Pewaliana 13
13
Hi Abara hante hi Lot mokaꞌa
1Katoꞌo molaimo hi Abara ka woiꞌ Masiri, pe woiꞌ Negeꞌ hante hantambina hei lekiꞌna lumana, hei hi Lot woꞌo moꞌawa-awa hante io. 2Hi Abara toaꞌ tosugiꞌ, woriꞌ pinatuwuꞌ rewuane, doiꞌ peraꞌ hante bulawana. 3Io matengkaꞌ ka peꞌoꞌohaꞌa pe peꞌoꞌohaꞌa to ntaniꞌna, ka woiꞌ Negeꞌ wute dodungku i Beteli, i konopotiꞌiana bambaruꞌna hampiha i lumbuna Beteli hante Ai, 4pe koꞌuwaꞌana potutua popenomba to nowali uluꞌna, itoꞌomola hi Abara mowowoi konaꞌna Pueꞌ Ala. 5Hi Lot woꞌo uwaꞌ gimbane hei gapiꞌna hante bambaruꞌna. Io metuntu moꞌawa hi Abara. 6Angkana woiꞌ peꞌohaꞌa tiꞌo hawaꞌi maganaꞌ ropeꞌohaꞌi moꞌawa-awa, alaꞌ woriꞌi lumare, horiana hawaꞌhi hohumbo meꞌohaꞌ moꞌawa-awa. 7Iomo horiana poko moheꞌero topolambaꞌne hi Abara hante topolambaꞌne hi Lot. I tempo tiꞌo toKanaꞌa hante toParisi mampeꞌohaꞌihi woiꞌ tiꞌo. 8Katoꞌo notiꞌi hi Abara pe hi Lot, “Inioꞌna intu mewali poheꞌeroanta, ba topolambaꞌku hante topolambaꞌmu, alaꞌ ingkiꞌ hieꞌe topohalaliki. 9Hareꞌi woꞌo korobalu woiꞌ hieꞌe? Moromiꞌ ane mokaꞌaki. Ane pe koiriko, aku pe koanaꞌa, ane ingko pe koana, aku pe koiriꞌa.” 10Katoꞌo hi Lot meꞌoꞌele hei noꞌekiꞌ, i humalekiꞌna ngamba Yarade woriꞌ uwaine, hibali kineteꞌna Pueꞌ Ala, hibali woiꞌ i Masiri, wute i Soara. Tiꞌo mewali ikohandoaꞌana Pueꞌ Ala molobuꞌi Sodomo hante Gomora. 11Katoꞌo hi Lot moꞌuwiꞌ lekiꞌna ngamba Yarade tiꞌo, katoꞌo molaimo io pe tinaꞌ motoꞌando hei mokaꞌamohi. 12Hi Abara lebaꞌ i woiꞌ Kanaꞌa, angkana hi Lot lebaꞌmo i bolaꞌ-bolaꞌ ngkodeꞌ i ngamba Yarade hei mobambaruꞌ dodungku Sodomo. 13Ikoꞌuwaꞌra toaꞌ to Sodomohi hingkaꞌ madosahi hei kodake pe Pueꞌ Ala. 14Kopokaꞌanalu hi Lot ka hi Abara, notiꞌi Pueꞌ Ala pe hi Abara, “Elemoꞌi mantuleliꞌmu, 15Alaꞌ lekiꞌna woiꞌ to iꞌokiꞌ tiꞌo hingkiꞌ Kupaꞌanikiko hante pe pemuleꞌamu wute nantolou-louna ipeꞌohaꞌi. 16Alaꞌ Aku, muleꞌmu hingkiꞌ woriꞌ hibali awuna woiꞌ, ane uwaꞌi toaꞌ to pobiaꞌ moꞌihaꞌ awuna woiꞌ, pemuleꞌamu woꞌo hingkiꞌ nobiaꞌ noꞌihaꞌ. 17Matimomoko, itengkaꞌimo woiꞌ peꞌohaꞌa hieꞌe motuntuni kokurauꞌna hei kokorobana, alaꞌ pe ingkomola hingkiꞌ Kupepaꞌaniki woiꞌ peꞌohaꞌa hieꞌe.” 18Uko tiꞌo hi Abara moboliꞌmo bambaruꞌna hei lebaꞌ dodungku nunuꞌ-nunuꞌ i Mamre, dodungku Hebron, katoꞌo nopopetotiꞌimo peꞌohaꞌa menomba pe Pueꞌ Ala itoꞌo
Currently Selected:
Pewaliana 13: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
