LUKAS 19
19
Ap Zakheus nen hilingitikhe wene
1A'nogo hilingitikhesik he, at Yesus o Yerikho kwi lagaikhesik, o sili andoma hebisaluk pikhirat lagunem he, ap ekhe enu Zakheus, 2uang pemerintah faget kino iluk andogoti lagaukwa mene inoe kain logolik enggi werek agun welagaikhe. 3Were'ma, ”Yesus andi ebe ningginik he,” iluk eilenggen yethageluk isikhe mene re, afuni inebe mondok hokhorogo were'ma, at ebe oak horok andi nen he yetha re elo'lek agaikhe. 4A'nogo hilinglagaikhemo, at endawimo nen he, ”Yesus ebe kwe yiba wagunem neilenggen yethagain,” iluk, it afuni omanogo hobuget fisaluk he, at ebe attagat fungusek lagaikhesik, eba lagasikhe. 5Lagasikhesik were'ma, at Yesus aremnogo lagaikhesik eilenggen liakhasikhesik he, enu fakhogo mel yagatikhe: ”Zakheus, yogondak hat haiba nemberek nogo i louwogen he, weak-weak pi me o,” iluk yagatikhemo, 6at Zakheus a'nogo weak-weak pi wagaikhesik he, Yesus ebe hai warogo wanhikhesik, endawimo agaiyek agaikhesik, at aiba emberek lagaukwa. 7Emberek lagunem, it afuni nen ineilenggen yerisasukwasik, wene palogo inane nguluk-habuk inabok palhi logolik he, mel isukwa: ”Yesus he, ap weak hilingiri'logo mene a'nogo aiba emberek nogo i louwogeluk lili'lagwi andi nailo e!” iluk isukwa meneat he, 8at Zakheus a'nogo menlagaikhesik he, Yesus oba mel yagatikhe: ”Noe! An nangge yi mene ti mene mondogat tulem heirogo minggilogo re, it afuni inenggi lek mene andi sumburisagain. Nen, an nen afuni nera nen lalinafi mene halok he, onggo nenggi 4 oba nen hobuk oba loukhogoat wogisagain o,” iluk yagatikhe. 9A'nogo yagatikhemo at Yesus nen he: ”Hat hebe Abraham en tagongge a'luk he, yogondak yiat hat hagainafuri hinomat Allah nen telhinafe o! 10Telhinafe mene andi, an abat ta'lasi wagagi a'nogo, it afuni nong ari'lagwi mene heragaisogo telinabigeluk wagagi aro,” iluk yagaisasikhe.#Mat. 18:11
Uang emas hokho mene oba lirogo yagaisasikhe wene
(Mat. 25:14-30)
11At Yesus nen a'nogo yagaisasikhesik, inesanggo holek werek kwelegat, o Yerusalem arat horokhogo asi lagaukwasigen he, it afuni omanogo inendawimo nen mel anggasukwa: ”Allah nen awe a'ma inobagagin andi yogondak yaat ninobagagunem nineilenggen hogoin o,” iluk inendawimo anggasukwa andi nen he, at Yesus nen wene ekhe oba lirogo mel yagaisasikhe:#Mat. 25:14-30 12”Ap kain mene nen tagongge ekhe endawimo nen he, o ap kaindek inenupogot menfisagarek oba andoma lagunem an kain nenupogot mennobagaumo nambotkwe wesigin, iluk anggasikhe. 13A'nogo anggasikhesik logolik he, amingmingengge mene inebe 10 nen wolisasikhemo wagaukwama re, uang emas hokhondek mene ebe 10 nen inebe lombok misik tek sumburogo wogisikhi logolik he, mel yagaisasikhe:
An oan wagi'lek werek kwelek, narupiah yiba onggo palogo sik-pikhogo hilingiti logoino, iluk yagaisasikhesik he, at a'nogo lagaikhe. 14Lagu kwelek he, it oe agot omanogo ap andi inabiren he, wene palhukwasik, at ap andi ninoe kain enupogot logogin he, ninabit, iluk yagaisa lano, iluk, yonggo ombo'ne lakfisasukwa. 15A'nogo wene warogo lakfisasukwa meneat he, ap a'nogo kain enupogot logouwageluk menfesukwama aiba ambotkwe wagaikhe. Wagaikhesik he, uang an mene omanogo iren ninggi'nogo onggo palogo sik-pikhogo hilingita, iluk, elu asigeluk he, amingmingengge mene omanogo wolisasikhe. 16Wolisasikhemo, at ekhe attak wagaikhesik he, mel yagatikhe: Noe. An uang emas hokho mene misigat wo'netigin a'nogoba re, an nen onggo palogo re, hobuk 10 nen oba mangorogo onggo palogo fagagimo yi o, iluk yagatikhemo, 17at oe a'nogo nen he: Nagot wa! Hat hobabut fano hilingiti lagenma higi o. Endebat mene hobabut humbunhogo hilingiti lagenma andi nen he, yogondak he, o sili 10 nen yoma hobuk hat eise logolik ferinarek logoinogeluk menhobagagi o, iluk yagatikhe. 18A'nogo yagatikhemo nen, hobuk at ekhe ombo'ne wagaikhesik he, mel yagatikhe: Noe. An uang emas hokho mene misigat wo'netigin a'nogoba, an nen onggo palogo hobuk 5 nen oba mangorogo onggo palogo fagagimo yi o, iluk yagatikhemo, 19at oe a'nogo nen he: Nagot wa! Halok he, o sili 5 nen yoma hobuk hat eise logolik ferinarek logoinogeluk menhobagagi o, iluk yagatikhe. 20-21It a'nogo yagaisasikhemo nen, hobuk at ekhe wagaikhesik he, mel yagatikhe:
Noe. Hat hobabut mondok ningsek logolik, hat mene le'maat he, it ekhe mene heligik, nen, haren awi feik lakfigi'lek, we, it ekhe nen awi feik lakfaga meneat he, enggen henggi abisak paligik, egendek a'nogo nen, hobabut palhirik, nailo nen he, uang emas hokho mene misigat wo'netigin a'nogo an su likak tetu mene elonggoma yelogo fisogo welagirik he, wokhesi wagi yi o, iluk yagatikhe. 22A'nogo yagatikhemo, at kain a'nogo nen he,
Nagot. Hat hobabut weak mondogat hilingiti lagenma o. Hat hane egen andibaat wene hoba fembik weagethabigin o. An nobabut ningsek logolik he, an nen figi'lek mene heligik, awi an nen yati'lek meneat he, enggen paligik, igire'ma, nobabut hat helu halok he, 23an nambotkwe wesimbik narupiah ebe mene inom, oba mangorogo andogosugun mene inom, an hela wesuageluk he, it afuni ekhe uang fisogo logolik, onggo palogo ekhe inom oba loukhogo fili'lagwi mene omanogo wogisawemat he, nenahalok wogisigi'lek welagen, iluk yagatikhe. 24A'nogo uang emas hokho misigat mene ap ari fisogo werek ari waganogo re, ap ekhe 10 nen onggo palogo fikhe mene ari wogo'ni o, iluk yagaisasikhemo, 25it afuni omanogo nen he, mel yagatukwa: Noe! At yi a uang emas hokho mene 10 nen werek yoma, iluk yagatukwama, 26at kain a'nogo nen he, mel yagaisasikhe: It afuni ekhe inenggi werek mene andi, inebe lombok hobuk ekhe inom oba loukhogo wogisogoin o. Nen, it ekhe inenggi lek mene andi, endebat fisogo werek mene andi, inenggimo nen telogo helogoin andi nen he, at ap andiat wogosubagaigeluk yagahisigi o.#Mat. 13:12; Mrk. 4:25; Luk. 8:18 27A'nogo yagaisasikhesik he: It ap an ninom inaselei mene hangge hilingninabi'logo ikhi logolik: At andi nit ninoe kain enupogot logogin he ninabit, iluk aga mene andi inebe woginarek wesimbik he, an neilhanem yaat inoasubagaigo, iluk yagaisasikhe,” iluk he, at Yesus nen afuni omanogo yagaisasikhe.
Yesus fogeratu kwelek o Yerusalem kwisikhe wene
(Mat. 21:1-11; Mrk. 11:1-11; Yoh. 12:12-19)
28Wene a'nogo arat yagaisasikhesik he, afuni omanogo oan werek kwelek, at Yesus ebe attagat, o Yerusalem lagasikhe. 29Lagakhi lagaikhesik, tom Zaitun a'ma o sili ekhe enu Betfage, ekhe enu Betania, andoma higit asi lagasikhesik he, at agoromi ane wanhi lagaukwa mene ekhe inebe pire wene warogo attagat lakfisikhi logolik he, 30mel yagaisasikhe: ”O sili hinelokhoma a'li lani o. Nen, andoma kwi logoin hak he, wam keledai eak mene oan afuni amboroba hu'lagunem woginarek lagi'lek mene kombi kelik were'ma hineilenggen hogoin a'naga. Nen, arat hineilenggen hegep halok he, kombi kelik andi fikhalogo waluk we'no. 31A'nogo kombi fikhalhunem, it afuni andoma mene ekhe nen, wam kombi fikhalhi lagep andi nenahalok, iluk heinok wokhisaga halok he, mel yagaisano: Nit ninoe Enupogot a'nogo nen wam yi mene legen he, waluk louwogeluk kombi fikhalhi lago, iluk yagaisano,” iluk he, wene warogo lakfisasikhe. 32A'nogo lakfisasikhemo, it a'nogo lagaukwa hak he, aren isikhe higithogoat were'ma hasukwa. 33Hasukwasik he, wam keledai a'nogo kombi fikhalhunem he, it ap inanggo eisewerek mene nen he, ”Wam keledai andi nenahalok kombi fikhalhi lagep,” iluk yagaisasukwama, 34iren he, ”Nit ninoe Enupogot a'nogo wam keledai yi mene legen he, waluk louwogeluk kombi fikhalhi lago,” iluk yagaisaluk he, 35wam keledai a'nogo waluk Yesus oba wagaukwa. Wagaukwasik he, inasu endakwe laberek mene nonggologo wam a'nogo amboroba talfesukwasik he, Yesus ebe wam a'nogo amboroba hutfesukwa. 36A'nogo hutfesukwama, wam amboroba hu'lagaikhesik lagunem he, it omanogo inasu laberek mene nonggologo re, ebekwe talik lagaukwa. 37Talik lagaukwasik he, o Yerusalem horokhogo asi lagaukwasik, kwe tom Zaitun oba nen pagarek oba andoma puogeluk he, at agoromi ombo'ne nikhi lagaukwa mene inebe hokhorogo omanogo, at Yesus hilingisu lek mene elalinat hilingiti lagaikhe omanogo ineilenggen hikhi lagaukwa andi nen he, inendawimo inagaiyegeti logolik inane hokhorogo a'mit suphogo Allah fogerarik pisukwa. 38A'mit suphogo pikhi logolik mel isukwa:
”Allah nen ninoe kain Enupogot lakhobagai wagama wagen yi,
arenat fanothabuago!
It pogoroba welagaikharek mene andoma
inendawinggen hambukhogo logouwago.
Nen, Allah esin pogoroba welagarek mene
fogerati logouwogo,” iluk a'nogo ilik-ilik pisukwa.#Mzm. 118:26
39A'nogo ilik pugunem he, it ap Farisi mene fena afuni hokhorogo omanogo inanggele'ma pikhi logolik he, Yesus mel yagatukwa: ”Noe! Hagoromi inane legasuageluk komorinabumo re,” iluk isukwama, 40at Yesus nen he, mel yagaisasikhe: ”Nane eberogoat yagahisak. It afuni yi inane igi'lek kamo ilepma re, helep yoma inane a'mit sup ilebaro,” iluk yagaisasikhe.
Yesus nen o Yerusalem faget le agaikhe wene
41A'nogo yagaisasikhesik horokhogo asi pisukwasik, at Yesus eilenggen o kota Yerusalem a'nogo yethasikhesik he, obaget le agaikhe. 42Obaget le aga logolik he, mel isikhe: ”Hit afuni o Yerusalem mene andi, hinendawimo nen, nit fano liokhogo logouwogen yi'nogo hilingisuok, iluk yogondak yaat hinendawimo ebesuem ebeti'lek welagep andi, eige! Nendawilage! Mene re, yogondak wene andi hit hineilmo hinago weregen futfigi'lek welagep andi. 43-44Allah nen fanothinabigeluk hinoba waga meneat he, hit futfigi'lek welagep andi nen, hit hobuk hinaiba nen heise wulibi lanogo iluk he, hinaselei mene nen leget walingisogo waganogo hinobagambik he, fena-fena nen petet hinobagaluk horok-horok kwi wesugun o. Kwi wesimbik he, hinawi helep meneba ambolma a'ma wurik andoma ekhe obali'mo wurik herakfigi'lek meisalhi logolik hinebe mondok felelenghogo hinagainafuri hinom wulil tagalogoat hinoasugun o,” iluk inobaget le agaikhe.
Yesus nen Allah awi wuri'mo kwisikhesik tegelhikhe wene
(Mat. 21:12-17; Mrk. 11:15-19; Yoh. 2:13-22)
45A'nogo yagaisasikhesik he, Allah awi wuri'mo kwisikhesik, it afuni onggo palhi lagaukwa mene mugisogo-magaisogo wulakfisikhi logolik he, mel yagaisasikhe: 46”Allah nen he, An nawi wurik yi re, o samban ikhi logogun oba aro, iluk, lisu palek werek meneat he, hiren he, it afuni ekhe inangge inenggi abisak telogo helagarek mene inawi hak wurogo fisikhi lagep yi ri!” iluk wenagisasikhe.#Yes. 56:7; Yer. 7:11
47A'nogo yagaisasikhesik he, at Yesus hundik-handik Allah awi wuri'mo wene yagaisugu mondok welagaikhe. A'nogo yagaisugunem it ap Allah eisewerek inogogwi kaindek inom, Allah ane lisu palek inelu mene inom, Yahudi mene kaindek inenu werek mene inomen, ”At Yesus ebe ninggi'nogo wasuok,” iluk abok palhi lagaukwa.#Luk. 21:37 48A'nogo abok palhi lagaukwa meneat he, it afuni hokhorogo re, at Yesus ane ugunem inesanggo hologo mondok welagaukwa andi nen he, at ebe ninggi'nogo wasu heat hilinglaga lagaikhe.
Currently Selected:
LUKAS 19: inohap
Highlight
Share
Copy
Want to have your highlights saved across all your devices? Sign up or sign in
