Lukas 12
12
Pepoturuꞌ pe toaꞌ to hantoniꞌ
(Mat. 10:26-33; 19–20)
1Mosabu-sabuna toaꞌ to humei mangkodokoꞌi pangkiꞌ hi Yesu, momebihiꞌ-bihiꞌmohi alana momedihaꞌ-dihaꞌmohi. I tempo tiꞌo, hi Yesu mampatiꞌikihi topeguruNa, “Majaga-jagakei i ragiꞌra toParisi. Iomo kohantoniꞌra toParisi, alaꞌ moromiꞌhi i huwali angkana kodake lalire. 2Lekiꞌna to tetutuꞌi hingkiꞌ mombaha, hei lekiꞌ-lekiꞌna to tewuni hingkiꞌ tongawa. 3Mewaliꞌ, hapo to ipololitakei i winina bateꞌna hingkiꞌ nibahaꞌ i andona. Hei hapo to iwowaraꞌkikei pe awami i lali tambimi to tewiti, bateꞌna hingkiꞌ tekareba i lali bolaꞌ.”
Mengkoruꞌkei pe Pueꞌ Ala
(Mat. 10:28-31)
4“Halali-halalingKu, ipehoromuamokei moromiꞌ lolitangKa, inioꞌkei mangkorokaꞌ toaꞌ to dokoꞌhi morokoꞌkei, alaꞌ hawaꞌi uwaꞌ kuasaꞌre mohukukei wute nantolou-louna. 5Kutidoꞌkikei hihimo to hangangaa ikotehuꞌkei. Motehuꞌkei pe Pueꞌ Ala! Alaꞌ ane uko merorokoꞌ Io makuasaꞌ woꞌo mampelubaꞌki pe lali naraka! Mepoꞌohikei! Iolu to hangagaa nikotehuꞌo.
6Limo mbaꞌana deno wadi nipobaluꞌ rompepaꞌlu doiꞌ see. Angkana kehapoꞌi hatoꞌo, hawaꞌi uwaꞌ hambaꞌa to hawaꞌi norewahi Pueꞌ Ala. 7Hapona tene ingkei, hingkoweꞌ woꞌo wilolumi, nobahaꞌ Pueꞌ Ala koworiꞌne. Mewaliꞌ inioꞌkei motehuꞌ. Meliu tene perewahine Pueꞌ Ala pe ingkei ka porewahiNa i deno to woriꞌ.”
Ipangakuꞌkei petuntumi pe Kerisitu i hinarona toaꞌ to woriꞌ
(Mat. 10:32-33; 12:32; 10:19-20)
8“Pehoromua moromiꞌ lolitangKa! Hihimo to mopangakuꞌ petuntuna i Aku anaꞌ Manusiaꞌ i hinarona toaꞌ, io woꞌo hingkiꞌ Kupangakuꞌ i hinarona malaꞌekana Pueꞌ Ala. 9Angkana hihimo to mosapuakaꞌA i hinarona toaꞌ, io woꞌo hingkiꞌ Kusapuaka i hinarona malaꞌekana Pueꞌ Ala.
10Himo to mampononaꞌa Anaꞌ Manusiaꞌ, hohumbolu tene teꞌampuni dosane. Angkana hihimo to mosapuaka Inohaꞌ Mangkolehi, hawaꞌi niꞌampuni dosane.
11Ane nikomikei pe tadulako agama ba i topoparenta bolaꞌ nokomi petuntumi i Aku, inioꞌkei motehuꞌ hei komomaꞌa noniuꞌ hapo to itiꞌikei. 12Alaꞌ i tempo tiꞌo, Inohaꞌ Mangkolehi hingkiꞌ mampaꞌanikei hapo to hangangaa itiꞌikei.”
Pandiriꞌ noniuꞌ i tosugiꞌ tobebe
13Uwaꞌ haduo toaꞌ ka lumbura toaꞌ to woriꞌ to humei pe hi Yesu notiꞌi, “Guru, Itiꞌiki halalingku hingkeꞌna nopaꞌaniꞌa wokae dolaꞌku ka lumara tomotodingki.”
14Mehoniꞌ hi Yesu, “Bee, himo to mohiniꞌA mewali to mampeꞌilumbuikei to mampodolaꞌkikei lumana tomotodimi?” 15Uko tiꞌo, notiꞌi hi Yesu pe toaꞌ to woriꞌ, “Majaga-jagakei hei moromiꞌ-romiꞌkei, inioꞌkei pangkulabo morampu luma duniaꞌ. Alaꞌ kehapoꞌi woriꞌ lumami, handoꞌio tiꞌo to mampoꞌuwaꞌ kotuwuꞌ to wolaꞌ.”
16Iomo hinaꞌ nopowute hi Yesu lolita pandiriꞌ hieꞌe Notiꞌi, “Uwaꞌ haduo tosugiꞌ, uwaꞌ woiꞌne hei huꞌa-huꞌana mewali mpololeke. 17Notiꞌi laline tosugiꞌ tiꞌo, Hapo woꞌo tene to kupomasusa? Himaꞌmo ganaꞌ buhoꞌka kupamporiahi kinangku.’ 18Koꞌukoana nohua akala notiꞌi, ‘Agina buhoꞌ to kokiuꞌ hieꞌe kuwolihi, hei kuꞌaro to kodeꞌ, hingkeꞌna itoꞌo kuporiaꞌi lekiꞌ-lekiꞌne kinangku hante lumangku to ntaniꞌna. 19Uko tiꞌo, himaꞌmoꞌa paralu majama, alaꞌ woriꞌ pamporiangku, ganaꞌmo kupakeꞌ haꞌumbora ntoꞌana. Aku hingkiꞌ mangka hante maꞌinuluꞌa i lali komotanaꞌ-tanaꞌa!’
20Angkana notiꞌi Pueꞌ Ala, ‘Ee tobebe! Wini hieꞌe, inohaꞌmu hingkiꞌ niroamo. Mewaliꞌ, lekiꞌ-lekiꞌna to irampu tiꞌo, himomo intu tumpune?’ ”
21Koꞌukona mampowute pandiriꞌ tiꞌo, notiꞌi hi Yesu, “Hatoꞌomo komarugiꞌre toaꞌ to mangkodokoꞌi morampu luma duniaꞌ pe io hadoduona, alaꞌ merima-rima tuwuꞌre i hinarona Pueꞌ Ala.”
Anioꞌ tepe lalimi
(Mat. 6:25-34)
22Notiꞌi hi Yesu pe topeguruNa, “Iomo hinaꞌ kutiꞌikikei, inioꞌ tepe lalimi noniuꞌ i kotuwuꞌmi, hapo to hingkiꞌ iꞌokakei hei to i inukei. Inioꞌ woꞌo tepe lalimi noniuꞌ i peparewami. 23Alaꞌ kotuwuꞌmi meliu ka pangka, hei wotami meliu ka parewa. 24Iꞌelekei tinti kokao. Hawaꞌhi mehuꞌa, hawaꞌhi mekina, hawaꞌi uwaꞌ buhoꞌre. Kehapoꞌi hatoꞌo, Pueꞌ Ala bateꞌna mampopopangkahi. Hapo tene ingkei! I pampeꞌelena Pueꞌ Ala, meliu tene kotuwuꞌmi ka kotuwuꞌra tinti. 25Hapomo podumbuꞌane woriꞌ ipotepekei? Kehapoꞌi tepe lalimi mampekiri kotuwuꞌmi, angkana hawaꞌkei hohumbo motambai tinuwuꞌmi kehapoꞌi hangkiuꞌlu. 26Mewaliꞌ, ane hawaꞌi nibiaꞌ mowali to monangkoꞌ, mahamporeꞌi hinaꞌ tepekei i ntaniꞌna? 27Elekei bunga i popada. Hawaꞌhi majama, hawaꞌhi marau. Angkana kutiꞌikikei, ngkoweꞌ woꞌo datu Salomo tosugiꞌ mpololeke, baduꞌna hawaꞌi hibali komarangane hante bunga tiꞌo. 28Mewaliꞌ, ane Pueꞌ Ala mampomaranga kora i popada to uwaꞌ i ando hieꞌe hei nihunu poꞌonina, hapo tene ingkei! Meliu tene perewahine Pueꞌ Ala i ingkei. Mewaliꞌ, mahamporeꞌi hinaꞌ hawaꞌi ipohinarukei perewahiNe? 29Hatoꞌo woꞌo inioꞌ tepe lalimi hei itiꞌikei, ‘Hapomo to hingkiꞌ toꞌoka hei toꞌinu?’ 30Lekiꞌ-lekiꞌna tiꞌo nopaliꞌ toaꞌ to hawaꞌi pobahaꞌ Pueꞌ Ala. Angkana ingkei, inioꞌkei hatoꞌo, alaꞌ lekiꞌ-lekiꞌna to iparaluꞌikei, nobahaꞌmo Umoꞌmi i suruga. 31Mewaliꞌ, to hangangaa ipohimpodulukei iomo Pueꞌ Ala moparenta i lali kotuwuꞌmi, hei lekiꞌ-lekiꞌna to iparaluikei bateꞌna hingkiꞌ Nopaꞌanikikei.”
Luma i suruga
(Mat. 6:19-21)
32“Ingkei to metuntu i Aku, inioꞌkei motehuꞌ kehapoꞌi hawaꞌkei woriꞌ. Alaꞌ kopopuhiꞌna lalina Umoꞌmi i suruga, iomo hinaꞌ Io moꞌuwiꞌkei, hingkeꞌna pahuakei kotuwuꞌ to wolaꞌ i lali poparentaNa. 33Iomo hinaꞌ Kutiꞌi, nipobaluꞌmo lumamio, hei hilina ipaꞌanikihi toaꞌ to merima-rima tuwuꞌna. Alaꞌ ane iwalikei watoꞌo iporiakei lumami i lali hepuꞌ to hawaꞌi hingkiꞌ mohepaꞌ, iomo i suruga. Lumami tiꞌo hawaꞌi hingkiꞌ moholi, alaꞌ hawaꞌi hohumbo ninako hei hawaꞌi hohumbo noꞌoka bubuꞌ. 34Iporiamo lumami i lali suruga, alaꞌ i imbo koꞌuwaꞌana lumami, itoꞌo nturusi pekirimio.”
Haduo hawiꞌ to matimomo
35“Halali-halali, hinamo timomokei mebaduꞌ hei huluꞌmi nipomakiꞌ, 36hibali haduo hawiꞌ to timomo mampekau tuana mahuliꞌ ka pepahamokoa. Ane tuana tiꞌo mahuliꞌ hei mangkadoꞌ wambaꞌ, io hingkiꞌ moweaꞌ wambaꞌ. 37Morasiꞌhi hawiꞌ to matimomo mampekau kohupaꞌna tuara. Alaꞌ tuara tiꞌo hingkiꞌ moroa kumba nopewiwiꞌki i henaꞌna, nopopahurahi, hei nopopopangkahi. 38Morasiꞌ mpololeke hawiꞌ to mampekau hei timomo nokohupaꞌi tuana, kehapoꞌi halumbu wini ba dodungku ando.
39Hangangaa ipoꞌilalikei pandiriꞌ hieꞌe, ane kenobahaꞌi umbiꞌ tumpu tambi hiwaꞌimbo kohupaꞌne topanako, bateꞌna majaga-jaga, hawaꞌi nopotedehi mekahi pe lali tambina. 40Iomo hinaꞌ hangangaa majaga-jagakei, alaꞌ hawaꞌkei ibahaꞌ hiwaꞌimbo kohupaꞌne Anaꞌ Manusiaꞌ.”
Hawiꞌ to mononto hante hawiꞌ to hawaꞌi mononto
(Mat. 24:45-51)
41Meꞌitano hi Peturuꞌ pe hi Yesu, “Pueꞌ, hihimo to Itungkai i lali pandiriꞌ tiꞌo, ba ingkalu ba lekiꞌ-lekiꞌna woꞌo toaꞌ?”
42Mehoniꞌ hi Yesu, “Ipoꞌilalikei pandiriꞌ hieꞌe: hihimo i lumbumi to hibali hawiꞌ hieꞌe? Io mononto laline hei nopoꞌohi tuana, hei nohini tuana motadulakoi hawiꞌ ntaniꞌna hei moꞌatoroꞌ pangkara ando-ando. 43Morasiꞌ mpololeke kotuwuꞌna hawiꞌ tiꞌo, ane mahuliꞌmoꞌi uweꞌne, nohua kolentuꞌana mampopatengkaꞌ jamana. 44Hawiꞌ tiꞌo bateꞌna hingkiꞌ nohini tuana morewahi lekiꞌ-lekiꞌna lumana. 45Angkana ane hawaꞌi moromiꞌ hawiꞌ tiꞌo, hingkiꞌ notiꞌi i lalina, ‘Tuaku hawaꞌi hingkiꞌ hantouꞌ mahuliꞌ.’ Iomo hinaꞌ io hawaꞌi mampopatengkaꞌ jamana. Mepongkamo mampadeahi hawiꞌne moromiꞌ towoweꞌe moromiꞌ tomaꞌani. Io mangka hante maꞌinu woꞌo wute nolanu. 46Angkana, hawaꞌi nobahaꞌ kohingkiꞌ hupaꞌne tumpuna i ando hei i jaa to hawaꞌi nopohinaru. Hawiꞌ tiꞌo hingkiꞌ nopadea tuana wute mahi hei nopohibali hante toaꞌ to hawaꞌi tungkuꞌ pe Pueꞌ Ala.
47Haduo hawiꞌ to pobahaꞌ peleihana uweꞌna, angkana hawaꞌi majaga-jaga hei hawaꞌi nowali peleihana uweꞌna, hawiꞌ tiꞌo mantorimo pekokondo to monono. 48Angkana ane uwaꞌ haduo hawiꞌ to hawaꞌi mpuꞌu pobahaꞌ peleihana uweꞌna hei mowali salaꞌ, monangkoꞌlu konipadeane. Alaꞌ hihimo to nipaꞌani woriꞌ, woriꞌ woꞌo to hingkiꞌ niperapiꞌ ka io. Hei ane woriꞌ to nipoꞌohiki i haduo toaꞌ, woriꞌ woꞌo to hingkiꞌ nipaliꞌ ka io.”
Alaꞌ kohiYesuna, tetambaimo posisalaꞌre toaꞌ
(Mat. 10:34-36)
49“Aku humeiꞌA mangkomi api i duniaꞌ. Moromiꞌ mpuꞌu ane api tiꞌo makiꞌmo. 50Angkana uwaꞌ tene komaporiꞌ to hangangaa morumpaꞌA. Hingkiꞌ masusa lalingKa wute tempona mewali. 51Inioꞌ ipekirikei kohumeingKa hieꞌe hingkiꞌ mampohaꞌanu toaꞌ. Hawaꞌi! KohumeingKu hieꞌe mangkomi posisalaꞌ i lumbuna toaꞌ. 52Mepongka hinewowoꞌena, toaꞌ hantambi hingkiꞌ mosisalaꞌhi. Pandiriꞌna, ane uwaꞌ limo i lali hantambi, hingkiꞌ mosisalaꞌhi alaꞌ tolu metuntu pe Aku, hei roduo hawaꞌi. 53Umoꞌ hingkiꞌ moꞌewa anaꞌna tomaꞌani, hei anaꞌna tomaꞌani hingkiꞌ moꞌewa umoꞌna. Inoꞌ hingkiꞌ moꞌewa anaꞌna towoweꞌe, hei anaꞌna towoweꞌe hingkiꞌ moꞌewa inoꞌna. Poniana hingkiꞌ moꞌewa moniana, hei moniana hingkiꞌ moꞌewa ponianana.”
Petandaꞌi
54Notiꞌi womo hi Yesu pe toaꞌ to woriꞌ, “Ane iꞌokiꞌkei kini tinaꞌ i kotompuha ando, itiꞌikei hingkiꞌ ura, hei ura mpuꞌu. 55Ane meparowoꞌi ka mbuhaꞌu, itiꞌikei hingkiꞌ pokoꞌando, hei bateꞌna mewali hatoꞌo. 56Mengkomapandekei mpuꞌu! Ibahaꞌkei mampelao laniꞌ hante woiꞌ, angkana hawaꞌkei ibahaꞌ mampelao hapo to nowali Pueꞌ Ala i tempo hieꞌe.”
Modamekei hante poniꞌmi
(Mat. 5:25-26)
57“Ingkei hieꞌe, mahamporeꞌi hinaꞌ hawaꞌkei iponiuꞌ hapo to tuꞌu? 58Ane rapaꞌna, uwaꞌ haduo toaꞌ to mampehorikiko pe hinarona topebutusi, hangangaa ipodameki toaꞌ tiꞌo i tempomi tene i lumbu lala. Alaꞌ ane hawaꞌkei modame, hingkiꞌ nokomikei mpuꞌu nolou pe topobutusi, hei topobutusi tiꞌo hingkiꞌ mampeweikei pe polisi, hei polisi hingkiꞌ mokahikei i lali petarungkuꞌa. 59Hawaꞌkei tepohente ka lali petarungkuꞌa ane handoaꞌi tene lapaꞌ indami ibaiarikei.”
Currently Selected:
Lukas 12: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
Lukas 12
12
Pepoturuꞌ pe toaꞌ to hantoniꞌ
(Mat. 10:26-33; 19–20)
1Mosabu-sabuna toaꞌ to humei mangkodokoꞌi pangkiꞌ hi Yesu, momebihiꞌ-bihiꞌmohi alana momedihaꞌ-dihaꞌmohi. I tempo tiꞌo, hi Yesu mampatiꞌikihi topeguruNa, “Majaga-jagakei i ragiꞌra toParisi. Iomo kohantoniꞌra toParisi, alaꞌ moromiꞌhi i huwali angkana kodake lalire. 2Lekiꞌna to tetutuꞌi hingkiꞌ mombaha, hei lekiꞌ-lekiꞌna to tewuni hingkiꞌ tongawa. 3Mewaliꞌ, hapo to ipololitakei i winina bateꞌna hingkiꞌ nibahaꞌ i andona. Hei hapo to iwowaraꞌkikei pe awami i lali tambimi to tewiti, bateꞌna hingkiꞌ tekareba i lali bolaꞌ.”
Mengkoruꞌkei pe Pueꞌ Ala
(Mat. 10:28-31)
4“Halali-halalingKu, ipehoromuamokei moromiꞌ lolitangKa, inioꞌkei mangkorokaꞌ toaꞌ to dokoꞌhi morokoꞌkei, alaꞌ hawaꞌi uwaꞌ kuasaꞌre mohukukei wute nantolou-louna. 5Kutidoꞌkikei hihimo to hangangaa ikotehuꞌkei. Motehuꞌkei pe Pueꞌ Ala! Alaꞌ ane uko merorokoꞌ Io makuasaꞌ woꞌo mampelubaꞌki pe lali naraka! Mepoꞌohikei! Iolu to hangagaa nikotehuꞌo.
6Limo mbaꞌana deno wadi nipobaluꞌ rompepaꞌlu doiꞌ see. Angkana kehapoꞌi hatoꞌo, hawaꞌi uwaꞌ hambaꞌa to hawaꞌi norewahi Pueꞌ Ala. 7Hapona tene ingkei, hingkoweꞌ woꞌo wilolumi, nobahaꞌ Pueꞌ Ala koworiꞌne. Mewaliꞌ inioꞌkei motehuꞌ. Meliu tene perewahine Pueꞌ Ala pe ingkei ka porewahiNa i deno to woriꞌ.”
Ipangakuꞌkei petuntumi pe Kerisitu i hinarona toaꞌ to woriꞌ
(Mat. 10:32-33; 12:32; 10:19-20)
8“Pehoromua moromiꞌ lolitangKa! Hihimo to mopangakuꞌ petuntuna i Aku anaꞌ Manusiaꞌ i hinarona toaꞌ, io woꞌo hingkiꞌ Kupangakuꞌ i hinarona malaꞌekana Pueꞌ Ala. 9Angkana hihimo to mosapuakaꞌA i hinarona toaꞌ, io woꞌo hingkiꞌ Kusapuaka i hinarona malaꞌekana Pueꞌ Ala.
10Himo to mampononaꞌa Anaꞌ Manusiaꞌ, hohumbolu tene teꞌampuni dosane. Angkana hihimo to mosapuaka Inohaꞌ Mangkolehi, hawaꞌi niꞌampuni dosane.
11Ane nikomikei pe tadulako agama ba i topoparenta bolaꞌ nokomi petuntumi i Aku, inioꞌkei motehuꞌ hei komomaꞌa noniuꞌ hapo to itiꞌikei. 12Alaꞌ i tempo tiꞌo, Inohaꞌ Mangkolehi hingkiꞌ mampaꞌanikei hapo to hangangaa itiꞌikei.”
Pandiriꞌ noniuꞌ i tosugiꞌ tobebe
13Uwaꞌ haduo toaꞌ ka lumbura toaꞌ to woriꞌ to humei pe hi Yesu notiꞌi, “Guru, Itiꞌiki halalingku hingkeꞌna nopaꞌaniꞌa wokae dolaꞌku ka lumara tomotodingki.”
14Mehoniꞌ hi Yesu, “Bee, himo to mohiniꞌA mewali to mampeꞌilumbuikei to mampodolaꞌkikei lumana tomotodimi?” 15Uko tiꞌo, notiꞌi hi Yesu pe toaꞌ to woriꞌ, “Majaga-jagakei hei moromiꞌ-romiꞌkei, inioꞌkei pangkulabo morampu luma duniaꞌ. Alaꞌ kehapoꞌi woriꞌ lumami, handoꞌio tiꞌo to mampoꞌuwaꞌ kotuwuꞌ to wolaꞌ.”
16Iomo hinaꞌ nopowute hi Yesu lolita pandiriꞌ hieꞌe Notiꞌi, “Uwaꞌ haduo tosugiꞌ, uwaꞌ woiꞌne hei huꞌa-huꞌana mewali mpololeke. 17Notiꞌi laline tosugiꞌ tiꞌo, Hapo woꞌo tene to kupomasusa? Himaꞌmo ganaꞌ buhoꞌka kupamporiahi kinangku.’ 18Koꞌukoana nohua akala notiꞌi, ‘Agina buhoꞌ to kokiuꞌ hieꞌe kuwolihi, hei kuꞌaro to kodeꞌ, hingkeꞌna itoꞌo kuporiaꞌi lekiꞌ-lekiꞌne kinangku hante lumangku to ntaniꞌna. 19Uko tiꞌo, himaꞌmoꞌa paralu majama, alaꞌ woriꞌ pamporiangku, ganaꞌmo kupakeꞌ haꞌumbora ntoꞌana. Aku hingkiꞌ mangka hante maꞌinuluꞌa i lali komotanaꞌ-tanaꞌa!’
20Angkana notiꞌi Pueꞌ Ala, ‘Ee tobebe! Wini hieꞌe, inohaꞌmu hingkiꞌ niroamo. Mewaliꞌ, lekiꞌ-lekiꞌna to irampu tiꞌo, himomo intu tumpune?’ ”
21Koꞌukona mampowute pandiriꞌ tiꞌo, notiꞌi hi Yesu, “Hatoꞌomo komarugiꞌre toaꞌ to mangkodokoꞌi morampu luma duniaꞌ pe io hadoduona, alaꞌ merima-rima tuwuꞌre i hinarona Pueꞌ Ala.”
Anioꞌ tepe lalimi
(Mat. 6:25-34)
22Notiꞌi hi Yesu pe topeguruNa, “Iomo hinaꞌ kutiꞌikikei, inioꞌ tepe lalimi noniuꞌ i kotuwuꞌmi, hapo to hingkiꞌ iꞌokakei hei to i inukei. Inioꞌ woꞌo tepe lalimi noniuꞌ i peparewami. 23Alaꞌ kotuwuꞌmi meliu ka pangka, hei wotami meliu ka parewa. 24Iꞌelekei tinti kokao. Hawaꞌhi mehuꞌa, hawaꞌhi mekina, hawaꞌi uwaꞌ buhoꞌre. Kehapoꞌi hatoꞌo, Pueꞌ Ala bateꞌna mampopopangkahi. Hapo tene ingkei! I pampeꞌelena Pueꞌ Ala, meliu tene kotuwuꞌmi ka kotuwuꞌra tinti. 25Hapomo podumbuꞌane woriꞌ ipotepekei? Kehapoꞌi tepe lalimi mampekiri kotuwuꞌmi, angkana hawaꞌkei hohumbo motambai tinuwuꞌmi kehapoꞌi hangkiuꞌlu. 26Mewaliꞌ, ane hawaꞌi nibiaꞌ mowali to monangkoꞌ, mahamporeꞌi hinaꞌ tepekei i ntaniꞌna? 27Elekei bunga i popada. Hawaꞌhi majama, hawaꞌhi marau. Angkana kutiꞌikikei, ngkoweꞌ woꞌo datu Salomo tosugiꞌ mpololeke, baduꞌna hawaꞌi hibali komarangane hante bunga tiꞌo. 28Mewaliꞌ, ane Pueꞌ Ala mampomaranga kora i popada to uwaꞌ i ando hieꞌe hei nihunu poꞌonina, hapo tene ingkei! Meliu tene perewahine Pueꞌ Ala i ingkei. Mewaliꞌ, mahamporeꞌi hinaꞌ hawaꞌi ipohinarukei perewahiNe? 29Hatoꞌo woꞌo inioꞌ tepe lalimi hei itiꞌikei, ‘Hapomo to hingkiꞌ toꞌoka hei toꞌinu?’ 30Lekiꞌ-lekiꞌna tiꞌo nopaliꞌ toaꞌ to hawaꞌi pobahaꞌ Pueꞌ Ala. Angkana ingkei, inioꞌkei hatoꞌo, alaꞌ lekiꞌ-lekiꞌna to iparaluꞌikei, nobahaꞌmo Umoꞌmi i suruga. 31Mewaliꞌ, to hangangaa ipohimpodulukei iomo Pueꞌ Ala moparenta i lali kotuwuꞌmi, hei lekiꞌ-lekiꞌna to iparaluikei bateꞌna hingkiꞌ Nopaꞌanikikei.”
Luma i suruga
(Mat. 6:19-21)
32“Ingkei to metuntu i Aku, inioꞌkei motehuꞌ kehapoꞌi hawaꞌkei woriꞌ. Alaꞌ kopopuhiꞌna lalina Umoꞌmi i suruga, iomo hinaꞌ Io moꞌuwiꞌkei, hingkeꞌna pahuakei kotuwuꞌ to wolaꞌ i lali poparentaNa. 33Iomo hinaꞌ Kutiꞌi, nipobaluꞌmo lumamio, hei hilina ipaꞌanikihi toaꞌ to merima-rima tuwuꞌna. Alaꞌ ane iwalikei watoꞌo iporiakei lumami i lali hepuꞌ to hawaꞌi hingkiꞌ mohepaꞌ, iomo i suruga. Lumami tiꞌo hawaꞌi hingkiꞌ moholi, alaꞌ hawaꞌi hohumbo ninako hei hawaꞌi hohumbo noꞌoka bubuꞌ. 34Iporiamo lumami i lali suruga, alaꞌ i imbo koꞌuwaꞌana lumami, itoꞌo nturusi pekirimio.”
Haduo hawiꞌ to matimomo
35“Halali-halali, hinamo timomokei mebaduꞌ hei huluꞌmi nipomakiꞌ, 36hibali haduo hawiꞌ to timomo mampekau tuana mahuliꞌ ka pepahamokoa. Ane tuana tiꞌo mahuliꞌ hei mangkadoꞌ wambaꞌ, io hingkiꞌ moweaꞌ wambaꞌ. 37Morasiꞌhi hawiꞌ to matimomo mampekau kohupaꞌna tuara. Alaꞌ tuara tiꞌo hingkiꞌ moroa kumba nopewiwiꞌki i henaꞌna, nopopahurahi, hei nopopopangkahi. 38Morasiꞌ mpololeke hawiꞌ to mampekau hei timomo nokohupaꞌi tuana, kehapoꞌi halumbu wini ba dodungku ando.
39Hangangaa ipoꞌilalikei pandiriꞌ hieꞌe, ane kenobahaꞌi umbiꞌ tumpu tambi hiwaꞌimbo kohupaꞌne topanako, bateꞌna majaga-jaga, hawaꞌi nopotedehi mekahi pe lali tambina. 40Iomo hinaꞌ hangangaa majaga-jagakei, alaꞌ hawaꞌkei ibahaꞌ hiwaꞌimbo kohupaꞌne Anaꞌ Manusiaꞌ.”
Hawiꞌ to mononto hante hawiꞌ to hawaꞌi mononto
(Mat. 24:45-51)
41Meꞌitano hi Peturuꞌ pe hi Yesu, “Pueꞌ, hihimo to Itungkai i lali pandiriꞌ tiꞌo, ba ingkalu ba lekiꞌ-lekiꞌna woꞌo toaꞌ?”
42Mehoniꞌ hi Yesu, “Ipoꞌilalikei pandiriꞌ hieꞌe: hihimo i lumbumi to hibali hawiꞌ hieꞌe? Io mononto laline hei nopoꞌohi tuana, hei nohini tuana motadulakoi hawiꞌ ntaniꞌna hei moꞌatoroꞌ pangkara ando-ando. 43Morasiꞌ mpololeke kotuwuꞌna hawiꞌ tiꞌo, ane mahuliꞌmoꞌi uweꞌne, nohua kolentuꞌana mampopatengkaꞌ jamana. 44Hawiꞌ tiꞌo bateꞌna hingkiꞌ nohini tuana morewahi lekiꞌ-lekiꞌna lumana. 45Angkana ane hawaꞌi moromiꞌ hawiꞌ tiꞌo, hingkiꞌ notiꞌi i lalina, ‘Tuaku hawaꞌi hingkiꞌ hantouꞌ mahuliꞌ.’ Iomo hinaꞌ io hawaꞌi mampopatengkaꞌ jamana. Mepongkamo mampadeahi hawiꞌne moromiꞌ towoweꞌe moromiꞌ tomaꞌani. Io mangka hante maꞌinu woꞌo wute nolanu. 46Angkana, hawaꞌi nobahaꞌ kohingkiꞌ hupaꞌne tumpuna i ando hei i jaa to hawaꞌi nopohinaru. Hawiꞌ tiꞌo hingkiꞌ nopadea tuana wute mahi hei nopohibali hante toaꞌ to hawaꞌi tungkuꞌ pe Pueꞌ Ala.
47Haduo hawiꞌ to pobahaꞌ peleihana uweꞌna, angkana hawaꞌi majaga-jaga hei hawaꞌi nowali peleihana uweꞌna, hawiꞌ tiꞌo mantorimo pekokondo to monono. 48Angkana ane uwaꞌ haduo hawiꞌ to hawaꞌi mpuꞌu pobahaꞌ peleihana uweꞌna hei mowali salaꞌ, monangkoꞌlu konipadeane. Alaꞌ hihimo to nipaꞌani woriꞌ, woriꞌ woꞌo to hingkiꞌ niperapiꞌ ka io. Hei ane woriꞌ to nipoꞌohiki i haduo toaꞌ, woriꞌ woꞌo to hingkiꞌ nipaliꞌ ka io.”
Alaꞌ kohiYesuna, tetambaimo posisalaꞌre toaꞌ
(Mat. 10:34-36)
49“Aku humeiꞌA mangkomi api i duniaꞌ. Moromiꞌ mpuꞌu ane api tiꞌo makiꞌmo. 50Angkana uwaꞌ tene komaporiꞌ to hangangaa morumpaꞌA. Hingkiꞌ masusa lalingKa wute tempona mewali. 51Inioꞌ ipekirikei kohumeingKa hieꞌe hingkiꞌ mampohaꞌanu toaꞌ. Hawaꞌi! KohumeingKu hieꞌe mangkomi posisalaꞌ i lumbuna toaꞌ. 52Mepongka hinewowoꞌena, toaꞌ hantambi hingkiꞌ mosisalaꞌhi. Pandiriꞌna, ane uwaꞌ limo i lali hantambi, hingkiꞌ mosisalaꞌhi alaꞌ tolu metuntu pe Aku, hei roduo hawaꞌi. 53Umoꞌ hingkiꞌ moꞌewa anaꞌna tomaꞌani, hei anaꞌna tomaꞌani hingkiꞌ moꞌewa umoꞌna. Inoꞌ hingkiꞌ moꞌewa anaꞌna towoweꞌe, hei anaꞌna towoweꞌe hingkiꞌ moꞌewa inoꞌna. Poniana hingkiꞌ moꞌewa moniana, hei moniana hingkiꞌ moꞌewa ponianana.”
Petandaꞌi
54Notiꞌi womo hi Yesu pe toaꞌ to woriꞌ, “Ane iꞌokiꞌkei kini tinaꞌ i kotompuha ando, itiꞌikei hingkiꞌ ura, hei ura mpuꞌu. 55Ane meparowoꞌi ka mbuhaꞌu, itiꞌikei hingkiꞌ pokoꞌando, hei bateꞌna mewali hatoꞌo. 56Mengkomapandekei mpuꞌu! Ibahaꞌkei mampelao laniꞌ hante woiꞌ, angkana hawaꞌkei ibahaꞌ mampelao hapo to nowali Pueꞌ Ala i tempo hieꞌe.”
Modamekei hante poniꞌmi
(Mat. 5:25-26)
57“Ingkei hieꞌe, mahamporeꞌi hinaꞌ hawaꞌkei iponiuꞌ hapo to tuꞌu? 58Ane rapaꞌna, uwaꞌ haduo toaꞌ to mampehorikiko pe hinarona topebutusi, hangangaa ipodameki toaꞌ tiꞌo i tempomi tene i lumbu lala. Alaꞌ ane hawaꞌkei modame, hingkiꞌ nokomikei mpuꞌu nolou pe topobutusi, hei topobutusi tiꞌo hingkiꞌ mampeweikei pe polisi, hei polisi hingkiꞌ mokahikei i lali petarungkuꞌa. 59Hawaꞌkei tepohente ka lali petarungkuꞌa ane handoaꞌi tene lapaꞌ indami ibaiarikei.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)