YOHANES 6

Yesus nen afuni hokhorogo sumburu wogisasikhe wene

(Mat. 14:13-21; Mrk. 6:30-44; Luk. 9:10-17)

1Hobuk he, at Yesus i mogo Galilea, enu ekhe Tiberias agaregat andi aik elikwe wulifikhe. 2I aik elikwe wulifunem he, attagat afuni inoba ou mene elalinat higirinafunem ineilenggen hasukwasi'mo andi nen he, afuni inebe hokhorogoat esa logalfuluk at ombo'ne lagaukwa. 3Ombo'ne lagu kwelek, at Yesus agoromi ane wanhi lagaukwa mene omanogo inomat wulifukwasik he, punuba lagasukwasik inom hu'lagaukwa. 4Nen, andem sambul he, it afuni Yahudi mene nen he, ”Allah nen telninafikhe,” iluk inendawimo eberogo seni Paskah nenggarek a'nogo nogoin oba arat horok asi wagaikhe. 5A'nogo hu'lagaukwasik, at Yesus eilenggen yerisasikhe re, afuni hokhorogo esa fologo andogosi wagunem eilenggen yerisaluk, Filipus mel yagatikhe: ”Filipus. Afuni hokhorogo aroma sumburu noagen, o koma mene onggo palisouwok he,” iluk yagatikhe. 6A'nogo yagatikhe andi re, at Yesus nen hilingisigin mene elu logoligat he, at Filipus obabut paligeluk yagatikhe andi. 7A'nogo yagatikhemo at Filipus nen he, mel yagatikhe: ”Afuni nen yabu inenggi misigam faget hilingitunem inenggi onggo rupiah wogisagarek andi mene niren 200 oba sumburu roti mene onggo pali lamo re, afuni yoma endep-endep enggen wokhigik higithogo nogoin ogo? Elo'lek aro,” iluk isikhemo re, 8at Yesus agoromi ane wanhi lagaukwa mene ekhe enu Andreas, Simon enu ekhe Petrus agarek a'nogo agoren he, mel yagatikhe: 9”Noe. Yoma abo yenggerek mene ekhe sumburu roti logomhigik werogo mene fuaben, nen ikan pire inom fisogo werek meneat he, ap esa hokhorogo hilingi'mo higithogo na hak no go? Elo'lego,” iluk yagaisasikhemo, 10at Yesus nen agoromi omanogo yagaisikhi logolik he, mel yagaisasikhe: ”Nagoromi. Afuni aroma hu'lasuagen yagaisani o,” iluk isikhemo, engga hokhorogo wulibik kwe hu'larik lagaukwama re, afuni inebe hokhorogoat mene re, ap enek inebe 5.000 nen inenggi wenaginafukwa. 11A'nogo hu'larik lagaukwama re, at Yesus nen sumburu roti mene aremnogo enggimo wanhikhesik he, ”Allah neisena,” iluk hai warogo afuni hokhorogo hu'lagaukwa mene omanogo sumburisasikhesik he, ikan aremnogo a'nogoat sumburisasikhe. Sumburisasikhemo it inendawimo nen, nelo anggasukwa hagat inalabut ninghogo nasukwa. 12Inalabut ninghogo nasukwama re, at agoromi ane wanhi lagaukwa mene omanogo yagaisikhi logolik he, mel yagaisasikhe: ”Sumburu nenggasik ando tindelogo herakfisaga mene aroma alomat lasinogo nen he, misi'mo andogorogo feni o,” iluk yagaisasikhemo re, 13sumburu roti logomhigik werogo mene 5 nen omanogo nasukwasik, tindelogo fesukwa mene mul ugu 12 nen ambem peterogo kwalogo fesukwa.

14A'nogo kwalogo fesukwama, at Yesus nen ebe futfouwageluk elalinat hilingitikhe mene andi it afuni ineilenggen hasukwama andi nen he, mel isukwa: ”Ap ekhe nen Allah ane kweangma yaganisa wesigin isukwa a'nogo eberogoat he, ebe yi aro,” iluk isukwa. 15A'nogo isukwama, at Yesus endawimo nen he, ”It andi wesimbik, an it inoe kain logouwageluk inane omamerogo mennobagagun anggigi,” iluk inobabut enegat palhikhesik he, o andoma hebisaluk punuba alegat lagasikhe.

Yesus eisok i agum ebene filik wagaikhe wene

(Mat. 14:22-23; Mrk. 6:45-52)

16-17At Yesus ebe a'nogo lagasikhesik, agoromi ane wanhi lagaukwa mene omanogo inoba wagi'lek oan werek kwelek, o arat hubagaikhemo, it enek i mogo yenggelek a'nogo esanggoma pi wagaukwasik he, e so elema kwisukwasik i palogo o Kaperanaum wulibi wesuogeluk wagaukwa. 18Wulibi wagunem he, sogoi aninirogo funha wagaikhemo re, i ha'labu hokho agaikhe. 19I ha'labu hokhorogo hilingitu kwelek it a'nogo e so warik tulem heire'ma ilirengge fuaben he a, falfaligen he a, yatmaat asi wagaukwa hak he, at Yesus a'nogo eisok i agum ebene filik inoba higit horogat wagunem ineilenggen yet hasukwasik inailo hokhorogo agaukwa. 20Inailo hokhorogo agaukwama re, at Yesus nen he, mel yagaisasikhe. ”Nagoromi, An nebeat waga lagi. Hinailo agubo,” iluk yagaisasikhemo, 21it inendawimo inagaiyek anggasukwasik Yesus ebe e so elema kwelakfugu kwelek aremnogoat, e so a'nogo inendawimo nen, ”I aik oba a'lem higit wulibugun o,” iluk anggasukwa higithogo arat asi wagaukwa.

Afuni hokhorogo Yesus herarik lagaukwa wene

22Wagaukwasik oba nen, ohealekwe re, it afuni hokhorogo i aik elikwe fisaluk wagaukwa mene omanogo inendawimo nen he, ”Eige. O hobit e so misigenek welaga meneat he, at Yesus ebe inom lek. We, at agoromi ane wili'lagwi mene nek e so warogo wulifunem nineilenggen isogo,” iluk anggasukwa. A'nogo e so ebe legenat isukwa meneat he, 23hobuk e so hunogoat mene ekhe afuni o enu Tiberias mene nen warik, ninoe Enupogot Yesus nen samban Allah hai warogo nen sumburu roti mene sumburisasikhemo nasukwaba a'nogo wulifukwasik were'ma, ineilenggen hasukwa. 24Ineilenggen hasukwasik inendawimo nen anggikhi logolik he, ”Yesus ebe inom, agoromi ane wili'lagwi mene inom, inebe yoma lek oma re,” iluk, e so elema kwisukwasik, Yesus ebe herarik o Kapernaum wulibi wagaukwa.

Yesus nen, ”Sumburu inelugerinafirek mene nebe anaro,” iluk yagaisasikhe wene

25It afuni omanogo wulibi wagaukwasik, at Yesus o Kapernaum were'ma oba wagaukwasik he, mel yagatukwa: ”Noe, hat o yoma mera wagen,” iluk oba heinok wokhasukwama, 26Aren he, mel iluk yagaisasikhe, ”An nebe futnobagauwageluk elalin mene hilingitunem hineilnggen neegep a'nogo nen hera'nabik wagep fuk. Lego. Sumburu roti mene sumburogo wokhisigimo hinalabut ninghogo nenggep a'nogo nenat hera'nabik wagep hisigi o, iluk eberogoat yagahisigi. 27Sumburu fili asimbik lek asigin mene faget yabu hilingiti logou fugo. Athe, sumburu mondok logogin mene ninggi logolik, ineluk mondok logogun mene andi, an nenat wokhisikhi logouwageluk neisena nen nayonggo fuluk laknobagai wagaikhemo, abat ta'lasi wagagi andi faget yabu hilingiti logoni,” iluk yagaisasikhe. 28A'nogo yagaisikhi lagaikhemo, iren at yagati logolik he, mel yagatukwa: ”Noe Allah endawimo anggikherek mene hilingiti logou menere, nit ninobabut ninggi'nogo hilingiti logogun?” iluk, oba heinok wanhukwama, 29at Yesus nen he, mel yagaisasikhe: ”Allah endawimo anggikherek mene hiren hilingisugun andi ebe re yi. Hinendawinggen an Allah nen laknobagai wagaikhemo wagagi mene yi noba himbiret fogoin andi aro,” iluk yagaisasikhemo.

30Iren he, mel yagatukwa: ”Hebe futhobagauwageluk, elalin mene ekhe hilingitunem nineilenggen healuk ninendawinggen hoba himbiret fouwogen he, ebe ki mene hilingisigin. Ekhe ninggi'nogo hilingisigin. 31Ninombalak o leimo afuni le'ma logolik sumburu na hak, enu mana mene ninggi lagaukwa iluk, Allah aneba lisu palek werek: It inamburu ninggi logouwageluk, ebearen pogoroba nen pelakfei waga lagaikhe, iluk lisu palek werek higithogo ninggi lagaukwa,” iluk yagatukwa.#Kel. 16:4, 15; Mzm. 78:24

32-33A'nogo yagatukwama, aren he, mel yagaisasikhe: ”An nen wene ekhe yagahisak. Sumburu pogoroba nen pelak hisa waga lagaikhe andi re, at Musa nen fuk. Lego. Athe, sumburu ebe mene andi re, an Neisena nen afuni kweangma mene inelugerinabuageluk an nebe pogoroba nen pi wagagi andiaro,” iluk yagaisasikhe. 34A'nogo yagaisasikhemo, iren he, mel yagatukwa: ”Noe sumburu andi mene wo'nisikho mondok logoino,” iluk yagatukwama, 35aren he, mel yagaisasikhe: ”Sumburu inelugerinafirek mene andi re, an nebe aro. Ap sa nen an noba wagik, endawinggen noba eberogoat himbiret figik, igin halok he, sumburu nele agik, i nele agik, ikhi logogin mondok lego. 36Menere, an nen wene attak yagahisigi hagat, hineilenggen niikhi lagep meneat he, hinendawinggen noba eberogoat himbiret fou re hinabiro. 37-38Menere, an pogoroba nen pi wagagi andi re, an nonggwarek nendawimo nen kagalogo hilingisigeluk pi wagagi fuk. We, At laknobagai wagaikhe mene endawimo anggikherek mene andiat higithogo hilingisigeluk pi wagagi andi nen he, afuni an Neisena nen wo'neterek mene inebe lombok noba wagunem he, an nen, hit an noba wesugun lek, iluk wenagisagain lego. 39Nen, at endawimo anggikherek mene an nen hilingisuageluk laknobagai wagaikhe andi re, ebe yi: Aren afuni an wo'neterek mene mondogat ekhe pelakfisigi legat, o wurep oba, an nenat inelugerinabuageluk, 40neisena endawimo anggikherego. A'nogo anggikhi logolik, afuni nen Allah amlogo nebe yi ineilenggen niigik, inendawinggen noba eberogoat himbiret figik ugu halok, inebe lombok ineluk mondok logouwageluk, o wurep oba an nen inelugerinabuageluk endawimo anggikherego,” iluk yagaisasikhe.

41At Yesus nen a'nogo yagaisikhi logolik, ”Sumburu roti pogoroba mene andi re, an nebeat pi wagagi o,” iluk yagaisasikhe andi nen, it ap Yahudi mene nen, at abok nguluk-habuk palhi logolik, 42”Ap yi enu Yesus, ap Yusuf amlogo. Nen, at eisena agaisa ninelu meneat he, aren ikhi logolik he, An nebe re, pogoroba nen pi wagagi iluk ikhe andi ninggi'nogo nen ikhe, anggegep,” iluk isukwama re, 43at Yesus nen he, ”Hit-hit nabok nguluk-habuk palhi lagep andi, palu fugo.

44An Neisena laknobagai wagaikhe mene a'nogo nen, afuni lithigik an noba woginarek wagi'lek halok, noba wesugun elo'lego. We, aren it ekhe lit-lit woginarek wagunem noba wesugun halok o wurep oba an nen inelugerinabigin aro. 45Wene andi faget it ap Allah ane yagaisikhi lagaukwa mene omanogo nen lisu palogo fikhi logolik mel isukwa: It afuni mondogat Allah nenat wene yagaisikhi logogin o, iluk lisu palogo fesukwa andi hagat, afuni an neisena ane inesanggo holfuluk, aren yagaisugunem wanhu halok, inebe lombok an noba wagaikharegaro.#Yes. 54:13 46Wene yagahisigi yi re, it afuni ekhe nen an neisena andi ineilenggen hasukwa iluk yagahisigi fuk. We, an nalegat Allah were'ma nen wagagi mene yi nek he, neisena neilenggen hasigi o. 47Ap sa nen endawinggen an noba eberogo nen himbiret fugu halok he, ineluk mondok welagaikharek mene eise agasik werego, iluk, eberogoat yagahisigi,” iluk yagaisasikhe. 48Wene ekhe mel yagaisasikhe: ”Sumburu inelugerinafirek mene andi re, an nebe aro. 49Hit hinombalak o leimo afuni le'ma logolik sumburu na hak, mana andi mene ninggi lagaukwa meneat he, inebe wa'larik wagaukwa andi. 50A'nogo wa'lagaukwa meneat he, sumburu ebe mene pogoroba nen pi wagaikhe andi. A'nogo pi wagaikhemo re, at sa nen sumburu andi mene nunggu halok, at ebe wa'lagi'lek eluk mondok logogin o. 51Sumburu inelugerinaferek mene pogoroba nen pi wagarek andi re, an nebe aro. Sumburu an nen wogisagain mene andi, ap sa nen nunggu halok, at ebe eluk mondok logogin o. Afuni kweangma mene ineluk logouwageluk an nebe it faget wa'lasigin andi, an nebeat wogisagain,” iluk yagaisasikhe.

52A'nogo yagaisasikhemo re, it ap Yahudi mene omanogo, it-it wene palhi logolik he, wene mel isukwa: ”Ap yi sani, ap yi ebe mene nit noageluk ninggi'nogo wo'nisagelugen yaganisikhe anggegep?” iluk isukwama. 53At Yesus nen he, ”An nen wene ekhe yagahisago. An abat ta'lasi wagagi a'nogo nebe ninggik, namep ninggik, ikhi lagep lek halok, ineluk mondok welagaikharek mene, hit eise werek agi'lek welagebo, iluk eberogoat yagahisigi. 54Meneat he, ap sa nen an nebe ninggik, namep ninggik, ili'logo halok he, ineluk mondok logogun mene eisewerek asimbik were'ma, o wurep oba an nen elugerasigin o. 55An nebe inom namep inom, andi re, hinamburu hinagai ebe mene aro. 56Ap sa nen an nebe ninggik, namep ninggik, ili'logo halok he, aren an nemberek hundigat, nen, an nen, at nemberek hundigat, logogun o. 57An neisena eluk mondok welagarek mene nen laknobagai wagaikhemo wagagi a'nogo, at eluk welagarek andi nen an neluk welagirek hak, ap sa nen, an nebe ningge halok, an neluk welagirek andi nen, at elugat logogin o. 58Nen, sumburu pogoroba nen pi wagaikhe mene yi re, hit hinombalak ninggi lagaukwa mene inebe wa'laga lagaukwa andi hangge re lek, meneat he, ap sa nen sumburu ebe mene yi nunggu halok, eluk mondok logogin o,” iluk yagaisasikhe. 59Wene Yesus nen a'nogo yagaisasikhe andi re, at ebe o Kapernaum o samban agarek oba wene yagasikhi logolik yagaisasikhe.

Wene inelugerinaferek wene

60At Yesus nen wene a'nogo yagaisasikhemo, it at agoromi ane wanhi lagaukwa mene omanogo ekhe inebe hokhorogo wene andi inesanggo holhukwasik he, mel isukwa: ”Wene ikhe andi re, enggin hokhoatma, sa hagen wanigin anggegep? Elo'lego,” iluk isukwa. 61A'nogo at ebe yagati'lek isukwa meneat he, aren he, ”Wene igi a'nogo faget nagoromi nen an nobaget pourogo wene pali'lagwi higi,” iluk inobabut enegat palhikhesik mel yagaisasikhe: ”Wene yagahisigi a'nogo nen, At ninabit, iluk kobokhogo heraknobagauwogeluk ikhi lageba? 62An abat ta'lasi wagagi a'nogo attak welagagiba hobuk nambotkwe lagagunem hineilenggen nealuk, hinendawimo ninggi'nogo anggogoin? 63Allah Areagun nenat afuni inelugerinaferego. Afuni kweangma mene inomameba ekhe hilingisu elo'lego. Menere, wene an nen yagahisikhi lagi andi, Allah Areagun nenat ikherek mene andi nen he, inelugerinaferek wene yagahisikhi lagi andi o. 64Wene andiba inelugerinaferek meneat he, hit fena yoma eberogoat iluk hinendawinggen an noba himbiret figi'lek mene inom, at ekhe nen Yesus ebe wasuageluk yonggo lagain mene inom, it andi a'nogo hilingisugun, iluk at omanggum elu welagaikhesi'mo andi nen he, wene a'nogo yagaisasikhe andi. 65A'nogo yagaisasikhesik he, wene ekhe mel yagaisasikhe: ”A'nogo iluk, an nen he, afuni Allah nen inendawimo kagalhi'lek halok an noba wesugun he elo'lek iluk yagahisigi andi,” iluk yagaisasikhe. 66Wene a'nogo ikhi lagaikhemo, at agoromi ane wanhi lagaukwa mene omanogo, inebe hokhorogoat ekhe Yesus herakfisaluk pugulhukwasik he, hobuk ombo'ne nikhi logouwogeluk, oba wagi'lek kamo isukwa.

Petrus nen Yesus abok fakhogo isikhe wene

67A'nogo pugulhukwama, at Yesus nen agoromi inebe 12 nen omanogo yagaisikhi logolik he, mel yagaisasikhe: ”Hit ogo re, a'nogoat heraknobagaluk puguluogeluk anggikhi lageba?” iluk yagaisasikhe. 68A'nogo yagaisikhi lagaikhemo, at Simon Petrus a'nogo nen he, mel yagatikhe: ”Eige! Noe. Ninebe nineluk mondok logogun mene faget he, wene haren yaganisikhi lagen hilingi'mo re, hat herakhobagaluk ap saba logoin anggegen.#Mat. 16:16; Mrk. 8:29; Luk. 9:20 69Niren he, ninoe hat Allah onggwarek faget menhobagaluk, eberogoat aren lakfagai wagaikhemo iluk, fut hobagagosik ninendawinggen hat hoba himbiret fogo o,” iluk a'nogo yagatikhemo. 70Aren he, mel yagaisasikhe: ”An nen hit hinebe 12 nen yi wenakhinafigi lek nogo? An nenat wenakhinafigi o. Meneat he, hat misigat ekhe Iblis meneat welagen o,” iluk yagaisasikhe. 71Wene a'nogo isikhe andi re, ap Simon Iskariot amlogo enu Yudas faget isikhe. At ap andi ebe Yesus agoromi inebe 12 nen omanogo meneat he, hobuk Yesus ebe wasuageluk yonggo lagain mene andi faget isikhe andi.

Currently Selected:

YOHANES 6: inohap

Highlight

Copy