YOANES 12

Mbetania-nen Yesus ebem amburu kilid wene

12:1-8

(Mt 26:6-13; Mk 14:3-9)

1O Anggul Pandok Mbiridnak tarem na yebet kagit lak ma, enam nene luk, Lasarus na wat yij-et nde, Yesus-nen uruk tak pid iri na ama Mbetania iri na me Yesus na mbirij-o. 2Iri me-nen-e Yesus amanggim nunggwi mende saiga-o. Nde, nunggwi mende na nonggolar-e, Lasarus na-ge it erep inmin Yesus imin koreyak woragola-ge, Marata-nen nunggwi mende mak ondosolat woragaij-o. 3Mak ondosola-ge, Maria na-nen-e onggo kwarat pugwi emben worak amburu-ge yimbe misik arem kobong tak na wanuruk, Yesus ijok pem kilik puruk, at anggulsu-nen Yesus ijok amburu mbarak pij-o. Iri kwarosola-ge, amburu emben konak na-ge o ma iri me yebet yij-o. 4Iri ala-ge, Yesus imin nugwi nap ap misik, abok-nen Yesus iminep wusururak nap Yuras Ikariot na-nen yosolar-e: 5”Abuga! Amburu yu-ge onggo uang kwarat wanuruk, insilobulo lak nap tembesa wok undurag-et nde-o” luk yij-o. 6Iri yid iri-ge, insilobulo lak nap enabuwa-nen yij-e lag-o. Are, ar-e yariya wanoso alar-e, it ontol tena wolmomtak at inggem pidnak me, ereb-e at wanurak perasolat-nen yij-o.

7Alat nde, Yesus-nen yosolar-e: ”Kwe yu-ge keya ber-o! An yapma nuburak ala-nen amburu yu kilik nibij-o. 8Insilobulo lak nab-e pem-et kit kinmin wolma-t nde, an-e kit kinmin pempa woramin pug-o” luk yij-o.

Lasarus wuruwokluk yiga wene

12:9-11

9Nde, ”Yesus na Mbetania worasu-o” yogola kuluruk Yawuri nap kwarat na-ge iri me mbiriga iri-ge Yesus nak kujwokluk mbirigir-e lak. Are, Lasarus na wat yij-et nde, Yesus-nen uruk tak pid nap iri na min-et kujwokluk mbiriga-o. 10Iri ala karuk, tepan omborak nagawan-nen-e: ”Lasarus min-et wuruwog-o” luk wene mbarogolat woraiga-o. 11Nde, Lasarus kwat ibidnak pem Yawuri nap kwarat-nen it tepan omborak keya unpuruk, Yesus ebem inndi angin tubu yogola-ge, Lasarus min-et wuruwokluk yiga-o.

Yerusalem nggosola, Yesus igijak wiriga wene

12:12-19

(Mt 21:1-11; Mk 11:1-11; Lk 19:28-40)

12Nene luk, kub-e nunggwi mende nggulok sakola, Yerusalem lobok yidnak ap kwarat-nen-e ”Yesus na Yerusalem lobok yusu-o” luk yogola kuliga-o. 13Kulurug-e, it-nen-e mbari ngga yendera wanuruk, at abuwok mbirigarig-e, enne nggoksa-t yogolar-e: ”Mbal Pem Nagawan wa-o! Nagawan Indo unu bem lobok yusu nap yu-ge imbiringgat-nen yusu-o! Isarael nap nagawan yu-ge imbiringgat-nen yusu-o!” luk yiga-o.

14Yogolikma-ge, Yesus-nen kelerai wam marik ombolwak pem kore yij-o. Iri kwarid iri-ge, engga bem mbaridnak wene-nen yosolar-e:

15”Sion woragwi nap wa-e. Kwiye kali-ge meyog-o! Kit-nen idnak nagawan-e kelerai wam marik ombolwak pem kore luk, kit kendam lobok yusu iri ker-o”

mbaridnak na ndak ndak tak posolat-nen iri kwarij-o.

16Nde, iri kwat ibidnak tarem-e Yesus owosirak na-nen inndi yebet kagit lak woraiga-t nde, Yesus na uruk luk unu kek tak posoloma-ge, at imin yidnak engga wene na yebet karuk, ap-nen iri nggal kwat ibidnak nde yebet kaiga-o.

17Yesus-nen Lasarus yapma pidnak sa-nen wumakluk, ”Wasug-o” yak turuk, uruk tak posola kaiga nap-nen-e iri kwaridnak wene ap yak indil mbiriga-o. 18Yak indil mbiridnak me, ap kwarat ereba na-ge Yesus kil mbiriga iri-ge at-nen kwiye worak mende iri kwaridnak wene kuligarik-nen kil mbiriga-o. 19Iri ala-ge, Parisi nap na-nen yak kerak mbogolar-e: ”Li yu-ge wa-e. Ap pik paksa-nen at imbirik nak mborogola, nit-nen kwarurag-e meya yusu yu nde ker-o! luk yiga-o.

Yunani nap erep-nen Yesus ogore yiga wene

12:20-26

20Nunggwi mende nggulok sakola, Mbal Pem Nagawan erembel wanuwokluk mbiriga nap ennggenggerag-e Yunani nap erep na woraiga-o. 21It-nen-e o Nggalilea o siri Mbetsaira nap Pilipus na eram lobok yigarik-nen at yak togolar-e: ”La yu-ge wa-e. Nir-e Yesus kujwokluk lobok yige-o” luk yak tiga-o.

22Yak togolikma-ge, Pilipus na-nen wene iri na Andereas yak tosoloma-ge, it enmberek-nen-e Yesus yak til mbiriga-o. 23Yak togolikma-ge, Yesus-nen it yak ondosolar-e: ”Ap Ambara an nunu kek tak purak tarem-e ndak agaij-o. 24An-e ndemeret yak kundusu-o. Mbato engen lerak misig-e nggweyak pem yagosoma, piri yigit lak-nen-e engen iri na nak woraso-o. Nde, piri luk-net ebe kwarat poso-o. 25At ondomok indi abuwa kaso nab-e at indi-ge lak ma-o. Nde, nggweyak ma yu me-nen at-net at indi abuwa lak tak puwa nap-nen-e urug-et woralik nalik wolmomtak elem irit tena wolma-o. 26An ndegel noboso nab-e an woraso sa an totno wolmokluk, an ndegel nuburak nab-e mondok an nimbirik nuwag-o. Nde, an ndegel nubuwa nab-e an Neid-nen kek tak ubuwa-o” luk yak indij-o.

Yesus-nen at wat momtak yidnak wene

12:27-36a

27Yuruk, Yesus-nen yosolar-e: ”Yawo-ge an nindi andi kwarat yidnak me, no wene nde yimin-o? ’Neid wa-e. Iri kwat nuburak tarem-e an nebem wok ma naru, nimiri yi-o’ luk yimin, lak? Lag-o. Iri kwat nuburak pem-et lobok yigi-o. 28Neid wa-e! Kat kunu nak kek tak pi-o!” luk yij-o. Yosoloma-ge, mbal pem-nen wene pil mbuwasolar-e: ”An nunu kek tak pigi irir-o. Nde, tuguruk-nen na kek tag-et pimin-o” luk yij-o.

29Yosoloma-ge, iri me mendak woraiga nap na-nen wene iri kuluruk-nen yogolar-e: ”Iri-ge o nggu-o!” luk yogola, it erep-nen yogolar-e: ”Lag-o. Aid nap-nen at wene yak tij-o!” luk yiga-o.

30Yogolikma-ge, Yesus-nen it yak ondosolar-e: ”Wene pil mbuwagaid yu-ge an namanggim-e lag-o. Kit kenmanggim-et yij-o. 31Nggweyak ma yu ebem wene mbatlik, nggweyak yu tena woraso na mbo bilik momtak tarem-e yawo ndak yij-o. 32Nde, an-e nggweyak ma yu me-nen mendak nibil lujwama-ge, ap pidsa lesa an neram inpimin-o” luk yak indij-o. 33(Iri yid iri-ge ”Inik nggal kwasa wat yimin-o” luk mirik onposolat-nen yij-o.)

34Yosoloma-ge, ap kwarat-nen at yak togolar-e: ”Nit-nen idnak imiri mbarak pidnak engga bem-e ’Mesias iri-ge pem-et woralik nalik wolma-o’ luk mbarak worasu-t nde, kat-nen yosolar-e: ’Ap Ambara-ge nggweyak ma-nen ibil lujwa-o’ yigen iri-ge noluk-nen yigen-o? Ap Ambara-ge ta nde yigen-o?” luk yak tiga-o.

35Yak togolikma-ge, Yesus-nen it yak ondosolar-e: ”Yaya iri-ge marig-et tarem nak kinmin wolma-o. Ndamug-e kendam mbuma naru, yaya kinmin worala ereya-t yaya na bem waring kagolat wolmer-o. Nde, ndamuk arem waring kaso nab-e ngge me nde mburusu-o luk kabag-et waring kaso-o. 36aKir-e yaya ilirak tobok-nen yaya kinmin worala ya-t yaya iri bem kinndi angin tubu yer-o” luk yij-o.

Yawuri nap-nen Yesus ebem inndi angin tubu yigit lak yiga wene

12:36b-43

36bWene iri na yurug-e, it inmbiri bem nam yurak imbit me, iri me-nen mbirij-o. 37Nde, at-nen-e it inmbiri bem kwiye worak mende kwarat kwarij-et nde, inndi-ge at ebem angin tubu yigit lak yiga-o. 38Iri kwariga iri-ge, Mbal Pem Nagawan ene lomboksa yoso nap Yesaya-nen yosolar-e:

”Nagawan Indo wa-e. Nit-nen yidnak wene bem-e ta-nen nde inndi angin tubu yij-o? Nagawan Indo amawi-ge ta nde mirik ibij-o?”

luk yid iri na ndak ndak tak pogolat-nen kwariga-o.

39Iri yidnak me, it-nen inndi at ebem angin tubu yurag-e meya agaij-o. Nde, Yesaya na-nen tuguruk yosolar-e: 40”Mbal Pem Nagawan-nen yosolar-e:

’It-nen an neram lobok yogola, an-nen ki yaga wok indimin naru, it enlengen-nen kujwa naru, it inndi-nen yebet kujwa naru, an-nen it enlengen ngguru rak posolat, it inndi amawi rak posolat yigi-o’ luk yij-o.”

41Yesaya-nen iri yid iri-ge Yesus kek tak pidnak na karuk, Yesus imin-et yij-o. 42Iri alat nde, Yawuri nap enne kulugwi nap kwarat-nen inndi-ge Yesus ebem angin tubu yiga-t nde, Parisi nap-nen-e Mbal Pem Nagawan ama-nen abu abu wirik unpuwa naru, Yesus ebem inndi angin tubu yidnag-e para yigit lak yiga-o. 43Nde, ki nap-nen it unnu kek tak purak nak nggok tak pogolar-e, Mbal Pem Nagawan-nen it unnu kek tak purag-e marik tak piga-o.

Yesus-nen yidnak wene-nen ap enpem wene mbarurak wene

12:44-50

44Iri luk, Yesus-nen ene ngguloksa yosolar-e: ”An nebem indi angin tubu yusu nab-e, an nebem nag-e lag-o. Are, an wirik nibil lobok yidnak nap na ebem-et indi angin tubu yusu-o. 45Nde, an neyasu nab-e, an wirik nibil lobok yidnak nab-et kasu-o. 46Nde, an nebem inndi angin tubu yuwa nap-nen-e ndamuk pem wolma naru, an-e nggweyak ma yu me yaya nggal-et lobok yigi-o. 47Nde, an-nen yidnak wene kulurug-et nde, kuruk tuwa nap ebem-e an-nen wene mbarimin pug-o. An-e ki nap enpem wene mbareyekluk lobok yigi-ge lag-o. Are, ki nap pidsa inmiri yekluk-nen lobok yigi-o. 48An isili rak nuburuk, an-nen yidnak wene kulusu buk nab-e at ebem wene mbarurak nab-e worasu-o. I woronosolat tarem an-nen yidnak wene-net ap iri ebem wene mbaruwa-o. 49Nde, wene an-nen yusu yu-ge an nindi-n pidnak pem nak yusu-ge lag-o. Nde, an-nen yurak min an-nen yak kundurak min iri-ge an Neid wirik nibil lobok yidnak nap iri na-net nebem pamu-nen yak kundusu-o. 50Nde, wene nebem pidnak yu-ge unlug-et woralik nalik yaga wok ondoso-nen yusu-o luk an-e naru-o. Iri bem-e, an-nen yak kundusu wene yu-ge an Neid-nen nebem pidnak wene nak yak kundusu-o” luk yij-o.

Currently Selected:

YOANES 12: inondx

Highlight

Copy