Matius 6
6
Dau pa'peassakanni ke ma'petandokoa'
1“Pengkilalaii, daua' umpalako sara'na alukmu ke anggari la mupa'paitaan lako tau kamban. Annu ianna susi too, ta'mo la dengan saromua' yao mai Ambemu yao suruga.
2Ianna ma'petandokoa' lako to mase-mase, daua' pa'peassakanni susi sinapalako to ma'dua tambuk illalan banua pa'sambayangan sola lako tangnga lalan annu morai la natede tau buda. Sitonganna itin matin tau susio untarimamia sarona ke natedei tau buda. 3Sapo ianna dengan aka-akammua' la mutandoian to mase-mase, pomatimminni indana issananni tau senga'. 4Angga iko la ummissananni anna Ambemu yao suruga to ullosa angga maritik sae lako kara-kara membuni, la umbengangko saromu.”
Pepatudu diona sambayang
5“Ianna ma'sambayangkoa', tae'koa' la susi to ma'dua tambuk sinaporai ke'de' ma'sambayang illalan banua pa'sambayangan, battu lako lalan maroa' anna malara naita tau buda. Sitonganna, tau susi too untarimamia sarona ke natedemi tau. 6Sapo ianna ikoa' ma'sambayang, tamakoa' tambingmu ammu tutu'i ammu mane ma'sambayang langngan Ambemu to tadiita. Anna Ambemu to ullosa angganna membuninna, la umbengangkoa' saromu.
7lanna ma'sambayangkoa', tae'koa' la susi to tangngummissanan Dewata umpa'sule-sulei tula'na. Annu nasanga la naperangngii Dewata ke kalandoi sambayangna. 8Dau pa'pasusii, annu naissanan asan Ambemu kaparalluammua' moika anna ta'pa lemba' dio pudukmu. 9Sapo ianna ma'sambayangkoa' la mukua:
Ambeki yao suruga,
dipomasero sangammu.
10Paombo'mi kaparentaammu,
anna dituru' pa'kuammu
illalan lino susi yao suruga.
11Beengkan nande la siruanna kiande allo temo.
12Ammu garri'iangkan kasalaangki,
susi kami unggarri'imo to kasalaan lako kaleki.
13Dau pabeaikan disudi la umpogau' kasalaan,
sapola mupasikambelakan kakuasaanna kakadakean.
[Annu Ikomo to ummampui kaparentaan, kakuasaan,
anna kamatandean sae lako-lakona. Amin.]’
14Annu ianna unggarri'iko kasalaanna padammu ma'rupa tau, la nagarri'iangkoa' duka' kasalaammu Ambemu yao suruga. 15Sapo ianna tae'koa' unggarri'i kasalaanna padammu, tae'koa' duka' nagarri'ian kasalaammu Ambemu yao suruga.”
La sipato'na napogau' to ma'puasa
16“Ianna ma'puasakoa', daua' ma'patingkurrung leen susi to ma'dua tambuk annu sinaangga'i umpalumalin rupanna anna malara naita tau kumua marassan ma'puasa. Kupokadangkoa' sitonganna, itin matin tau susio untarimamia sarona ke natedemi tau. 17Sapo ianna ikoa' ma'puasa, mendau'koa' ammu meselak manappa, 18anna malara tae' naissanan tau senga' kumua marassangko ma'puasa. Sapo angga Ambemu to tadiita ummissananni. Annu Ambemu yao suruga to ullosa angga maritik sae lako kara-kara membuninna la umbengangko saromu.”
Ewanan la da'da'
19Daua' urrempun ewanan illalan lino, annu la naande panattak, ta'gasan, anna la naboko tau. 20Sapo rempun yaori suruga ewanammu annu tala naande panattak, tala ta'gasan dapakaia la naboko tau. 21Annu umba-umba angngenan nangei ewanammu, iamo duka' nangei penawammu.
22Mata sirapan ballona batang kaleta. Ianna masiang matammu masiang asan duka' sangkalebu kalemu. 23Sapo ianna mapa'di' matammu, manassa anna tae' dengan aka muita susi to illalan kamalillinan. Dadi ianna pi'de kamasiangan illalan kalemu, manassa anna kali'likangko.
24Tae' dengan tau la nabela umpengkarangan dua puang annu la naturu' manappa mesa, anna la napaboko'i penawa mesa. Battu' dikua marru la napakalando mesa anna tae' la naperangngii mesa. Susimokoa duka', tae' la mubela umpalulangngan Puang Allata'alla penawammu ke mupasiolanni untombon ewanan lino.”
Daua' malallan umpikki' salu katuoammu
Luk. 12:22-31
25“Iamo too kupokadangkoa' matin temo: Daua' malallan umpikki' salu katuoammu kumua akamo la diande sola diiru'. Tae'koa' duka' la malallan umpikki' batang kalemu kumua akamo la dipake. Annu katuoanna ma'rupa tau tae' angga la ummande anna batang kalena tae' angga la ma'pake. 26Pikki'pia' katuoanna dassi langngan loa, tala mangngambo', tala mepare, dapakaia la mailika'. Sapo moika anna susimo too, tontong liu duka nabengan nande Ambemu yao suruga. Tae'ka marru keangga'koa' iko anna la itin lako dassio? 27Tae' dengan tau mala ullombungngi sunga'na moi titti'mo annu malallan umpikki' salu katuoanna.
28Maakari ammu malallan umpikki' la mupakena? Petua'pi bunga-bunga lako pasang, tala mengkarang, tala ma'tannun. 29Sapo marru untondonkamalekeanna pakeanna tomaraya Salomo yolona, moika anna iamo randan tomakaka. 30Inde lako reue tuo temo disumpunni makale', sapo napomaleke Puang Allata'alla. Senga'mia' iko too, sapo tangkaangkoa' mangngorean. 31Iamo too daua' malallan umpikki salu katuoammu kumua: ‘Akamo la kiande? Akamo la kiiru'? Anna akamo la kipake?’ 32Itin matin kara-kara susio napeang to tae' ummissanan Puang Allata'alla. Sapo tae'koa' iko la susi, annu innang naissanan iko Ambemu yao suruga angganna kaparalluammu. 33Sapo pasaluikoa' penawa kaparentaanna Puang Allata'alla ammu pogau'i pa'kuanna, anna pagannasangkoa' duka' kaparalluan senga'mu. 34Iamo too ta'mokoa' la malallan umpikki' allo makale' annu allo makale' ummampui duka' kamalallanan. Pasiruaimia' duka' kamalallananna allo temo, daumo rangnganni polei.”
Currently Selected:
Matius 6: MQJ
Highlight
Share
Copy
Want to have your highlights saved across all your devices? Sign up or sign in
@LAI 2011 Indonesian Bible Society (Lembaga Alkitab Indonesia)
