Yohanes 4
4
Yefun Yesus ki suk su nggon Samaria dik yo
1Ye Farisi jam do, yé mwa ma mo Yefun Yesus wa Yefun Yesus ras án mo syur subere án tepsu Yefun bi pakon. Ye Farisi jam do yé mwa ma mo Yefun Yesus wai kadit Yohanes. (2Yefun Yesus dakai yo ras nje mo syur nde, wo An bi pakon anato ras nje sor re.). 3Yefun Yesus jam ye Farisi bi sukdu subot suk gato An ben ne sa, An mu kadit bur Yudea, An satu mu mo bur Galilea. 4An satu mu mo Galilea saresa, Yefun Yesus muket os gato wai ket bur Samaria. 5Sane mo Samaria ne, Yefun Yesus mu kom mo kota dik yo gato gum do Sikhar, karowa bur det gato kam nyim tuya Yakub syo nai an bi gan Yusuf. 6Mo pe ne Yakub bi syurwak mó. Yefun Yesus kaim rere, we An muket os syu teker ma kom mone. Sane An kem ga mo syurwak de. Tomgane, kam yó miten. 7-8An bi pakon mu mo kota wa so sugit re.
Orete nggon Samaria dik yo ma wa en syur. Nggon ne ma kom mo syurwak sa, Yefun Yesus ki nai mom do, ”Nan syo syur wa Ji da et.”
9Nggon ne ki nai Yefun Yesus do, ”Ben sa u anato Nan ye Yahudi ndek syur kadit ji, ye Samaria ré ne?” (Nggon ne ki sane, we sugane ye Yahudi bariwa karowa ye Samaria.)
10Yefun Yesus ki do, ”Nan jam suk gato Yefun Allah fro wa syo nai nan ete nan jam Ji gato ndek syur mo nan ne yo, bere nan waii ndekwa Ji syo syur gato ós nan kem ndo nai nan da, ete bere Ji syo syur ne nai nan da re.”
11Nggon ne ki nai An do, ”Yenggras, Nan bi sukbo wa Nan en syur su yo mo nde. Syurwak ré kru teker. Nan nai syur gato ós ji kem ndo ne kadit u ne? 12Men bi amui Yakub anato rom syurwak ré. An syo nai men. An dakai nai syur more wa an da. An bi pa ne sino nai syur kadit syurwak ré wa án si án bi suksi da. Nan nut do, Nan gum kok sye wai kadit Yakub bado?”
13Yefun Yesus ki do, ”Ye gato da syur ré, bere an sosa o re. 14Wo ye gato da syur gato Ji syo ne yo, an yo sosa o nde to kapyo mato kapyo. Syur gato Ji syo nai an ne tepsu syur gro mo an mit. Syur gro ne syé ete ben an kem ndo, an kem ndo to kapyo mato kapyo.”
15Nggon ne ki do, ”Yenggras, Nan syo syur ne wa ji da et, subere ji yo sosa o nde, subere ji yo mitwa ji satu ma wa en syur more o nde.”
16Yefun Yesus ki nai nggon ne do, ”Sane nan mu, nan kendo nan bi ya, ete nan si ma.”
17Nggon ne ki do, ”Ji bi ya mo nde.”
Yefun Yesus ki do, ”Suk gato nan ki ne sangge. 18Wo nan kra yetu ge mek it, ete su ré ye gato nan si kem ne, yo tepsu nan bi ya nde. Sukdu gato nan ki ne sangge, nan bi ya mo nde.”
19Nggon ne ki do, ”Su ré ji jam Nan it. Nan yenabi, Nan anato Yepasye gato ki Yefun bi suktaru nai men. 20Ji bi amui, ye Samaria, án sum wa án som Yefun Allah mo banbo ré. Sarewo nin ye Yahudi ki do, men sum wa men som Yefun Allah mo pe dik sor, mo kota Yerusalem.”
21Yefun Yesus ki nai mom do, ”Nggongras, nan jammo suk gato Ji ki ré et. Kapyo tak bere yé yo som Ji bi Ai Yefun Allah mo banbo ré o nde. Sane dom, bere ye yo som An mo Yerusalem o nde. 22Nin ye Samaria som suk gato nin jam nde, wo men ye Yahudi som Yefun Allah gato men jam re, we men ye Yahudi anato yewis gato jam ete kibot os gato Yefun Allah fro wa yetu subere yetu kem gesyos. 23Bere kapyo tak o nde, wo su re it, men som Yefun Allah sisu men mit dik si men onyar dik sor. Pe gato men som Yefun mone Yefun yo nutbot nde, wo An mit iwa men yé gato som An. Yefun Allah Gen ben men nggiwa som An sisu men mit dik si men onyar dik sor re. 24Yefun Allah kaim tepsu yetu kaim mo nde, wo Yefun Allah ne Gen sor ete mó. Sane Yefun mitwa men sum wa men som An mo pe dik nde, wo An iwa ye som An sisu an mit dik si an onyar dik sor.”
25Nggon ne ki nai Yefun Yesus do, ”Ji jam do, Yekwesu gato Yefun Allah syogat ma mo bur ré wa nai men yetu kadit sukye ete jowa men, bere An (gato gum do Kristus) ma. An ma yo, bere An ki rer nai men jam subot suk mwa ne sino.”
26Yefun Yesus ki do, ”Ji gato ki suk su nan, Ji anato Kristus gane it.”
27Sugane Yefun Yesus bi pakon ne satu ma. Pakon ne me Yefun Yesus ki suk su nggon ne sa, pakon yeket mone. Sarewo án yo ndo mo nggon ne do, ”Nan mitmo suma ne?” nde. Án yo ndo mo Yefun Yesus do, ”Nan ki suk su nggon ré wa suma ne?” dom nde.
28Sane nggon ne grem mom bi sukbo gato mom en syur su ne kwop, ete mom satu mu mo kota. Mom mu kom mo kota sa, mom ki nai nje mone do, 29”Nin ma me Ye gare et. Nin ma me Ye gato kibot suk mwa ne sino gato ji ben ré et. An anato Kristus bado?” 30Sane yé mo kota ne, án mu me Yefun Yesus.
31Yé mwa gato ma ne yo kom nde tó, Yefun Yesus bi pakon wergat Yefun Yesus do, ”Yeguru nan git sugit wokgan mó et.”
32Sarewo Yefun Yesus ki nai pakon ne do, ”Ji git sugit deyo gato nin jam nde re.”
33Sane An bi pakon ndo mo yu do, ”Ye deyo gwat sugit syo nai An git bado?”
34Yefun Yesus ki do, ”Suk gato tepsu sugit wa Ji anato Ji ben suk tepsu Yefun Allah mit. Ji ben An bi suk-i gato An syogat Ji ma mo bur ré wa ben ne sor kom mo pe gato or mó anato tepsu sugit wa Ji git re. 35Nin ki do, ’Aina at o, ete men bi sukjan kri wa men nai.’ Sarewo Ji ki sare do, nin brek, nin sokme nggwe tak deyo-deyo. Sukjan ne kri it. 36Ye gato nai sukjan kri ne ku suk mone tepsu án bi kamba it. Ye ne nai sukjan gato kri ne, tepsu an ós nje kem ndo to kapyo mato kapyo. Sane ye gato nai sukjan kri si ye gato jan sukjan ne sino mit iwa re. 37Sane sukdu gato yé ki ré, sangge, sare do, ’Yetu ge dik yo jan sukjan, yetu ge dik yo o nai sukjan gato kri.’ 38Ji syogat nin mu nai sukjan gato nin yo jan nde. Ye yi anato jan sukjan ne, ete nin anato nai an bi sukjan gato kri ne.”
39Sane ye Samaria mwa, gato kem mo kota ne, án nai sukjimnut dik do, án onyar kem mo Yefun Yesus mo sukdu gato nggon ne ki sare do, ”Ye gane kibot suk mwa ne sino gato ji ben ne re.” 40Sane ye Samaria ne ma kom mo Yefun Yesus sa, án ndek gat Yefun Yesus subere Yefun si án kem sino mone. Sane Yefun Yesus kem mone kom mo kam we rek.
41Orete ye Samaria mwa wai o nai sukjimnut dik do, án onyar kem mo Yefun Yesus, we án dakai jam sukdu gato Yefun Yesus ki ne. 42Ye Samaria ne ki nai nggon ne do, ”Su ré men onyar kem mo Yefun Yesus mo nan bi sukdu-i sor nde, wo men onyar kem mo An, we men dakai jam An ki An bi sukdu-i re. Men jam do, An anato Ye gato ma wa An nai men yetu sino mo bur ré wé kadit sukye, subere men kem ndo to kapyo mato kapyo.”
Yefun Yesus ben yesu bi pa ge dik yo ge
43Yefun Yesus kem mo kota Sikhar kom mo kam we rek, orete Yefun Yesus mu kadit kota ne, An mu mo bur Galilea. 44Yefun Yesus dakai ki do, ”Yenabi gato ki Yefun Allah bi suktaru satu mu mo an dakai bi nat-i yo, bere yé mone bariwa jammo an re.” 45Sarewo Yefun Yesus mu kom mo Galilea sa, ye Galilea kak yé mit wa An ma, we su gabere Kam Sye Waiket mo Yerusalem, ye Galilea ne simo kam sye mone, ete me suk mwa gato Yefun Yesus ben mone.
46Orete Yefun Yesus satu mu mo kota Kana mo bur Galilea ne o. Tomga nyim An frus syur tepsu nau anggur rom mone. Yefun Yesus kom mone sa, An ku yesu ge dik yo gato ben suk wa yeraja. Yesu ne bi gan i. Yesu bi gan ne kem mo kota Kapernaum. 47Sane yesu ne jam do Yefun Yesus ma kom mo Galilea kadit Yudea sa, an mu ku Yefun Yesus. An ndek mo Yefun Yesus do, Yefun mu mo Kapernaum wa ben an bi gan gato i ne ge. An bi gan ne karowa kwop rok. 48Yefun Yesus ki nai yesu gato ben suk wa yeraja si nje mone do, ”Nin gare yo me suk gato kadum Yefun Allah bi suktinggi bor su nin gro nde yo, bere nin yo onyar kem mo Ji mo nde.”
49Yesu gato bi gan i ne ki do, ”Yenggras, Nan ma kekro, ondeyo ji bi pa bere kwop re.”
50Yefun Yesus ki nai yesu ne do, ”Nan mu sor, nan bi pa ge re.”
Yesu ne onyar kem mo sukdu gato Yefun Yesus ki nai an, ete an mu re. 51An mu kom mo os mit saresa, an bi pakwerut ma ku an ete ki do, ”Yenggras nan bi pa yebris mbau, an ge re!”
52Yesu ne ndo mo an bi pakwerut do, ”Kam sa u anato ji bi gan ge kadit pa bi suki ne?” Pakwerut ne ki do, ”Kamekre, kam ti ri sa, pa jam nde re, an kaim yo kam o nde.” 53Sane pa bi ai ne napakom suk gato Yefun Yesus ki do, ”Nan bi pa ge re,” sugane kam ti ri. Sane an si an bi rus nai sukjimnut dik do, án sino onyar kem mo Yefun Yesus kadit kam ne it.
54Yefun Yesus ma kadit bur Yudea ma kom mo Galilea sa, An ben suk gato ben yé yeket wam kedowe it anane.
Currently Selected:
Yohanes 4: KGR
Highlight
Share
Copy
Want to have your highlights saved across all your devices? Sign up or sign in
@LAI 2004, 2014
