YOHANES 9
9
Yesus nen ap ekhe eilenggen mum mene fano higitikhe wene
1At Yesus ebe o andoma herakfisaluk kwe laga logolik, eilenggen yethasikhe hak he, ap ekhe agaisa alabutmo nen mondok eilenggen mumat ta'lagaikhe mene hasikhe. 2A'nogo hasikhemo, at agoromi ane wanhi lagaukwa mene omanogo nen he, mel yagatukwa: ”Noe. Ap eilenggen mum ari re, ero at onggwaregen weak hilingitikheba a? Athe, ero eisena agaisa weak hilingitukwaba ebe a'nogo ta'lagaikhe a?” iluk yagati lagaukwama, 3at Yesus nen he, mel yagaisasikhe: ”Ero ap yi inom, eisena agaisa inom, weak hilingitukwaba eilenggen mum ta'lagaikhe fuk. Athe, Allah nen ap yi higitunem afuni nen ineilenggen haluk, At Allah nen hilingiterek mene inelu asuageluk ta'lagaikhemo o,” iluk yagaisasikhesik, 4ekhe mel yagaisasikhe: ”Hobuk o mum asigin o. A'nogo mum agunem, afuni ekhe nen yi mene ti mene hilingisu lek hak asigin andi nen he, At laknobagai wagaikhe mene hilingiterek mene andi, o yogondak o selek werek kwelek yagaat hilingiti logouwogo. 5An kweangma yoma logolik, nebe o selek hangge andi nen he, afuni selegerinafirego.”#Mat. 5:14; Yoh. 8:12 6Iluk a'nogo arat yagaisasikhesik he, wesi suphogo kweangma fesikhesigen, enggi nen fiselogo lebeleget fesikhesigen ap a'nogo eilenggen oba yugulfesikhe. 7A'nogo yugulfesikhesik he, ap a'nogo mel yagatikhe: ”Helokhe kwe i Siloam mogo a'liba sobali lan o,” iluk yagatikhe. I andi nit ninaneba re, ’Lakfesikhe,’ u hak, enu Siloam ima loageluk yagatikhe. A'nogo lagaikhesik elokhe kwe sobalhikhemo eilenggen a'nogo fano agaikhesik ambotkwe wagaikhe.
8A'nogo fano agaikhesik wagunem, it afuni at agaila'lak mene inom, it ekhe ap a'nogo attak ambe kino weak ugunem ineilenggen hasukwasik he, mel isukwa: ”Eige! nailo e. Ap yi re, ebe hurek enek logolik, ambe kino weak ikherek mene a'nogo lek nogo? Ap a'nogo aro,” iluk isukwama, 9it afuni omanogo ekhe nen he, mel isukwa: ”Ebe araro,” igik, it ekhe nen he: ”At fuk. Hunogoat meneat he, at elokhe hangge,” igik, isukwama at onggwaregen he: ”Eberogoat an nebe aro,” iluk yagaisasikhemo. 10Iren at oba heinok wokhikhi logolik he: ”Ninggi'nogo nen heilenggen fano aga,” iluk yagatukwama, 11at ap a'nogo nen mel yagaisasikhe: ”Ap enu Yesus agarek a'nogo nen kweang mene enggi nen piselogo lebeleget fikhesik neilenggen oba yugulnobagaikhesik mel yaganete, helokhe i Siloam mogoma sobali lan o, iluk yaganetemo, aren yaganete hagat lagarik, arat sobalhimo re, neilenggen fano aga o,” iluk isikhemo, 12iren yagati logolik he, ”Ap andi ebe koma werek,” iluk isukwama, aren he,
”An nonggoro,” iluk yagaisasikhe.
It ap Farisi mene nen ap eilenggen mum mene fano agaikhe mene a'nogo anema wanhukwa wene.
13A'nogo isikhemo, iren he, ap eilenggen mum mene a'nogo ap Farisi mene inoba waluk lagaukwa. 14Andi sambul he, at Yesus nen kweang enggi nen piselogo lebeleget fesikhesik ap eilenggen mum mene fano higitikhe andi. 15A'nogo higitikhe andi nen, it ap Farisi mene nen ap eilenggen mum mene a'nogo oba heinok wokhikhi logolik he, mel isukwa: ”Ninggi'nogo nen heilenggen fano aga,” iluk isukwama aren he, ”At a'nogo nen kweang mene enggi nen piselogo lebeleget fikhesik neilenggen oba yugulnobagaikhemo, sobali lagimo re, an neilenggen fano aga o,” iluk yagaisasikhemo, 16it ap Farisi mene ekhe nen he, mel isukwa: ”Ninenggi sabit oba Allah faget weat logogun iluk, wene palek mene andi sagalogo fikhesik hilingite andi nen he, at ebe Allah were'ma nen waga mene re lego,” iluk isukwa meneat he, it ap ekhe nen he, ”At ebe weak hilingiterek mene logoilepma re, wene futfouwogeluk elalin mene yi'nogo hilingisu hak nogo? Lego,” iluk, it inendawimo a'nogo hunogo tomok anggasukwasik inane sagalogo inebe minggilhukwa andi. 17A'nogo minggilhukwasik he, ap eilenggen mum mene a'nogo oba heinok hobuk wokhikhi logolik he, mel isukwa. ”Haren he, neilenggen fano higitnafe egen anggigi. Halok he, ap andi abok haren ninggi'nogo igin,” iluk yagatukwama, aren he, ”At ebe Allah, ane yagaisikherek mene a'nogo mene aro,” iluk yagaisasikhe. 18A'nogo yagaisasikhe meneat he, it ap kaindek Yahudi mene nen ap yi attagat eilenggen mum welagaikhe meneat he, yogondak arat fano agama, iluk fut fou inabiren he, ap a'nogo eisena agaisa wolisasukwama wagaukwama re, inoba heinok wogisikhi logolik he, mel isukwa: 19”Hiren he, nit ninamlogo eilenggen mumat ta'lagama isigip a'nogo re ebe yi ara? halok he, yogondak eilenggen ninggi'nogo nen fano aga?” iluk yagaisasukwama, 20iren yagaisikhi logolik he, mel isukwa: ”Abo yi re, ebe niren hogo mene eilenggen mum ta'lagaikhe, ikhi lago a'nogo meneat he, 21ninggi'nogo nen fano aga he, nit ninonggoro. Nen, sa nen fano higite he, nit ninonggoraro. Halok he, at ebe ap yenggerek fugo. Ebe alue atma re, at onggwarek faget yagahisoagen oba heinok wokhani,” iluk yagaisasukwa. 22A'nogo yagaisasukwa andi re, it ap kaindek Yahudi mene nen, ikhi logolik he, ”It afuni inebe lombogen, ap yi re, Allah nen nit afuni telninabuageluk lakfei wesigin isikhe a'nogo Kristus ebe yi aro, iluk fakhogo ugu halok he, oloba samban agarek oba nen lisogo wulak fisouwogo,” iluk wene palhukwa mene werek andi nen he, ap andi eisena agaisa it ap kaindek Yahudi mene inailo nen he, 23mel isukwa andi: ”At ebe re, ap yenggerek fuk. Ebe alue atma re, at onggwaregen yagahisoagen oba heinok wokhani o,” iluk yagaisasukwa andi.
24A'nogo isukwama iren he, attagat eilenggen mumat ta'lagaikhesik welagaikhe mene a'nogo hobuk, ”Eme o,” iluk wolhasukwama wagaikhemo re, mel yagatukwa: ”Ap andi ebe weak hilingiterek mene nit ninelu andi nen he, hat honggwaregen hane eberogoat Allah enu hombuk palogo yaganisan o,” iluk yagatukwama, 25aren he, mel yagaisasikhe: ”Ap andi ebe weak hilingiterek mene he a? Lek he a. An nonggot meneat he, an attagaren neilenggen mum welagirek mene re, yogondak ya fano agarik welagi andi nek nelu o,” iluk yagaisasikhemo, 26iren he, mel yagatukwa: ”Aren ninggi'nogo hilingite? Heilenggen ninggi'nogo fano higithafe,” iluk yagatukwama, 27aren he, mel yagaisasikhe: ”Wene fageat arat yagahisigi meneat he, hinesanggo holu hinabit logoligen, hobuk hinesanggo holugun iluk ikhi lagep andi nenahalok? Hit at agoromi asugun hinamolo nen ikhi lageba?” iluk yagaisasikhemo, 28iren inane asegen wokhikhi logolik he, mel isukwa, ”Hat at agot agendik ikhi lagen higi. Nit he, ap Musa agoromi welago o. 29Nen, ap Musa faget he, wene Allah nenat yagatikhe, iluk nit ninelu meneat he, ap andi faget enek he, ebe o koma nen waga mene he, nit ninonggoro,” iluk ikhi lagaukwama, 30aren he, mel yagaisasikhe: ”Eige! Nailo e. Ap andi nen, an neilenggen fano higitnafe meneat he, hiren, at ebe o koma nen waga mene he, nit ninonggot iluk ikhi lagep andi, elalinhogoat ikhi lagebo. 31Afuni weak hilingitarek mene Allah nen inane esanggo holherek mondok lek andi, nit ninelu o. We, afuni inailorogo logolik, at endawimo anggikherek mene higithogo hilingiterek mene halok, Allah nen inane esanggo holherego. 32Nen, afuni omanggum eroba nen yogondak huli afuni ekhe ineilenggen mum ta'lagaukwama nen hobuk fano hilinginafukwa, iluk ninesanggo holhorek mondok lego. 33Ap andi Allah nen lakfei wagi'lek logoilepma re, aren yi hilingitik, ti hilingitik, hilingiterek a'nogo hilingiti logoilep lego,” iluk yagaisikhi lagaikhemo, 34iren he, mel yagatukwa: ”Hat hobabut weagat ta'lagagindik, weak mondok hilingiti lagen meneat he, haren wene nit yaganisa hak nogo? Mondok elo'lego,” iluk yagatukwasik he, o samban agarek oba nen enggi lisogo leget enda'ma wulakfisa wagaukwa.
Yesus nen, ”Afuni ebe wene faget ineilenggen mum hangge werek,” iluk yagaisasikhe wene
35Afuni nen ”Iren ap a'nogo leget enda'ma wulabi wagaikha,” iluk afuni nen isukwama, at Yesus esanggo holhikhemo nen, hobuk ap a'nogo emberek ambi agaukwasik he, mel yagatikhe: ”Ap ekhe ebe abat ta'lasi wesigin isukwa a'nogo, ebe futfegendigen hendawinggen oba himbiret fegen a?” iluk yagatikhemo, 36aren he, mel yagatikhe: ”Ap andi ebe sa nogo, noe. An nen ap andi ebe fut fembigen nendawinggen oba himbiret feigen he, yaganom,” iluk yagatikhemo, 37at Yesus nen he: ”Hat heilenggen arat neegen a'nogo yogondak nemberek wene ane ikhi lago nebe yi aro,” iluk yagatikhemo, 38aren he mel yagatikhe: ”Yogondak arat fut hobagagirik nendawinggen hoba eberogoat himbiret figi, noe,” iluk eindep awi yagaisogo re, Yesus fogeratikhe. 39A'nogo fogeratikhemo, at Yesus nen he mel yagatikhe: ”An nen afuni ekhe ineilenggen mum mene halok fanorinafik, it ekhe ineilenggen fano mene halok mumet fisigik, ikhi logolik ayo wurinabigiluk nebe kweangma yoma pi wagagi o,” iluk ugunem, 40it ap Farisi mene ekhe andoma logolik inesanggo holhukwasik he, mel isukwa: ”Hat hendawimo nen he, it ineilenggen mum iluk anggikhi logolik nit faget yaganisegen a? Lego” iluk yagatukwama re, 41at Yesus nen he, mel yagaisasikhe: ”Hit hineilenggen mum logoilepma re, hit weak iluk wene hinoba feilep lek. Meneat he, hiren he, nit nineilenggen fano hikhi lago iluk ikhi lagep andi nen, Allah nen he, hit weak iluk wene hinoba fikhemo werego,” iluk yagaisasikhe.
Currently Selected:
YOHANES 9: inohap
Highlight
Share
Copy
Want to have your highlights saved across all your devices? Sign up or sign in
