Yohanes 8
8
Towoweꞌe to nihua mebualosi
1Angkana hi Yesu nolou pe Biri Saitu.
2Kopoꞌonina mehoꞌolu-olu, nolou womo hi Yesu pe Tambina Pueꞌ Ala. Hupaꞌmohi toaꞌ to woriꞌ mekododungku pe hi Yesu. Hei Io mahura honiꞌi mampaguruhi.
3Kolentuꞌana hi Yesu mepoturuꞌ, guru-guru agama hante toParisi mehupaꞌmohi mangkomi haduo towoweꞌe to rohua kolentuꞌana mebualosi. Towoweꞌe tiꞌo ropopetotiꞌi i lumbuna toaꞌ to woriꞌ, 4honiꞌi rotiꞌiki hi Yesu, “Guru, towoweꞌe hieꞌe nihua kolentuꞌana mebualosi! 5I lali hawaꞌna hi Musa, uwaꞌ hawaꞌ to mantiꞌi towoweꞌe to mowali hatoꞌo hangangaa rowatui wute mahi. Mewaliꞌ hohumbo pahuaMa?” 6Tungkaihana peꞌitanora tiꞌo, mampaliꞌluhi komonawuꞌana lolitana hi Yesu hingkeꞌna rosalaꞌiꞌi. Angkana hi Yesu hawaꞌi mehoniꞌ, metoungkaꞌlu moꞌukiꞌ hante koraweNa i woiꞌ.
7Meꞌitanohi nturusi pe Io, iomo horiana metotiꞌimo hi Yesu, Notiꞌikihi, “Himo i lumbumi to hawaꞌi madosa, iomo to medulu mowatui towoweꞌe tiꞌo!” 8Io metoungkaꞌ womo, hei moꞌukiꞌ i woiꞌ hante koraweNa.
9Korohorina tadulako-tadulako toYahudi lolitane hi Yesu tiꞌo, molaihi haduo-haduo, mepongka ka tomotodi wute i to moleaꞌ. Koukoana, hi Yesu romo to uwaꞌ itoꞌo hante towoweꞌe tiꞌo. 10Uko tiꞌo, hi Yesu metotiꞌimo honiꞌi mampatiꞌiki towoweꞌe tiꞌo, “Pe umbomohi toaꞌ to mosalaꞌiko hingkenia? Hamboaꞌmoreꞌi uwaꞌ to mangkodokoꞌi mohukuko?”
11Mehoniꞌ towoweꞌe tiꞌo, “Hamboaꞌmohi uwaꞌ, Pueꞌ.”
Notiꞌi hi Yesu, “Aku woꞌo, hawaꞌko hingkiꞌ Kuhuku. Mewaliꞌ, mahuliꞌmoko, hei mepongka hinewowoꞌena, inioꞌ womoko mowali dosa]”#8:11 mepongka ka 7:53–8:11, I suraꞌna hi Yohanes wiharo Yunani to uluꞌ-uluꞌna mpololeke, lalana hieꞌe hawaꞌi teꞌukiꞌ, angkana teꞌukiꞌ i woriꞌ suraꞌ to niꞌukiꞌ huliꞌ kamuri.
Hi Yesu iomo wanta duniaꞌ
12Uko tiꞌo, mololita womo hi Yesu pe toYahudi, Notiꞌi, “Akumola to mepaꞌani wanta pe lekiꞌna toaꞌ i duniaꞌ. Toaꞌ to motuntuniꞌA, hawaꞌhi matengkaꞌ i lali komokorindi. Bateꞌna pahuahi komobaro to mepaꞌani kotuwuꞌ to hawaꞌi mokoꞌukoa.”
13Rotiꞌi toParisi, “Ingko mampololitaKo wotaMu. LolitaMu tiꞌo hawaꞌi tuꞌu, alaꞌ hawaꞌi uwaꞌ toaꞌ to mampetotuꞌu.”
14Notiꞌi hi Yesu, “KehapoꞌA mololita noniuꞌ i wotangKu, lolitangKu bateꞌna tuꞌu, alaꞌ Kubahaꞌ kokaꞌimbongKu humei hei Kubahaꞌ woꞌo pe imbo koꞌakoangKu. Angkana ingkei, hawaꞌkei ibahaꞌ kokaꞌimbongKu hei koꞌakoangKu. 15Pobutusimi motuntunilu pekirina toaꞌ. Aku, hawaꞌA mobutusi ba hihimolu. 16Angkana, ane mobutusiꞌA toaꞌ, pobutusingKu bateꞌna mononto hawaꞌA mampohambeiꞌ, alaꞌ hawaꞌA hadoduongKu. UmoꞌKu to morumbaꞌA, Iomo to moꞌowoniꞌA.
17I lali suraꞌ Aturami uwaꞌ teꞌukiꞌ waheꞌe: ‘Ane uwaꞌ roduo sabiꞌ to hibobali lolitare, posobiꞌira tiꞌo hangangaa nipoꞌohi.’ 18SabiꞌKu uwaꞌ roduo to mantiꞌi noniuꞌ Aku iomo: Aku hadoduongKu, hei koroduona UmoꞌKu to morumbaꞌA.”
19Iomo horiana ropeꞌitanoki toParisi, “Ane UmoꞌMu uwaꞌ, i imbomoꞌi hinewowoꞌene?”
Mehoniꞌ hi Yesu, “Hawaꞌkei ibahaꞌ kohihimongKu, hei hawaꞌkei woꞌo ibahaꞌ kohihimona UmoꞌKa. Ane keꞌibahaꞌAkei, bateꞌna ibahaꞌkei woꞌo UmoꞌKa.” 20Lekiꞌ-lekiꞌna tiꞌo nopowute hi Yesu kolentuꞌana mepoturuꞌ i lali Tambina Pueꞌ Ala dodungku i petiꞌ pamporideꞌa doiꞌ popenomba. Hei hi Yesu handoaꞌi tene mewali rohokiꞌ, alaꞌ handoaꞌi tene tempona.
Hi Yesu handoꞌio to ka duniaꞌ hieꞌe
21Notiꞌi womo hi Yesu pe tadulako-tadulakora toYahudi, “Hingkiꞌ molaiꞌA, hingkiꞌ ipaliꞌAkei, angkana hingkiꞌ mahikei, alaꞌ mowalikei nturusi dosa. Mewaliꞌ pe koꞌakoangKu, hawaꞌkei wadi hingkiꞌ nolou.”
22Korohorina tadulakora toYahudi lolitaNe, mololitamohi haduo hei haduo, rotiꞌi, “Hapo palaihane lolitaNa hingkenia? Ba mangkodokoꞌireꞌi menoꞌo, honiꞌi Notiꞌi hawaꞌki hohumbo nolou pe koꞌakoaNa.”
23Notiꞌikihi hi Yesu, “Ingkei mehupaꞌ ka munaꞌu, Aku mehupaꞌ ka tanti. Ingkei ka duniaꞌ hieꞌe, Aku hawaꞌA ka duniaꞌ hieꞌe. 24Io horiana Kutiꞌikikei, hingkiꞌ mahikei alaꞌ mowalikei nturusi dosa, alaꞌ ane hawaꞌi ipoꞌohikei lolitangKa to mampokononto koꞌAkunamo hieꞌe, bateꞌna mahikei mpuꞌu hei dosami hawaꞌi hingkiꞌ teꞌampuni.”
25Ropeꞌitanoki, “Kotuꞌuana, hihimoKo mpuꞌu?”
Mehoniꞌ hi Yesu, “MepongkaꞌA mepoturuꞌ Kutiꞌikimokikei! 26Woriꞌ tene to hingkiꞌ kutiꞌi hei kusalaꞌikikei. Angkana Io to morumbaꞌA, Io to nipoꞌohi mpololeke. Hapo to Kuhori ka Io, tiꞌomo to Kupowute pe ingkei to uwaꞌ i duniaꞌ.”
27To notungkai hi Yesu, iomo Umoꞌna to i suruga, angkana hawaꞌi robahaꞌ himo to notungkai hi Yesu. 28Iomo hinaꞌ Notiꞌikihi womo, “Ane Anaꞌ Manusiaꞌ nipodingkaoꞌ i loti momehulepe, tempo tiꞌomola honiꞌi ibahaꞌkei koꞌAkunamo hieꞌe. Hei hingkiꞌ ibahaꞌkei woꞌo, hawaꞌi uwaꞌ halangkaꞌ to Kuwali motuntuni peleihangKu hadoduongKu. Bateꞌnalu kutiꞌi hapo to nopoturuꞌkiꞌA UmoꞌKu. 29Iomo to morumbaꞌA hei to mampoꞌawaꞌA. HawaꞌA Nopotedehi hadoduongKu, alaꞌ Kuwali nturusi hapo to mampomotanaꞌ laliNa.”
30Kolentuꞌana hi Yesu mampowute lekiꞌ-lekiꞌna tiꞌo, woriꞌ toYahudi mepoꞌohi pe Io. 31Mewaliꞌ, Notiꞌikihi, “Ane ipetuntuikei nturusi poturuꞌKa, hei tuꞌu-tuꞌu mpuꞌu mewalikei topetuntuKu, 32hingkiꞌ ibahaꞌmokei poturuꞌ to tuꞌu noniuꞌ Pueꞌ Ala, koꞌukoana himpolohoꞌmokei ka konipohawiꞌami.”
33Mehoniꞌhi, rotiꞌi, “Ingka hieꞌe, muleꞌna hi Burahima! Handoaꞌka kahampiha nopohawiꞌ ba hihimolu. Mahamporeꞌi hinaꞌ Itiꞌi hingkiꞌ nipolohoꞌka ka konipohawiꞌangki?”
34Notiꞌi hi Yesu, “Tuꞌu mpololeke lolitangKa hieꞌe: lekiꞌ-lekiꞌna toaꞌ to mowali dosa, nopohawihiꞌ peleira hingkeꞌna madosahi. 35Ane hawiꞌ, wadi nipopolai ka tambina tuana. Angkana anaꞌna mpololeke, wadi meꞌohaꞌ i tambina umoꞌna wute nantolou-louna. 36Mewaliꞌ, ane Aku mampohentemokei ka lali dosami, himpolohoꞌmokei mpuꞌu, alaꞌ Aku AnaꞌnaꞌA Pueꞌ Ala. 37Kubahaꞌ koꞌingkeina pemuleꞌane hi Burahima. Angkana uwaꞌkei to mangkodokoꞌi hingkiꞌ morokoꞌA, alaꞌ hawaꞌkei motuntuni poturuꞌKu. 38Hapo to Kuꞌokiꞌmo i UmoꞌKu, tiꞌomo to Kutiꞌikikei. Angkana ingkei mowali hapo to nopoturuꞌkikei umoꞌmi.”
39Rotiꞌi toYahudi, “Umoꞌki iomo hi Burahima!”
Notiꞌi hi Yesu, “Ane tuꞌu-tuꞌu anaꞌnakei hi Burahima, mahamporeꞌi hinaꞌ hawaꞌi ipetuntuikei waliane? 40Kupowutekikei poturuꞌ to tuꞌu to Kutorimo ka Pueꞌ Ala, angkana ikodokoꞌilukei morokoꞌA! Ane hi Burahima, hawaꞌi hatoꞌo waliane. 41Waliami tiꞌo bateꞌna mampetuntui waliana umoꞌmi!”
Rohoniꞌ toYahudi, “Handoꞌioka anaꞌ bobule! Umoꞌki haduolu, Iomo Pueꞌ Ala.”
42Notiꞌi hi Yesu, “Ane tuꞌu-tuꞌu mpuꞌu Pueꞌ Ala Umoꞌmi, keꞌipokarimaꞌAkei, alaꞌ Aku ka Pueꞌ AlaꞌA humei, hei Akumola to Norumbaꞌ. HawaꞌA humei motuntuni peleihangKu hadoduongKu. HumeiꞌA motuntuni peleihana Pueꞌ Ala, alaꞌ Io to morumbaꞌA. 43Hingkiꞌ Kutiꞌikikei mahamporeꞌi hinaꞌ hawaꞌikei ibahaꞌ palaihane lolitangKu: alaꞌ hawaꞌkei ibiaꞌ mampehoromua poturuꞌKu. 44Umoꞌmi iomo Belisiꞌ! Hei ikodokoꞌilukei nturusi motuntuni peleihane umoꞌmi tiꞌo. Mepongka ka uluꞌ-uluꞌna iomo to merorokoꞌ. Poturuꞌna hawaꞌi hibali poturuꞌ to tuꞌu, alaꞌ hawaꞌi uwaꞌ to tuꞌu i io. Io mowuti, alaꞌ io topowuti. Iomola pongkane lekiꞌ-lekiꞌna wuti, hei mewali umoꞌna hihimo to mowuti.#8:44 Belisiꞌ hawaꞌi uwaꞌ ka uluꞌ-uluꞌna. Io woꞌo nopopewali Pueꞌ Ala. Wutina to uluꞌ-uluꞌna iomo, “Hawaꞌkei hingkiꞌ mahi.” Pwl. 3:4. 45Iomo horiana hawaꞌAkei ipoꞌohi, alaꞌ Kutiꞌi hapo to tuꞌu. 46HawaꞌA madosa, hei hawaꞌi uwaꞌ haduo ka ingkei to wadi mampokononto koꞌuwaꞌna dosangKu. Kupowute hapo to tuꞌu, mewaliꞌ mahamporeꞌi hinaꞌ hawaꞌAkei ipoꞌohi? 47Toaꞌna Pueꞌ Ala palei mampehoromua hei mampetuntui lolitana Pueꞌ Ala. Angkana hawaꞌkei ilei pahori lolitangKu, alaꞌ handoꞌiokei ka Pueꞌ Ala.”
48Rotiꞌi tadulakore toYahudi, “Tuꞌu to kitiꞌi! Ingko toSamariaKo, handoꞌioKo toYahudi, hei nopekahiiKo lomoa.”
49Notiꞌi hi Yesu, “HawaꞌA nopekahii lomoa. Aku moꞌadaꞌiꞌA UmoꞌKu. Angkana Aku, hawaꞌkei iꞌadaꞌi. 50HawaꞌA mampaliꞌ hingkeꞌna roꞌadaꞌiꞌA. Nokodokoꞌi Pueꞌ Ala hingkeꞌna roꞌadaꞌiꞌA, hei Iomo to mobutusi himo to tuꞌu hante hawaꞌi mampohambeiꞌ. 51Tuꞌu mpololeke lolitangKa hieꞌe: himo to mampetuntui lolitangKu, hawaꞌhi hingkiꞌ mahi, angkana hingkiꞌ tuwuꞌhi wute nantolou-louna.”
52Rotiꞌi tadulakore toYahudi, “Hinewowoꞌena kibahaꞌ mpololeke konopekohiiMa lomoa! Hi Burahima mahimo. Hatoꞌo woꞌo lekiꞌ-lekiꞌna nabi hampiha, mahimohi. Angkana Itiꞌireꞌi himo to mampetuntui lolitaMu hawaꞌhi mahi. 53Ba Itiꞌi meliu kokodeꞌne tuwuꞌMu ka tododulunta hi Burahima to moruemo mahi? Ba meliu kokodeꞌne tuwuꞌMu ka lekiꞌ-lekiꞌna nabi to mahimohi? HihimoKoreꞌi horiana Itiꞌi hatoꞌo?”
54Notiꞌi hi Yesu, “Ane moꞌadaꞌiꞌA wotangKu hadoduongKu, hawaꞌi uwaꞌ podumbuꞌane. Angkana UmoꞌKu to moꞌadaꞌiꞌA. Itiꞌikei koꞌIona Pueꞌ Ala to ipenombaikei. 55Angkana kotuꞌuana hawaꞌkei ibahaꞌ Pueꞌ Ala. Aku, Kubahaꞌ. Ane Kutiꞌiꞌi hawaꞌi Kubahaꞌ, mowutiꞌA hibali hante ingkei. Angkana Kubahaꞌ, hei Kupetuntui poturuꞌNe. 56Ane tododulumi hi Burahima, motanaꞌ laline alaꞌ nobahaꞌ kohingkiꞌ noꞌokiꞌKu i ando kohupaꞌangKu. Io pangkiꞌmo kohupaꞌKu hante motanaꞌ mpololeke.”
57Rotiꞌi tadulakore toYahudi, “UmuruꞌMu handoaꞌi tene ganaꞌ limo mpuluꞌ ntoꞌa. Hohumbo hinaꞌ Itiꞌi Iꞌokiꞌmo hi Burahima?”
58Notiꞌi hi Yesu, “Tuꞌu lolitangKa hieꞌe: handoaꞌi tene nipoꞌanaꞌki hi Burahima, Aku umbiꞌ uwaꞌmoꞌA.”#8:58 Hi Burahima mahi kira-kira 2.000 ntoꞌa ikohandoaꞌana tene hi Yesu nipoꞌanaꞌki.
59Korohorinalu toYahudi lolitaNe tiꞌo, moroahi watu keropopolubaꞌ hi Yesu.#8:59 Motuntuni pahuara toaꞌ, hi Yesu mampohibali wotana hante Pueꞌ Ala, palaihana, mampokokeniꞌa Pueꞌ Ala. Pehukuna toaꞌ to mampokokeniꞌa Pueꞌ Ala, rowatui wute mahi. Im. 24:13-16. Angkana Io molai ngkadondiiꞌ ka Tambina Pueꞌ Ala.
Currently Selected:
Yohanes 8: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
