LUKAS 8
8
Hemi Yesus ombo'ne nikhi logolik, at faget hilingiti lagaukwa wene
1At Yesus a'nogo hilingitikhesik he, welagi'legat, hobuk Fano Wene Allah awe a'ma fisikherek wene a'nogo, o sili hokho kwe endep kwe yagaisilik nikhi lagaikhe. Yagaisilik nikhi logolik, at agoromi mene inebe 12 nen omanogo inom, 2it hemi ekhe munggwarengge obabut weak mene inendawimo kwisikhesik were'ma henegeisogo wulakfisigik, inoba ou mene higirinafik, fageat higirinafikhe mene ekhe inom nikhi lagaukwa. Hemi andem ekhe re, he Maria awi Magdalena ikhi lagaukwa mene, attagat munggwarengge inobabut weak mene inebe 7 nen endawimo kwisukwasik were'ma, at Yesus nen henegeisogo wulakfisasikhe mene andi inom,#Mat. 27:55-56; Mrk. 15:40-41; Luk. 23:49 3nen, ekhe re, he Yohana ap kain Herodes agarek yi mene ti mene enggiba logolik hilingiti lagaikhe mene enu Khuza andi agwe inom, he Susana inom, nen ekhe re, it hemi fena hokhorogoat inom, uang it meneba yi mene ti mene onggo palogo Yesus agoromi inomat leberisilik nikhi lagaukwa.
Ap ekhe awi feik lakfilik lagaikhe iluk oba lirogo isikhe wene
(Mat. 13:1-9; Mrk. 4:1-9)
4At Yesus o andoma were'ma, afuni mondok hokhorogo o yi awi ti awi nen, esa hokhorogoat oba andogosi wagaukwama, aren wene oba lirogo mel yagaisasikhe: 5”Ap ekhe yabu waganogo awi yaterek mene awi feik lakfeigeluk wulifikhe. Wulifikhesik, feik lakfilik lagunem he, enggen ekhe kwe ebekhalem pilik lagaikhe. A'nogo pugunem afuni laga logolik he, ineisogen alperelogo filik lagaukwama re, sue tarogo nikherek mene wagaikhesik felelenghogo nasikhe. 6Nen, enggen ekhe re, helep talek oba pisikhe mene re, weak-weak fulelhikhesik he, kweang amusu legen pugagaikhe. 7Nen, enggen ekhe re, panggi anggele'ma pisikhe mene re, panggi andi inom misikwe fulelhikhesik, awi fano mene a'nogo panggi andi nen sebelhikhemo kenken agaikhe. 8Nen, fena re, kweang fanoma pisikhe mene re, fulelhikhesik he, hokho agaikhesik, ero lombok enggen 100 nen higik irik lagaikhe,” iluk yagaisasikhe. A'nogo yagaisasikhesik ane hokhorogoat ikhi logolik he, ”Hinesanggo holugun halok he, furogo holini o,” iluk yagaisasikhe.
Yesus nen he, ”Wene oba lirogo yagahisikhi lagi andi, ebe yi faget,” iluk yagaisasikhe wene
(Mat. 13:10-17; Mrk. 4:10-12)
9A'nogo yagaisasikhemo, at agoromi ane wanhi lagaukwa mene omanogo nen, at Yesus mel yagatukwa: ”Haren wene oba lirogo yaganisegen andi, ebe ninggi'nogo mene faget egen,” iluk yagatukwama, 10at Yesus nen he, mel yagaisasikhe: ”Allah nen awe a'ma fisikherek wene andi, at endawimo hinago welagaikhe mene andi, hit enek he, wene andi hinelu asubagaigeluk fakhogo yagahisagain iluk, anggasikhe meneat he, it afuni ekhe andi re, at Allah nen he,
Ineilenggen hikhi logogun meneat he, furogo hikhi logogun lego.
Nen, inesanggo holhi logogun meneat he, furogo futfikhi logogun legaro,
iluk isikhe andi higit asuageluk wene andi oba lithigigat yagaisikhi lagi o,” iluk yagaisasikhe.#Yes. 6:9-10
At Yesus nen ”Ap ekhe feik lakfilik lagaikhe, iluk yagahisigi a'nogo re, ebe yi'nogo,” iluk yagaisasikhe wene
(Mat. 13:18-23; Mrk. 4:13-20)
11A'nogo yagaisasikhesik he, hobuk ekhe mel yagaisasikhe: ”Wene oba lirogo yagahisigi a'nogo ebe yi. Feik lakfilik lagaikhe igi a'nogo re, ebe Allah ane andi aro. 12Kwe ebekhalem pisikhe andi ebe re, it afuni ekhe Allah ane inesanggo holharesik, eberogoat iluk wanhunem, Allah nen inebe telinabinogo iluk, Iblis wagaresik he, wene inendawimo nen henogo waluk lagarek andi aro. 13Nen, helep oba pisikhe mene andi ebe re, it afuni ekhe Allah ane andi inesanggo holharesik he, inendawimo agaiyek hikhi logolik wanharesigat he, inendawinggenma omanggen yati'legen eberogoat iluk endebat enek anggaluk were'ma, weak hilingisuageluk inendawimo kagali wagunem he, arat kobokhogo herakfisaluk wulifarek andi aro. 14Nen, panggi hokhorogo anggele'ma pisikhe andi ebe re, it afuni ekhe Allah ane andi inesanggo holharesigenat inendawimo nen he, eige. Ninggi'nogo hilingisigin he, iluk, menenei ebetik, nagarek hokhorogo logoilebe, iluk inendawimo ebetik, kweangma mene inendawimo inagaiyek hogoin mene oba ebetik, agarek andi nen he, inendawimo Allah ane andi enggen wurik agi'lek lologo lek agarek andi aro. 15Nen, kweang fanoma pisikhe andi ebe re, it afuni ekhe fano wene andi inesanggo holharesik he, inendawinggenma mondok furogo helagaresik herakfigi'lek fisogo logolik, enggen hokho iterek andi aro,” iluk yagaisasikhe.
Esage oba lirogo yagaisasikhe wene
(Mrk. 4:21-25)
16A'nogo yagaisasikhesik he, ekhe yagaisikhi logolik, mel yagaisasikhe, ”Afuni nen he, esage ibilogo re, iwak elema sebelogo figik, nogo agarek oba a'ma figik, agarek lek. Afuni oloba kwikhi logolik selek were'ma enegat hoageluk he, esage eisok telik oba legeisogo fagarek.#Mat. 5:15; Luk. 11:33 17A'nogo fugunem, yi mene ti mene hinago welagarek mene andi, weinam agik, wene inendawimo hinago welagarek mene andi, sele'ma fakhogo figik, igin andi nen he,#Mat. 10:26; Luk. 12:2 18wene hinesanggo holhi lagep mene andi fanorogo futfikhi logoino o. It afuni inagarek werek mene andi re, ekhe inom mangorogo wogisagain. Meneat he, it ekhe lek mene andi re, inendawimo nen he, endebat ya elok werek, anggili'lagwi mene andi telogo helagain o,” iluk yagaisasikhe.#Mat. 25:29; Luk. 19:26
”An nagaisa nagoromi it yi aro,” iluk yagaisasikhe wene
(Mat. 12:46-50; Mrk. 3:31-35)
19A'nogo yagaisugu were'ma, at Yesus agaisa inom, agoromi inom, at oba wagaukwama re, afuni hokhorogo inom weregen he, oba ku re elo'lek agaikhe. 20A'nogo hilinglagaikhemo re, it afuni ekhe nen mel yagatukwa: ”Yesus! Hat hagaisa inom, hagoromi inom, herakhabik wagaikhasik olulu werego,” iluk yagatukwama, 21at Yesus nen he, mel yagaisasikhe: ”An nagaisa nagoromi andi re, afuni Allah ane inesanggo holharesik, higithogo hilingitarek mene andi aro,” iluk yagaisasikhe.
Yesus nen sogoi hokho mene legetfesikhe wene
(Mat. 8:23-27; Mrk. 4:35-41)
22Inenggi ekhe sambul he, at Yesus ebe inom, agoromi ane wanhi lagaukwa mene omanogo inom, e so elema kwisukwasik he, mel yagaisasikhe: ”I aik elikwe wulibuogo,” iluk yagaisasikhesik he, wulifukwa. 23Wulifi logolik he, at Yesus nogo isikhe. Nogo ugu kwelek, sogoi hokhorogo funha wagaikhemo, i ha'labu hokhorogo wati logolik, i kweisalogo, e so elema kwisikhemo, e so a'nogo wula'lakhogo pigeluk isikhe. 24A'nogo hilingitikhemo, it omanogo nen, at Yesus nogo ugunem eluget hikhi logolik he, mel yagatukwa: ”Ninoe-ninoe! Nit arat i logoin yoma,” iluk yagatukwama, at Yesus eluk agaikhesik he, sogoi inom, i ha'labu inom, wenagetikhemo palagaikhesik he, mondok hambuk isikhe. 25Hambuk isikhemo, at Yesus nen agoromi omanogo mel yagaisasikhe: ”Hinendawinggen noba himbirik welagep mene a'nogo, ka lagama nen ikhi lagep,” iluk, a'nogo yagaisasikhemo it inailo agaukwasik, it-it ikhi logolik he, ”Egi! Ap yi sa anggegep. Sogoi inom, i ha'labu inom, at aneba, legame, ugunem, ane hologo legaga andi nailo e,” iluk fogeratukwa.
Yesus nen ap o Gerasa mene ekhe munggwarengge obabut weak mene endawimo kwisukwasik were'ma henegeisogo wulakfisasikhe wene
(Mat. 8:28-34; Mrk. 5:1-20)
26A'nogo iluk, hobuk he, at Yesus agoromi inom i Galilea yenggelek aik elikwe e so warogo o Gerasa wulifukwa. 27-29Wulifukwasik, i aik oba wulibi lagaukwa hak, ap ekhe awi sili kota andi mene munggwarengge obabut weak mene endawimo kwisikhemo welagaikhe mene, at Yesus oba wagaikhe. Ap andi fagearen munggwarengge obabut weak mene hundik-handik endawimo kugunem, it afuni ekhe nen enggi eisok posiemanggen oba homati lagaukwa meneat he, hele libik-lebekhogo lakfisaluk, munggwarengge a'nogo nen waluk o leimo afuni le'ma andoma laga lagaikhesik he, hobuk su laberek lek alfulukwaat, at aiba lomborogo welagi'lek oumo warek mene fisagarekwe andoma nogolik nikhi logolik were'ma, Yesus ebe wagunem eilenggen yethasikhesik awe a'ma hu'lasi kwisikhesik ane hokhorogoat mel yagatikhe: ”Yesus. Hat Allah Enupogot amlogo yi, an ninggi'nogo hilingnabigeluk wagen,” iluk yagatunem, at Yesus nen munggwarengge a'nogo wulibuageluk yagatikhemo, at a'nogo nen: ”Noe. Weagetnafun o,” iluk ane liokhogo yagatikhe. 30A'nogo yagatikhemo re, at Yesus nen heinok wokhikhi logolik, mel isikhe: ”Hat henu sa,” iluk yagatikhemo, ap a'nogo munggwarengge inobabut weak mene esa hokhorogo endawimo kwisukwasik welagaukwa andi nen he ”Ninenu esa hokhorogo,” u hak, ”Ninenu Legiun,” isikhe. 31A'nogo isikhesik he, it munggwarengge inobabut weak mene omanogo henegeisogo pile uanma ma'lima pelakninobagai nogoluk inane liokhogo Yesus yagatukwa. 32Andi sambul, o andoma tom ebene wam mondok hokhorogoat inambisang wilik nugunemen he, it munggwarengge inobabut weak mene omanogo nen Yesus mel yagatukwa: ”Wam a'lima inendawimo kwalasi louwogen he, lakninobagain o,” iluk, inane liokhogo yagatukwa. A'nogo yagatukwama, at Yesus nen he, ”I o. Lani,” iluk, yagaisasikhemo re, 33it munggwarengge inobabut weak mene omanogo, ap a'nogo endawimo nen henegeisogo wulibi lagaukwasik, wam omanogo endawimo kwalasi lagaukwama re, mondogat i kat oba nen pururumhogo, i hokho yenggele'ma pisukwasik i lagaukwa.
34A'nogo hilinglagaikhemo, it ap wam kwalogo welagaukwa mene ineilenggen hasukwasik he, fungusek yonggo lagaukwasik, wene hilinglagaikhe mene a'nogo afuni o sili hokhoma yagaisigik, endepma yagaisigik, yagaisasukwa. 35A'nogo yagaisa lagaukwama re, it afuni nen he, ”Ninggi'nogo hilinglagama nen aga,” iluk, ineilenggen houwogeluk Yesus oba wagaukwa. Wagaukwama re, ap munggwarengge inobabut weak mene endawimo nen wulifikhe mene a'nogo afe hebelagaikhesik asu laberogo Yesus awe a'ma hurek were'ma ineilenggen hasukwasik, inailo agaukwa. 36Inailo agaukwama re, it afuni ekhe Yesus nen hilingitunem ineilenggen hasukwa mene nen, mel yagaisasukwa, ”Ap munggwarengge obabut weak mene endawimo kwisukwasik welaga a'nogo yi'nogo fano hilingite,” iluk pilingisogo yagaisasukwa. 37A'nogo yagaisasukwama, it afuni o sili Gerasa mene inom o esanggokwe mene inom inebe mondogat inailo mondok hokhorogo agaukwasik he, Yesus mel yagatukwa: ”Yesus. Hat hebe ninom yoma logogun lek. Lan o,” iluk yagatukwa. A'nogo yagatukwama, at Yesus e so elema kwisikhesik warogo re, ambotkwe wagaikhe. 38Wesigeluk ugunem he, ap munggwarengge inobabut weak mene endawimo kwisikhemo henegeisogo wulafikhe mene a'nogo nen, mel isikhe: ”Noe. Nemberek nikhi logouwogen, louwogo,” iluk, ane elagaik ane Yesus yagatikhemo, at Yesus nen he, ”Lego,” iluk aiba lakfikhi logolik he, 39”Haiba lan o. Lambik he, Allah nen higithafe mene andi pilingisogo yagaisilik nikhi logoino,” iluk, yagatikhemo ap a'nogo aiba lagaikhesik he, ”Yesus nen, yi'nogo higitnafe o,” iluk, pilingisogo it afuni o sili hokhoma andoma mene mondogat yagaisilik nikhi lagaikhe.
Yesus nen Yairus a'logo higitik, he ekhe amep lagu mondok welagaikhe mene higitik, isikhe wene
(Mat. 9:18-26; Mrk. 5:21-43)
40At Yesus ebe i aik elikwe nen ambotkwe wagaikhemo re, it afuni inebe hokhorogoaren, at ebe yerogo welagaukwa andi nen he, hai warogo wanhukwa. 41-42A'nogo wanhukwama, ap ekhe enu Yairus, o afuni Yahudi mene samban agarek oba inoe kain mene, a'logo misigat tago mene ebe ta'lagaikhesik oba nen, mo lagagik pigik ugu kwelek umur 12 tahun hilinglagaikhe hak, ou en horogat wa'lasigiluk ikhi lagaikhemo, Yesus oba wagaikhesik awe a'ma eindep awi yagaisogo hai wati logolik he, mel yagatikhe: ”Noe. An naiba louwogo,” iluk, ane elagaik ane yagatikhe. A'nogo yagatikhemo, Yesus at emberek louwogeluk lagunem he, afuni mondok hokhorogo ombo'ne yagarek-fagarek lagaukwa. 43Lagunem he, he ekhe amep lagu mondok werek kwelek 12 tahun hilinglagaikhe mene, it ekhe nen fano hilingisuageluk inayonggo filik onggo hokhorogo wogisikhi logolik he, at agarek mene leget fesikhe meneat he, iren fano higiti'lek werek kwelek, amep a'nogo palagi'lek lagu mondok welagaikhesik, 44afuni hokhorogo omanogo lagunem, Yesus ambotma lagaikhesik he, asu wurep enggi fakhasikhe. A'nogo fakhugu kwelek aremnogoat amep a'nogo palagaikhe. 45Enggi a'nogo fakhasikhemo, at Yesus nen he, mel isikhe: ”Sa nen enggi fa'niikhe,” iluk isikhemo it afuni omanogo ekhe inane oba igi'lek mondok kamo isukwama, at Petrus nen he, mel yagatikhe: ”Noe! Afuni mondok hokhorogo yagarek-fagarek waga logolik a'luk he, hat hoba to'morogo wagaikhama o,” iluk yagatikhe. 46A'nogo yagatikhemo, at Yesus nen he, mel isikhe: ”Lego. Afuni ekhe nen inenggi fa'neagama nen, an nomamerogo elalin higirinafirek a'nogo mene nendawimo nen afuni ekhe inoba lagama enegat higi o,” iluk yagatikhe. 47Yagatikhemo, at he a'nogo endawimo nen he, ”Arat futnobagaikhe higi o,” iluk, ailo agaikhesik, oak lei'leik Yesus oba wagaikhesik he, eindep awi yagaisogo awe a'ma kwisikhesik mel yagatikhe: ”An yi'nogo nen hasu nenggi fakhigi o. A'nogo fakhugu kwelek aremnogoat fano agimo yi,” iluk, afuni omanogo ineilhanem mondok pilingisogo yagatikhe. 48A'nogo yagatikhemo, at Yesus nen he, mel yagatikhe: ”Na'logo e! Hendawinggen eberogoat noba himbiret fegen andi nen fano agen o. Halok he, hendawimo fanorogo lan o,” iluk lakfesikhe.
49A'nogo yagatu kwelek aremnogoat he, o afuni Yahudi mene samban agarek oba inoe kain a'nogo aiba nen agot ekhe yonggo wagaikhesik he, mel yagatikhe: ”Noe. Ha'logo a'nogo arat wa'lagama nen wagi o. Halok he, ninoe kain wene yaganisikherek mene ari, tulemat hemberek louwogeluk oba weagasigin lego,” iluk yagatikhe. 50A'nogo yagatikhemo re, at Yesus esanggo holhikhesik he, kain a'nogo mel yagatikhe: ”Hendawimo menenei ebetun o. Hendawinggen noba himbiret fegen halok he, ha'logo andi fano asigin o,” iluk yagatikhesik he, 51Yairus aiba lagaukwa. Lagaukwasik he, afuni fena olulu logouwageluk yagaisasikhesik he, Petrus inom, Yohanes inom, Yakobus inom, helenggerek a'nogo eisena agaisa inom, inebe andem enek woginarek oloba kwisikhe. 52Kwisukwa hak he, afuni mondok hokhorogo helenggerek a'nogo ware'ma logolik he, obaget le agik, inendawinggen warigik, ugunem kwisukwasik at Yesus nen he, mel yagaisasikhe: ”Le agubo. Helenggerek ari ebe wa'lagi'lek. We, nogo ili'logo,” iluk yagaisasikhemo, 53iren he, helenggerek andi arat wa'laga iluk inelumo andi nen he, Yesus faget endo hokhorogo yatukwa. 54Endo hokhorogo yatukwama, at Yesus nen helenggerek a'nogo enggi fagaisogo menfikhi logolik he, mel yagatikhe: ”Na'logo e. Menlame o!” iluk yagatu kwelek aremnogoat he, 55areagun wulifikhe mene hobuk kwisikhemo ebe arat eluk agaikhesik menlagaikhe. Menlagaikhemo, at Yesus nen yagaisikhi logolik he, ”Amburu ekhe noagen wogo'ni o,” iluk yagaisasikhe. 56A'nogo yagaisasikhemo, at helenggerek a'nogo eisena agaisa nen he, ”Ninailo e!” iluk, fogeratukwa meneat he, at Yesus nen he, mel yagaisasikhe: ”Hilingitunem hineilenggen neegep mene andi, afuni ekhe mondok yagaisagubo,” iluk, komorinafikhe.
Currently Selected:
LUKAS 8: inohap
Highlight
Share
Copy
Want to have your highlights saved across all your devices? Sign up or sign in
LUKAS 8
8
Hemi Yesus ombo'ne nikhi logolik, at faget hilingiti lagaukwa wene
1At Yesus a'nogo hilingitikhesik he, welagi'legat, hobuk Fano Wene Allah awe a'ma fisikherek wene a'nogo, o sili hokho kwe endep kwe yagaisilik nikhi lagaikhe. Yagaisilik nikhi logolik, at agoromi mene inebe 12 nen omanogo inom, 2it hemi ekhe munggwarengge obabut weak mene inendawimo kwisikhesik were'ma henegeisogo wulakfisigik, inoba ou mene higirinafik, fageat higirinafikhe mene ekhe inom nikhi lagaukwa. Hemi andem ekhe re, he Maria awi Magdalena ikhi lagaukwa mene, attagat munggwarengge inobabut weak mene inebe 7 nen endawimo kwisukwasik were'ma, at Yesus nen henegeisogo wulakfisasikhe mene andi inom,#Mat. 27:55-56; Mrk. 15:40-41; Luk. 23:49 3nen, ekhe re, he Yohana ap kain Herodes agarek yi mene ti mene enggiba logolik hilingiti lagaikhe mene enu Khuza andi agwe inom, he Susana inom, nen ekhe re, it hemi fena hokhorogoat inom, uang it meneba yi mene ti mene onggo palogo Yesus agoromi inomat leberisilik nikhi lagaukwa.
Ap ekhe awi feik lakfilik lagaikhe iluk oba lirogo isikhe wene
(Mat. 13:1-9; Mrk. 4:1-9)
4At Yesus o andoma were'ma, afuni mondok hokhorogo o yi awi ti awi nen, esa hokhorogoat oba andogosi wagaukwama, aren wene oba lirogo mel yagaisasikhe: 5”Ap ekhe yabu waganogo awi yaterek mene awi feik lakfeigeluk wulifikhe. Wulifikhesik, feik lakfilik lagunem he, enggen ekhe kwe ebekhalem pilik lagaikhe. A'nogo pugunem afuni laga logolik he, ineisogen alperelogo filik lagaukwama re, sue tarogo nikherek mene wagaikhesik felelenghogo nasikhe. 6Nen, enggen ekhe re, helep talek oba pisikhe mene re, weak-weak fulelhikhesik he, kweang amusu legen pugagaikhe. 7Nen, enggen ekhe re, panggi anggele'ma pisikhe mene re, panggi andi inom misikwe fulelhikhesik, awi fano mene a'nogo panggi andi nen sebelhikhemo kenken agaikhe. 8Nen, fena re, kweang fanoma pisikhe mene re, fulelhikhesik he, hokho agaikhesik, ero lombok enggen 100 nen higik irik lagaikhe,” iluk yagaisasikhe. A'nogo yagaisasikhesik ane hokhorogoat ikhi logolik he, ”Hinesanggo holugun halok he, furogo holini o,” iluk yagaisasikhe.
Yesus nen he, ”Wene oba lirogo yagahisikhi lagi andi, ebe yi faget,” iluk yagaisasikhe wene
(Mat. 13:10-17; Mrk. 4:10-12)
9A'nogo yagaisasikhemo, at agoromi ane wanhi lagaukwa mene omanogo nen, at Yesus mel yagatukwa: ”Haren wene oba lirogo yaganisegen andi, ebe ninggi'nogo mene faget egen,” iluk yagatukwama, 10at Yesus nen he, mel yagaisasikhe: ”Allah nen awe a'ma fisikherek wene andi, at endawimo hinago welagaikhe mene andi, hit enek he, wene andi hinelu asubagaigeluk fakhogo yagahisagain iluk, anggasikhe meneat he, it afuni ekhe andi re, at Allah nen he,
Ineilenggen hikhi logogun meneat he, furogo hikhi logogun lego.
Nen, inesanggo holhi logogun meneat he, furogo futfikhi logogun legaro,
iluk isikhe andi higit asuageluk wene andi oba lithigigat yagaisikhi lagi o,” iluk yagaisasikhe.#Yes. 6:9-10
At Yesus nen ”Ap ekhe feik lakfilik lagaikhe, iluk yagahisigi a'nogo re, ebe yi'nogo,” iluk yagaisasikhe wene
(Mat. 13:18-23; Mrk. 4:13-20)
11A'nogo yagaisasikhesik he, hobuk ekhe mel yagaisasikhe: ”Wene oba lirogo yagahisigi a'nogo ebe yi. Feik lakfilik lagaikhe igi a'nogo re, ebe Allah ane andi aro. 12Kwe ebekhalem pisikhe andi ebe re, it afuni ekhe Allah ane inesanggo holharesik, eberogoat iluk wanhunem, Allah nen inebe telinabinogo iluk, Iblis wagaresik he, wene inendawimo nen henogo waluk lagarek andi aro. 13Nen, helep oba pisikhe mene andi ebe re, it afuni ekhe Allah ane andi inesanggo holharesik he, inendawimo agaiyek hikhi logolik wanharesigat he, inendawinggenma omanggen yati'legen eberogoat iluk endebat enek anggaluk were'ma, weak hilingisuageluk inendawimo kagali wagunem he, arat kobokhogo herakfisaluk wulifarek andi aro. 14Nen, panggi hokhorogo anggele'ma pisikhe andi ebe re, it afuni ekhe Allah ane andi inesanggo holharesigenat inendawimo nen he, eige. Ninggi'nogo hilingisigin he, iluk, menenei ebetik, nagarek hokhorogo logoilebe, iluk inendawimo ebetik, kweangma mene inendawimo inagaiyek hogoin mene oba ebetik, agarek andi nen he, inendawimo Allah ane andi enggen wurik agi'lek lologo lek agarek andi aro. 15Nen, kweang fanoma pisikhe andi ebe re, it afuni ekhe fano wene andi inesanggo holharesik he, inendawinggenma mondok furogo helagaresik herakfigi'lek fisogo logolik, enggen hokho iterek andi aro,” iluk yagaisasikhe.
Esage oba lirogo yagaisasikhe wene
(Mrk. 4:21-25)
16A'nogo yagaisasikhesik he, ekhe yagaisikhi logolik, mel yagaisasikhe, ”Afuni nen he, esage ibilogo re, iwak elema sebelogo figik, nogo agarek oba a'ma figik, agarek lek. Afuni oloba kwikhi logolik selek were'ma enegat hoageluk he, esage eisok telik oba legeisogo fagarek.#Mat. 5:15; Luk. 11:33 17A'nogo fugunem, yi mene ti mene hinago welagarek mene andi, weinam agik, wene inendawimo hinago welagarek mene andi, sele'ma fakhogo figik, igin andi nen he,#Mat. 10:26; Luk. 12:2 18wene hinesanggo holhi lagep mene andi fanorogo futfikhi logoino o. It afuni inagarek werek mene andi re, ekhe inom mangorogo wogisagain. Meneat he, it ekhe lek mene andi re, inendawimo nen he, endebat ya elok werek, anggili'lagwi mene andi telogo helagain o,” iluk yagaisasikhe.#Mat. 25:29; Luk. 19:26
”An nagaisa nagoromi it yi aro,” iluk yagaisasikhe wene
(Mat. 12:46-50; Mrk. 3:31-35)
19A'nogo yagaisugu were'ma, at Yesus agaisa inom, agoromi inom, at oba wagaukwama re, afuni hokhorogo inom weregen he, oba ku re elo'lek agaikhe. 20A'nogo hilinglagaikhemo re, it afuni ekhe nen mel yagatukwa: ”Yesus! Hat hagaisa inom, hagoromi inom, herakhabik wagaikhasik olulu werego,” iluk yagatukwama, 21at Yesus nen he, mel yagaisasikhe: ”An nagaisa nagoromi andi re, afuni Allah ane inesanggo holharesik, higithogo hilingitarek mene andi aro,” iluk yagaisasikhe.
Yesus nen sogoi hokho mene legetfesikhe wene
(Mat. 8:23-27; Mrk. 4:35-41)
22Inenggi ekhe sambul he, at Yesus ebe inom, agoromi ane wanhi lagaukwa mene omanogo inom, e so elema kwisukwasik he, mel yagaisasikhe: ”I aik elikwe wulibuogo,” iluk yagaisasikhesik he, wulifukwa. 23Wulifi logolik he, at Yesus nogo isikhe. Nogo ugu kwelek, sogoi hokhorogo funha wagaikhemo, i ha'labu hokhorogo wati logolik, i kweisalogo, e so elema kwisikhemo, e so a'nogo wula'lakhogo pigeluk isikhe. 24A'nogo hilingitikhemo, it omanogo nen, at Yesus nogo ugunem eluget hikhi logolik he, mel yagatukwa: ”Ninoe-ninoe! Nit arat i logoin yoma,” iluk yagatukwama, at Yesus eluk agaikhesik he, sogoi inom, i ha'labu inom, wenagetikhemo palagaikhesik he, mondok hambuk isikhe. 25Hambuk isikhemo, at Yesus nen agoromi omanogo mel yagaisasikhe: ”Hinendawinggen noba himbirik welagep mene a'nogo, ka lagama nen ikhi lagep,” iluk, a'nogo yagaisasikhemo it inailo agaukwasik, it-it ikhi logolik he, ”Egi! Ap yi sa anggegep. Sogoi inom, i ha'labu inom, at aneba, legame, ugunem, ane hologo legaga andi nailo e,” iluk fogeratukwa.
Yesus nen ap o Gerasa mene ekhe munggwarengge obabut weak mene endawimo kwisukwasik were'ma henegeisogo wulakfisasikhe wene
(Mat. 8:28-34; Mrk. 5:1-20)
26A'nogo iluk, hobuk he, at Yesus agoromi inom i Galilea yenggelek aik elikwe e so warogo o Gerasa wulifukwa. 27-29Wulifukwasik, i aik oba wulibi lagaukwa hak, ap ekhe awi sili kota andi mene munggwarengge obabut weak mene endawimo kwisikhemo welagaikhe mene, at Yesus oba wagaikhe. Ap andi fagearen munggwarengge obabut weak mene hundik-handik endawimo kugunem, it afuni ekhe nen enggi eisok posiemanggen oba homati lagaukwa meneat he, hele libik-lebekhogo lakfisaluk, munggwarengge a'nogo nen waluk o leimo afuni le'ma andoma laga lagaikhesik he, hobuk su laberek lek alfulukwaat, at aiba lomborogo welagi'lek oumo warek mene fisagarekwe andoma nogolik nikhi logolik were'ma, Yesus ebe wagunem eilenggen yethasikhesik awe a'ma hu'lasi kwisikhesik ane hokhorogoat mel yagatikhe: ”Yesus. Hat Allah Enupogot amlogo yi, an ninggi'nogo hilingnabigeluk wagen,” iluk yagatunem, at Yesus nen munggwarengge a'nogo wulibuageluk yagatikhemo, at a'nogo nen: ”Noe. Weagetnafun o,” iluk ane liokhogo yagatikhe. 30A'nogo yagatikhemo re, at Yesus nen heinok wokhikhi logolik, mel isikhe: ”Hat henu sa,” iluk yagatikhemo, ap a'nogo munggwarengge inobabut weak mene esa hokhorogo endawimo kwisukwasik welagaukwa andi nen he ”Ninenu esa hokhorogo,” u hak, ”Ninenu Legiun,” isikhe. 31A'nogo isikhesik he, it munggwarengge inobabut weak mene omanogo henegeisogo pile uanma ma'lima pelakninobagai nogoluk inane liokhogo Yesus yagatukwa. 32Andi sambul, o andoma tom ebene wam mondok hokhorogoat inambisang wilik nugunemen he, it munggwarengge inobabut weak mene omanogo nen Yesus mel yagatukwa: ”Wam a'lima inendawimo kwalasi louwogen he, lakninobagain o,” iluk, inane liokhogo yagatukwa. A'nogo yagatukwama, at Yesus nen he, ”I o. Lani,” iluk, yagaisasikhemo re, 33it munggwarengge inobabut weak mene omanogo, ap a'nogo endawimo nen henegeisogo wulibi lagaukwasik, wam omanogo endawimo kwalasi lagaukwama re, mondogat i kat oba nen pururumhogo, i hokho yenggele'ma pisukwasik i lagaukwa.
34A'nogo hilinglagaikhemo, it ap wam kwalogo welagaukwa mene ineilenggen hasukwasik he, fungusek yonggo lagaukwasik, wene hilinglagaikhe mene a'nogo afuni o sili hokhoma yagaisigik, endepma yagaisigik, yagaisasukwa. 35A'nogo yagaisa lagaukwama re, it afuni nen he, ”Ninggi'nogo hilinglagama nen aga,” iluk, ineilenggen houwogeluk Yesus oba wagaukwa. Wagaukwama re, ap munggwarengge inobabut weak mene endawimo nen wulifikhe mene a'nogo afe hebelagaikhesik asu laberogo Yesus awe a'ma hurek were'ma ineilenggen hasukwasik, inailo agaukwa. 36Inailo agaukwama re, it afuni ekhe Yesus nen hilingitunem ineilenggen hasukwa mene nen, mel yagaisasukwa, ”Ap munggwarengge obabut weak mene endawimo kwisukwasik welaga a'nogo yi'nogo fano hilingite,” iluk pilingisogo yagaisasukwa. 37A'nogo yagaisasukwama, it afuni o sili Gerasa mene inom o esanggokwe mene inom inebe mondogat inailo mondok hokhorogo agaukwasik he, Yesus mel yagatukwa: ”Yesus. Hat hebe ninom yoma logogun lek. Lan o,” iluk yagatukwa. A'nogo yagatukwama, at Yesus e so elema kwisikhesik warogo re, ambotkwe wagaikhe. 38Wesigeluk ugunem he, ap munggwarengge inobabut weak mene endawimo kwisikhemo henegeisogo wulafikhe mene a'nogo nen, mel isikhe: ”Noe. Nemberek nikhi logouwogen, louwogo,” iluk, ane elagaik ane Yesus yagatikhemo, at Yesus nen he, ”Lego,” iluk aiba lakfikhi logolik he, 39”Haiba lan o. Lambik he, Allah nen higithafe mene andi pilingisogo yagaisilik nikhi logoino,” iluk, yagatikhemo ap a'nogo aiba lagaikhesik he, ”Yesus nen, yi'nogo higitnafe o,” iluk, pilingisogo it afuni o sili hokhoma andoma mene mondogat yagaisilik nikhi lagaikhe.
Yesus nen Yairus a'logo higitik, he ekhe amep lagu mondok welagaikhe mene higitik, isikhe wene
(Mat. 9:18-26; Mrk. 5:21-43)
40At Yesus ebe i aik elikwe nen ambotkwe wagaikhemo re, it afuni inebe hokhorogoaren, at ebe yerogo welagaukwa andi nen he, hai warogo wanhukwa. 41-42A'nogo wanhukwama, ap ekhe enu Yairus, o afuni Yahudi mene samban agarek oba inoe kain mene, a'logo misigat tago mene ebe ta'lagaikhesik oba nen, mo lagagik pigik ugu kwelek umur 12 tahun hilinglagaikhe hak, ou en horogat wa'lasigiluk ikhi lagaikhemo, Yesus oba wagaikhesik awe a'ma eindep awi yagaisogo hai wati logolik he, mel yagatikhe: ”Noe. An naiba louwogo,” iluk, ane elagaik ane yagatikhe. A'nogo yagatikhemo, Yesus at emberek louwogeluk lagunem he, afuni mondok hokhorogo ombo'ne yagarek-fagarek lagaukwa. 43Lagunem he, he ekhe amep lagu mondok werek kwelek 12 tahun hilinglagaikhe mene, it ekhe nen fano hilingisuageluk inayonggo filik onggo hokhorogo wogisikhi logolik he, at agarek mene leget fesikhe meneat he, iren fano higiti'lek werek kwelek, amep a'nogo palagi'lek lagu mondok welagaikhesik, 44afuni hokhorogo omanogo lagunem, Yesus ambotma lagaikhesik he, asu wurep enggi fakhasikhe. A'nogo fakhugu kwelek aremnogoat amep a'nogo palagaikhe. 45Enggi a'nogo fakhasikhemo, at Yesus nen he, mel isikhe: ”Sa nen enggi fa'niikhe,” iluk isikhemo it afuni omanogo ekhe inane oba igi'lek mondok kamo isukwama, at Petrus nen he, mel yagatikhe: ”Noe! Afuni mondok hokhorogo yagarek-fagarek waga logolik a'luk he, hat hoba to'morogo wagaikhama o,” iluk yagatikhe. 46A'nogo yagatikhemo, at Yesus nen he, mel isikhe: ”Lego. Afuni ekhe nen inenggi fa'neagama nen, an nomamerogo elalin higirinafirek a'nogo mene nendawimo nen afuni ekhe inoba lagama enegat higi o,” iluk yagatikhe. 47Yagatikhemo, at he a'nogo endawimo nen he, ”Arat futnobagaikhe higi o,” iluk, ailo agaikhesik, oak lei'leik Yesus oba wagaikhesik he, eindep awi yagaisogo awe a'ma kwisikhesik mel yagatikhe: ”An yi'nogo nen hasu nenggi fakhigi o. A'nogo fakhugu kwelek aremnogoat fano agimo yi,” iluk, afuni omanogo ineilhanem mondok pilingisogo yagatikhe. 48A'nogo yagatikhemo, at Yesus nen he, mel yagatikhe: ”Na'logo e! Hendawinggen eberogoat noba himbiret fegen andi nen fano agen o. Halok he, hendawimo fanorogo lan o,” iluk lakfesikhe.
49A'nogo yagatu kwelek aremnogoat he, o afuni Yahudi mene samban agarek oba inoe kain a'nogo aiba nen agot ekhe yonggo wagaikhesik he, mel yagatikhe: ”Noe. Ha'logo a'nogo arat wa'lagama nen wagi o. Halok he, ninoe kain wene yaganisikherek mene ari, tulemat hemberek louwogeluk oba weagasigin lego,” iluk yagatikhe. 50A'nogo yagatikhemo re, at Yesus esanggo holhikhesik he, kain a'nogo mel yagatikhe: ”Hendawimo menenei ebetun o. Hendawinggen noba himbiret fegen halok he, ha'logo andi fano asigin o,” iluk yagatikhesik he, 51Yairus aiba lagaukwa. Lagaukwasik he, afuni fena olulu logouwageluk yagaisasikhesik he, Petrus inom, Yohanes inom, Yakobus inom, helenggerek a'nogo eisena agaisa inom, inebe andem enek woginarek oloba kwisikhe. 52Kwisukwa hak he, afuni mondok hokhorogo helenggerek a'nogo ware'ma logolik he, obaget le agik, inendawinggen warigik, ugunem kwisukwasik at Yesus nen he, mel yagaisasikhe: ”Le agubo. Helenggerek ari ebe wa'lagi'lek. We, nogo ili'logo,” iluk yagaisasikhemo, 53iren he, helenggerek andi arat wa'laga iluk inelumo andi nen he, Yesus faget endo hokhorogo yatukwa. 54Endo hokhorogo yatukwama, at Yesus nen helenggerek a'nogo enggi fagaisogo menfikhi logolik he, mel yagatikhe: ”Na'logo e. Menlame o!” iluk yagatu kwelek aremnogoat he, 55areagun wulifikhe mene hobuk kwisikhemo ebe arat eluk agaikhesik menlagaikhe. Menlagaikhemo, at Yesus nen yagaisikhi logolik he, ”Amburu ekhe noagen wogo'ni o,” iluk yagaisasikhe. 56A'nogo yagaisasikhemo, at helenggerek a'nogo eisena agaisa nen he, ”Ninailo e!” iluk, fogeratukwa meneat he, at Yesus nen he, mel yagaisasikhe: ”Hilingitunem hineilenggen neegep mene andi, afuni ekhe mondok yagaisagubo,” iluk, komorinafikhe.
Currently Selected:
:
Highlight
Share
Copy
Want to have your highlights saved across all your devices? Sign up or sign in