Yohanes 7
7
Hi Yesu nolou pe posusaꞌa i Yerusale
1Uko tiꞌo, hi Yesu nolou mantuleliꞌ i woiꞌ Galilea. Hamboaꞌmo hiniꞌ nolou pe woiꞌ Yudea, alaꞌ uwaꞌhi tadulakore toYahudi itoꞌo to mangkodokoꞌi morokoꞌ hi Yesu.
2I tempo tiꞌo, hingkiꞌ hupaꞌ ando ngkodeꞌre toYahudi to rotiꞌi Posusaꞌ Bambaruꞌ taweꞌ. 3Iomo horiana rotiꞌi halaline hi Yesu pe Io, “HaKo iseꞌelu! NoloumoKo pe Yudea, hingkeꞌna topetuntuMu itoꞌo pangkiꞌ woꞌo tandaꞌ kuasaꞌ to Iwali. 4Ane mewuni-wuniluKo nturusi iseꞌe, hawaꞌKo hingkiꞌ mewali toaꞌ ngkodeꞌ. Ane mowaliKo tandaꞌ kuasaꞌ, hangangaa Iponoꞌokiꞌkihi lekiꞌ-lekiꞌna toaꞌ i duniaꞌ!” 5Howeꞌ halali-halaliNahi hi Yesu hawaꞌhi woꞌo mepoꞌohi pe Io.
6Katoꞌo notiꞌikihi hi Yesu, “Handoaꞌi tene tempona Kupomombaha kuasaꞌKa. Ane ingkei, hiwaꞌimbolu ikodokoꞌikei nolou pe Yerusale hawaꞌi mahampo, 7alaꞌ hawaꞌi uwaꞌ toaꞌ to mampokoiꞌkei. Angkana Aku, ropokoiꞌA toaꞌ to kodake i duniaꞌ hieꞌe, alaꞌ Kupokonontokihi kokodakene waliara. 8Medulumokei nolou pe posusaꞌa tiꞌo. Aku handoaꞌA tene nolou, alaꞌ handoaꞌi tene tempoKu hingkiꞌ nolou.” 9Hatoꞌomo lolitane hi Yesu pe halaliNahi, hei Io meꞌohaꞌ tene nturusi i Galilea.
10Noloumohi mpuꞌu halaline hi Yesu pe Yerusale hingkeꞌna motuntunihi Posusaꞌ Bambaruꞌ taweꞌ. Kopolaira tiꞌo, hi Yesu metuntu ngkawowuni, hingkeꞌna hawaꞌi robahaꞌ toaꞌ to woriꞌ. 11I posusaꞌa tiꞌo, tadulakora toYahudi mampaliꞌ nturusi hi Yesu, ropeꞌitanoki pe toaꞌ to itoꞌohi, rotiꞌi “I imboreꞌi Toaꞌ tiꞌo?”
12Hei toaꞌ to woriꞌ woꞌo, memewowaraꞌ-waraꞌhi. Uwaꞌhi to mantiꞌi, “Io toaꞌ to moromiꞌ.” Hantenaꞌhi woꞌo mantiꞌi, “Hawaꞌi! Io mampomonawuꞌlu toaꞌ to woriꞌ” 13Angkana hawaꞌi howeꞌ haduo to podehoꞌ mololita mampomombaha, alaꞌ mangkorokaꞌhi tadulakora toYahudi.
Hi Yesu mepoturuꞌ i Tambina Pueꞌ Ala
14Kolentuꞌana posusaꞌ tiꞌo, mekahimo hi Yesu pe lali Tambina Pueꞌ Ala, hei hi Yesu mampemolukamo mepoturuꞌ. 15Ropohele tadulako-tadulako toYahudi pahori poturuꞌNe, rotiꞌi, “Hohumbo horiana Nobahaꞌ woriꞌ langkaꞌ poturuꞌ to uwaꞌ i Suraꞌ Mangkolehi, hantaro Io hawaꞌi mosikolaꞌ.”
16Mehoniꞌ hi Yesu, “To Kupoturuꞌkikei, iomo poturuꞌ ka Pueꞌ Ala to morumbaꞌA, handoꞌio poturuꞌKu hadoduongKu. 17Himo to mangkodokoꞌi mowali peleihana Pueꞌ Ala hingkiꞌ robahaꞌ koka imbona poturuꞌKa hieꞌe, ba ka Pueꞌ Ala mpuꞌu ba lolitangKulu hadoduongKu. 18Himolu to mololita i lali kuasaꞌna hadoduona, io mampaliꞌlu hingkeꞌna niperenakiꞌi. Angkana, Aku, Kukodokoꞌi hingkeꞌna UmoꞌKu to morumbaꞌA humei ropokodeꞌ, alaꞌ Aku to mononto, hawaꞌA mowuti. 19Nabi Musa hampiha mampaꞌanikei hawaꞌna Pueꞌ Ala, angkana hawaꞌkei uwaꞌ haduo to mampetuntui Atura tiꞌo, mewaliꞌ mahamporeꞌi hinaꞌ ikodokoꞌikei morokoꞌA?”
20Haꞌumbora duo ka toaꞌ to woriꞌ mampatiꞌiki hi Yesu, “NopekahiKo lomoa! Himoreꞌi to mangkodokoꞌi morokoꞌKo?”
21Notiꞌi hi Yesu, “Hongkoꞌlu halangkaꞌ tandaꞌ kuasaꞌ to kuwali ipohelemokei. 22Nabi Musa hampiha morumbaꞌkei mobulabaꞌ anaꞌmi. Iomo horiana ane uwaꞌi anaꞌmi to hangangaa nibulabaꞌ i ando penombaha, bateꞌna mpuꞌu nibulabaꞌ. Kotuꞌuana adaꞌ pebulabaꞌ tiꞌo ka tododulunta to medulu ka hi Musa, handoꞌio ka hi Musa hadoduona. 23Nokomi pampetuntuimi hawaꞌna hi Musa, howeꞌ i ando penomba, ingkei mampeweikei wotami nibulabaꞌ. Mewaliꞌ, mahamporeꞌi hinaꞌ ipowuriꞌiꞌAkei ane mampokoꞌoriꞌA lekiꞌna wotana haduo toaꞌ i ando penombaha? 24Inioꞌkei mobutusi awami motuntunilu hapo to iꞌokiꞌkei, angkana hangangaa mobutusikei hante ikototuꞌuana.”
Tuꞌureꞌi hi Yesu Datu to Mamposalamaꞌ?
25Haꞌumbora duohi toYerusale mantiꞌi, “Iomo to ropaliꞌ tadulakonte hingkeꞌna rorokoꞌi. 26Elekei mepoturuꞌlu nturusi hawaꞌi uwaꞌ komorokaꞌNe, hei hawaꞌi woꞌo uwaꞌ to mokamorokiꞌI. Nioꞌ-nioꞌna intu robahaꞌmo tadulakonta koꞌIona Datu to Mamposalamaꞌ. 27Tobahaꞌ ane hupaꞌi mpuꞌu Datu to Mamposalamaꞌ to rodandi hampiha, hawaꞌi uwaꞌ howeꞌ haduo to pobahaꞌ kokaꞌimboNa humei.” Angkana Io hieꞌe tobahaꞌ kokaꞌimboNe humei.
28Katoꞌo, kolentuꞌana hi Yesu mepoturuꞌ i lali Tambina Pueꞌ Ala, Io mololitamo Nopokobue, Notiꞌi, “Itiꞌikei ibahaꞌlukei kohihimongKu hei ka imboꞌA humei. HawaꞌA humei motuntuni peleihangKu hadoduongKu, angkana humeiꞌA motuntuni peleihana Pueꞌ Ala to morumbaꞌA. Iomo to masipatoꞌ nipoꞌohi. Angkana Io hawaꞌikei ibahaꞌ. 29Ane Aku, Kubahaꞌ alaꞌ ka Io kohumeihangKa, hei Io to morumbaꞌA humei.”
30I tempo tiꞌo, uwaꞌhi to mangkodokoꞌi nturusi mohokiꞌ hi Yesu, angkana hawaꞌi uwaꞌ to wurani mohokiꞌI, alaꞌ handoaꞌi tene tempona. 31Angkana woriꞌ toaꞌ i lumbura to mepoꞌohi pe Io, rotiꞌi, “Ane hupaꞌmoꞌi mpuꞌu Datu to Mamposalamaꞌ, hei hawaꞌi nobiaꞌ mowali tandaꞌ kuasaꞌ meliu ka Toaꞌ hieꞌe, mopalaiha Toaꞌ hieꞌe iomo Datu to Mamposalamaꞌ.”
32Uwaꞌhi toParisi to pahori pomewaraꞌ-waraꞌra toaꞌ to woriꞌ mampololita noniuꞌ hi Yesu. Iomo horiana toParisi hante tutuꞌ-tutuꞌ tadulako mpenomba morumbaꞌhi haꞌumbora duo to mampoꞌodaꞌ Tambina Pueꞌ Ala nolou mohokiꞌ hi Yesu. 33I tempo tiꞌo, hi Yesu mampoturuꞌ toaꞌ to woriꞌ, Notiꞌikihi, “HamboaꞌmoꞌA morue moꞌawa hante ingkei. Hingkiꞌ mahuliꞌA nolou pe Io to morumbaꞌA. 34Hingkiꞌ ipaliꞌAkei, angkana hawaꞌAkei hingkiꞌ ihua alaꞌ i koꞌakoangKu tiꞌo, hawaꞌkei hohumbo nolou.”
35Wulimohi tadulakore toYahudi pahori lolitaNa, hei mometonoi-tonoihi, rotiꞌi, “Pe imboreꞌi koꞌakoaNe? Ba Noloureꞌintu pe woiꞌ ntaniꞌna, meꞌohaꞌ moꞌawa hante to handoꞌio toYahudi hingkeꞌna Io hohumbo mampaguruhi itoꞌo? 36Hei hapo palaihane lolitaNa to mantiꞌi: hingkiꞌ topaliꞌ, angkana hawaꞌi tohua, hei hawaꞌki wadi nolou pe koꞌakoaNa?”
Uwai to mepaꞌani kotuwuꞌ
37Ando koꞌukoana Posusaꞌ Bambaruꞌ taweꞌ tiꞌo, iomo ando to meloliu konipokodeꞌne, metotiꞌimo hi Yesu i lali Tambina Pueꞌ Ala notiꞌikihi Nopokobue, “Himo-himo to mangkumaro, humeimokei pe Aku, hingkiꞌ Kupaꞌanikei maꞌinu! 38Himo-himo to mepoꞌohi pe Aku, hibali to teꞌukiꞌ i lali Suraꞌ Mangkolehi to mantiꞌi: ka lalina hingkiꞌ mampopoꞌili uwai to mepaꞌani kotuwuꞌ.” 39To notungkai lolitana hi Yesu iomo Inohaꞌ Mangkolehi to hingkiꞌ rotorimo i lalira toaꞌ to mepoꞌohi pe Io. I tempona hi Yesu mololita hatoꞌo, Inohaꞌ Mangkolehi handoaꞌi tene mengkohou pe topetuntuNa, alaꞌ hi Yesu handoaꞌi nipokodeꞌ.
40 #
Ul. 18:15-18
Woriꞌ toaꞌ pahori lolitana hi Yesu, hei uwaꞌhi hantenaꞌ to mantiꞌi, “Iomo mpuꞌu nabi to nodandi Pueꞌ Ala hampiha.”
41Hantenaꞌhi woꞌo mantiꞌi, “Iomo hieꞌe Datu to Mamposalamaꞌ!”
Angkana uwaꞌhi woꞌo to mantiꞌi, “Hawaꞌi! Io toGalilea! Hawaꞌi uwaꞌ Datu to Mamposalamaꞌ mehupaꞌ ka Galilea. 42#Mi. 5:2; Yer. 23:5; Mas. 89:4-5; 2Sem. 7:12-13, 16Alaꞌ i lali Suraꞌ Mangkolehi teꞌukiꞌ: Datu to Mamposalamaꞌ iomo pemuleꞌana datu Daudi to ka bolaꞌ Beteleme, bolaꞌ konipoꞌanaꞌkina hi Daudi” 43Iomo horiana momehoniꞌ-honiꞌmohi toaꞌ to woriꞌ: hantenaꞌhi mepoꞌohi pe hi Yesu, hantenaꞌhi hawaꞌi. 44Uwaꞌhi to mangkodokoꞌi mohokiꞌ hi Yesu, angkana hawaꞌhi wurani.
Tadulakora toYahudi hawaꞌi mepoꞌohi pe hi Yesu
45To mampoꞌoda Tambina Pueꞌ Ala to nirumbaꞌ mohokiꞌ hi Yesu mahuliꞌmohi nolou pe toParisi hei tutuꞌ-tutuꞌ tadulako Mpenomba. Hawaꞌhi mewali mohokiꞌ hi Yesu. Meꞌitanohi tadulako tiꞌo pe iohi, rotiꞌi, “Mahamporeꞌi hinaꞌ hawaꞌkei ihokiꞌ hei ikomikei humei?”
46Mehoniꞌhi topampodaꞌ tambine Pueꞌ Ala, “Alaꞌ hawaꞌi tene howeꞌ hampiha kihori toaꞌ mololita hibali toaꞌ tiꞌo!”
47Mehoniꞌhi toParisi tiꞌo, “Ba Noꞌakalaikei woꞌo? 48Elemo, hawaꞌi uwaꞌ howeꞌ haduo tadulako ba toParisi to mepoꞌohi pe toaꞌ tiꞌo, 49bateꞌnalu toaꞌ to woriꞌ to mepoꞌohi pe Io, alaꞌ hawaꞌhi pobahaꞌ hawaꞌna hi Musa. Buntoꞌmohi!”
50 #
Yoh. 3:1-2
Uko tiꞌo, mololita woꞌo haduo toParisi to nikokeneꞌi hi Nikodemu. Hi Nikodemu tiꞌo, hampihamo mampomehuaki hi Yesu. Notiꞌi hi Nikodemu pe awana, 51#Ul. 1:16-17; 17:4; Kel. 23:1-3; Im. 19:15-16“Motuntuni aturanta, hawaꞌki wadi mohuku haduo toaꞌ ane hawaꞌi tene tohori kara-karane hei toparesaꞌ waliane.”
52Awanahi tiꞌo mampariwoiꞌ hi Nikodemu, rotiꞌi, “Ba ingko woꞌo haduo toGalilea? Iꞌele hei iparesaꞌ i lali Suraꞌ Mangkolehi. Hawaꞌi uwaꞌ nabi to hingkiꞌ mehupaꞌ ka Galilea.” [53Uko tiꞌo, mahuliꞌhi haduo-haduo nolou pe tambira.
Currently Selected:
Yohanes 7: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
