LUKAS 18

He sogwe mene inom, ap wene ayo wuterek mene inom, inoba lirogo yagaisasikhe wene

1A'nogo yagaisasikhesik he, at Yesus nen agoromi ane wanhi lagaukwa mene omanogo samban ikhi logolik inendawimo kamo igi'lek, hundik-handigat ikhi logouwageluk, wene ekhe oba lirogo yagaisikhi logolik he, mel yagaisasikhe: 2”O sili ekhe, ap kain mene wene inoba figik, kotik, ikherek mene ekhe Allah ailo lek logolik afuni agaukhogo endawirinaferek lek mene welagaikhe. 3A'nogo were'ma, he sogwe mene ekhe o sili andi welagaikheat. Logolik, hundik-handik ap a'nogo oba wagu mondok logolik he, mel yagati lagaikhe: Ap ekhe an nemberek weak mene haren elele wo'nabinogeluk wagi o, iluk yagasi waga lagaikhe. 4A'nogo yagasi wagunem he, ap kain a'nogo nen attak ane holhi'lek abiret fikhi lagaikhe meneat he, hobuk endawimo ebeti logolik he, an nobabut he, Allah nailo legat logolik, afuni agaukhogo nendawirinafirek lek meneat he, 5at he sogwe mene yi, ane noba weak peakhogo yaganesi weri'logo yi, awene pilingereti'lek halolot fisamo re, noba wagu mondok logolik nendawinggen sagalogo hilingiti logoinogo nen he, awene andi pilingeresigin, iluk endawimo anggasikhe,” iluk Yesus nen isikhe. 6A'nogo yagaisasikhesik, at Tuhan Yesus nen he, ekhe mel yagaisasikhe: ”Ap obabut weak logolik wene afuni inoba figik, kotik, ikherek mene ikhe andi futfeni o. 7Andi hangge, at Allah nen againafuri wenagaisogo fisasikhe mene halogen linggene hubanggo inane ninghogo ayonggo fugu halok he, elele woginabigin lek nogo? Inane konhi logombigen, hobuk halok elele woginabigin nogo? 8Lego. Weak-weagat elele woginabigin o, iluk eberogoat yagahisigi. A'nogo hilinginabigin meneat he, an abat ta'lasi wagagi a'nogo hobuk wesimbik he, afuni kweangma mene yoma ekhe inendawinggen noba himbirik were'ma isa wesigin a? Lek he a,” iluk yagaisasikhe.

Ap Farisi mene inom, ap uang pemerintah faget kino iluk andogoterek mene inom, inoba lirogo yagaisasikhe wene

9A'nogo yagaisasikhemo, it afuni fena omanogo inendawimo nen he, mel anggikhi lagaukwa: ”It afuni mondogat yoma elo'lek hak meneat he, nit yi nek he, ninebe esin logolik higithogo hilingiti lago,” iluk anggikhi lagaukwama re, at Yesus nen wene oba lirogo yagaisikhi logolik he, mel yagaisasikhe: 10”Ap inebe pire mene samban uogeluk, Allah awi wuri'mo kwi lagaukwa. Ap ekhe re, Farisi mene. Nen, ekhe re, uang pemerintah faget kino iluk andogoterek mene. 11Emberek kwi lagaukwasik samban ikhi logolik, ap Farisi mene a'nogo menlagaikhesik samban ale'ma nen ikhi logolik he, mel isikhe: Allah, neisena e. An nobabut he, afuni mondogat inobabut hangge lego. It afuni hesangge yogot wanharek mene inom, weak hilingitarek mene inom, hemi pailak fakfisili'lagwi mene inom, ap uang pemerintah faget kino iluk andogoterek mene yi inom, inobabut andi hak he, an nobabut a'nogo mondok lek andi nen he, hai wathafi lagi o. 12An he, minggu misigat oba nenggi pireba sumburu ninggi'lek heang fuluk welagik, nagarek yi mene ti mene fakhigirek mene, mondogat nenggi wenagaisogo re, nomoloba asi wagunem, ekhe hat faget hobagagik, igirego. Neisena, iluk isikhe meneat he, 13at ap uang pemerintah faget kino iluk andogoterek mene a'nogo nek he, ebe yatma mendek logolik ot legeisogo eilenggen pogoroba higit liak higi'lek ailorogo logolik, enggi nen endawinggen fothikhi logolik he, mel isikhe:

Allah neisena e! An weak hilingiti lagi mene yi hendawi nean o, iluk yagatikhe. 14It samban a'nogo isukwa andi faget, an wene ekhe yagahisak. Ap sa nen endawinggen legeisogo fakhaluk fogerakhugu halok he, Allah nen sebelfisikherego. Nen, ap sa nen endawinggen sebelfakhaluk, an elo'lek, anggikhe halok he, Allah nen legeisogo fisikherek andi nen he, at ap samban attak ikhe mene andi, Allah nen wene oba mene sebelogo legetfisigi'lek kamo isikhe. Meneat he, at ap samban hobuk isikhe mene andi nek he, Allah nen wene oba mene sebelogo legetfisasikhemo aiba lagaikhe, iluk yagahisigi,” iluk yagaisasikhe.#Mat. 23:12; Luk. 14:11

”Yenggerugwi magendek andi noba wesuak,” iluk yagaisasikhe wene

(Mat. 19:13-15; Mrk. 10:13-16)

15At Yesus nen a'nogo yagaisasikhesik were'ma, hobuk afuni nen inagainafuri magendek mene Yesus nen enggi fagisoageluk he, oba woginarek wagaukwa. A'nogo woginarek wagunem, at Yesus agoromi ane wanhi lagaukwa mene omanogo nen ineilenggen isasukwasik he, wenagisasukwa. 16A'nogo wenagisasukwa meneat he, at Yesus nen yenggerugwi magendek mene omanogo wesuageluk wolisasikhemo wagu kwelek he, at ane wanhi lagaukwa mene omanogo mel yagaisasikhe: ”Afuni inobabut it yenggerugwi ari inobabut hangge hilinglasugun halok he, Allah nen awe a'ma fisikhere'ma andoma eisewerek asugun andi nen he, yenggerugwi magendek andoma an noba wesuago. Wene palhu lek. 17Sa nen, yenggerugwi magendek mene yi higit hilinglagi'lek halok, Allah awe a'ma fisikherek oba andoma eisewerek asugun mondok lego, iluk eberogoat yagahisigi,” iluk yagaisasikhe.

Ap kain enggi werek mene Yesus oba wagaikhe wene

(Mat. 19:16-30; Mrk. 10:17-31)

18A'nogo yagaisikhi lagaikhemo re, it ap Yahudi mene inoe kain ekhe nen Yesus mel yagatikhe: ”Noe. Hat guru fano mene logolik wene yaganisikhi lagen andi, mondok fano o. An nabulal-habulal eise asigen he, an nobabut ninggi'nogo hilingiti logogin,” iluk yagatikhemo, 19at Yesus nen he, mel yagatikhe: ”Hat fano, iluk yaganeten andi ninggi'nogo nen yaganeten. At ekhe fano lego. We, at Allah amuat fano o. 20Wene Allah nen, yi'nogo hilingi'no, ti'nogo hilingi'no, iluk komotninafi logolik, mel isikhemo werek:

Hemi pailak fakfisogoin lego. Afuni inoasugun lego.

Yogot wanugun lego. Hinera nenat inabok palugun lego.

Hineisena hinagaisa inane hologo agaugwerinafi logogun o,

iluk komotninafikhe a'nogo hat helu aro,” iluk yagatikhemo,#Kel. 20:12-16; Ul. 5:16-20

21at ap a'nogo nen he, mel yagatikhe, ”Wene yaganeten andi mondogat he, an nebe yenggerek oba nenat nesanggo hologo higithogo hilingitirek mene aro,” iluk yagatikhemo, 22at Yesus esanggo holhikhesik he, mel yagatikhe: ”Wene misigat enek ekhe hilingiti'lek welagen o. Hat hangge andoma felelenghogo it ekhe inoba onggo pali lano. Onggo paliluk he, onggo wokhesugun mene andi it afuni ekhe inagarek lek inelagaik mene andi mondok sumburogo wogisano o. A'nogo arat wogisegen halok he, hat pogoroba mene hokhorogat eisewerek asigin o. Halok a'nogo arat sumburogo wogisaluk he, an nombo'ne nikhi logoinogen we'no o,” iluk yagatikhemo, 23at ap a'nogo esanggo holhikhesik he, angge mondok hokhorogo andi nen he, endawimo mondok weak agaikhe. 24Endawimo a'nogo weak agaikhemo, at Yesus eilenggen enegat yethasikhesik he, agoromi mel yagaisasikhe: ”Eige. Nailo e. Afuni inangge hokhorogo werek mene re Allah awe a'ma fisikherek oba andoma ninggi'nogo ku hearo. 25Wam unta hokho mene andi lisu enggetma kwelabumo elok kwigin meneat he, it afuni inangge hokhorogo werek mene Allah nen awe a'ma fisikherek oba andoma kugun mondok elo'lego,” iluk yagaisasikhe. 26A'nogo yagaisasikhemo, it omanogo inesanggo holhukwasik he, at Yesus mel yagatukwa: ”Halok he, Allah nen afuni sani hak elok telinabigin he,” iluk yagatukwama, 27at Yesus nen he, mel yagaisasikhe: ”Afuni nen hilingisu mondok elo'lek meneat he, at Allah nen hilingisigin enego,” iluk yagaisasikhe.

28A'nogo yagaisasikhemo, at Petrus nen he, mel yagatikhe: ”Mene re, nit hat hombo'ne nikhi logouwogeluk ninangge yi mene ti mene herakfisaluk wagosik nikhi lago mene yi nek he, ningginik,” iluk yagatikhemo, 29-30at Yesus nen he, mel isikhe: ”Sa nen Allah awe a'ma logoigeluk awi wurik inom, agwe inom, oe agot inom, eisena agaisa inom, againafuri inom, herakfisaluk waga halok he, o yogondak ya logolik obali'mo mondok hokhorogo oba loukhogo wogosigin o. Nen, o hobuk hilinglasigin a'nogo logolik, nabulal-habulal wogosigin aro, iluk eberogoat yagahisigi,” iluk yagaisasikhe.

”An noasugun o,” iluk enggi pireba yagaisasikhesigen, hobuk ekhe yagaisasikhe wene

(Mat. 20:17-19; Mrk. 10:32-34)

31At Yesus a'nogo yagaisasikhesik he, agoromi inebe 12 nen omanogo woginarek he, inale'ma tegelogo lagaukwasik mel yagaisasikhe: ”Nagoromi. Nit yogondak o Yerusalem pikhi lago. Arat pumo nen he, it ap attak Allah ane yagaisikhi lagaukwa mene omanogo nen, an abat ta'lasi wagagi a'nogo hobuk hilingnabugun mene lisu palogo fesukwa mene higithogoat hilingnabugun o. 32Nebe noasuageluk, yonggo lambik it ap enda'ma mene inenggiba nobagagun o. Nobagaumo, inane asegen wo'niigik, endo ya'nafik, wesi nobagagik, 33yei lambisok noatik, imbik he, nebe mondok noasugun o. Noatunem he, nenggi pire warek logombigen, ekheba re, neluk asigin o,” iluk, 34a'nogo fakhogo yagaisasikhe meneat he, hinago mene ikhe iluk, at agoromi omanogo ninggi'nogo mene faget ikhe heat wonget fesukwa.

Ap eilenggen mum mene ekhe higitikhe wene

(Mat. 20:29-34; Mrk. 10:46-52)

35At Yesus o Yerikho kwi lageluk horokhogo asi lagaikhe hak he, ap ekhe eilenggen mum logolik ambe kino weak ikhi lagaikhe mene ebekhalem aremnogo hurek were'ma re, 36afuni inane hokhorogo ilik lagunem esanggo holhikhesik he, mel yagaisasikhe: ”Inane andoma, ninggi'nogoluk ilik weri'lagwi,” iluk heinok wanhikhe. 37Heinok wanhikhemo, iren he, mel yagatukwa: ”Yesus awi Nasaret mene a'nogo kwe yikwe wagu nen ili'lagwi o,” iluk yagatukwama, 38ap a'nogo nen ane hokhorogo ikhi logolik he, Yesus mel yagatikhe: ”Yesus Daud en tagongge mene noe a! Hendawi nean o,” iluk yagatikhemo, 39it afuni attak lagaukwa mene omanogo nen, ”Hane o,” iluk wenagatukwa meneat he, hobuk ane ninghogoat mel yagatikhe: ”Daud en tago mene noe a! Hendawi nean o,” iluk yagatikhemo re, 40at Yesus ebe menlagaikhesik he, afuni omanogo mel yagaisasikhe: ”Ap andi waluk we'ni o,” iluk yagaisasikhemo, ebe Yesus era'lu fei wagaukwama, aren heinok wokhikhi logolik, 41”An nen ninggi'nogo hilinghabuageluk yaganeten,” iluk yagatikhemo, at ap a'nogo nen he, mel yagatikhe: ”Noe e. Neilenggen fano higitnabinogeluk yagaheti o,” iluk yagatikhemo, 42at Yesus nen he, mel yagatikhe: ”Heilenggen mum ari fano ame o. Hat hendawinggen an noba eberogo nen himbiret fegen andi nenat fano agen o,” 43iluk yagatu kwelek aremnogoat, eilenggen mum mene a'nogo fano agaikhesik, Yesus ombo'ne laga logolik he, Allah fogerarik lagaikhe. Nen, it afuni fena omanogo Yesus nen higitikhe mene andi ineilenggen hasukwasik he, Allah fogeratukwaat.

Currently Selected:

LUKAS 18: inohap

Highlight

Copy