelembak isasikhesik Yusuf asu a'nogo he a'nogo enggimo agu kwelek heise olilu wulifikhe. 13Heise wulifikhemo, asu jubah a'nogo nonggologo he hun Potifar agwe andi enggimo agaikhemo eilenggen hasikhe. 14A'nogo hasikhesik, amingmingengge mene wolisasikhemo wagaukwama re, mel yagaisasikhe: ”Kwelakhani, an nagun nen ap Ibrani mene oloba yoma kwelakfei waga a'nogo nen nit yoma weagetninabigiluk hilingitemo o. At o hulu an nogo ikhi lagiba kwikhesik, faknobagaigiluk ikhi lagama an nane hokhorogo mondok kwe igi o. 15Nane a'nogo kwe ikhi lagimo re, asu yi nonggologo herakfisaluk heise wulife o,” iluk yagaisasikhe. 16A'nogo yagaisasikhesik, Yusuf asu nonggolek a'nogo agun wagunem inukhageluk fesikhe. 17Fesikhesik were'ma, agun Potifar a'nogo ambotkwe wagaikhemo re, wene it yagaisasikhe hagat weak-weagat mel yagatikhe: ”Ap Ibrani mene oloba yoma kwelakfakha wagen a'nogo nen o hulu an nogo ikhi lagiba noba kwikhesik he, weagetnabigiluk ikhe o. 18A'nogo ikhi lagama, an nane kwe ikhi lagimo re, asu yi nonggologo herakfisaluk heise wulife o,” iluk yagatikhe. 19A'nogo yagatikhemo, at Potifar a'mage hokho mene lagasikhe. 20A'mage a'nogo lagasikhesik, afuni ekhe nen Yusuf enggi hele weak-weak warogo o afuni inenggi hele warek fisagarek oba kwelakfei loageluk yagaisasikhemo, o at raja Firaun nen afuni inenggi hele warogo fisikhi lagaikheba andoma kwelakfei lagaukwa.
21A'nogo meneat he, Allah nen Yusuf serogo logolik ebe endawi mondok hasikhesik, lebethugunem afuni inenggi hele warek mene ferinarek welagaukwa mene inoe andi nen Yusuf ebe oba liogeratikhesik endawirogo welagaikheat.#Kis. 7:9 22A'nogo logolik, afuni hele warek welagaukwa mene fenakwe mel yagaisasikhe: ”Hit hinoe higit he, Yusuf yi logouwago,” iluk menfesikhesik, yi yabu ti yabu hele warek were'ma hilingitarek mene mondogat at enggiba fesikheat. 23A'nogo fesikhemo, Tuhan Allah nen Yusuf serogo logolik lebethugunem, yabu hilingitunem he, higit enek hilinglaga lagaikhe andi nen, ap hele warek ferinarek welagaukwa mene inoe a'nogo nen, ”Yusuf, yi'nogo hilingisin, ti'nogo hilingisin,” iluk yagati'lek endawinggen yamukhogo welagaikhe.
Currently Selected:
KEJADIAN 39: inohap
Highlight
Share
Copy
Want to have your highlights saved across all your devices? Sign up or sign in
