MARKUS 16
16
Yesus ebe eluk agaikhe wene
(Mat. 28:1-8; Luk. 24:1-12; Yoh. 20:1-10)
1A'nogo hasukwasik, inenggi sabit oba Allah faget weat welagaukwasigen he, it he Maria aiba Magdalena mene a'nogo inom, he Maria Yakobus agaisa a'nogo inom, he Salome inom, amusu amben fano mene Yesus warek oba yuguli louwogeluk onggo pali lagaukwa. 2Onggo palogo fesukwasik he, nogo iluk ohealekwe hari Minggu ba ohealek hup siakhogo mo henegeisogo lagai wagu kwelek, oumo a'nogo wagaukwa. 3-4Waga logolik, ”Warek helep hokho mene to'morogo faga a'nogo, sa nen limbilogo kwe hu'nisagain he,” iluk it-it ilik wagaukwa. A'nogo ilik inot somarek waga lagaukwasigen, ineilenggen liakhasukwa re, helep a'nogo limbilogo lakfesukwama kwe hurik were'ma hasukwa. 5Hasukwasik, horokhogo wagaukwasik inebe kwisukwa re, ap alage mene ekhe asu kut uan mene laberogo inenggi ebekwe higit hurek were'ma ineilenggen hasukwasik he, ina'manggen lagaikhe. 6Ina'manggen lagaikhemo, at ap alage mene a'nogo nen he, mel yagaisasikhe: ”Hina'manggen lagubo. Yesus aiba o Nasaret mene eba menfagasik wata a'nogo herarik wagep mene re, ebe yoma lek. Allah nen eluget fikhemo werego. Warek fagaba a'nogo obuluk enek yi hineilenggen kwelakhani o. 7Kwelakhambik he, hiren at agoromi ane wanhi lagaikha mene Petrus lak omanogo yagaisa lano o. Attak Yesus nen he: An o Galilea lambik hinelokhoma logogin o, iluk yagahisasikhe hagat lambik logogin a'naga o. Hit lambik it inoba yagaisa lano o,” iluk yagaisasikhe. 8A'nogo yagaisasikhemo inobakhe palagaikhesik he, inoak lei'leik heise wulifukwasik inailo nen wene afuni ekhe yagaisigi'lek pikhit lagaukwa.
WENE ATTAGAREN WUREP KOFOKHOGO OBA LISU PALOGO FESUKWA WENE
Yesus nen, ”Attak he Maria aiba Magdalena mene nen eilenggen neoag,” iluk elokhoma menlagaikhe wene
(Mat. 28:9-10; Yoh. 20:11-18)
9[At Yesus ebe hari Minggu ba menlagaikhe andi sambul ohealek hup siakhogo re, menlagaikhesik, at he Maria aiba o Magdalena mene munggwarengge inobabut weak mene inebe 7 nen endawimo kwisukwasik were'ma fageat henegeisogo wulakfisasikhe mene a'nogo nen tak, ”Attak eilenggen neoagen,” iluk elokhoma menlagaikhe. 10Elokhoma menlagaikhemo eilenggen hasikhesik he, yonggo it afuni at Yesus inom welagaukwa mene fong wati logolik le agunem inoba lagaikhe. 11Lagaikhesik he, mel yagaisasikhe: ”At Yesus he, eluk agasik werego. Ebe arat neilenggen higi,” iluk yagaisasikhemo, inesanggo holhukwa meneat he, eberogoat iluk anggasukwa lek.
Yesus nen he, ”It ap agoromi inebe pire mene ineilenggen neoageluk,” inelokhoma menlagaikhe wene
(Luk. 24:13-35)
12A'nogo anggasukwasik werek kwelek, hobuk he, ap inebe pire mene ekhe o sili endepma wesuogeluk wagunem, at Yesus ebe hunogoat hilinglagaikhesik he, An nebe ineilenggen neoak, iluk inombo'ne wagaikhe. 13Inombo'ne wagaikhemo re, ineilenggen hasukwasik inambotkwe inagaila'lak fena omanogo yagaisa lagaukwa meneat he, it inendawimo nen eberogoat iluk anggasukwa legat.
Yesus nen, ”Nebe nagoromi ineilenggen neoak,” iluk inoba kwisikhesik inelokhoma menlagaikhe wene
(Mat. 28:16-20; Luk. 24:36-49; Yoh. 20:19-23; Kis. 1:6-8)
14A'nogo hilingirik waga lagaikhesik, ebe hobuk he, irat Yesus agoromi inebe 11 nen omanogo hurek sumburu ninggi logolik were'ma, ”Ineilenggen neoak,” iluk inoba kwisikhesik inelokhoma menlagaikhesik mel yagaisasikhe: ”Hit yoma hinendawimo nen he, eberogoat iluk anggigi'lek hinendawimo pugat yoma ri! Allah nen an nebe arat nelugetnafemo were'ma, it ekhe nen ineilenggen neagasik yagahisa wagaikha meneat he, hinendawimo nen eberogoat iluk anggigi'legat welagep yoma ri!” iluk wenagisasikhe. 15A'nogo wenagisasikhesik, wene ekhe mel yagaisasikhe: ”Hit he, afuni inunggul enu lombok o yi awi ti awi a'lima mondogat wene fano wene yi yagaisilik laga logoino o. 16Yagaisilik lagunem he, it afuni ekhe nen wene andi eberogoat iluk anggogoin mene ima pelaginabugun mene halok, Allah nen telinabigin meneat he, it ekhe wene andi eberogoat iluk wanugun lek mene halok, Allah nen wene inoba fembik weagerinabigin o. 17It afuni ekhe nen wene andi eberogoat iluk anggoageluk, it wene eberogoat iluk wanugun mene nen he, yi'nogo hilingiti logogun. Munggwarengge obabut weak mene it ekhe inendawimo kuluk were'ma an nenu hombuk palogo henegeisogo wulakfisigik, inane it ekhe inane inonggot mene elalinat igik, ikhi logogun. 18A'nogo ikhi logolik, kisu afuni inoaterek mene inenggimo wanhik, it inebe wa'lasuageluk afuni wa'lagaikharek mene iwak elema kwelagaisogo wogisugunem ninggik, ugun meneat he, andi nen weagerinafi logogin lego. Nen, afuni ekhe ou wanhunem, iren inenggi fagisamo, se aga logogun aro,” iluk yagaisasikhe.
Allah nen Yesus pogoroba waluk lagasikhe wene
(Luk. 24:50-53; Kis. 1:9-11)
19Wene a'nogo arat yagaisasikhemo re, at Allah nen Yesus ebe pogoroba waluk lagasikhe. A'nogo waluk lagasikhemo era'lu enggi ebekwe hutfesikhemo kainat welagarek. 20A'nogo waluk lagasikhemo re, at Yesus agoromi omanogo o yi awi ti awi mondogat wene yagaisilik lagaukwa. Wene yagaisilik lagunem he, afuni nen he, ”It wene yaganisilik wagaikha andi eberogoat,” iluk futfouwageluk, ninoe Enupogot inom hundik logolik iren elalin mene hilingiti logouwageluk Aren wene andi omamet fesikhe.]
Currently Selected:
MARKUS 16: inohap
Highlight
Share
Copy
Want to have your highlights saved across all your devices? Sign up or sign in
