YOANES 6
6
Yesus-nen ap lima ribu (5,000) mburu mak indid wene
6:1-15
(Mt 14:13-21; Mk 6:30-44; Lk 9:10-17)
1Iri yak undurug-e, Yesus na-ge tuguruk ijok lem Nggalilea koma unu misig-e Tiberias iri na eyak ele bem ndil lagaij-o. 2Ndil lasola-ge, at-nen kwiye worak mende kwarosolar-e, ap kugi worak ereba na ki rak onposola karuk, ap kwarat-nen at imbirik mbiriga-o. 3Mborogolikma-ge, Yesus na ndobo bem lagarik, at owosirak inmin koreyak woragaij-o. 4Iri tarem-e Yawuri nap-nen O Anggul Pandok Mbiridnak tarem yebet kagwi na panggo yij-o. 5Alama-ge, Yesus na erengen lumbunuruk, ap kwarat iri na at eram lobok yogola karug-e, at-nen Pilipus na yak tosolar-e: ”Ap kwarat yu pidsa-nen norak mburu-ge ngge me-nen onggo pul-o?” luk yak tij-o. 6(Iri yak tid iri-ge at-nen-e at-nen kwarurak iri-ge aru-t woralar-et nde, we Pilipus indi kasolat-nen yij-o.)
7Yak tosoloma-ge, Pilipus-nen yosolar-e: ”Ap kwarat me, uwang-e seratus dua pulu lima ribu rupia (Rp. 125,000) nggal pem-nen mburu onggo pidnag-et nde, marig-et marig-et nonggolat-nen ndak ma-ge lag-o” luk yij-o.
8Yosoloma-ge, at imin nugwi nap misik Simon Peterus owot Andereas na-nen yosolar-e: 9”La li ap yu-ge mburu lima min keyane mberen min worasu-t nde, ap kwarat yu nggal-nen iri ndak norag-e meya-o” luk yij-o.
10Yosoloma-ge, Yesus-nen it yak ondosolar-e: ”Ap yeba-ge koreyak enper-o” luk yak indij-o. Iri me-ge tusuwangge kwarat me, ap iri na pidsa tusuwangge bem kore yil mbiriga ereba na wonarogolar-e, ap nag-e lima ribu (5,000) irit kore yiga-o. 11Kore yogolikma-ge, Yesus na-nen mburu na wanuruk, Mbal Pem Nagawan wa yak turuk, ap iri me koreyak ereba na tembet indij-o. Nde, keyane na iri nggal kwasa-t tembet endamu, it pidsa inmbitsa ningga-o. 12It pidsa inmbitsa nonggola karuk, at owosirak na yak ondosolar-e: ”Minggirik keya bidnak mbi mbo buwa naru, pidsa ndok werer-o” luk yak indij-o. 13Yak ondosoloma, mburu lima ap kwarat ereba-nen nonggolat minggirig-e at owosirak na-nen ndok wosa yarukmu-ge mul sum duabelas irit yat yij-o.
14Nde, Yesus-nen kwiye worak mende nggulok iri kwarosola kaiga nap-nen yogolar-e: ” ’Mbal Pem Nagawan ene lomboksa yoso nap misik nggweyak ma yu me lobok yuwa-o’ yugwi na-ge ndemeret yu-t lobok yamu kaige-o!” luk yiga-o. 15Yogolikma-ge, Yesus-nen-e it ap ereba na at eram lobok luk, lembesa ”Kar-e nit nennggendumu nagawan men yi-o” luk yak turak inndi aru me, tuguruk ndobo bem at arig-et nak mbirij-o.
Yesus na yi ombolwak pem mbirid wene
6:16-21
(Mt 14:22-33; Mk 6:45-52)
16Nde, o na keyama yosola-ge, at owosirak-nen-e yi koma eyak pem mbirigarig-e, 17e koma misik arem ngguruk, Kaperenaum nggwe ndil lujwokluk mburukmu-ge, Yesus na it endam awo wok yigit lak irit worasola, o ndamuk yij-o. 18Alama-ge, obube nggulok puk kil lobok yosolar-e, yi na nggweyerep nggwayerep lobok yoso tel kwirij-o. 19It na-ge yi na minggiril mbirigarik, lima kilometer nggal, enam kilometer nggal mborogolat-nen yik kaiganggal-e, Yesus na yi ombolwak pem wasolar-e, e koma na eralu panggo yosola-ge, ir-e kwiye-nen pabok piga-o. 20Kwiye yogola karuk, Yesus-nen it yak ondosolar-e: ”Kwiye kali-ge meyog-o. Yu-ge an-net yusu-o” luk yak indij-o. 21Yosoloma-ge, it enalen min-et Yesus na-ge lesa e koma arem ibil nggwiga-o. Nde, ereya na-net e koma na-ge it wok yurak sa na-t wok yij-o.
Ap-nen Yesus ogore yiga wene
6:22-24
22Nene luk kub-e yi koma eyak ponok nggwe keya unpuruk mbiriga nap ereba na-nen peragolar-e: ”E! E koma misiget nak worasu iri ker-o. Nde, Yesus na at owosirak inmin e koma arem ngguruk mbirigit lak, are, it enarig-et mbiriga-o” luk peraiga-o. 23Nde, e koma ereb-e Tiberias nggwe-nen lobok yarik, Nagawan Indo-nen Mbal Pem Nagawan wa yak turuk, mburu tembet ondosola ningga sa eralu na kondok yil lobok yij-o. 24Nde, ap kwarat ereba na-nen yik kaiganggal-e, Yesus min at owosirak na min lak ala karug-e, it na e koma ereba na arem ngguruk, Yesus ogore Kaperenaum mbiriga-o.
Yesus na unluk yaga wok ondoso mburu-nen yusu-o
6:25-59
25Ogore yi koma eyak ele bem ndil ligarig-e, ap ereba na-nen Yesus karuk, at yak togolar-e: ”Mul Ondoso Nap wa-e. Kar-e mepme tarem-nen yu me lobok yigendig-o?” luk yak tiga-o.
26Yak togolikma-ge, Yesus-nen it yak ondosolar-e: ”An-e ndemeret yak kundusu-o. Kir-e an-nen kwiye worak mende kwaroso ereba na ebe yenggerak puruk-nen nogore yili-ge lag-o. Are, mburu kinmbitsa ninggep iri na bem nak nogore yili-o. 27Lak yosolat, emben yosolat yoso nunggwi mende iri-ge ndegel tenak momtak pug-o. Are, emben yoso buk, pem-et unlug-et woralik nalik yaga wok ondoso nunggwi mende irit ndegel tenak wolmer-o. Nde, Ap Ambara an-e Neid Mbal Pem Nagawan-nen lenak nibidnak me, iri yidnak nunggwi mende iri-ge Ap Ambara an-nen wok kindimin-o” luk yij-o.
28Yosoloma-ge, it-nen Yesus yak togolar-e: ”Nir-e Mbal Pem Nagawan indi-n pidnak nak kwaruwoklug-e no nde kwarul-o?” luk yiga-o.
29Yogolikma-ge, Yesus-nen it yak ondosolar-e: ”Mbal Pem Nagawan indi-n kit-nen kwaruwag-o luk perasu-ge yu-o: At-nen wirik nibil lobok yidnak nap an nebem nak kinndi angin tubu yer-o” luk yak indij-o.
30Yak ondosoloma-ge, it-nen at yak togolar-e: ”Nir-e iri karuk-nen kat kebem ninndi angin tubu yuwok-nen kagwi buk mende no nde kwarugun-o? Kar-e ngge mende nde kwarugun-o? 31Nit nenlawingga na-ge karu me woragolar-e, no mende mburu (mana) iri na nonggolat woraiga-o. Nde, engga mbarak pem-nen yosolar-e: ’It-nen nujwaklug-e, aid arem-nen mburu pil mbuwa-o’ luk mbarak nar-o” luk yiga-o.
32Yogolikma-ge, Yesus-nen it yak ondosolar-e: ”An-e ndemeret yak kundusu-o. Aid arem-nen mbuwaidnak ndemeret mburu iri-ge Musa-nen-e mak kindigit lag-o. Iri-ge an Neid-net mak kundusu-o. 33Nde, Mbal Pem Nagawan-nen wok ondoso mburu iri-ge aid arem-nen mbuwarik, ki nap pidsa unluk yaga wok undusu nap iri-ge Mbal Pem Nagawan umburu-nen yusu-o” luk yak indij-o.
34Yak ondosoloma-ge, it-nen at yak togolar-e: ”Nab-o. Mburu na-ge pempa wok nondosolat wolmin-o” luk yiga-o.
35Yogolikma-ge, Yesus-nen it yak ondosolar-e: ”Unlug-et wolmomtak mburu-ge an-er-o. An neram lobok yuwa nab-e mburu nere mondok kujwa bug-o. An nebem indi angin tubu yuwa nab-e yi nere na mondok kujwa bug-er-o. 36Nde, ’kit-nen an neyaigeb-et nde, kinndi-ge an nebem angin tubu yili bug-o’ luk yak kindigi nar-o. 37An Neid-nen wok nuruwa nap pidsa-ge an neram lobok yuwa-o. Nde, an neram lobok yuwa nab-e an-nen-e langgal eneyamin pug-o. 38An-e aid arem-nen mbuwagi yu-ge, an nindi-n pidnak kwarurak pem lobok yigi-ge lag-o. Are, an nibil lobok yidnak nap indi-n pidnak kwareyekluk-nen lobok yigi-o. 39Nde, an nibil lobok yidnak nap-nen-e an-e yu kwaruwakluk wirik nibij-o. At-nen wok niridnak nap iri-ge an-nen-e misik mbi pul tak pigit lak, are, i woronosolat tarem-nen-e it pidsa an-nen unluk tak unpuwakluk-nen nibil lobok yij-o. 40Nde, an Neid indi-nen perasu-ge yur-o. At Ambara an neyaruk, an nebem inndi angin tubu yuwa nap pidsa-nen unlug-et woralik nalik elem wanuwa-o. Nde, inndi angin tubu yili nab-e i woronosolat tarem-nen an-nen unluk tak inpimin-o” luk yak indij-o.
41Yesus-nen yosolar-e: ”An-e aid arem-nen mbuwaidnak mburu-nen yusu-o” yosola karug-e, it Yawuri nap-nen-e unlum ne yol ngol mbogolat-nen 42yogolar-e: ”Abuga! At yu-ge eid min ija min na nir-e nenaru Yusup ambara Yesus na-t nde, nggerak puruk-nen ’An-e aid arem-nen mbuwagi-o’ luk yusu kali?” luk yiga-o.
43Yogolikma-ge, Yesus-nen yosolar-e: ”Kir-e kunlum ne yol ngol mbili meyog-o. 44An Neid wirik nibil lobok yidnak nap-nen ap inndi lesa neram pil lobok yigit lak nap-nen-e an neram wok yurag-e meya-o. Nde, Neid-nen inndi lesa an neram inpil lobok yuwa nab-e i woronosolat tarem-nen-e unluk tak inpimin-o. 45Mbal Pem Nagawan ene lomboksa yugwi nap-nen engga bem mbarogolar-e: ’Ap pidsa-ge Mbal Pem Nagawan-nen mul unduwa-o’ luk mbaridnak me, an Neid-nen yidnak wene kuluruk, at-nen mirik ibidnak wene wanusu nab-e an neram lobok yusu-o. 46Nde, ap misik erengen-nen Neid kaso ala-nen yigi-ge lag-o. Are, Mbal Pem Nagawan eram-nen lobok yidnak nap an narig-et nak-nen Neid kaso-nen yusu-o. 47An-e ndemeret yak kundusu-o. Indi angin tubu yidnak nab-e unlug-et pem-et woralik nalik momtak elem wanarik worasu-o. 48An-e unluk yaga wok ondoso mburu-nen yusu-o. 49Kit kenlawingga-ge karu me-nen no mende mburu (mana) na ningga-t nde, pendaga wat yiga-o. 50Alat nde, aid arem-nen mbuwaidnak mburu yu perak nde, ap-nen nujwarig-e, wat ma bug-o. 51An-e aid arem-nen mbuwaidnak unluk yaga wok ondoso mburu-nen yusu-o. Nde, ap-nen mburu yu nujwa nab-e unlug-et pem-et woralik nalik ma-o. Nde, ki nap pidsa unlug-et wolmaklug-e, wok indimin mburu iri-ge an nebe nde yigi-o” luk yij-o.
52Iri yosoloma-ge, Yawuri nap-nen ngguno pet kerak mbogolar-e: ”At yu-ge nggesa-nen at ebe nujwakluk at ebe wok nundurak yusu-o?” luk yiga-o.
53Yogolikma-ge, Yesus-nen it yak ondosolar-e: ”An-e ndemeret yak kundusu-o. Kar-e Ap Ambara an nebe min neyabi min ninggit lak-nen-e kit kenarem-e unlug-et wolmomtak elem-e worasu bug-o. 54Nde, an nebe min neyabi min nasu nab-e, urug-et woralik nalik momtak elem tena worasu-o. Nde, i woronosolat tarem-nen-e an-e uruk tak ibimin-o. 55Nde, an nebe-ge ndemeret nunggwi mende-nen yusu-o. An neyabi-ge ndemeret yi-nen yusu-o. 56An nebe min neyabi min nasu nab-e at-nen an narem worala, an-nen na at arem-et worasu-o. 57Urug-et woraso Neid-nen nibil lobok yidnak me, an-e at ebem-et nurug-et worasu-o. Iri nggal, an nebe nasu nab-e an nebem-et urug-et wolma-o. 58Iri bem-e, aid arem-nen mbuwaidnak mburu-ge yu-net yusu-o. Mburu yu-ge kit kenlawingga-nen ningga-t nde, wat yiga mburu iri na nggal-e lag-o. Alat nde, mburu yu nujwa nab-e urug-et pem-et woralik nalik ma-o” luk yak indij-o.
59Wene yu-ge Yesus na Kaperenaum-nen tepan yugwi ma-nen ap mul ondosolat-nen yak indid wene-o.
”An-nen yak kundusu wene yu-ge unluk tak unpurak wene-nen yusu-o” luk yij-o
6:60-71
60Wene na yosoloma kulurug-e, Yesus imin nugwi nap kwarat-nen yogolar-e: ”Wene yu-ge angin worak me, ta-nen kuluwa-o?” luk yiga-o. 61Nde, ir-e iri yogolar-e unlum ne yol ngol mbogola, Yesus-nen aru luk, it yak ondosolar-e: ”Wene yu angin worak ala karuk, yumbuk kudtak yol ngol mbili-a? 62Nde, kit-nen Ap Ambara an-e nanduk woraso sa lasola karug-e, no nde kwarugub-o? 63Konak Indi nak-nen unluk tak onposo-o. Nde, ki nap enmawi-ge ebe lak mende-nen yusu-o. Nde, Konak Indi-nen an-nen yak kundusu wene na bem-nen kunluk tak konposo-t nde, 64kit erep-nen-e an nebem kinndi angin tubu yili bug-o” luk yak indij-o. (Nde, Yesus-nen-e nanduk-net at ebem inndi angin tubu yigit lak yurak nap min at iminep wusururak nap min aru woragaij-o.) 65Iri yuruk, Yesus-nen yosolar-e: ”Iri bem-nen an Neid-nen indi waruk lobok yigit lak nab-e an neram lobok yurag-e meya-o luk yak kindigi nar-o” luk yij-o.
66Iri yidnak pem-e Yesus imin nugwi nap kwarar-e at imin nugwi na keya biga-o. 67Iri ala karuk, Yesus-nen at owosirak duabelas na yak ondosolar-e: ”Kit-nen na an keya nubugup, lak?” luk yak ondosoloma-ge,
68Simon Peterus-nen at yak tosolar-e: ”Nagawan Indo wa-e. Ta eram nde mburul-o? Kat kene-ge unluk yaga wok ondoso-nen yusu-o. 69Mbal Pem Nagawan eram-nen lobok yidnak konak nab-e kat-net yusu-o nenaru luk, kat kebem ninndi angin tubu yili-o” luk yak tij-o.
70Yak tosoloma-ge, Yesus-nen it yak ondosolar-e: ”Kit ap duabelas yu an-net len kinpigi-t nde, kit kennggendumu ap misig-e sere nde worasu-o!” luk yak indij-o. 71Iri yid iri-ge Simon Ikariot ambara Yuras na imin yij-o. Yuras na-ge it ap duabelas na inmin len ibij-et nde, Yesus iminep wusururak nap ala-nen yij-o.
Currently Selected:
YOANES 6: inondx
Highlight
Share
Copy
Want to have your highlights saved across all your devices? Sign up or sign in
@LAI 1992, 1994
YOANES 6
6
Yesus-nen ap lima ribu (5,000) mburu mak indid wene
6:1-15
(Mt 14:13-21; Mk 6:30-44; Lk 9:10-17)
1Iri yak undurug-e, Yesus na-ge tuguruk ijok lem Nggalilea koma unu misig-e Tiberias iri na eyak ele bem ndil lagaij-o. 2Ndil lasola-ge, at-nen kwiye worak mende kwarosolar-e, ap kugi worak ereba na ki rak onposola karuk, ap kwarat-nen at imbirik mbiriga-o. 3Mborogolikma-ge, Yesus na ndobo bem lagarik, at owosirak inmin koreyak woragaij-o. 4Iri tarem-e Yawuri nap-nen O Anggul Pandok Mbiridnak tarem yebet kagwi na panggo yij-o. 5Alama-ge, Yesus na erengen lumbunuruk, ap kwarat iri na at eram lobok yogola karug-e, at-nen Pilipus na yak tosolar-e: ”Ap kwarat yu pidsa-nen norak mburu-ge ngge me-nen onggo pul-o?” luk yak tij-o. 6(Iri yak tid iri-ge at-nen-e at-nen kwarurak iri-ge aru-t woralar-et nde, we Pilipus indi kasolat-nen yij-o.)
7Yak tosoloma-ge, Pilipus-nen yosolar-e: ”Ap kwarat me, uwang-e seratus dua pulu lima ribu rupia (Rp. 125,000) nggal pem-nen mburu onggo pidnag-et nde, marig-et marig-et nonggolat-nen ndak ma-ge lag-o” luk yij-o.
8Yosoloma-ge, at imin nugwi nap misik Simon Peterus owot Andereas na-nen yosolar-e: 9”La li ap yu-ge mburu lima min keyane mberen min worasu-t nde, ap kwarat yu nggal-nen iri ndak norag-e meya-o” luk yij-o.
10Yosoloma-ge, Yesus-nen it yak ondosolar-e: ”Ap yeba-ge koreyak enper-o” luk yak indij-o. Iri me-ge tusuwangge kwarat me, ap iri na pidsa tusuwangge bem kore yil mbiriga ereba na wonarogolar-e, ap nag-e lima ribu (5,000) irit kore yiga-o. 11Kore yogolikma-ge, Yesus na-nen mburu na wanuruk, Mbal Pem Nagawan wa yak turuk, ap iri me koreyak ereba na tembet indij-o. Nde, keyane na iri nggal kwasa-t tembet endamu, it pidsa inmbitsa ningga-o. 12It pidsa inmbitsa nonggola karuk, at owosirak na yak ondosolar-e: ”Minggirik keya bidnak mbi mbo buwa naru, pidsa ndok werer-o” luk yak indij-o. 13Yak ondosoloma, mburu lima ap kwarat ereba-nen nonggolat minggirig-e at owosirak na-nen ndok wosa yarukmu-ge mul sum duabelas irit yat yij-o.
14Nde, Yesus-nen kwiye worak mende nggulok iri kwarosola kaiga nap-nen yogolar-e: ” ’Mbal Pem Nagawan ene lomboksa yoso nap misik nggweyak ma yu me lobok yuwa-o’ yugwi na-ge ndemeret yu-t lobok yamu kaige-o!” luk yiga-o. 15Yogolikma-ge, Yesus-nen-e it ap ereba na at eram lobok luk, lembesa ”Kar-e nit nennggendumu nagawan men yi-o” luk yak turak inndi aru me, tuguruk ndobo bem at arig-et nak mbirij-o.
Yesus na yi ombolwak pem mbirid wene
6:16-21
(Mt 14:22-33; Mk 6:45-52)
16Nde, o na keyama yosola-ge, at owosirak-nen-e yi koma eyak pem mbirigarig-e, 17e koma misik arem ngguruk, Kaperenaum nggwe ndil lujwokluk mburukmu-ge, Yesus na it endam awo wok yigit lak irit worasola, o ndamuk yij-o. 18Alama-ge, obube nggulok puk kil lobok yosolar-e, yi na nggweyerep nggwayerep lobok yoso tel kwirij-o. 19It na-ge yi na minggiril mbirigarik, lima kilometer nggal, enam kilometer nggal mborogolat-nen yik kaiganggal-e, Yesus na yi ombolwak pem wasolar-e, e koma na eralu panggo yosola-ge, ir-e kwiye-nen pabok piga-o. 20Kwiye yogola karuk, Yesus-nen it yak ondosolar-e: ”Kwiye kali-ge meyog-o. Yu-ge an-net yusu-o” luk yak indij-o. 21Yosoloma-ge, it enalen min-et Yesus na-ge lesa e koma arem ibil nggwiga-o. Nde, ereya na-net e koma na-ge it wok yurak sa na-t wok yij-o.
Ap-nen Yesus ogore yiga wene
6:22-24
22Nene luk kub-e yi koma eyak ponok nggwe keya unpuruk mbiriga nap ereba na-nen peragolar-e: ”E! E koma misiget nak worasu iri ker-o. Nde, Yesus na at owosirak inmin e koma arem ngguruk mbirigit lak, are, it enarig-et mbiriga-o” luk peraiga-o. 23Nde, e koma ereb-e Tiberias nggwe-nen lobok yarik, Nagawan Indo-nen Mbal Pem Nagawan wa yak turuk, mburu tembet ondosola ningga sa eralu na kondok yil lobok yij-o. 24Nde, ap kwarat ereba na-nen yik kaiganggal-e, Yesus min at owosirak na min lak ala karug-e, it na e koma ereba na arem ngguruk, Yesus ogore Kaperenaum mbiriga-o.
Yesus na unluk yaga wok ondoso mburu-nen yusu-o
6:25-59
25Ogore yi koma eyak ele bem ndil ligarig-e, ap ereba na-nen Yesus karuk, at yak togolar-e: ”Mul Ondoso Nap wa-e. Kar-e mepme tarem-nen yu me lobok yigendig-o?” luk yak tiga-o.
26Yak togolikma-ge, Yesus-nen it yak ondosolar-e: ”An-e ndemeret yak kundusu-o. Kir-e an-nen kwiye worak mende kwaroso ereba na ebe yenggerak puruk-nen nogore yili-ge lag-o. Are, mburu kinmbitsa ninggep iri na bem nak nogore yili-o. 27Lak yosolat, emben yosolat yoso nunggwi mende iri-ge ndegel tenak momtak pug-o. Are, emben yoso buk, pem-et unlug-et woralik nalik yaga wok ondoso nunggwi mende irit ndegel tenak wolmer-o. Nde, Ap Ambara an-e Neid Mbal Pem Nagawan-nen lenak nibidnak me, iri yidnak nunggwi mende iri-ge Ap Ambara an-nen wok kindimin-o” luk yij-o.
28Yosoloma-ge, it-nen Yesus yak togolar-e: ”Nir-e Mbal Pem Nagawan indi-n pidnak nak kwaruwoklug-e no nde kwarul-o?” luk yiga-o.
29Yogolikma-ge, Yesus-nen it yak ondosolar-e: ”Mbal Pem Nagawan indi-n kit-nen kwaruwag-o luk perasu-ge yu-o: At-nen wirik nibil lobok yidnak nap an nebem nak kinndi angin tubu yer-o” luk yak indij-o.
30Yak ondosoloma-ge, it-nen at yak togolar-e: ”Nir-e iri karuk-nen kat kebem ninndi angin tubu yuwok-nen kagwi buk mende no nde kwarugun-o? Kar-e ngge mende nde kwarugun-o? 31Nit nenlawingga na-ge karu me woragolar-e, no mende mburu (mana) iri na nonggolat woraiga-o. Nde, engga mbarak pem-nen yosolar-e: ’It-nen nujwaklug-e, aid arem-nen mburu pil mbuwa-o’ luk mbarak nar-o” luk yiga-o.
32Yogolikma-ge, Yesus-nen it yak ondosolar-e: ”An-e ndemeret yak kundusu-o. Aid arem-nen mbuwaidnak ndemeret mburu iri-ge Musa-nen-e mak kindigit lag-o. Iri-ge an Neid-net mak kundusu-o. 33Nde, Mbal Pem Nagawan-nen wok ondoso mburu iri-ge aid arem-nen mbuwarik, ki nap pidsa unluk yaga wok undusu nap iri-ge Mbal Pem Nagawan umburu-nen yusu-o” luk yak indij-o.
34Yak ondosoloma-ge, it-nen at yak togolar-e: ”Nab-o. Mburu na-ge pempa wok nondosolat wolmin-o” luk yiga-o.
35Yogolikma-ge, Yesus-nen it yak ondosolar-e: ”Unlug-et wolmomtak mburu-ge an-er-o. An neram lobok yuwa nab-e mburu nere mondok kujwa bug-o. An nebem indi angin tubu yuwa nab-e yi nere na mondok kujwa bug-er-o. 36Nde, ’kit-nen an neyaigeb-et nde, kinndi-ge an nebem angin tubu yili bug-o’ luk yak kindigi nar-o. 37An Neid-nen wok nuruwa nap pidsa-ge an neram lobok yuwa-o. Nde, an neram lobok yuwa nab-e an-nen-e langgal eneyamin pug-o. 38An-e aid arem-nen mbuwagi yu-ge, an nindi-n pidnak kwarurak pem lobok yigi-ge lag-o. Are, an nibil lobok yidnak nap indi-n pidnak kwareyekluk-nen lobok yigi-o. 39Nde, an nibil lobok yidnak nap-nen-e an-e yu kwaruwakluk wirik nibij-o. At-nen wok niridnak nap iri-ge an-nen-e misik mbi pul tak pigit lak, are, i woronosolat tarem-nen-e it pidsa an-nen unluk tak unpuwakluk-nen nibil lobok yij-o. 40Nde, an Neid indi-nen perasu-ge yur-o. At Ambara an neyaruk, an nebem inndi angin tubu yuwa nap pidsa-nen unlug-et woralik nalik elem wanuwa-o. Nde, inndi angin tubu yili nab-e i woronosolat tarem-nen an-nen unluk tak inpimin-o” luk yak indij-o.
41Yesus-nen yosolar-e: ”An-e aid arem-nen mbuwaidnak mburu-nen yusu-o” yosola karug-e, it Yawuri nap-nen-e unlum ne yol ngol mbogolat-nen 42yogolar-e: ”Abuga! At yu-ge eid min ija min na nir-e nenaru Yusup ambara Yesus na-t nde, nggerak puruk-nen ’An-e aid arem-nen mbuwagi-o’ luk yusu kali?” luk yiga-o.
43Yogolikma-ge, Yesus-nen yosolar-e: ”Kir-e kunlum ne yol ngol mbili meyog-o. 44An Neid wirik nibil lobok yidnak nap-nen ap inndi lesa neram pil lobok yigit lak nap-nen-e an neram wok yurag-e meya-o. Nde, Neid-nen inndi lesa an neram inpil lobok yuwa nab-e i woronosolat tarem-nen-e unluk tak inpimin-o. 45Mbal Pem Nagawan ene lomboksa yugwi nap-nen engga bem mbarogolar-e: ’Ap pidsa-ge Mbal Pem Nagawan-nen mul unduwa-o’ luk mbaridnak me, an Neid-nen yidnak wene kuluruk, at-nen mirik ibidnak wene wanusu nab-e an neram lobok yusu-o. 46Nde, ap misik erengen-nen Neid kaso ala-nen yigi-ge lag-o. Are, Mbal Pem Nagawan eram-nen lobok yidnak nap an narig-et nak-nen Neid kaso-nen yusu-o. 47An-e ndemeret yak kundusu-o. Indi angin tubu yidnak nab-e unlug-et pem-et woralik nalik momtak elem wanarik worasu-o. 48An-e unluk yaga wok ondoso mburu-nen yusu-o. 49Kit kenlawingga-ge karu me-nen no mende mburu (mana) na ningga-t nde, pendaga wat yiga-o. 50Alat nde, aid arem-nen mbuwaidnak mburu yu perak nde, ap-nen nujwarig-e, wat ma bug-o. 51An-e aid arem-nen mbuwaidnak unluk yaga wok ondoso mburu-nen yusu-o. Nde, ap-nen mburu yu nujwa nab-e unlug-et pem-et woralik nalik ma-o. Nde, ki nap pidsa unlug-et wolmaklug-e, wok indimin mburu iri-ge an nebe nde yigi-o” luk yij-o.
52Iri yosoloma-ge, Yawuri nap-nen ngguno pet kerak mbogolar-e: ”At yu-ge nggesa-nen at ebe nujwakluk at ebe wok nundurak yusu-o?” luk yiga-o.
53Yogolikma-ge, Yesus-nen it yak ondosolar-e: ”An-e ndemeret yak kundusu-o. Kar-e Ap Ambara an nebe min neyabi min ninggit lak-nen-e kit kenarem-e unlug-et wolmomtak elem-e worasu bug-o. 54Nde, an nebe min neyabi min nasu nab-e, urug-et woralik nalik momtak elem tena worasu-o. Nde, i woronosolat tarem-nen-e an-e uruk tak ibimin-o. 55Nde, an nebe-ge ndemeret nunggwi mende-nen yusu-o. An neyabi-ge ndemeret yi-nen yusu-o. 56An nebe min neyabi min nasu nab-e at-nen an narem worala, an-nen na at arem-et worasu-o. 57Urug-et woraso Neid-nen nibil lobok yidnak me, an-e at ebem-et nurug-et worasu-o. Iri nggal, an nebe nasu nab-e an nebem-et urug-et wolma-o. 58Iri bem-e, aid arem-nen mbuwaidnak mburu-ge yu-net yusu-o. Mburu yu-ge kit kenlawingga-nen ningga-t nde, wat yiga mburu iri na nggal-e lag-o. Alat nde, mburu yu nujwa nab-e urug-et pem-et woralik nalik ma-o” luk yak indij-o.
59Wene yu-ge Yesus na Kaperenaum-nen tepan yugwi ma-nen ap mul ondosolat-nen yak indid wene-o.
”An-nen yak kundusu wene yu-ge unluk tak unpurak wene-nen yusu-o” luk yij-o
6:60-71
60Wene na yosoloma kulurug-e, Yesus imin nugwi nap kwarat-nen yogolar-e: ”Wene yu-ge angin worak me, ta-nen kuluwa-o?” luk yiga-o. 61Nde, ir-e iri yogolar-e unlum ne yol ngol mbogola, Yesus-nen aru luk, it yak ondosolar-e: ”Wene yu angin worak ala karuk, yumbuk kudtak yol ngol mbili-a? 62Nde, kit-nen Ap Ambara an-e nanduk woraso sa lasola karug-e, no nde kwarugub-o? 63Konak Indi nak-nen unluk tak onposo-o. Nde, ki nap enmawi-ge ebe lak mende-nen yusu-o. Nde, Konak Indi-nen an-nen yak kundusu wene na bem-nen kunluk tak konposo-t nde, 64kit erep-nen-e an nebem kinndi angin tubu yili bug-o” luk yak indij-o. (Nde, Yesus-nen-e nanduk-net at ebem inndi angin tubu yigit lak yurak nap min at iminep wusururak nap min aru woragaij-o.) 65Iri yuruk, Yesus-nen yosolar-e: ”Iri bem-nen an Neid-nen indi waruk lobok yigit lak nab-e an neram lobok yurag-e meya-o luk yak kindigi nar-o” luk yij-o.
66Iri yidnak pem-e Yesus imin nugwi nap kwarar-e at imin nugwi na keya biga-o. 67Iri ala karuk, Yesus-nen at owosirak duabelas na yak ondosolar-e: ”Kit-nen na an keya nubugup, lak?” luk yak ondosoloma-ge,
68Simon Peterus-nen at yak tosolar-e: ”Nagawan Indo wa-e. Ta eram nde mburul-o? Kat kene-ge unluk yaga wok ondoso-nen yusu-o. 69Mbal Pem Nagawan eram-nen lobok yidnak konak nab-e kat-net yusu-o nenaru luk, kat kebem ninndi angin tubu yili-o” luk yak tij-o.
70Yak tosoloma-ge, Yesus-nen it yak ondosolar-e: ”Kit ap duabelas yu an-net len kinpigi-t nde, kit kennggendumu ap misig-e sere nde worasu-o!” luk yak indij-o. 71Iri yid iri-ge Simon Ikariot ambara Yuras na imin yij-o. Yuras na-ge it ap duabelas na inmin len ibij-et nde, Yesus iminep wusururak nap ala-nen yij-o.
Currently Selected:
:
Highlight
Share
Copy
Want to have your highlights saved across all your devices? Sign up or sign in
@LAI 1992, 1994