LUKAS 23
23
Yesus Pilatus oba waluk lagaukwa wene
(Mat. 27:1-2,11-14; Mrk. 15:1-5; Yoh. 18:28-38)
1Wene a'nogo isukwasik, afuni inebe welagaukwa mene omanogo mondogat menlagaukwasik he, Yesus Pilatus oba waluk wagaukwa. 2Wagaukwasik wene oba fikhi logolik he, mel yagatukwa: ”Ap yi nen afuni nit mene lalinafik, uang pemerintah mene faget ap kain Kaisar a'nogo wogosugun lego, igik, hinoe Nenupogot Kristus a'nogo an aro, igik, iluk nit nineilhanem ikhi laga andi nen waluk wago o,” iluk yagatukwa. 3A'nogo yagatukwama, at Pilatus nen Yesus oba heinok wokhikhi logolik he, mel yagatikhe: ”Ap Yahudi mene inoe enupogot a'nogo hat meneat aga?” iluk yagatikhemo, at Yesus nen he, ”Hat honggwaregen egen andi aro,” iluk isikhemo, 4at Pilatus nen he, ap Allah eisewerek mene inogogwi kaindek inom, afuni hokhorogo andogorek welagaukwa mene omanogo inom, yagaisikhi logolik he: ”An nen, at yi anema wanhi mene, at weak ekhe hilingiti'lego,” iluk isikhemo, 5it omanogo hobuk inane mondok ninghogo ikhi logolik he, mel yagatukwa: ”Lego. Ap yi wene yagaisilik nikhi logolik he, afuni o Yudea mene yi awi ti awi mondogat inendawimo kagalik nikho. Omanggum o Galilea andoma nen inendawimo kagalik-kagalik he, o yoma ogo wagaat andi,” iluk yagatukwa.
Yesus Herodes oba waluk lagaukwa wene
6A'nogo yagatukwama, at Pilatus a'nogo esanggo holhikhesik he, ”Ap yi o Galilea mene a?” iluk, afuni omanogo yagaisasikhemo, 7iren he, ”Ap andi, o at kain Herodes nen ferinarek welagarek oba omanogo nen wagasik higi,” iluk isukwama esanggo holhikhesik he, andi sambul, ap kain Herodes a'nogo, o Yerusalem andoma pisikhesik were'ma andi nen he, oba lakfesikhe. 8Lakfesikhemo re, at Herodes a'nogo Yesus hilingiti lagaikhe mene attagat esanggo holhikhesik, endawimo nen he, ”Ebe neilenggen hele e. Elalinat hilinginabik nikho andi, ekhe hilingitunem an neilenggen hele e,” iluk anggaluk welagaikhe andi nen he, at Yesus ebe oba waluk wagaukwama, eilenggen hasikhesik endawimo agaiyek agaikhe. 9Endawimo agaiyek agaikhesik, yi wene ti wene hokhorogo Yesus oba heinok wanhikhe mene re, aren onggo ekhe yagati'legat kamo isikhe. 10Onggo yagati'lek kamo isikhemo re, it ap Allah eisewerek mene inogogwi kaindek inom, it ap Allah ane lisu palek inelu mene inom, omanogo horokhogo kwisukwasik he, inane ninghogo wene oba fikhi lagaukwa. 11Fugunem he, Herodes agoromi tentara mene omanogo inomen, Yesus ebe inendawimo inabiret fuluk, inane asegen hokhorogo wokhikhi lagaukwasik he, su fano mondok kaindek labetarek mene ekhe labetfesukwasik, ambotkwe Pilatus oba lakfei wagaukwa. 12Attak he, at Herodes Pilatus emberek weim palek hangge welagaukwa meneat he, a'nogo lakfesikhe andi sambul emberek fano agaukwa.
Yesus ebe pinggi wasuageluk wene oba fesukwa wene
(Mat. 27:15-26; Mrk. 15:6-15; Yoh. 18:39–19:16)
13Nen, at Yesus waluk lagaukwama re, at Pilatus nen, it ap Allah eisewerek mene inogogwi kaindek inom, it ap Yahudi mene kaindek inenu werek mene ekhe inom, inagoromi mondogat inom, ”Andogosi we'ni o,” isikhemo wagaukwama re, 14wene mel yagaisasikhe: ”Ap yi nen afuni lalinabik nikho yi, iluk, an noba waluk wagepsik wene oba fegepma re, an nen hit hineilhanemat wene ero pilingiti mene re, hiren wene oba fegep hak he, higi lego. 15Nen, at kain Herodes a'nogo ekhe higi'legen he, nit ninoba yoma lakfei waga andi. Weak hilingitunem wene inoba fulugen inoatarek andi hangge, ap yi nen a'nogo weak ekhe hilingitemo higi mondok lego. 16Halok, we, yei enek warogo hele fikhaligin o,” iluk isikhe. 17[A'nogo yagaisasikhe andi re, seni enu Paskah a'nogo mene nunggu kwelek, at Pilatus nen ap inenggi hele warek mene misigat halok ekhe fikhalogo wogisikherek andi nen he, a'nogo yagaisasikhe andi.] 18A'nogo yagaisasikhe meneat he, it ap mondogat omanogo nen he, inane paksilak ikhi logolik, ”Ap Barabas andiat enggi hele fikhalnisambik he, ap yiat wasugun o,” isukwa. 19At Barabas andi attagat he, ap ekhe inomaren, afuni o sili hokho a'nogo mene folim hibirogo, ”Ninogogwi kaindek pemerintah mene ninabit,” iluk weim yafi logolik afuni ekhe inoati lagaikhemo enggi hele warogo fesukwa mene were'ma a'nogo yagatukwa. 20Yagatukwama, at Pilatus endawimo nen he, ”Yesus andi enggi hele fikhalogo herakfagain,” anggikhi logolik andi nen he, ane hobuk sirogo yagaisasikhe meneat he, 21it ogo inane hokhorogo ikhi logolik he, ”Eba menfuluk wa'no o! Eba menfuluk wa'no o!” iluk a'nogo isukwama, 22at Pilatus enggi pireba yagaisasikhesigen hobuk ekhe inom yagaisikhi logolik he, ”At yi nena mene weak hilingitemo nen. Weak hilingitunem inoatarek andi hangge, an wene ero pilingiti mene, at andi weak ekhe hilingiti'lego. We, yei nek warogo fikhalogo herakfogoin o,” iluk a'nogo yagaisasikhe meneat he, 23eba menfuluk wasuageluk inane hokhorogo ninghogo kino yagatukwama re, it inane omame agaikhe. 24It inane omame agaikhemo, at Pilatus nen iren kino isukwa higithogo wene tekhogo isikhesik, 25at Barabas nen folim hibirogo weim yafi logolik afuni inoati lagaikhemo enggi hele warogo fesukwa mene a'nogo, ”Hele fikhalogo wo'nisan,” isukwa a'nogo wogisigik, nen, at Yesus a'nogo nek he, it inendawimo anggasukwa mene higithogo hilingisuageluk agoromi inenggiba figik, isikhe.
Yesus eba menfuluk watukwa wene
(Mat. 27:32-44; Mrk. 15:21-32; Yoh. 19:17-27)
26A'nogo wogisasikhemo waluk lagaukwa hak he, ap enu Simon, awi o Kirene mene ekhe o ekhema nen o sili hokhoma kwigeluk lagunem, ebe fakfesukwasik e Yesus menfembik wasugun mene a'nogo waluk he, Yesus ombo'ne wesuageluk inane ninghogo yagatukwa. 27Yesus ebe waluk wagunem afuni hokhorogo inombo'ne waga logolik, hemi ekhe at obaget le aga logolik, inendawinggen inenggi nen fothilik wagaukwa. 28A'nogo hilingirik wagunem, at Yesus elokhe hebekhogo kwelagisasikhesik he, mel yagaisasikhe: ”Hit hemi o Yerusalem mene yi re, an nobaget le agu lego. Hit he, hineagwi hinom hinonggwarek hinouwak le akhani o. 29Hobuk weak asigin werek. Andi sambul he, it afuni nen ikhi logolik: Hemi abili mene, ineagwi taginafi'lek mene, ineilak unggul yenggerugwi inambe aben lek mene, andi nek he, inendawimo inagaiyek hogoin hangge o, ugun. 30Andi sambul afuni nen he, ninebe alperelninabigin iluk he, tom hokhondek mene yagatik, ninebe sebelogo ninobagagin, iluk tom magendek mene omanogo yagatik, ugun o.#Hos. 10:8; Why. 6:16 31Andi hak he, yogondak ya e ket hak logolik hilingnabi'lagwi yi re, hobuk e puk mene hak asi laga logolik, ninggi'nogo hilingisugun anggegep,” iluk yagaisasikhe.
32Nen, at waluk laga logolik he, it ap inobabut mondok weak hilingiti lagaukwa mene inebe pire inom inoasuogeluk woginarek lagaukwaat. 33Woginarek he, tom enu Inungguloak palek punuba lagaukwasik, at Yesus eba menfikhi logolik he, ap inebe pire inobabut mondok weak hilingiti lagaukwa mene ekhe enggi ebekwe, nen ekhe enggi harekwe eba menfisaluk inoatukwaat. 34A'nogo menfisasukwama logolik, at Yesus nen mel yagatikhe: ”Neisena e! It yi inonggot logolik hilingnabi'lagwi yi re, wene inoba figi'lek sebelogo herakfisano o,” iluk yagatikhe. Nen, it ap tentara mene omanogo nen he, a'nogo menfisaluk, ”At Yesus asu andi sa hak asigin,” iluk he, oagengge lakfigik, wakfigik, isukwasik, oagengge inoba agaikhe mene halok sumburogo helasukwa.#Mzm. 22:19 35It afuni omanogo andem mendek logolik ineilenggen werek kwelek he, it ap Yahudi mene inogogwi kaindek omanogo inambisang singgin isukwasik, Yesus inane asegen wokhikhi logolik he, mel isukwa: ”At yi Allah nen Kristus menfuluk lakfei wesigin isikhe a'nogo ebe arat halok he, it afuni ekhe elok telinafi laga a'nogo hak, onggwarek ebe ogore a'nogoat telanik he,” iluk yagatukwa.#Mzm. 22:8 36-37Nen, it ap tentara mene omanogo oba horokhogo wagaukwasik, anggur enggen amusu ale weak mene a'nogo hegethasukwasik he, inane asegen wokhikhi logolik, ”Hat afuni Yahudi mene inoe kain henupogot eberogoat halok he, honggwaregen telan he,” iluk yagatukwa.#Mzm. 69:22 38Nen, iren he: ”Afuni Yahudi mene inoe enupogot he, ebe yi aro,” iluk lisu palogo e Yesus menfesukwa mene a'nogoba fesukwa.
39At Yesus a'nogo warogo menfikhi logolik, ap weak hilingiti lagaukwa mene inom warogo menfisasukwa aremnogo, at ekhe nen Yesus ane asegen waganogo wenageti logolik he, ”Hat Kristus at anggigi. Halok he, honggwarek hebe telikhi logolik he, nirogo telninabin he,” iluk yagatikhe meneat he, 40at agailak ekhe a'nogo nen, at wenageti logolik he, ”Hat yi ogo re, at warogo faga hak ninom higirat warogo ninobagaga welago yoma re, Allah hailo lega? 41Nit he, weak hilingiti lagoma ninobabut oba ninoasugun higithogoat ninoata meneat he, at yi nek he, weak ekhe a'nogo hilingiti'lego,” iluk yagatikhesik, 42hobuk, at Yesus mel yagatikhe: ”Noe e! Hat kain henupogot logoigeluk waga logolik, an noba ebe'no o,” iluk yagatikhemo, 43at Yesus nen he, mel yagatikhe: ”O yogondak yibaat o fanoma Firdaus andoma nemberek kwimbik logogun o, iluk eberogoat yagaheti,” iluk yagatikhe.
Yesus ebe wa'lagaikhe wene
(Mat. 27:45-56; Mrk. 15:33-41; Yoh. 19:28-30)
44-45A'nogo fisasukwama welagaukwa, o lingge tulem jam 12 higit o mum agaikhesik he, mo yati'lek werek kwelek o andoma mondogat huli jam 3 ba welagaikhe. Jam 3 hilinglagaikhemo re, Allah awi wuri'mo su kain mene Allah o senggelek ti'mo kwe palek welagaikhe mene a'nogo tulem heirogo pelangerik pi wagaikhe.#Kel. 26:31-33 46A'nogo hilingitikhemo, at Yesus ane hokhorogo Allah yagati logolik he, ”Neisena e! An nareagun selokhogo, hat henggimo waninogen, iluk yagaheti o,” iluk yagatikhesik he, arat lebekhogo wa'lagaikhe.#Mzm. 31:6 47A'nogo hilingitikhemo ap tentara mene inoe kain a'nogo eilenggen hasikhesik Allah fogerati logolik he, ”Ap yi eberogoat weak hilingiti'le'ma higi o,” iluk isikhe. 48Nen, it afuni hokhorogo ineilenggen houwogeluk wagaukwa mene omanogo a'nogo hilingitunem ineilenggen hasukwasik hobuk inambotkwe inaiba laga logolik, inebe mondogat inendawinggen inenggi nen fothigik warilik-warilik lagaukwa. 49Nen, Yesus ebe inelu mene mondogat, it hemi o Galilea nen Yesus ombo'ne pisukwa mene inom, it ekhe inom, inebe yatma mendek logolik he, a'nogo hilinglagunem ineilenggen yerogo welagaukwaat.#Luk. 8:2-3
Yesus ebe warek oumo fesukwa wene
(Mat. 27:57-61; Mrk. 15:42-47; Yoh. 19:38-42)
50-51A'nogo hilingitukwama re, ap ekhe enu Yusuf, aiba Yahudi mene inawi sili ekhe enu Arimatea andi mene. Endawimo nen he, ”Allah nen awe a'ma mera nen fisagain,” iluk nenangorogo logolik, obabut fano higithogo hilingiti lagaikhe mene, ebe Yahudi inogogwi kaindek wene pilingisuogeluk inom andogoti lagaukwa mene. A'nogo meneat he, it agaila'lagen, Yesus abok palogo watukwa andi, aren, ”I o, wasuok,” iluk igi'lek welagaikhesigen, 52at Yesus warek Pilatus oba kino lagaikhe. 53Kino lagaikhemo, at Pilatus nen, ”I o, fano,” iluk yagatikhemo, wagaikhesik Yesus warek a'nogo eba nen pelakfei wagaikhesik he, su kain kut meneba yinggilogo re, oumo afuni warek fisikhi logouwogeluk helep anggwe kerat folelhukwasik he, warek oan figi'lek mene a'nogoba fei lagaikhe. 54Fei lagaikhe andi sambul he, it Yahudi mene endebat wela'luk samban uogeluk logolik, yi mene ti mene andogorogo fagarek oba hari Jumat fesikhe. 55Nen, it hemi o Galilea nen Yesus ombo'ne pisukwa mene omanogo Yusuf ombo'ne wagaukwasik he, ”Yesus ebe warek oumo andi a'nogo fikhe, iluk ineilenggen furogo hasukwa.
56Ineilenggen hasukwasik oloba lagaukwasik he, e yi enggen ti enggen amben fano mene inom, amusu amben fano mene inom, Yesus warek oba ebene wasi louwogeluk he, tegelogo fesukwa. A'nogo fesukwasik, it afuni Yahudi mene Allah nen komorinafikhe higithogo inenggi sabit oba Allah faget weat welagaukwa.#Kel. 20:10; Ul. 5:14
Currently Selected:
LUKAS 23: inohap
Highlight
Share
Copy
Want to have your highlights saved across all your devices? Sign up or sign in
