Pewaliana 3
3
Manusiaꞌ monawuꞌ pe lali dosa
1Ule iomo to mapande moꞌakala ka hinangkana pinatuwuꞌ i lerina to nowali Pueꞌ Ala. Ule tiꞌo mantiꞌi pe towoweꞌe tiꞌo, “Monontomo Pueꞌ Ala mohawaꞌ, lekiꞌna loti to i kineteꞌ hieꞌe hawaꞌi wadi iꞌokakei wuaꞌne, hinape?”
2Katoꞌo mehoniꞌ towoweꞌe tiꞌo pe ule, “Wuaꞌ-wuaꞌ loti to uwaꞌ i lali kineteꞌ hieꞌe wadilu kiꞌoka, 3angkana noniuꞌ wuaꞌ loti to uwaꞌ i lumbu-lumbuna kineteꞌ, Pueꞌ Ala mohawaꞌ, inioꞌkei iꞌoka ba iramakei wuaꞌ tiꞌo, mahikei intu.”
4Angkana ule tiꞌo mantiꞌi pe towoweꞌe tiꞌo, “Hawaꞌiwae watoꞌo, hawaꞌkeiwae hingkiꞌ mahi. 5Kotuꞌuana nobahaꞌlu Pueꞌ Ala, ane iꞌokakei hingkiꞌ tebungkahi pekirimi, hei hingkiꞌ mewalikei hibali Pueꞌ Ala, pobahaꞌ noniuꞌ to moromiꞌ hei to kodake.”
6Towoweꞌe tiꞌo mampeꞌele wuaꞌ loti tiꞌo marasa eleane niꞌoka, hapo lekemo loti tiꞌo mekohohokai alaꞌ mepaꞌani pebahaꞌ. Katoꞌo noroa wuaꞌne hei noꞌoka hante nopepaꞌaniki pe maꞌanina to moꞌawa-awa hante io, hei noꞌokamo mpuꞌu maꞌanina. 7Katoꞌo tebungkahimo pekirire meroduora hei robahaꞌ kopewula mpahira, katoꞌo iohi mampohiroa-hiroa taweꞌ loti ara hei rowali piwi.
8Ikorohorinalu popaserene Pueꞌ Ala matengkaꞌ-tengkaꞌ i lali kineteꞌ tiꞌo i tempona mototaheꞌ, mewunimo manusiaꞌ hante hantambina tiꞌo ka hinarona Pueꞌ Ala i kohelaꞌna loti-loti i lali kineteꞌ. 9Angkana Pueꞌ Ala mododoeꞌ manusiaꞌ tiꞌo hei mantiꞌi, “I imboko?”
10Io mehoniꞌ, “Ikokubahaꞌnamo koꞌuwaꞌMa i kineteꞌ hieꞌe, aku mewaliꞌa motehuꞌ, alaꞌ mewula mpahiꞌa, iomo horiana mewuniꞌa.”
11 Pueꞌ Ala meꞌitano, “Hihimoreꞌi to mampatiꞌikiko, kopewula mpahimu? Ba iꞌokamoreꞌi wuaꞌ loti to Kupeꞌopiki inioꞌ iꞌokaꞌi?”
12Manusiaꞌ tiꞌo mehoniꞌ, “Towoweꞌe to Ipaꞌanikiꞌa mewali awangku, iomola to mampaꞌaniꞌa wuaꞌ loti tiꞌo pe aku, horiana kuꞌoka.”
13Uko tiꞌo notiꞌi Pueꞌ Ala pe towoweꞌe tiꞌo, “Haporeꞌi to iwalio hieꞌe?”
Mehoniꞌ towoweꞌe tiꞌo, “Ule tiꞌo to moꞌakalaiꞌa, io hinaꞌ kuꞌoka.”
14Katoꞌo notiꞌi Pueꞌ Ala pe ule tiꞌo,
“Alaꞌ mowaliako watoꞌo, buntoꞌko ka hinangkana pinatuwuꞌ to manondoꞌ hei ka hinangkana pinatuwuꞌ to i lopoꞌ. Ingko hingkiꞌ mendaeko hante hinaꞌimu hei awuna woiꞌ to mewali pangkamu i tempomu tuwuꞌ. 15Ingko hante towoweꞌe hieꞌe hingkiꞌ momekabiriꞌ; muleꞌmu hante muleꞌna hingkiꞌ momeponiꞌhi. Ingko hingkiꞌ mobingku pakoꞌra angkana Haduo muleꞌna hingkiꞌ mopakoꞌ tutuꞌmu.”
16 Pueꞌ Ala mohawaꞌ pe towoweꞌe tiꞌo,
“I tempomu mehinonaꞌi hingkiꞌ pedeꞌ maporiꞌ ihori, hei i tempomu moꞌanaꞌ hingkiꞌ pedeꞌ molalo ihori, angkana ingko tontomu mangkodokoꞌi maꞌanimu hei io hingkiꞌ makuasaꞌ pe ingko.”
17Katoꞌo Notiꞌi womo pe manusiaꞌ tiꞌo,
“Alaꞌ ituntuniꞌi to notiꞌi hantambimu, hei mangkako wuaꞌ loti to Kupetiꞌiki pe ingko inioꞌ iꞌokaꞌi, iomo hinaꞌ buntoꞌmo woiꞌ alaꞌ ingko, mepongka ka hinewowoꞌena hingkiꞌ maporiꞌ ihori majama mampaliꞌ pangkamu i tempomu tuwuꞌ. 18Woiꞌ to i intuꞌ hingkiꞌ mampotuwuꞌ kora to metotaiꞌ hei kora to morui, hante huꞌa-huꞌa to tuwuꞌ i popada hingkiꞌ mewali kopongkonamu. 19Hante moholemuꞌko hingkiꞌ mampaliꞌ kopongkonamu, wuteko mahuliꞌ mewali woiꞌ, alaꞌ katoꞌo niroako, alaꞌ ingko awu hei ingko hingkiꞌ mahuliꞌko mewali awu.”
20Katoꞌo manusiaꞌ tiꞌo mangkokeneꞌi hi Hewa pe hantambina, alaꞌ io to mewali inoꞌ lekiꞌna to tuwuꞌ. 21Hei Pueꞌ Ala mowali parewa ka koliꞌ pinatuwuꞌ to Nopaꞌanikiꞌi pe manusiaꞌ hei hantambina tiꞌo, katoꞌo Noponopakeꞌikihi.
22Mohawaꞌmo Pueꞌ Ala, “Kotuꞌuana manusiaꞌ tiꞌo mewalimo hibali Ingkiꞌ, pobahaꞌ noniuꞌ to moromiꞌ hei to kodake, horiana hinewowoꞌena inioꞌna intu io morupuꞌ womo wuaꞌ loti to hangkaruna iomo loti to mepaꞌani kotuwuꞌ hei noꞌoka, horiana io tuwuꞌ wute nantolou-louna.” 23Katoꞌo nobuehi Pueꞌ Ala ka kineteꞌ Paradesi hingkeꞌna io maꞌintuꞌ woiꞌ koniroahana. 24Io mobue manusiaꞌ tiꞌo pe tinaꞌ moto andona kineteꞌ Paradesi. Nopopeꞌohaꞌhi itoꞌo hei haꞌumbo malaꞌeka kerubi hante piho to makiꞌ-makiꞌ hei mewembo-wembo to nipopampodaꞌ lala pe loti to mepaꞌani kotuwuꞌ.
Currently Selected:
Pewaliana 3: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
Pewaliana 3
3
Manusiaꞌ monawuꞌ pe lali dosa
1Ule iomo to mapande moꞌakala ka hinangkana pinatuwuꞌ i lerina to nowali Pueꞌ Ala. Ule tiꞌo mantiꞌi pe towoweꞌe tiꞌo, “Monontomo Pueꞌ Ala mohawaꞌ, lekiꞌna loti to i kineteꞌ hieꞌe hawaꞌi wadi iꞌokakei wuaꞌne, hinape?”
2Katoꞌo mehoniꞌ towoweꞌe tiꞌo pe ule, “Wuaꞌ-wuaꞌ loti to uwaꞌ i lali kineteꞌ hieꞌe wadilu kiꞌoka, 3angkana noniuꞌ wuaꞌ loti to uwaꞌ i lumbu-lumbuna kineteꞌ, Pueꞌ Ala mohawaꞌ, inioꞌkei iꞌoka ba iramakei wuaꞌ tiꞌo, mahikei intu.”
4Angkana ule tiꞌo mantiꞌi pe towoweꞌe tiꞌo, “Hawaꞌiwae watoꞌo, hawaꞌkeiwae hingkiꞌ mahi. 5Kotuꞌuana nobahaꞌlu Pueꞌ Ala, ane iꞌokakei hingkiꞌ tebungkahi pekirimi, hei hingkiꞌ mewalikei hibali Pueꞌ Ala, pobahaꞌ noniuꞌ to moromiꞌ hei to kodake.”
6Towoweꞌe tiꞌo mampeꞌele wuaꞌ loti tiꞌo marasa eleane niꞌoka, hapo lekemo loti tiꞌo mekohohokai alaꞌ mepaꞌani pebahaꞌ. Katoꞌo noroa wuaꞌne hei noꞌoka hante nopepaꞌaniki pe maꞌanina to moꞌawa-awa hante io, hei noꞌokamo mpuꞌu maꞌanina. 7Katoꞌo tebungkahimo pekirire meroduora hei robahaꞌ kopewula mpahira, katoꞌo iohi mampohiroa-hiroa taweꞌ loti ara hei rowali piwi.
8Ikorohorinalu popaserene Pueꞌ Ala matengkaꞌ-tengkaꞌ i lali kineteꞌ tiꞌo i tempona mototaheꞌ, mewunimo manusiaꞌ hante hantambina tiꞌo ka hinarona Pueꞌ Ala i kohelaꞌna loti-loti i lali kineteꞌ. 9Angkana Pueꞌ Ala mododoeꞌ manusiaꞌ tiꞌo hei mantiꞌi, “I imboko?”
10Io mehoniꞌ, “Ikokubahaꞌnamo koꞌuwaꞌMa i kineteꞌ hieꞌe, aku mewaliꞌa motehuꞌ, alaꞌ mewula mpahiꞌa, iomo horiana mewuniꞌa.”
11 Pueꞌ Ala meꞌitano, “Hihimoreꞌi to mampatiꞌikiko, kopewula mpahimu? Ba iꞌokamoreꞌi wuaꞌ loti to Kupeꞌopiki inioꞌ iꞌokaꞌi?”
12Manusiaꞌ tiꞌo mehoniꞌ, “Towoweꞌe to Ipaꞌanikiꞌa mewali awangku, iomola to mampaꞌaniꞌa wuaꞌ loti tiꞌo pe aku, horiana kuꞌoka.”
13Uko tiꞌo notiꞌi Pueꞌ Ala pe towoweꞌe tiꞌo, “Haporeꞌi to iwalio hieꞌe?”
Mehoniꞌ towoweꞌe tiꞌo, “Ule tiꞌo to moꞌakalaiꞌa, io hinaꞌ kuꞌoka.”
14Katoꞌo notiꞌi Pueꞌ Ala pe ule tiꞌo,
“Alaꞌ mowaliako watoꞌo, buntoꞌko ka hinangkana pinatuwuꞌ to manondoꞌ hei ka hinangkana pinatuwuꞌ to i lopoꞌ. Ingko hingkiꞌ mendaeko hante hinaꞌimu hei awuna woiꞌ to mewali pangkamu i tempomu tuwuꞌ. 15Ingko hante towoweꞌe hieꞌe hingkiꞌ momekabiriꞌ; muleꞌmu hante muleꞌna hingkiꞌ momeponiꞌhi. Ingko hingkiꞌ mobingku pakoꞌra angkana Haduo muleꞌna hingkiꞌ mopakoꞌ tutuꞌmu.”
16 Pueꞌ Ala mohawaꞌ pe towoweꞌe tiꞌo,
“I tempomu mehinonaꞌi hingkiꞌ pedeꞌ maporiꞌ ihori, hei i tempomu moꞌanaꞌ hingkiꞌ pedeꞌ molalo ihori, angkana ingko tontomu mangkodokoꞌi maꞌanimu hei io hingkiꞌ makuasaꞌ pe ingko.”
17Katoꞌo Notiꞌi womo pe manusiaꞌ tiꞌo,
“Alaꞌ ituntuniꞌi to notiꞌi hantambimu, hei mangkako wuaꞌ loti to Kupetiꞌiki pe ingko inioꞌ iꞌokaꞌi, iomo hinaꞌ buntoꞌmo woiꞌ alaꞌ ingko, mepongka ka hinewowoꞌena hingkiꞌ maporiꞌ ihori majama mampaliꞌ pangkamu i tempomu tuwuꞌ. 18Woiꞌ to i intuꞌ hingkiꞌ mampotuwuꞌ kora to metotaiꞌ hei kora to morui, hante huꞌa-huꞌa to tuwuꞌ i popada hingkiꞌ mewali kopongkonamu. 19Hante moholemuꞌko hingkiꞌ mampaliꞌ kopongkonamu, wuteko mahuliꞌ mewali woiꞌ, alaꞌ katoꞌo niroako, alaꞌ ingko awu hei ingko hingkiꞌ mahuliꞌko mewali awu.”
20Katoꞌo manusiaꞌ tiꞌo mangkokeneꞌi hi Hewa pe hantambina, alaꞌ io to mewali inoꞌ lekiꞌna to tuwuꞌ. 21Hei Pueꞌ Ala mowali parewa ka koliꞌ pinatuwuꞌ to Nopaꞌanikiꞌi pe manusiaꞌ hei hantambina tiꞌo, katoꞌo Noponopakeꞌikihi.
22Mohawaꞌmo Pueꞌ Ala, “Kotuꞌuana manusiaꞌ tiꞌo mewalimo hibali Ingkiꞌ, pobahaꞌ noniuꞌ to moromiꞌ hei to kodake, horiana hinewowoꞌena inioꞌna intu io morupuꞌ womo wuaꞌ loti to hangkaruna iomo loti to mepaꞌani kotuwuꞌ hei noꞌoka, horiana io tuwuꞌ wute nantolou-louna.” 23Katoꞌo nobuehi Pueꞌ Ala ka kineteꞌ Paradesi hingkeꞌna io maꞌintuꞌ woiꞌ koniroahana. 24Io mobue manusiaꞌ tiꞌo pe tinaꞌ moto andona kineteꞌ Paradesi. Nopopeꞌohaꞌhi itoꞌo hei haꞌumbo malaꞌeka kerubi hante piho to makiꞌ-makiꞌ hei mewembo-wembo to nipopampodaꞌ lala pe loti to mepaꞌani kotuwuꞌ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)