YOANES 17
17
Yesus-e at owosirak enmanggim tepan yid wene
17:1-26
1Yesus-nen wene na yurug-e, at erengen mbal arogo lik karuk-nen yosolar-e: ”Neid wa-e. An nururak tarem-e yawo-n panggo yij-o. Kat Kambara an-nen kat kek tak kubuwaklug-e, kat-nen-e Kambara an kek tak nibi-o. 2Kat-nen lena wok niridnak nap iri-ge unlug-et woralik nalik elem an-nen wok unduwakluk, ki nap oboksa tena unpuruk wolmomtak amawi-ge an ninggem pigen-o. 3Unlug-et pem-et woralik nalik momtak elem-e ap-nen Mbal Pem Nagawan Lud tak Nak Kwaroso kat misiget nak enaru yogolat, kat wirik ibil lobok yigen nap Yesus Kerisut na enaru yogolat yugwi irir-o. 4Nggweyak ma yu me-nen kat kek tak kobosolar-e, kat-nen nebem pigen yabu na woroksa wanigi-o. 5Neid wa-e! Nggweyak yu ndak wirigit lak ma-nen kat kimin woralat an nunu kek tak woraso iri na bem yawo-nen kat kinmbiri bem an nunu kek tak pi-o.
6Nggweyak ma nap ennggenggerak-nen lena wok nirigen nap pidsa inmbiri bem-e kat mirik inpigi-o. It iri-ge kat karengge woraigen-et nde, wok nirigen-o. It-nen-e kat-nen yidnak yidnak nak yugwi-o. 7Nde, yawo-ge kat-nen wok niridnak mende pidsa-ge kat keram-nen lobok yidnak-nen yusu-o luk ir-e enaru yili-o. 8Nde, kat-nen nebem pigen wene-ge an-nen it yak ondosola, waniga-o. Wanogolar-e, an-e ndemeret kat keram-nen lobok yidnak irit enaru yogolat, an-e kat wirik nibil lobok yigen-o luk neberali-o.
9It enmanggim-et an-e tepan yusu-o. Nggweyak ma nap pidsa enmanggim an-e tepan yusu bug-et nde, kat-nen wok nirigen nap iri-ge kat karengge me, it enmanggim-et tepan yusu-o. 10An narengge pidsa-ge kat karengge-nen yusu-o. Nde, kat karengge pidsa-ge an narengge-nen yusu-o. Nde, it enpem-nen an kek tak nibili-o. 11Yawo an-e kat keram lobok yekluk yusu-o. An-e nggweyak ma yu me woramin pug-et nde, ir-e nggweyak ma worali-o. Konak nak Woraso Neid wa-e. Nit nenmberek misiget nak worali nggal, it na misiget nak makluk, an nebem pigen kunu, kat kunu iri bem-nen it na kwara ndegel onposolat wolmin-o. 12An-e it inmin woralar-e, an wok nirigen kunu iri bem-et ndegel onposolat woragi-o. Nde, an-nen-e it yik eneyarok worala-ge, misiger-o luk tet pul yigit lag-o. Are, Mbal Pem Nagawan engga bem mbaridnak na ndak ndak makluk, ap misiget nak pul yij-o. 13Nde, yawo an-e kat keram lobok yekluk yusu-o. An-e nggweyak ma yu me we luru woralat-nen wene yusu yu-ge, an nalen-e it inndi arem kobong makluk-nen yusu-o. 14An-e kat-nen yidnak wene yak indigi-o. Iri bem-e, an-e nggweyak ma nab-e lag-o. Iri nggal-et it na nggweyak ma nab-e lak ala karuk, nggweyak ma nap-nen-e it insili rak inpiga-o. 15An-nen-e: ’Nggweyak ma yu me wolma naru, wok inpi-o’ luk kemengen mbarusu bug-et nde, ’Meya Yoso Nap-nen it meya rak unpuwa naru, kwara untum wiri-o’ luk kemengen mbarusu-o. 16An-e nggweyak ma nab-e lag-o. Iri nggal, it na nggweyak ma nab-e lag-o. 17Ndemeret wene bem-net ir-e lena kat karengge rak inpi-o. Kat-nen yidnak wene-ge ndemeret wene-nen yusu-o. 18Kat-nen-e ki nap ennggendumu wirik nibil lobok yigen nggal, an-nen na it ki nap ennggendumu wirik inpigi-o. 19Ir-e ndemeret wene bem lena kat karengge makluk, it enmanggim an-e kat karengge teyek-nen an-e an-net len yigi-o.
20It enarik enmanggim nak an-e tepan yusu bug-o. Are, it-nen yidnak wene kuluruk an nebem inndi angin tubu yuwa nap enmanggim min-et tepan yusu-o. 21It oboksa lambuksa misiget mak-nen an-e it enmanggim tepan yusu-o. Neid wa-e. Kar-e an narem woralat, nde, an-e kat karem woralat yili nggal, iri nggal ir-e nit nenarem wolmakluk-nen yigi-o. Iri yuwama-ge, nggweyak ma nap-nen-e an-e kat-nen wirik nibil lobok yij-o luk inndi angin tubu yuwakluk-nen tepan yusu-o. 22Nit nenmbereg-e misiget nak worali nggal, it na iri nggal-et misiget wolmakluk, kat-nen an kek tak nibigen nggal, it na kek tak inpigi-o. 23Nde, it na-ge mondok misiget maklug-e, an-e it enarem woralat, nde, kar-e an narem worasola-ge, nggweyak ma nap-nen-e kat-nen an wirik nibil lobok yij-o luk enaru yogolat, kat-nen an nabuwa kaso nggal, it na enabuwa kasu-o luk enaru yogolat ma-o.
24Neid wa-e. An lena wok nirigen nab-e an kek tak woraso na kujwakluk, an woramin sa it na iri me totno wolmomtak perasu-o. Nde, an-nen kek tak woraso iri-ge nggweyak yu awo ndak wirigit lak ma, kar-e an nabuwa kasolar-e, wok nirigen nar-o. 25Lud tak nak Kwaroso Neid wa-e. Nggweyak ma nap-nen-e kat enaru buk worali-t nde, an perak nde kat naru-o. Nde, kat-nen an wirik nibil lobok yij-o luk it yu-nen perak nde enaru-o. 26Kat-nen an nabuwa kaso elem na it enarem worasolat, an na it enarem worasolat makluk, an-nen kat kunu mirik onposo-o. Nde, iri nggal-et kat kunu-ge mirik onposolat woramin-o” luk yij-o.
Currently Selected:
YOANES 17: inondx
Highlight
Share
Copy
Want to have your highlights saved across all your devices? Sign up or sign in
@LAI 1992, 1994
