LUKAS 15
15
”Wam longgot fuluk hobuk herakhaluk, inendawimo inagaiyek agaikharek,” iluk oba lirogo yagaisasikhe wene
(Mat. 18:12-14)
1A'nogo yagaisasikhesik, hobuk inenggi ekhe sambul he, it ap uang pemerintah faget kino iluk andogotarek mene inom, weak hilingitarek mene inom, inebe mondogat Yesus ane inesanggo holuogeluk he, ha wagaukwa.#Luk. 5:29-30 2A'nogo wagaukwa mene re, it ap Farisi mene inom, it ap Allah ane lisu palek inelu mene inom, ineilenggen isaluk he, inane nguluk-habuk ikhi logolik, mel isukwa: ”Ap yi nen afuni weak hilingiri'lagwi mene woginaferesik sumburu inom misi'mo nenggarek andi, nailo e!” iluk isukwama re, 3at Yesus nen wene oba lirogo mel yagaisasikhe: 4”Ap hit mene ekhe anggo domba 100 nen were'ma re, misigat ekhe longgoi laga halok he, 99 aremnogo o leimo fisaluk, misigat longgo igin mene andi herakfisigi'lek mondok herarik nikhi lagaresigen, arat herakhikherek a'nogo lek? 5A'nogo arat herakhaluk endawimo agaiyek a'luk ot oba sanggenogo waluk he, 6oe agot inom, afuni ekhe inawi sili misi'mo mene inom, mondogat wolisaluk he, an nanggo longgoi laga mene a'nogo arat herakhaluk wagi andi nen, ninendawimo ninagaiyegesuogo, iluk yagaisikherek a'nogo lek? 7Andi hak, afuni inebe 99 mene andi nen he,
An weak hilingiti andi nen he, nobabut hebelasigin nogo? Lego, iluk, inobabut hebelasu legen he, it pogoroba welagaikharek mene andi inendawimo inagaiyek hogoin lego. Meneat he, it afuni weak hilingitarek mene misik mene ekhe nen obabut hebelhe halok, it pogoroba welagaikharek mene andi inendawimo inagaiyek hokho mene asugun o, iluk yagahisigi,” iluk yagaisasikhe.
”He ekhe nen uang sen mene longgosikhe mene heratikhe,” iluk oba lirogo yagaisasikhe wene
8A'nogo yagaisasikhesik he, wene ekhe mel yagaisasikhe: ”He ekhe uang sen mene ebe 10 nen fisogo were'ma misigat ekhe longgo ikhe halok he, herakfisigi'lek esage ibilogo re, o hulukwe lelem mondok wulak fuluk tegelhi logolik he, arat herakhikherek a'nogo lek? 9A'nogo arat hera'luk he, hemi inom, at aksumi inom, inawi sili misi'mo welagaikharek mene inom, wolisugunem andogosi wagunem he, na uang sen mene longgo ikhe mene arat herakhigi andi nen he, nit mondogat ninendawimo ninagaiyegesuogo, iluk yagaisikherek lek a'nogo? 10Andi hak, afuni weak hilingitarek mene misigat ekhe obabut hebelhe halok he, it malaikat Allah nen yonggo lakfisa wagarek mene omanogo inendawimo inagaiyek hokhorogo asugun o, iluk eberogoat yagahisigi,” iluk yagaisasikhe.
”Ap ekhe amlogo longgosikhe mene ambotkwe wagaikhe,” iluk oba lirogo isikhe wene
11A'nogo yagaisasikhesik he, wene ekhe mel yagaisasikhe: ”Ap ekhe againafuri ap inebe pire welagaukwa. 12Mene re, ap elabo mene nen eisena yagati logolik he, mel yagatikhe: Neisena! Hat wa'lasumo haminingengge wo'nesigin mene halok, wo'nom o, iluk yagatikhemo re, at ineisena a'nogo nen he, at aminingengge sumburogo asugun mene higithogoat felelenghogo amlogomi emberek sumburogo wogisasikhe. 13A'nogo sumburisasikhemo, amlogo elabo mene a'nogo enggi ekhe inom welagi'lek, yi mene ti mene, at agaikhe mene a'nogo mondok felelenghogo onggo palogo helaluk he, o yatma andoma lagaikhe. Lagaikhesik andoma logolik he, endawimo ebeti'lek, we, hesanggeat hilingirik nikhi logolik arupiah omanogo mondok nalek-falegengge hilingitikhe. 14Mondok nalek-falegengge hilingisogo fesikhesik were'ma, o andoma sumburu mondok ouwak hokho agaikhemo re, ap a'nogo sumburu nele hokho agaikhe. 15Sumburu nele hokho agaikhemo re, ap a'nogo endawimo nen he, ap awi werek mene ekhe eabu hilingitunem namburu mela'neti logouwagen oba lagain, iluk lagaikhe. Lagaikhemo re, ap awi werek a'nogo nen he, o ik awiba anggo kwalogo logouwageluk lakfesikhe. 16Lakfesikhemo andoma logolik he, endawimo nen he, nalabut ning uagen he, sumburu asing ibilik wam ninggerek mene andi ninggi logoile o, iluk anggasikhe meneat he, wogeti lagaukwa le'ma, 17weat logolik obabut hebel lagaikhesik he, eigo! An neisena a'nogo aiba amingmingengge mene eabu hilingitarek mene omanogo inebe hokhorogoat sumburu hokho tindelogo figik nunggu kwelegat he, an yi nek he, sumburu nele nen wa'lasigin yi! 18Halok, an hobuk yoma nen neisena oba lambik he, mel yagasigin: Neisena! At Allah pogoroba mene andi inom, hat inom, hineil salogo weak mondok hilingitimo o. 19A'nogo weak hilingitiri'mo re, haren he, yi an namlogo, iluk hobuk igin mondok elo'lego. We, hat hamingmingengge meneat nobagainogo, iluk yagasi lagain, iluk endawimo anggasikhe. 20A'nogo anggasikhesik, o welagaikheba a'nogo hebisaluk he, eisena a'nogo oba wesigeluk oan wagunem, at eisena a'nogo nen yatma wagu kwelek eilenggen yethasikhesik he, endawinggen abolok isikhesik, fungusek lagaikhesik he, obakhe felikhogo hai ambe saluk-saluk watikhe. 21A'nogo hilingitikhemo, at amlogo a'nogo nen he, mel yagatikhe: Neisena! An he, at Allah pogoroba mene a'nogo inom, hat inom, hineil salogo weak hilingiti o. A'nogo hilingitiri'mo re, yi an namlogo, iluk hobuk igin mondok elo'lego, iluk yagatikhe. 22A'nogo yagatikhe meneat he, at eisena a'nogo nen amingmingengge mene omanogo yagaisikhi logolik he, mel yagaisasikhe: Lambik he, su fano mene a'nogo waluk weak-weak labetfei wagik, senggan fano mene enggimo ikfei wagik, sepatu eiso'ma ikfei wagik, weak-weak ini o. 23A'nogo hilingisimbik he, wam sapi eak eilagambi fano mene a'nogo waganogo, at faget ninendawimo ninagaiyegeti logolik obaget warogo isasuogo. 24An namlogo yi wa'laga anggogo mene eluk a'luk waga yi. Mondok longgoikhe meneat he, hobuk herato yi, iluk, inendawimo inagaiyek hokhorogo anggasukwa. 25A'nogo hilingitu kwelek aremnogoat, at oe a'nogo yabumo welagaikhesik wagaikhe hak he, gitar wati logolik wuni watunem inane esanggo holik-holik wagaikhe. 26Wagaikhesik eisena amingmingengge omanogo mene misigat ekhe wolhasikhemo wagaikhemo re, mel yagatikhe: Inane oloba andoma ninggi'nogo hilingiri'lagwi, iluk, heinok wanhikhemo, 27at a'nogo nen he, lego! Hagot a'nogo wagama o. At ebe oba ou lek fano mondok wagama re, heisena nen anggo sapi eilagambi fano mene a'nogo watesik hilingiri'lagwi o, iluk a'nogo isikhemo, 28at oe manggusa mene a'nogo a'mage hokho lagasikhesik he, aiba kwigin endawimo mondok pugagaikhesik were'ma, eisena a'nogo wulibi wagaikhesik he, ane liokhogo, kwi lou o, iluk yagatikhe. 29Yagatikhemo amlogo a'nogo nen eisena yagati logolik he, mel isikhe: Hesanggo holin? An he, yi tahun ti tahun hat faget heabu mondok hokhorogo hilingitirego. A'nogo hilingiti logolik he, haren, yi'nogo hilingi'no, ti'nogo hilingi'no, iluk yaganetendek mene a'nogo ekhe nabit igi'legat hilingitirek meneat he, wam eak misigat ekhe an nagaila'lak ninom ninendawimo ninagaiyek hikhi logolik isago noageluk wo'neti lagen legat. 30Meneat he, hat hamlogo ari hemi hesanggeat fakfisilik nikhi logolik hat wa'lasumo haminingengge eise asigin mene higithogo wogeten mene a'nogo mondok nalek-falegengge hebisaluk waga mene ari nek he, wam sapi eak eilagambi fano mene a'nogo warogo obaget isaten yi ri! iluk yagatikhemo, 31at eisena a'nogo nen he: Namlogo e! Hat nemberek welagorek mene yi re, an nagarek yi mene ti mene mondogat he, hat mene aro. 32Meneat he, hat hagot yi re, wa'laga anggogo mene re, eluk agasik waga o. Longgo ikhe mene herato o, andi nen he, ninendawimo ninagaiyek hikhi logolik hilingisu meneat hilingiti lago, iluk yagatikhe,” iluk Yesus nen yagaisasikhe.
Currently Selected:
LUKAS 15: inohap
Highlight
Share
Copy
Want to have your highlights saved across all your devices? Sign up or sign in
