YOHANES 8

Afuni nen, he ekhe pailak hilingitunem hasukwasik, Yesus oba waluk wagaukwa wene

1It afuni omanogo lagu kwelek he, at Yesus punu Zaitun oba lagasikhe.

2Lagasikhesik, ohealekwe hup siakhogo pi wagaikhesik, Allah awi wuri'mo wagaikheat. Wagaikhesik kwisikhemo re, afuni hokhorogo wagaukwama, at ebe hu'lagaikhesik he, wene yagaisasikhe. 3Wene yagaisugu were'ma, it ap Allah ane inelu mene inom, Farisi mene inomen, he ekhe pailak hilingitunem ineilenggen hasukwasik, Yesus oba waluk wagaukwasik, he a'nogo ebe tulem menfesukwasik he, Yesus yagati logolik, mel yagatukwa: 4”Noe. He yi re, pailak hilingitunem fakfogosigen hoba waluk wago o. 5At Musa nen wene Allah nen komotninafikhe wene a'nogoba lisu palhi logolik, it hemi nen, at yi hilingite yi hak hilingitu halok, helep oba inebe mondok inoati logogun o, iluk yaganisasikhemo wene palek werek andi re, haren ninggi'nogo yaganisagain,” iluk yagatukwa.#Im. 20:10; Ul. 22:22-24 6Wene a'nogo yagatukwa andi re, Yesus ambeba wene onggo ugunem enggali warogo wene oba fouwogeluk isukwa meneat he, at ot soma isikhesik enggi tum en kweangma lisu palhu kamo isikhe. 7A'nogo halolot fisasikhesik werek kwelek, iren he, ”Yaganisan o,” iluk yagatu mondok welagaukwama re, at ot legeisogo re mel yagaisasikhe: ”Hit welagep ya mene, ap ekhe weak hilingiti'lek welagarek mene halok, aren tak he yi helep oba tunghogo wasuago,” iluk, 8yagaisasikhesik he, hobuk ambotkwe ot soma isikhesik enggi tum en kweang oba lisu palhi lagaikheat. 9A'nogo palhu kwelek it omanogo wene yagaisasikhe mene a'nogo inesanggo holhukwasik he, it inaluendek tak wulifukwama, hobuk inebe mondogat misik lit pire lit pugulhukwama, at Yesus he a'nogo inom inalegat logolik he, 10at Yesus a'nogo ot legeisogo re, he a'nogo mel yagatikhe: ”He yi sa. Nerei e. Ap omanogo re? Iren wene hoba faga a'nogo, ap ekhe nen hoate a? Lega,” iluk yagati lagaikhemo, 11aren he, ”Noe, Mondok lego,” iluk yagatikhemo, at Yesus nen he mel yagatikhe: ”An ogo re, wene hoba fuluk hoasigin legaro. Hebe hawiba lano. Lambik he, huli yogondak oba nen hobuk weak ekhe hilingiti logou fugo,” iluk yagatikhesik he, awiba lakfesikhe.]

Yesus nen, ”Afuni selegerinafirek he, Anaro,” iluk isikhe wene

12Hobuk he, at Yesus nen it afuni omanogo wene ekhe mel yagaisasikhe: ”Afuni selegerinafirek andi re, an aro. Ap sa nen an nombo'ne nikhi logogin halok he, an nebe selek mene logolik inelugerinafirek mene a'nogoat wo'nabigin andi nen he, at andi o mum oba nikhi logogin lego,” iluk ikhi lagaikhemo,#Mat. 5:14; Yoh. 9:5 13it ap Farisi mene omanogo nen he, ”Hat he, habok inelu asuageluk, honggwaregenat yagaisikhi lagen andi heranenat ikhi lagen o,” iluk yagatukwama,#Yoh. 5:31 14at Yesus nen he, mel yagaisasikhe: ”An wagagi mene inom, lagain mene inom, hit hinonggot meneat he, an enek he, nebe o andoma nen wagagi, nen hobuk o andoma lagain, iluk nelu andi nen he, an nabok inelu asuageluk nonggwaregenat yagaisikhi lagi andi re, wene andi eberogoat yagaisikhi lagi o. 15Hiren he, wene noba fikhi lagep andi re, hit afuni-afuni wene inoba figik, kotik, ikhi lagep hagat noba fikhi lagep meneat he, an enek he, afuni wene inoba fikhi lagi mondok lego. 16Mene re, an nen wene inoba feilema re, andi an namu nen fuk. Neisena an laknobagai wagaikhe mene a'nogo ninomat logolik ikhi lagi andi nen he, wene higithogoat afuni inoba feile o. 17Wene, Allah nen komotninafikhe wene andiba mel isikhe:

Afuni wene inoba fikhi logogun halok he,

ap wene ero hilingita inelu mene inebe pire nen

inane emberek higirenek ugu halok he,

wene andi eberogoat uago,

iluk isikhemo lisu palogo fesukwa.

18Andi hak he, an nabok, nonggwaregen igik, neisena laknobagai wagaikhe mene nen igik, yagahisikhi lago andi,” iluk ikhi lagaikhemo, 19iren he, ”Hat heisena andi koma werek,” iluk yagatukwama, at Yesus nen he, ”An nebe yi inom, neisena inom hinonggoraro. An nebe hinelu logoilepma re, neisena andi hineluat logoilebo,” iluk yagaisasikhe. 20Wene a'nogo yagaisasikhe andi re, at ebe Allah awi wuri'mo peti uang Allah faget fisagarek oba era'lu logolik isikhe. A'nogo ugunem, at ebe fakfogoin oba horogasi wagi'lek werek kwelek andi nen he, it afuni omanogo ekhe nen fakfigi'lek kamo isukwa.

Yesus nen, ”O an lagain oba andoma, hit logoin elo'lego,” iluk yagaisasikhe wene

21A'nogo kamo isukwama re, at Yesus nen wene hobuk ekhe it omanogo mel yagaisasikhi: ”An nebe hobuk lagain o. Lambik andoma werek kwelek, hit an hera'nabugun meneat he, o an lagain oba andoma hit logoin elo'lek andi nen he, hit weak hilingiti lagep mene wene hinoba werek kwelegat hinebe wa'lasugun o,” iluk yagaisasikhemo, 22it ap Yahudi mene inogogwi omanogo nen he, mel isukwa: ”Ap yi nen yaganisikhi logolik he, o an lagain oba andoma hit logoin elo'lego, iluk yaganisikhe andi re, at onggwaregen warageluk ili'logo he a,” iluk isukwama, 23aren mel yagaisasikhe: ”An nebe re, pogot abel ponggwe mene wagarik welagi o. Menere, hit enek he, abel manggwe yoma mene o. Hinawi ero kweangma yoma aro. Mene re, an nawi ero kweangma yoma lego. 24Andi nen he, an nen wene attak yagahisikhi logolik he, weak hilingiti lagep mene wene hinoba werek kwelek wa'lasugun o, iluk yagahisigi a'nogo re, mel faget igi. Hiren an faget he, At ebe etok mondok welagarek mene aro, iluk hinendawinggen noba eberogoat himbiret fogoin lek halok he, wene hinoba werek kwelegat wa'lasugun andi nen igi o,” iluk yagaisasikhe. 25A'nogo yagaisasikhemo, iren he, ”Hat hebe sa nogo,” iluk oba heinok wokhasukwama, aren he, mel yagaisasikhe: ”Tulemat andi, hobuk nenahalok yagahisagain. 26An nen yi wene ti wene hokhorogoat yagahisigik, wene hinoba figik, kotik, u higit meneat he, at laknobagai wagaikhe mene a'nogo ane eberogoat enek ikherek andi nen, aren ugunem nesanggo holhi lagi mene andiat hit afuni kweangma mene yoma yagahisikhi lagi o,” iluk yagaisasikhe. 27A'nogo yagaisasikhe meneat he, iren he, ”At eisena Allah faget abok yaganisili'logo,” iluk wene andi futfigi'lek welagaukwa. 28A'nogo futfigi'lek werek kwelek, aren he, mel yagaisasikhe: ”An abat ta'lasi wagagi a'nogo, hiren an nebe legeisogo nobagagun andi sambul hiren he: Etok mondok welagarek mene a'nogo ebe yiaro. Aren wene yaganisikhi logolik he, endawimo nen kagalogo igi'lek. We, at eisena nen yagaterek mene nek, yaganisikhi lagama, iluk, hinelu asugun o. 29At laknobagai wagaikhe mene a'nogo, oba liok ikherek mene nek hilingitirek andi nen he, aren an nebe obokhogo heraknobagagi'lek nemberek hundik mondok welagorego,” iluk yagaisasikhe. 30Yesus nen wene a'nogo yagaisikhi lagaikhemo, afuni inebe hokhorogo inendawinggen at oba eberogoat himbiret fesukwa.

Yesus nen, ”Ebe weneba hinebe hele fikhalogo hinale'ma hinobagagin,” iluk yagaisasikhe wene

31A'nogo himbiret fesukwama, at Yesus nen he, it ap Yahudi mene inendawinggen at oba eberogoat himbiret fesukwa mene omanogo mel yagaisasikhe, ”Hiren, an nane hologo hilingiti logogun halok he, hinebe an nagoromi ebe mene nawe a'ma logolik he, 32wene ebe wene hinelu asigin o. Hinelu asumo, wene ebe wene andibaat hinebe hele fikhalogo hinale'ma hinobagagin o,” iluk yagaisikhi lagaikhemo, 33iren he, mel yagatukwa: ”Nit he, ap Abraham en tagongge mene andi nen he, ninebe afuni ekhe inamingmingengge agi'lek mene nek welago. Meneat he, haren ikhi logolik, hinebe hele fikhalogo hinale'ma hinobagagin o, iluk egen andi re, hendawimo ninggi'nogo anggegendigen egen,” iluk yagatukwama,#Mat. 3:9; Luk. 3:8 34aren he, mel yagaisasikhe: ”Afuni weak hilingitarek mene andi inebe lombok he, weak hilingitarek andi amingmingenggeat, iluk eberogoat yagahisigi. 35Nen, it inamingmingengge mene andi re, inogogwi inom mondogat welagaikharek lek meneat he, inagainafuri ebe mene nek he, inom mondogat welagaikharego. 36Andi hak he, an Allah ebe amlogo nen, hit hele fikhalogo hinale'ma hinobagagi mene halok, eberogo nen hele fikhalek mene hinale'ma logogun o,” iluk yagaisasikhe.

”Hit hineisena Iblis aro,” iluk yagaisasikhe wene

37A'nogo yagaisasikhesik, ekhe mel yagaisasikhe: ”Menere hit he, ap Abraham en tagongge mene welagep andi an nelu o. Meneat he, hit hinendawimo nen an nane wanu hinabit andi nen he, hirenat an nebe noasuogeluk naweim abok ikhi lagep andi. 38An he, neisena nemberek logolik neilenggen hikhi lagagi meneat yagahisugu kwelek, hit enek he, hineisena a'nogo nen ikherek mene ane hologo hilingiti lagebo,” iluk yagaisasikhe. 39A'nogo yagaisikhi lagaikhemo, iren he, ”Ah! Nit nineisena Abraham aro,” iluk isukwama, aren he mel yagaisasikhe: ”Hit hinebe eberogoat Abraham en tagongge mene logoilepma re, Abraham hilingiti lagaikhe meneat hilingiti logoilebo. 40Menere, an wene ebe wene Allah nen ugunem nesanggo holhigi meneat yagahisikhi lagi meneat he, hiren an nebe noasuogeluk naweim abok ikhi lagep andi hak, at Abraham en a'nogo hilingiti lagaikhe lek meneat hilingiti lagebo. 41Hit he, hineisena a'nogo hilingiterek mene hilingiti lagebo,” iluk yagaisikhi lagaikhemo, iren he, mel yagatukwa: ”Ah! Nit pailak hilingiti logolik ta'ninafe mene fuk. Nit nineisena Allah alegaro,” iluk yagatukwama,

42aren he, mel yagaisasikhe: ”Hit he, eberogoat hineisena Allah logoilepma re, an nerabisak nendawimo nen anggaluk wagi fuk. We, nebe nero Allah mene, aren laknobagai wagama wagarik welagi mene andi nebe hinendawirogo logoilebo. 43A'nogo wagarik, wene yagahisikhi lagi mene hit futfigi'lek welagep andi nenahalok. A'nogo welagep andi re, an nane holek logou hinabit andi nen o. 44A'nogo hinabit andi re, hit hineisena Iblis atma re, hiren at amolo anggikherek mene andiat hinamolo nen hilingiti lagep andi. At Iblis andi eroba nenat afuni inoaterek mene aro. At wene ebe wene endawimo lek andi nen he, wene ebe wene ugunem inane legeterek lek andi. Iblis eranen ikherek andi re, at obabut etogat mene eranenat ikherek andi o. Ineranhogo wene agarek andi, ero araro. 45Meneat he, an nen wene ebe wene yagahisikhi lagi andi nenat, hiren he, eberogoat, iluk futfikhi lagep lek. 46An nen weak hilingitunem, hit ekhe nen hineilenggen neegep halok he, yagane'ni ta, an nen wene ebe weneat yagahisugu kwelek, futfikhi lagep lek andi nenahalok? 47Ap sa nen ebe Allah mene halok, Allah ane andi esanggo holherek meneat he, hit he, hinebe Allah mene fuk. Hunogoat mene andi nen he, at ane hinesanggo holu hinabit andi o,” iluk yagaisasikhe.

”Abraham oan ta'lagi'lek werek kwelek, an netok mondogat welagirego,” iluk isikhe wene

48At Yesus nen wene a'nogo yagaisasikhemo, it ap Yahudi mene omanogo nen he, mel yagatukwa: ”Hat hebe ap Samaria mene yi re! Munggwarengge obabut weak mene hendawimo kwikhesik werego, iluk ikhi lago a'nogo eberogoat yagaheti lago higi,” iluk yagati lagaukwama re, 49aren he, mel yagaisasikhe: ”An munggwarengge obabut weak mene nendawimo kwigi'lego. An nen neisena fogeratu kwelek meneat he, hiren an nenu weak hilingisogo fikhi lagebo. 50Menere, an nonggwarek faget fogetnabuageluk hilingitirek fuk. Lego. Athe, an fogetnabuageluk, at ekhe nen wene inoba figik, kotik, igin mene werego. 51Nen, ap sa nen an nane hologo hilingiti logogin halok he, wa'lagi'lek eluk mondok logogin o, iluk eberogoat yagahisigi,” iluk, yagaisikhi lagaikhemo, 52it ap Yahudi mene omanogo nen he, mel yagatukwa. ”Ap Abraham inom, ap Allah ane yagaisikhi lagaukwa mene omanogo inom, arat wa'larik lagaukwa meneat he, haren ikhi logolik, ap sa nen an nane hologo hilingiti logogin halok, wa'lagi'lek eluk mondok logogin o, iluk egen andi nen he, munggwarengge obabut weak mene eberogoat hendawimo kwikhesik werek, iluk futhobagogo. 53Nit ninomba Abraham wa'lagikhe mene andi ebe yenggerek hak, nen hat enek he hebe kain a? It ap Allah ane yagaisikhi lagaukwa mene omanogo wa'larik lagaukwa meneat he, hat hebe sa hagen ikhi lagen nogo,” iluk yagatukwama, 54-55aren he, mel yagaisasikhe: ”An nonggwaregen fogerakhikhi logoilema re, we tulemat fogerakhikhi logoile o. Athe, an neisena ebe nelu mene andi, hiren, at ebe futfigi'lek logolik, nit nineisena Allah iluk ikhi lagep a'nogo, at ebe nenat, fogetnabi'logo. An nen, At ebe nonggot, iluk ilema re, hit hinera nen ikhi lagep hagat ile o. Menere, at ebe nelu andi nen he, at ane hologo hilingiti lagi o. 56Nen, hit hinomba Abraham a'nogo nen, an wesigin mene faget ikhi logolik, At wagunem neilenggen hagain, iluk an naleik wati lagaikhesi'mo andi nen he, eilenggen arat neasikhesik endawimo agaiyek anggasikhe,” iluk yagaisikhi lagaikhemo, 57it ap Yahudi mene omanogo nen he, mel yagatukwa: ”Hat hebe ta'lagagin oba nen 50 tahun oan hilinglagi'lek meneat he, Abraham elok heilenggen hasigindigen ikhi lagen a? Elo'lego,” iluk yagatukwama, 58aren he, mel yagaisasikhe: ”An nane eberogo yagahisago. Ap Abraham andi ebe oan ta'lagi'lek werek kwelek, an netok mondogat welagirego,” iluk yagaisasikhe 59A'nogo yagaisikhi lagaikhemo, it ap omanogo nen he, at Yesus ebe wasuogeluk helep inenggimo wanhukwa meneat he, Yesus ebe hina'lagaikhesigen, o Allah awi wuri'mo herakfuluk ale'ma lagaikhe.

Currently Selected:

YOHANES 8: inohap

Highlight

Copy