MARKUS 14
14
Yesus wasuogeluk weim abok isukwa wene
(Mat. 26:1-5; Luk. 22:1-2; Yoh. 11:45-53)
1Andem sambul it Yahudi mene domba wam warogo seni Paskah isati lagaukwa a'nogo mene inom, Linggene Roti Fiterek Lek Meneba hilingisuogeluk inom, inenggi pire wela'luk ekheba nouwogeluk logolik, it ap Allah eisewerek mene omanogo inogogwi kaindek inom, Allah ane lisu palek eisewerek mene omanogo inom, Yesus eil warogo fakfuluk wasuogeluk weim abok ikhi lagaukwa. 2Weim abok ikhi logolik he, mel isukwa: ”Seni hokho isago nunggunem wene wo'lasimbik ambisangma weak asinogo nen he, fakfigi'lek logombik, o we sambul halok fakfouwogo,” iluk weim abok isukwa.
He ekhe nen amusu amben fano mene Yesus unggul oba pelafikhe wene
(Mat. 26:6-13; Yoh. 12:1-8)
3Weim abok a'nogo ugu kwelek he, at Yesus lak o Betania lagaukwasik, ap Simon oumo henanggo hangge inailo mene fageat ebene welagaikhe mene andi aiba kwisikhesik logolik, sumburu nouwogeluk hu'lagaikhe. Hu'lagaikhesik were'ma, he ekhe nen iwak enu pualam mene hilingik meneba amusu amben fano mene onggo hokhorogo palogo elema hinagaisogo waluk Yesus oba kwisikhe. Oba kwisikhesik he iwak a'nogo ambe obakhe sikhiphogo, amusu Yesus ungguloba kweisalogo pelafikhe. 4Pelafunem he, it afuni ekhe andoma logolik he, mel isukwa: ”He yi amusu amben fano mene we tulemat alomarogo pelafe yi nenahalok? 5Amusu yiba, uang perak afuni yabu inenggi misigam faget hilingitunem inenggi onggo misiktek wogisagarek a'nogo mene 300 nen walugen he, afuni inangge lek mene sumburisa mene o,” iluk he a'nogo wenagetukwa. 6A'nogo wenagetukwa meneat he, at Yesus nen he, mel yagaisasikhe: ”He yi wenagetu lego. Herakfisani. Aren an fano hilingnafe o. 7It afuni inangge lek mene andi, hit hinom mondok logogun o. A'nogo logolik yi'nogo leberisogoin, iluk hinendawimo nen anggalugat leberisamo re fano o. A'nogo meneat he, an enek he, hit ninom mondok logogun lego. 8Aren an hilingnabu hagat elok hilingnafe o. Afuni warek oba amusu watfisagarek andi hak, an hobuk noatunem nebe wa'lasumo warek salnabuogeluk noba wat nobagau hagat arat wat nobagai waga o. 9Nane eberogoat yagahisak. He yi oba eberek logouwageluk he, afuni nen wene fano wene a'nogo o yi awi ti awi yagaisilik nikhi logolik he: He andi nen yi'nogo hilingitikhe, iluk abok fano ikhi logogun,” iluk yagaisasikhe.
Yudas nen Yesus wasuageluk yonggo lagaikhe wene
(Mat. 26:14-16; Luk. 22:3-6)
10At Yesus wene a'nogo yagaisasikhemo nen he, at agoromi inebe 12 omanogo mene ekhe at Yudas Iskariot a'nogo, Yesus wasuageluk yonggo it ap Allah eisewerek inogogwi kaindek omanogo inoba lagaikhe. 11Yonggo lagaikhesik yagaisasikhemo inesanggo holhukwasik he, inendawimo inagaiyek anggasukwasik, mel yagatukwa: ”Halok he, onggo uang ekhe wokhesugun o,” iluk abok yagatukwa. Yagatukwama re, at Yudas endawimo nen he: ”Yesus ebe fanoasuak ninggi'nogo were'ma inenggiba fagain he,” iluk weim abok endawimo logolik menenei ebeti lagaikhe.
Yesus agoromi inom seni Paskah nasukwa wene
(Mat. 26:17-25; Luk. 22:7-14,21-23; Yoh. 13:21-30)
12Yudas a'nogo endawimo ebetu kwelek he, it afuni Yahudi mene, Linggene Roti Fiterek Lek Meneba werago nenggarek a'nogo mene nouwogeluk ikhi logolik, ”Seni Paskah nogoin oba niren yi mene ti mene o koma tegelogo fei logoin hamolo anggegen?” iluk oba heinok wanhukwa. 13Heinok wanhukwama, aren he, agoromi ane wanhi lagaukwa omanogo mene ekhe inebe pire lakfisasikhe. Lakfisikhi logolik he, mel yagaisasikhe: ”O kota a'nogo lani. Lagunem he, ap ekhe kweang temul meneba hilingitarek mene i hina'luk wagunem hinom ambi asugun a'naga. Hinom ambi asimbik he, ombo'neat lano. 14Ombo'ne lagunemen, at ebe oloba kugu halok he, ap awi eisewerek mene andi oba heinok mel iluk wanino: At ninoe wene yaganisikherek mene a'nogo nen he, mel ikhe o: An nagoromi nane wili'lagwi mene ninom seni Paskah faget wam domba warogo noageluk, o hulu senggelek ki hak nobagegen, iluk heinok wani lani o, iluk lakninobagai wagama wago o. 15A'nogo yagatunem, aren he o henambo hulu hokho senggelek mene werago nogoin oba obuluk hilingik oba tegelek were'ma yagahisagain a'naga. Yagahisikhe halok he, andomaat nouwogen he, yi mene ti mene tegelogo fembik logoino o,” iluk he, lakfisasikhe. 16At agoromi ane wanhi lagaukwa mene inebe pire lakfisikhi logolik, ”O kota lani,” iluk yagaisasikhemo it a'nogo andomaat lagaukwasik he, at Yesus nen isikhe hagat were'ma ha lagaukwa. Ha lagaukwasik he, seni Paskah a'nogo faget wam domba watukwasik he, weragaisogo tegelogo fesukwa. 17Yi mene ti mene tegelogo fesukwasik were'ma hu'mokweat Yesus agoromi inebe 12 nen fena omanogo inom, inoba lagaukwa. 18Lagaukwasik he oloba kwisukwasik hu'lagaukwasik he, seni Paskah a'nogo ninggi logolik, at Yesus nen mel yagaisasikhe: ”Hit mene ekhe sumburu an nemberek misi'mo ninggi lago mene andi nen, an nebe noasuageluk yonggo lagain o, iluk eberogoat yagahisigi,” iluk yagaisasikhe. 19A'nogo yagaisasikhemo re, it inendawimo weak agaukwasik mel yagatukwa: ”An hea? An he lek anggigi,” iluk inebe lombogen a'nogo nek ilik lagaukwa. 20A'nogo ilik lagaukwama, at Yesus nen he mel yagaisasikhe: ”Hit hinebe 12 nen welagep ya mene ekhe an nemberek ninenggi ambine piring tale'ma pelafosik amusu sobalogo nonggo mene andi nenaro.
21An abat ta'lasi wagagi a'nogo, wa'lasigin mene lisu palek werek higithogoat wa'lasigin meneat he, at ap nebe noasuageluk yonggo lagain mene andi nek he, eigo. Ebe mondogat weagat asigin o,” iluk yagaisasikhe.
Yesus agoromi inom sumburu inom, enggen amusu inom, wurep oba nasukwa wene
(Mat. 26:26-30; Luk. 22:14-20; 1Kor. 11:23-25)
22At Yesus agoromi inom a'nogo sumburu inom ninggi logolik, aren he, sumburu roti mene enggim wanhikhesik Allah hai warogo sumburisikhi logolik he, mel yagaisasikhe: ”Yi re An nebe aro wanimbik nani,” iluk yagaisasikhe. 23A'nogo yagaisasikhesik he, iwak enggen hinago mene enggim wanhikhesik Allah hai warogo re, sumburisasikhemo inebe mondogat nasukwa. 24Noageluk sumburisikhi logolik mel yagaisasikhe: ”Yi re An namep aro. Allah nen wene warogo wokhinabigin isikhe a'nogo, afuni hokhorogoat faget namep wulagaisogo noasugun andiba, ebe asigin o. 25An nane eberogoat yagahisak. Anggur enggen amusu yi nambik he, an hobuk ekhe ninggi'lek logombigen, huli at Allah nen awe a'ma nobagagin andi huli amusu ket mene nagain o,” iluk yagaisasikhesik he, 26wuni Allah awuni ekhe wa'luk wulifukwasik he, Zaitun punuba lagasukwa.
”Haren Yesus nonggot, iluk labeligin o,” iluk Petrus yagatikhe wene
(Mat. 26:31-35; Luk. 22:31-34; Yoh. 13:36-38)
27A'nogo Zaitun punuba lagasukwasik at Yesus nen he, mel yagaisasikhe: ”At Allah nen he ap wam domba kwalogo welagarek mene andi ebe an nen watunem he, anggo heise pugulugun o, iluk isikhemo lisu palogo fesukwama werek andi nen, hit mondogaren heraknobagaluk heise pugulugun o. 28Pugulugun meneat he, an noatunem, hobuk Allah nen neluget nafunem he, an tak o Galilea lambik hinelokhoma logogin o,” iluk yagaisasikhe. 29A'nogo yagaisasikhemo re, at Petrus nen mel yagatikhe: ”It fena yoma inebe mondogat herakhobagaluk heise pugulhu halok he, an a'nogo heise wulibigin lego,” iluk yagatikhemo, 30At Yesus nen he: ”Yogondak hubanggo yiat, sue ayam ane attak imbigen, hobuk igi'lek werek kwelek, haren he: Yesus andi nonggoro, iluk henggi henagan oba labeligin a'naga, iluk eberogoat yagaheti o,” iluk yagatikhemo, 31At Petrus nen mel isikhe: ”A'nogo egenat mene re, an nemberek noasumo fano o. Yesus nonggot, iluk an nen labeligin lego,” iluk ane ninghogoat isikhemo re, it agaila'lak ekhe inebe lombok inane a'nogo nek ilik lagaukwa.
Yesus Getsemani yabumo nen Allah ayonggo fesikhe wene
(Mat. 26:36-46; Luk. 22:39-46)
32Wene a'nogo ilik-ilik he, yabumo ekhe enu Getsemani lagaukwa. Lagaukwasik, at Yesus nen he, mel yagaisasikhe: ”An horok ya lambik samban igin enggere, hit ya hurek logoni,” iluk agoromi ane wanhi lagaukwa mene omanogo yagaisasikhe. 33A'nogo yagaisasikhesik he, Petrus inom, Yakobus inom, Yohanes inom, woginarek lagunem he, at Yesus endawinggen heiselhikhesik, endawi firogo logolik he, 34mel yagaisasikhe: ”Nagoromi. An nendawinggen mondok weak agasik, wa'lasigin hangge hilingnabi'logo o. Halok, hit ya logolik he, hinebe hebelogo logoni o,” iluk yagaisasikhe. 35A'nogo yagaisasikhesik he, at samban igiluk orogat andem kweangma elokhe sagaum weinglagaikhesik, mel isikhe: ”Neisena! An yogondak yaat weaget nabuogeluk werek andi re, weaget nabinogo o, iluk isikhe, 36hobuk mel isikhe: ”Neisena. Neisena halaboge! Hat he, yi mene ti mene hilingisumo, hilingisu hagenek andi nen, an weaget nabugun andi, haren telnabin o, iluk u hak he, enggen amusu hinago noageluk wo'nesugun andi haren wokhano igi. Mene re, an nendawimo anggigi andi re lego. We, hat hendawimo anggegen mene andiat higirasuago o,” iluk samban isikhe. 37Samban a'nogo iluk agoromi omanogo inoba wagaikhe re, it nogo ugu were'ma wagaikhesik, at Petrus mel yagatikhe: ”Simon. Hat he, nogoat ikhi lagen a? Yogondak ya we jam misigam faget hebe hebelogoat logou re, elo'lek he a?” iluk yagatikhesik he, 38it fena omanogo inomat mel yagaisasikhe: ”Weak hilingisuageluk hinendawimo kagali wesinogo hinebe hebelogo logolik he, sambanat ikhi logoni o, hinendawimo nen elok hilingisigin iluk anggikhi lagep meneat he, hinebe nen a'nogo hilingisugun he, elo'lego,” iluk yagaisasikhe. 39A'nogo yagaisasikhesik he, samban attak isikhe hagat hobuk i lagaikhe. 40A'nogo i lagaikhesik hobuk wagaikhe re it omanogo nogo ineil agaikhemo re, nogo ugu were'ma isa wagaikhemo andi nen he, inane ninggi'nogo yagasuheat kamo isukwa. 41Kamo isukwama re, at enggi pireba eilenggen isa wagaikhesigen, hobuk lagaikhesik isa wagaikhesik he, mel yagaisasikhe: ”Hit set walogo nogo mondok ugu logogun a? Nogo arat egebo. An hilingnabugun a'nogo yogondak yi aro. Ap ekhe nen it ap weak hilingiri'lagwi mene nen, an abat ta'lasi wagagi a'nogo noasuageluk inenggiba arat nobagagun yi yethani! 42Halok louwogen he, menla'ni o. Ap an noasuogeluk yonggo laga mene a'nogo re, horogat asi waga,” iluk yagaisasikhe.
Yesus ebe fakfesukwa wene
(Mat. 26:47-56; Luk. 22:47-53; Yoh. 18:3-12)
43”A'nogo ugu kwelek aremnogoat he, it ap Allah eisewerek mene inogogwi kaindek omanogo inom, Allah ane lisu palek eisewerek mene omanogo inom, inaluendek omanogo inom, inomenat, ap esa ekhe hokhorogo lakfisa wagaukwama, karok inom, yei payuk inom, waluk Yesus agoromi inebe 12 nen omanogo mene ekhe enu Yudas a'nogo nen woginarek wagaikhe. 44Waga logolik, at Yudas yonggo lagaikhe mene a'nogo nen he, wene yi'nogo warisasikhesigen wagaikhe: ”An lambik he hai nambe saluk wati halok he, hiren anggikhi logolik, I, ebe andiat higi, iluk fakfembik hinenggi ninghogo waluk we'no,” iluk wene senggerogo yagaisasikhesik, at inomat wagaukwa. 45Wagaukwasik he, at Yudas a'nogo Yesus oba horokhogo wagaikhesik, mel yagatikhe: ”Noe,” iluk hai ambe saluk watikhe. 46Hai ambe saluk watunem he, it ap omanogo nen Yesus ebe fakfesukwasik enggi hele warogo fisogo welagaukwa. 47A'nogo fakfesukwama re, it ap andoma mendek welagaukwa mene ekhe nen karok awingga elema kwelabek mene oua'ma nen lisogo wanhikhesik he, ap Allah eisewerek mene inoe kain amingmingengge ekhe wasigeluk fugethasikhe re, esanggo nek sabelogo lakfesikhe. 48A'nogo lakfesikhemo, at Yesus nen he, it ap omanogo mel yagaisasikhe: ”An nenggi abisak ekhe wanhimo nen, hit karok inom, yei inom, waluk nenggi hele wasuogeluk wageba? 49Hundik-handigat an hinanggele'ma Allah awi wuri'mo logolik wene yagaisikho were'ma faknobagagi'lek welagepsigen he, Yi'nogo hilingisugun, iluk Allah ane lisu palogo fesukwa mene higithogoat, faknobagai wagebo,” iluk yagaisasikhemo, 50at Yesus agoromi omanogo inebe mondogat ebe herakfisaluk he, heise pugulhukwa.
Ap alage mene ekhe heise lagaikhe wene
51Heise pugulhu kwelek ap alage mene ekhe asu elonggoma mene nek laberek logolik Yesus ombo'ne lageluk ugunem, it ap omanogo nen fakfesukwa. 52A'nogo fakfugunem he, su a'nogo korogo hebisaluk, asu laberek legengge heise lagaikhe.
Yesus wasuogeluk wene oba fesukwa wene
(Mat. 26:57-68; Luk. 12:54-56; Yoh. 18:13-14,19-24)
53At Yesus ebe fakfesukwasik he, ap Allah eisewerek mene inoe kain oba waluk lagaukwa. Andoma it ap Allah eisewerek mene inogogwi kaindek inebe mondogat inom, inaluendek omanogo inom, Allah ane lisu palek eisewerek mene omanogo inom, andogotukwa. 54Yesus a'nogo waluk lagu kwelek, at Petrus a'nogo hobuk inombo'ne igam-hegam laga lagaikhesik, ap Allah eisewerek mene inoe kain a'nogo awililu agoromi Allah awi wurik kagalek welagaikharek mene were'ma inoba kwisikhesik he, inom endu nonggale'ma hurek logolik sogoi sakhikhi lagaukwa. 55It a'nogo sogoi sakhugu kwelek he, it ap Allah eisewerek mene inogogwi kaindek omanogo inom, wene Allah ane faget ero pilingitarek mene inebe mondogat inom, inom logolik, wene Yesus oba fesukwasik wasuogeluk he, mel isukwa: ”Afuni at weak hilingitunem ineilenggen haga mene uagen heraginabini o,” iluk isukwama heraginafukwa meneat he, lek agaikhe. 56Lek agaikhemo re, it ekhe inebe hokhorogo nenat he, mel isukwa: ”Weak yi'nogo hilingitunem nineilenggen hogo,” iluk wene ineranhogo wene isukwa meneat he, inane misigat higithogo isukwa lek.
57A'nogo isukwama, hobuk it ap ekhe inebe miren hakhogo menlagaukwasik he, ineranenat mel yagaisasukwa: 58”At yi nen he, Allah awi afuni inenggi nen wutukwa mene yi, an nen meisalogo lakfagain o. Meisalogo lakfembik obali'mo re, afuni inenggi nen wusugun lek. We, hunogoat mene nenggi pireba wuti logombik, ekheba, arat wurep kobokhogo wusigin o, iluk nineilhanem ugunem ninesanggo holhugu o,” iluk isukwa meneat he, 59inane andi misigat higithogo igi'legat. 60A'nogo isukwama nen he, it ap Allah eisewerek mene inoe kain a'nogo menlagaikhesik, tulem inanggele'ma kwisikhesik he, Yesus mel yagatikhe: ”Yesus! It ap yoma wene yagaheri'lagwi yoma, haren wene onggo ekhe yagaisagain lega? Onggo yagaisamo re,” iluk yagatikhe meneat he, 61ane igi'legat kamo isikhe. Kamo isikhemo hobuk it ap Allah eisewerek mene inoe kain a'nogo nen he, wene ekhe mel yagatikhe: ”Allah fogerati lago mene nen amlogo Kristus lakfei wesigin isukwa a'nogo ebe re, harara?” iluk heinok wokhasikheat. 62Heinok a'nogo wokhasikhemo, at Yesus nen he, mel yagatikhe ”Andi, an nebe yi aro. An abat ta'lasi wagagi a'nogo, at Allah omame hokho yi mene ti mene hilingisigin enek a'nogo era'lu enggi ebekwe kainat logombik he, pogoroba andoma nen ohena anggele'ma pi wagunem hineilenggen neogoin o” iluk yagatikhe.
63A'nogo yagatikhemo, it ap Allah eisewerek mene inoe kain a'nogo onggwarek asu endakwe laberek mene libilogo lakfisasikhesik he, mel yagaisasikhe: ”Afuni nen at weak hilingitunem ineilenggen haga mene wene senggerogo uageluk nenahalok yerinarek logogun? 64Allah endawimo serametfikhesik enu weagetfugunem arat hinesanggo holhep andi, hinendawimo nen ninggi'nogo anggikhi lagep,” iluk yagaisasikhemo, it omanogo mondogaren he, ”Wene oba fembik ebe mondok wasuogo!” iluk yagatukwa. 65A'nogo yagatukwasik he, it ap omanogo ekhe nen wesi suphogo Yesus oba fesukwasik he, inenggi nen eilenggen salfuluk, yei inenggi tap wati logolik he, ”Sa nen hoate nogo. Yaganisan ta,” iluk yagati lagaukwama, it ap kaindek omanogo inagoromi Allah awi wuri'mo kagalek welagaikharek mene nen ebe fakfesukwasik yei inenggi nen tamuk-tamakhogo watukwaat.
Petrus nen, ”Yesus nonggot,” iluk labelhikhe wene
(Mat. 26:69-75; Luk. 22:56-62; Yoh. 18:15-18,25-27)
66A'nogo hilingitu kwelek he, at Petrus olilu honggole'ma were'ma, ap Allah eisewerek mene inoe kain a'nogo amingmingengge helenggerek mene ekhe wagaikhe. 67Wagaikhesik, Petrus a'nogo endumo sogoi sakhugunem yethasikhesik, eilenggen oba lulu wagaikhesik he, mel yagatikhe: ”Hat ogo re, Yesus aiba Nasaret mene a'nogo hinom nikhi lagep mene anggigi,” iluk yagatikhe. 68Yagatikhemo, aren he, mel yagatikhe: ”An nonggoro. Hat egen andi futfigi lego,” iluk labelhikhe. Labelhikhesik he, kwe hokho ambe pale'ma wulifarek oba wulibi wagaikhesik werek kwelek he, sue ayam ane isikhe. 69A'nogo ane isikhemo, at Petrus kwe ambe pale'ma aremnogoat were'ma, at helenggerek a'nogo eilenggen hobuk hasikheat. Hasikhesik, mel yagaisasikhe: ”At yi it inom nikharek mene aro,” iluk, it afuni andoma welagaukwa mene omanogo yagaisasikhe. 70A'nogo yagaisasikhemo re, aren hobuk labelhikheat. Labelhikhesik endebat ekhe were'ma nen it afuni andoma welagaukwa mene omanogo nen he, mel yagatukwa: ”Hat hebe o Galilea mene heogo yi re, hebe eberogoat it mene aro,” iluk yagatukwama, 71aren he: ”Hiren ap abok ikhi lagep andi, ebe an nonggoro. Neisena Allah oak! Neranen igi halok, aren noasuago,” iluk labelhikhe. 72Hombuk palhu kwelek aremnogoat, sue ayam a'nogo ane hobuk isikhe. Ane hobuk ugunem he, at Petrus nen he: ”Eige. At Yesus nen an yaganeti logolik: Sue ayam ane attak imbik he, hobuk igi'lek werek kwelek, haren he: Yesus nonggoro, iluk henggi henagan oba labeligin o, iluk yaganete a'nogo, arat labelhi yi higi,” iluk endawimo ebetikhesik he, endawi fit-fit le agaikhe.
Currently Selected:
MARKUS 14: inohap
Highlight
Share
Copy
Want to have your highlights saved across all your devices? Sign up or sign in
MARKUS 14
14
Yesus wasuogeluk weim abok isukwa wene
(Mat. 26:1-5; Luk. 22:1-2; Yoh. 11:45-53)
1Andem sambul it Yahudi mene domba wam warogo seni Paskah isati lagaukwa a'nogo mene inom, Linggene Roti Fiterek Lek Meneba hilingisuogeluk inom, inenggi pire wela'luk ekheba nouwogeluk logolik, it ap Allah eisewerek mene omanogo inogogwi kaindek inom, Allah ane lisu palek eisewerek mene omanogo inom, Yesus eil warogo fakfuluk wasuogeluk weim abok ikhi lagaukwa. 2Weim abok ikhi logolik he, mel isukwa: ”Seni hokho isago nunggunem wene wo'lasimbik ambisangma weak asinogo nen he, fakfigi'lek logombik, o we sambul halok fakfouwogo,” iluk weim abok isukwa.
He ekhe nen amusu amben fano mene Yesus unggul oba pelafikhe wene
(Mat. 26:6-13; Yoh. 12:1-8)
3Weim abok a'nogo ugu kwelek he, at Yesus lak o Betania lagaukwasik, ap Simon oumo henanggo hangge inailo mene fageat ebene welagaikhe mene andi aiba kwisikhesik logolik, sumburu nouwogeluk hu'lagaikhe. Hu'lagaikhesik were'ma, he ekhe nen iwak enu pualam mene hilingik meneba amusu amben fano mene onggo hokhorogo palogo elema hinagaisogo waluk Yesus oba kwisikhe. Oba kwisikhesik he iwak a'nogo ambe obakhe sikhiphogo, amusu Yesus ungguloba kweisalogo pelafikhe. 4Pelafunem he, it afuni ekhe andoma logolik he, mel isukwa: ”He yi amusu amben fano mene we tulemat alomarogo pelafe yi nenahalok? 5Amusu yiba, uang perak afuni yabu inenggi misigam faget hilingitunem inenggi onggo misiktek wogisagarek a'nogo mene 300 nen walugen he, afuni inangge lek mene sumburisa mene o,” iluk he a'nogo wenagetukwa. 6A'nogo wenagetukwa meneat he, at Yesus nen he, mel yagaisasikhe: ”He yi wenagetu lego. Herakfisani. Aren an fano hilingnafe o. 7It afuni inangge lek mene andi, hit hinom mondok logogun o. A'nogo logolik yi'nogo leberisogoin, iluk hinendawimo nen anggalugat leberisamo re fano o. A'nogo meneat he, an enek he, hit ninom mondok logogun lego. 8Aren an hilingnabu hagat elok hilingnafe o. Afuni warek oba amusu watfisagarek andi hak, an hobuk noatunem nebe wa'lasumo warek salnabuogeluk noba wat nobagau hagat arat wat nobagai waga o. 9Nane eberogoat yagahisak. He yi oba eberek logouwageluk he, afuni nen wene fano wene a'nogo o yi awi ti awi yagaisilik nikhi logolik he: He andi nen yi'nogo hilingitikhe, iluk abok fano ikhi logogun,” iluk yagaisasikhe.
Yudas nen Yesus wasuageluk yonggo lagaikhe wene
(Mat. 26:14-16; Luk. 22:3-6)
10At Yesus wene a'nogo yagaisasikhemo nen he, at agoromi inebe 12 omanogo mene ekhe at Yudas Iskariot a'nogo, Yesus wasuageluk yonggo it ap Allah eisewerek inogogwi kaindek omanogo inoba lagaikhe. 11Yonggo lagaikhesik yagaisasikhemo inesanggo holhukwasik he, inendawimo inagaiyek anggasukwasik, mel yagatukwa: ”Halok he, onggo uang ekhe wokhesugun o,” iluk abok yagatukwa. Yagatukwama re, at Yudas endawimo nen he: ”Yesus ebe fanoasuak ninggi'nogo were'ma inenggiba fagain he,” iluk weim abok endawimo logolik menenei ebeti lagaikhe.
Yesus agoromi inom seni Paskah nasukwa wene
(Mat. 26:17-25; Luk. 22:7-14,21-23; Yoh. 13:21-30)
12Yudas a'nogo endawimo ebetu kwelek he, it afuni Yahudi mene, Linggene Roti Fiterek Lek Meneba werago nenggarek a'nogo mene nouwogeluk ikhi logolik, ”Seni Paskah nogoin oba niren yi mene ti mene o koma tegelogo fei logoin hamolo anggegen?” iluk oba heinok wanhukwa. 13Heinok wanhukwama, aren he, agoromi ane wanhi lagaukwa omanogo mene ekhe inebe pire lakfisasikhe. Lakfisikhi logolik he, mel yagaisasikhe: ”O kota a'nogo lani. Lagunem he, ap ekhe kweang temul meneba hilingitarek mene i hina'luk wagunem hinom ambi asugun a'naga. Hinom ambi asimbik he, ombo'neat lano. 14Ombo'ne lagunemen, at ebe oloba kugu halok he, ap awi eisewerek mene andi oba heinok mel iluk wanino: At ninoe wene yaganisikherek mene a'nogo nen he, mel ikhe o: An nagoromi nane wili'lagwi mene ninom seni Paskah faget wam domba warogo noageluk, o hulu senggelek ki hak nobagegen, iluk heinok wani lani o, iluk lakninobagai wagama wago o. 15A'nogo yagatunem, aren he o henambo hulu hokho senggelek mene werago nogoin oba obuluk hilingik oba tegelek were'ma yagahisagain a'naga. Yagahisikhe halok he, andomaat nouwogen he, yi mene ti mene tegelogo fembik logoino o,” iluk he, lakfisasikhe. 16At agoromi ane wanhi lagaukwa mene inebe pire lakfisikhi logolik, ”O kota lani,” iluk yagaisasikhemo it a'nogo andomaat lagaukwasik he, at Yesus nen isikhe hagat were'ma ha lagaukwa. Ha lagaukwasik he, seni Paskah a'nogo faget wam domba watukwasik he, weragaisogo tegelogo fesukwa. 17Yi mene ti mene tegelogo fesukwasik were'ma hu'mokweat Yesus agoromi inebe 12 nen fena omanogo inom, inoba lagaukwa. 18Lagaukwasik he oloba kwisukwasik hu'lagaukwasik he, seni Paskah a'nogo ninggi logolik, at Yesus nen mel yagaisasikhe: ”Hit mene ekhe sumburu an nemberek misi'mo ninggi lago mene andi nen, an nebe noasuageluk yonggo lagain o, iluk eberogoat yagahisigi,” iluk yagaisasikhe. 19A'nogo yagaisasikhemo re, it inendawimo weak agaukwasik mel yagatukwa: ”An hea? An he lek anggigi,” iluk inebe lombogen a'nogo nek ilik lagaukwa. 20A'nogo ilik lagaukwama, at Yesus nen he mel yagaisasikhe: ”Hit hinebe 12 nen welagep ya mene ekhe an nemberek ninenggi ambine piring tale'ma pelafosik amusu sobalogo nonggo mene andi nenaro.
21An abat ta'lasi wagagi a'nogo, wa'lasigin mene lisu palek werek higithogoat wa'lasigin meneat he, at ap nebe noasuageluk yonggo lagain mene andi nek he, eigo. Ebe mondogat weagat asigin o,” iluk yagaisasikhe.
Yesus agoromi inom sumburu inom, enggen amusu inom, wurep oba nasukwa wene
(Mat. 26:26-30; Luk. 22:14-20; 1Kor. 11:23-25)
22At Yesus agoromi inom a'nogo sumburu inom ninggi logolik, aren he, sumburu roti mene enggim wanhikhesik Allah hai warogo sumburisikhi logolik he, mel yagaisasikhe: ”Yi re An nebe aro wanimbik nani,” iluk yagaisasikhe. 23A'nogo yagaisasikhesik he, iwak enggen hinago mene enggim wanhikhesik Allah hai warogo re, sumburisasikhemo inebe mondogat nasukwa. 24Noageluk sumburisikhi logolik mel yagaisasikhe: ”Yi re An namep aro. Allah nen wene warogo wokhinabigin isikhe a'nogo, afuni hokhorogoat faget namep wulagaisogo noasugun andiba, ebe asigin o. 25An nane eberogoat yagahisak. Anggur enggen amusu yi nambik he, an hobuk ekhe ninggi'lek logombigen, huli at Allah nen awe a'ma nobagagin andi huli amusu ket mene nagain o,” iluk yagaisasikhesik he, 26wuni Allah awuni ekhe wa'luk wulifukwasik he, Zaitun punuba lagasukwa.
”Haren Yesus nonggot, iluk labeligin o,” iluk Petrus yagatikhe wene
(Mat. 26:31-35; Luk. 22:31-34; Yoh. 13:36-38)
27A'nogo Zaitun punuba lagasukwasik at Yesus nen he, mel yagaisasikhe: ”At Allah nen he ap wam domba kwalogo welagarek mene andi ebe an nen watunem he, anggo heise pugulugun o, iluk isikhemo lisu palogo fesukwama werek andi nen, hit mondogaren heraknobagaluk heise pugulugun o. 28Pugulugun meneat he, an noatunem, hobuk Allah nen neluget nafunem he, an tak o Galilea lambik hinelokhoma logogin o,” iluk yagaisasikhe. 29A'nogo yagaisasikhemo re, at Petrus nen mel yagatikhe: ”It fena yoma inebe mondogat herakhobagaluk heise pugulhu halok he, an a'nogo heise wulibigin lego,” iluk yagatikhemo, 30At Yesus nen he: ”Yogondak hubanggo yiat, sue ayam ane attak imbigen, hobuk igi'lek werek kwelek, haren he: Yesus andi nonggoro, iluk henggi henagan oba labeligin a'naga, iluk eberogoat yagaheti o,” iluk yagatikhemo, 31At Petrus nen mel isikhe: ”A'nogo egenat mene re, an nemberek noasumo fano o. Yesus nonggot, iluk an nen labeligin lego,” iluk ane ninghogoat isikhemo re, it agaila'lak ekhe inebe lombok inane a'nogo nek ilik lagaukwa.
Yesus Getsemani yabumo nen Allah ayonggo fesikhe wene
(Mat. 26:36-46; Luk. 22:39-46)
32Wene a'nogo ilik-ilik he, yabumo ekhe enu Getsemani lagaukwa. Lagaukwasik, at Yesus nen he, mel yagaisasikhe: ”An horok ya lambik samban igin enggere, hit ya hurek logoni,” iluk agoromi ane wanhi lagaukwa mene omanogo yagaisasikhe. 33A'nogo yagaisasikhesik he, Petrus inom, Yakobus inom, Yohanes inom, woginarek lagunem he, at Yesus endawinggen heiselhikhesik, endawi firogo logolik he, 34mel yagaisasikhe: ”Nagoromi. An nendawinggen mondok weak agasik, wa'lasigin hangge hilingnabi'logo o. Halok, hit ya logolik he, hinebe hebelogo logoni o,” iluk yagaisasikhe. 35A'nogo yagaisasikhesik he, at samban igiluk orogat andem kweangma elokhe sagaum weinglagaikhesik, mel isikhe: ”Neisena! An yogondak yaat weaget nabuogeluk werek andi re, weaget nabinogo o, iluk isikhe, 36hobuk mel isikhe: ”Neisena. Neisena halaboge! Hat he, yi mene ti mene hilingisumo, hilingisu hagenek andi nen, an weaget nabugun andi, haren telnabin o, iluk u hak he, enggen amusu hinago noageluk wo'nesugun andi haren wokhano igi. Mene re, an nendawimo anggigi andi re lego. We, hat hendawimo anggegen mene andiat higirasuago o,” iluk samban isikhe. 37Samban a'nogo iluk agoromi omanogo inoba wagaikhe re, it nogo ugu were'ma wagaikhesik, at Petrus mel yagatikhe: ”Simon. Hat he, nogoat ikhi lagen a? Yogondak ya we jam misigam faget hebe hebelogoat logou re, elo'lek he a?” iluk yagatikhesik he, 38it fena omanogo inomat mel yagaisasikhe: ”Weak hilingisuageluk hinendawimo kagali wesinogo hinebe hebelogo logolik he, sambanat ikhi logoni o, hinendawimo nen elok hilingisigin iluk anggikhi lagep meneat he, hinebe nen a'nogo hilingisugun he, elo'lego,” iluk yagaisasikhe. 39A'nogo yagaisasikhesik he, samban attak isikhe hagat hobuk i lagaikhe. 40A'nogo i lagaikhesik hobuk wagaikhe re it omanogo nogo ineil agaikhemo re, nogo ugu were'ma isa wagaikhemo andi nen he, inane ninggi'nogo yagasuheat kamo isukwa. 41Kamo isukwama re, at enggi pireba eilenggen isa wagaikhesigen, hobuk lagaikhesik isa wagaikhesik he, mel yagaisasikhe: ”Hit set walogo nogo mondok ugu logogun a? Nogo arat egebo. An hilingnabugun a'nogo yogondak yi aro. Ap ekhe nen it ap weak hilingiri'lagwi mene nen, an abat ta'lasi wagagi a'nogo noasuageluk inenggiba arat nobagagun yi yethani! 42Halok louwogen he, menla'ni o. Ap an noasuogeluk yonggo laga mene a'nogo re, horogat asi waga,” iluk yagaisasikhe.
Yesus ebe fakfesukwa wene
(Mat. 26:47-56; Luk. 22:47-53; Yoh. 18:3-12)
43”A'nogo ugu kwelek aremnogoat he, it ap Allah eisewerek mene inogogwi kaindek omanogo inom, Allah ane lisu palek eisewerek mene omanogo inom, inaluendek omanogo inom, inomenat, ap esa ekhe hokhorogo lakfisa wagaukwama, karok inom, yei payuk inom, waluk Yesus agoromi inebe 12 nen omanogo mene ekhe enu Yudas a'nogo nen woginarek wagaikhe. 44Waga logolik, at Yudas yonggo lagaikhe mene a'nogo nen he, wene yi'nogo warisasikhesigen wagaikhe: ”An lambik he hai nambe saluk wati halok he, hiren anggikhi logolik, I, ebe andiat higi, iluk fakfembik hinenggi ninghogo waluk we'no,” iluk wene senggerogo yagaisasikhesik, at inomat wagaukwa. 45Wagaukwasik he, at Yudas a'nogo Yesus oba horokhogo wagaikhesik, mel yagatikhe: ”Noe,” iluk hai ambe saluk watikhe. 46Hai ambe saluk watunem he, it ap omanogo nen Yesus ebe fakfesukwasik enggi hele warogo fisogo welagaukwa. 47A'nogo fakfesukwama re, it ap andoma mendek welagaukwa mene ekhe nen karok awingga elema kwelabek mene oua'ma nen lisogo wanhikhesik he, ap Allah eisewerek mene inoe kain amingmingengge ekhe wasigeluk fugethasikhe re, esanggo nek sabelogo lakfesikhe. 48A'nogo lakfesikhemo, at Yesus nen he, it ap omanogo mel yagaisasikhe: ”An nenggi abisak ekhe wanhimo nen, hit karok inom, yei inom, waluk nenggi hele wasuogeluk wageba? 49Hundik-handigat an hinanggele'ma Allah awi wuri'mo logolik wene yagaisikho were'ma faknobagagi'lek welagepsigen he, Yi'nogo hilingisugun, iluk Allah ane lisu palogo fesukwa mene higithogoat, faknobagai wagebo,” iluk yagaisasikhemo, 50at Yesus agoromi omanogo inebe mondogat ebe herakfisaluk he, heise pugulhukwa.
Ap alage mene ekhe heise lagaikhe wene
51Heise pugulhu kwelek ap alage mene ekhe asu elonggoma mene nek laberek logolik Yesus ombo'ne lageluk ugunem, it ap omanogo nen fakfesukwa. 52A'nogo fakfugunem he, su a'nogo korogo hebisaluk, asu laberek legengge heise lagaikhe.
Yesus wasuogeluk wene oba fesukwa wene
(Mat. 26:57-68; Luk. 12:54-56; Yoh. 18:13-14,19-24)
53At Yesus ebe fakfesukwasik he, ap Allah eisewerek mene inoe kain oba waluk lagaukwa. Andoma it ap Allah eisewerek mene inogogwi kaindek inebe mondogat inom, inaluendek omanogo inom, Allah ane lisu palek eisewerek mene omanogo inom, andogotukwa. 54Yesus a'nogo waluk lagu kwelek, at Petrus a'nogo hobuk inombo'ne igam-hegam laga lagaikhesik, ap Allah eisewerek mene inoe kain a'nogo awililu agoromi Allah awi wurik kagalek welagaikharek mene were'ma inoba kwisikhesik he, inom endu nonggale'ma hurek logolik sogoi sakhikhi lagaukwa. 55It a'nogo sogoi sakhugu kwelek he, it ap Allah eisewerek mene inogogwi kaindek omanogo inom, wene Allah ane faget ero pilingitarek mene inebe mondogat inom, inom logolik, wene Yesus oba fesukwasik wasuogeluk he, mel isukwa: ”Afuni at weak hilingitunem ineilenggen haga mene uagen heraginabini o,” iluk isukwama heraginafukwa meneat he, lek agaikhe. 56Lek agaikhemo re, it ekhe inebe hokhorogo nenat he, mel isukwa: ”Weak yi'nogo hilingitunem nineilenggen hogo,” iluk wene ineranhogo wene isukwa meneat he, inane misigat higithogo isukwa lek.
57A'nogo isukwama, hobuk it ap ekhe inebe miren hakhogo menlagaukwasik he, ineranenat mel yagaisasukwa: 58”At yi nen he, Allah awi afuni inenggi nen wutukwa mene yi, an nen meisalogo lakfagain o. Meisalogo lakfembik obali'mo re, afuni inenggi nen wusugun lek. We, hunogoat mene nenggi pireba wuti logombik, ekheba, arat wurep kobokhogo wusigin o, iluk nineilhanem ugunem ninesanggo holhugu o,” iluk isukwa meneat he, 59inane andi misigat higithogo igi'legat. 60A'nogo isukwama nen he, it ap Allah eisewerek mene inoe kain a'nogo menlagaikhesik, tulem inanggele'ma kwisikhesik he, Yesus mel yagatikhe: ”Yesus! It ap yoma wene yagaheri'lagwi yoma, haren wene onggo ekhe yagaisagain lega? Onggo yagaisamo re,” iluk yagatikhe meneat he, 61ane igi'legat kamo isikhe. Kamo isikhemo hobuk it ap Allah eisewerek mene inoe kain a'nogo nen he, wene ekhe mel yagatikhe: ”Allah fogerati lago mene nen amlogo Kristus lakfei wesigin isukwa a'nogo ebe re, harara?” iluk heinok wokhasikheat. 62Heinok a'nogo wokhasikhemo, at Yesus nen he, mel yagatikhe ”Andi, an nebe yi aro. An abat ta'lasi wagagi a'nogo, at Allah omame hokho yi mene ti mene hilingisigin enek a'nogo era'lu enggi ebekwe kainat logombik he, pogoroba andoma nen ohena anggele'ma pi wagunem hineilenggen neogoin o” iluk yagatikhe.
63A'nogo yagatikhemo, it ap Allah eisewerek mene inoe kain a'nogo onggwarek asu endakwe laberek mene libilogo lakfisasikhesik he, mel yagaisasikhe: ”Afuni nen at weak hilingitunem ineilenggen haga mene wene senggerogo uageluk nenahalok yerinarek logogun? 64Allah endawimo serametfikhesik enu weagetfugunem arat hinesanggo holhep andi, hinendawimo nen ninggi'nogo anggikhi lagep,” iluk yagaisasikhemo, it omanogo mondogaren he, ”Wene oba fembik ebe mondok wasuogo!” iluk yagatukwa. 65A'nogo yagatukwasik he, it ap omanogo ekhe nen wesi suphogo Yesus oba fesukwasik he, inenggi nen eilenggen salfuluk, yei inenggi tap wati logolik he, ”Sa nen hoate nogo. Yaganisan ta,” iluk yagati lagaukwama, it ap kaindek omanogo inagoromi Allah awi wuri'mo kagalek welagaikharek mene nen ebe fakfesukwasik yei inenggi nen tamuk-tamakhogo watukwaat.
Petrus nen, ”Yesus nonggot,” iluk labelhikhe wene
(Mat. 26:69-75; Luk. 22:56-62; Yoh. 18:15-18,25-27)
66A'nogo hilingitu kwelek he, at Petrus olilu honggole'ma were'ma, ap Allah eisewerek mene inoe kain a'nogo amingmingengge helenggerek mene ekhe wagaikhe. 67Wagaikhesik, Petrus a'nogo endumo sogoi sakhugunem yethasikhesik, eilenggen oba lulu wagaikhesik he, mel yagatikhe: ”Hat ogo re, Yesus aiba Nasaret mene a'nogo hinom nikhi lagep mene anggigi,” iluk yagatikhe. 68Yagatikhemo, aren he, mel yagatikhe: ”An nonggoro. Hat egen andi futfigi lego,” iluk labelhikhe. Labelhikhesik he, kwe hokho ambe pale'ma wulifarek oba wulibi wagaikhesik werek kwelek he, sue ayam ane isikhe. 69A'nogo ane isikhemo, at Petrus kwe ambe pale'ma aremnogoat were'ma, at helenggerek a'nogo eilenggen hobuk hasikheat. Hasikhesik, mel yagaisasikhe: ”At yi it inom nikharek mene aro,” iluk, it afuni andoma welagaukwa mene omanogo yagaisasikhe. 70A'nogo yagaisasikhemo re, aren hobuk labelhikheat. Labelhikhesik endebat ekhe were'ma nen it afuni andoma welagaukwa mene omanogo nen he, mel yagatukwa: ”Hat hebe o Galilea mene heogo yi re, hebe eberogoat it mene aro,” iluk yagatukwama, 71aren he: ”Hiren ap abok ikhi lagep andi, ebe an nonggoro. Neisena Allah oak! Neranen igi halok, aren noasuago,” iluk labelhikhe. 72Hombuk palhu kwelek aremnogoat, sue ayam a'nogo ane hobuk isikhe. Ane hobuk ugunem he, at Petrus nen he: ”Eige. At Yesus nen an yaganeti logolik: Sue ayam ane attak imbik he, hobuk igi'lek werek kwelek, haren he: Yesus nonggoro, iluk henggi henagan oba labeligin o, iluk yaganete a'nogo, arat labelhi yi higi,” iluk endawimo ebetikhesik he, endawi fit-fit le agaikhe.
Currently Selected:
:
Highlight
Share
Copy
Want to have your highlights saved across all your devices? Sign up or sign in