LUKAS 7
7
Yesus-nen Oroma nap san winde wari na ndegel oboso nap ki rak pidnak wene
7:1-10
(Mt 8:5-13)
1Yesus-nen-e wene iri na ap mondok mul ondosolug-e, Kaperenaum wi mbirij-o. 2Iri me-ge Oroma nap san winde wari ndegel oboso nap, at eid indi kundik nap mbi-ge kugi wiridnak me, abu wat yekluk woragaij-o. 3Wat yekluk worasola-ge, san winde wari iri-nen-e Yesus obok kulurug-e, Yesus lobok yuwarik, at ndegel oboso nap ki rak puwaklug-e, Yesus emengen mbaruwakluk Yawuri nap ogore yidnak nap ereb-e Yesus eram yonggo wirik inpij-o. 4Wirik onposola-ge, ir-e Yesus eram mbirigarik at emengen kiri keresa mbarogolar-e: ”Ar-e kat-nen yongga wururag-e ndag-o. 5At iri-ge nit nenlem nap nenabuwa kasolat, nit tepan yugwi wi misig-e at nak-nen worak nonposolat yidnak nap ala-n yige-o” luk yiga-o.
6Yogolikma-ge, Yesus na it inmin luk mberarik, ap iri na uwi mborom panggo panggo wok yosoma-ge, san winde wari na-nen wene yu yak tuwakluk at anggamirak mbi wirik enpamu-ge, Yesus yak togolar-e: ”Kuwok al masa an nggal nama nggurag-e meya-o. 7An-e kat keram wok yurak kwiye-t yusu-o. Iri bem-e we kene bem nak yugunmu-ge, an ndegel noboso nab-e ki ma-o. 8Nde, an na an nanggul pem-nen yidnak yidnag-et kwaroso-o. An nurugom nap san winde-nen na an-nen yidnak yidnag-et kwarogolar-e, an-nen san winde misik yak tosolar-e: ’Mbiri-o’ luk yak tosola-ge, mborosor-o, at misik yak tosolar-e: ’Lobok yi-o’ luk yak tosola-ge, lobok yosor-o, an-nen an ndegel noboso nap mbi yak tosolar-e: ’Yu kwari-o’ luk yak tosola-ge, irit kwarosor-o” luk Yesus yak tiga-o.
9Yak togoloma-ge, iri yidnak wene kulurug-e, Yesus na-nen wi luk, nden yaga ap kwarat at imbirik lobok yili nap iri yak ondosolar-e: ”An-nen yak kendeyeg-o. Ap yu-ge wir-o. Isarael nap ennggendumu-nen na ap inndi angin tubu yidnak yu nggal-e an-e kaso bug-o!” luk yij-o.
10Yosoloma-ge, at-nen wirik inpid nap na unuwok lem san winde wari ama mbiriganggal-e, at ndegel oboso nap na ki yidnak nde kaiga-o.
Kwe togwe ambara wat yidnag-e Yesus-nen uruk tak pid wene
7:11-17
11Siyag-et woraruk, misik tarem-e Yesus na-ge o siri unu-ge Nain iri me mbirij-o. Mborosola-ge, at owosirak min ap kwarat min at imin mbiriga-o. 12Mborogolar-e, o siri pak tumende bem panggosa wok yil mbiriganggal-e, ap lugunik misig-e en wutluk waruk mbepme nggwe wakmu, eneyagaij-o. Nde, la lugunik iri-ge kwe togwe ambara misiget nderag-o. Nde, o iri me woragwi ap kwarat na kwe iri na imin waiga-o. 13Wagola-ge, Nagawan Indo Yesus-nen kwe na kasoluk, at abuwa-nen yak tosolar-e: ”Yip tusu meyog-o” luk yak tij-o. 14Yurug-e, Yesus na en wutluk wali mbat na tena bosoloma-ge, mbat waruk mbitli nab-e ndong yiga-o. Alama-ge, Yesus-nen yosolar-e: ”La yu-ge wa-e. Men yi-o luk yak kirigi-o!” luk yij-o. 15Yosoloma-ge, wat yidnak na men luk, koreyak worasolar-e, wene ndirij-o. Wene ndorosola-ge, la iri na-ge Yesus-nen at ija eram pij-o.
16Iri kwarosola-ge, it pidsa-ge kwiye-nen pabok puruk, Mbal Pem Nagawan erembel wanogolar-e: ”Mbal Pem Nagawan ene lomboksa yoso nap nggulok mbi-ge nit nennggendumu nam agaij-o!” yurug-e, ”Mbal Pem Nagawan-nen-e at elem nap inmiri yurak pem lobok yij-o!” luk yiga-o.
17Nde, Yesus obog-e Yurea wi pidsa min o eralu na min-e pidsa wigak yij-o.
Yoanes ap yi maroso nap-nen ap wirik inpid wene
7:18-35
(Mt 11:2-19)
18Iri kwaridnak wene pidsa-ge Yoanes imin nugwi nap-nen at kerengga yak tiga-o. Yak togolikma-ge, Yoanes-nen at imin nugwi nap mberen mbi wene mbo unpuruk, 19Nagawan Indo eram wirik enpamu, at kin wok obogolat-nen yogolar-e: ”Abok lobok yuwa-o yili nap na-ge kar-et, lak? Are, nin nap lobok yuwa-o luk yik karok wulmul, lak, ngge-o?” luk yak tuwakluk wene enpem pamu-ge.
20Mberen nap na Yesus eram wok luk-nen at yak togolar-e: ”Ap yi maroso nap Yoanes-nen kat kin wok kubuwakluk, kat keram wirik ninpil lobok yosolar-e, yu nggal yij-o: ’Abok lobok yuwa yili nap na-ge kar-et, lak? Are, ap misik lobok yuwa-o luk yik karok wulmul-a?’ luk yij-o” luk yiga-o.
21Nde, ereya tarem-e Yesus-nen kugi worak woraidnak nap kwarat ki rak onposolat, kugi enarem nggwidnak nap kugi wirik onposolat, enlengen ngguru nap enlengen kuwara wok ondosolat kwarij-o. 22Iri lug-e, Yesus-nen it yak ondosolar-e: ”Kenlengen-nen kaidnak nde keneyanggo-nen kulidnak nde Yoanes na yak til mberer-o. Enlengen ngguru nap enlengen kuwarak posolat; onowak wat yidnak nap na tula nugwi rak onposolat, mbijap nggal enpem mbidnak nab-e ambut tak onposolat, eneyanggo lak nap-nen wene kologolat; wat yidnak nap unluk tak onposolat; insilobulo lak nab-e aid wene mul ondosolat, yosola kaige-o luk yak ter-o. 23Nde, an nebem inndi mberen yugwi buk nab-e enalen kujwag-o” luk yij-o.
24Yoanes-nen inpil lobok yidnak nap na mborogola karug-e, Yesus-nen ap kwarat iri na Yoanes owene yak ondosolar-e: ”Kit karu me mbirigep iri-ge no kujwokluk mbirigeb-o? Yorowa o wija-nen puk kasola, landurusu iri na kujwokluk mbirigep, lak? 25No mende nde kujwokluk mbirigeb-o? Ap usum konak yirik kujwokluk mbirigep, lak? Yu ker-o. Ap unsum konak yirik, enalen pem konak woragwi na-ge nagawan woragwi sa nak woragwi-o. 26No mende nde kujwokluk mbirigeb-o? Yak nerer-o. Mbal Pem Nagawan ene lomboksa yoso nap kujwokluk mbirigep, lak? Ndemerer-o. Mbal Pem Nagawan ene lomboksa yugwi nap ereb-e teberag-et nde, at iri terak minik nggulog-et kil mbirigeb-o. 27Mbal Pem Nagawan-nen at engga mbarak pem-nen Yoanes imin yosolar-e:
’An-nen kabuwok nggwe wirik ubusu nap yu-nen-e
kat kurula mondok ya kubuwa-o’ luk yij-o.
28An-nen yak kundusu yur-o. Kwami-nen ndet inpidnak nap misig-e Yoanes nggal-e lag-o. At arig-et nak nggulog-o. Alat nde, Mbal Pem Nagawan elem nap ennggendumu-nen marik teberak woraso irik perak nde, kek tak-nen yusu-o. Nde, Yoanes na-ge teberak-nen yusu-o” luk yij-o.
29Yosoloma-ge, ap pidsa min pemerinta enmanggim tol ndok wurugwi nap min Yesus-nen wene iri yosola, kuliga-o. Iti iri-nen-e Mbal Pem Nagawan-nen: ”Iri nggal, yu nggal kwarurag-o” yidnak iri na ndak-ndak kwarogola-ge, Yoanes-nen yi ma inpij-o. 30Alat nde, Parisi nap min imiri mbarak pidnak wene enaru nap min-nen-e: ”Yoanes-nen yi ma nunpurak ninmbir-o” luk yogolar-e, Mbal Pem Nagawan-nen it kwat unpurak peraidnak na-ge keya biga-o.
31Nde, Yesus-nen tuguruk it yak ondosolat-nen yosolar-e: ”Nde, yawo unluk worali nap yu-ge no nggal-o? No min ndak wirimin-o? 32It iri-ge li marik marik onggo wanugwi sa enarik tik enarik tak lom wosa koreyak woragolat-nen yak kerak mbogolar-e: ’Nir-e ndawi ebe yobokluk, ndawi imid yige-t nde, kir-e ebe yigit lag-o! Nir-e yip tobokluk, yip lilan wanige-t nde, kir-e yip tigit lag-o!’ luk yugwi iri nggal-nen yili-o. 33Ap yi maroso nap Yoanes na lobok yarig-e, mburu min anggut engen amburu min ninggit lak, we worasola-ge, kit-nen yogolar-e: ’Ap yu-ge kugi arem nggwarik-nen yusu-o!’ luk yigeb-o. 34Nde, Ap Ambara an lobok yosolar-e, mburu min yi min nasola-ge, kit-nen yogolar-e: ’Suguru kondosolat, anggut engen amburu ndonggosa nasolat, pemerinta enmanggim tol ndok wurugwi nap min meya yugwi nap min ananggam kwat yosolat yusu yu ker-o!’ luk yak nirigeb-o. 35Iri alat nde, Mbal Pem Nagawan indi lud tak elem na wanugwi nap-nen-e yu-ge ndemeret wene-nen yusu-o luk enaru rak pili-o” luk yij-o.
Yesus na Parisi nap Simon ama worala, kwat ibidnak wene
7:36-50
36Parisi na misik unu-ge Simon-nen Yesus yak tosolar-e: ”Mburu totno nog-o” luk yak tosoloma-ge, Yesus na ap iri na ama nggwarik, mburu nasolat koreyak woragaij-o. 37Nde, uwingga mbaroso kwe misig-e o iri me woragaij-o, ”Yesus-e Parisi nap ama nggwarik, nunggwi mende nasu-o” yogola kulurug-e, kwe na-nen enben worak amburu kenanggo yimbe mbi-ge at eram waruk lobok yarig-e, 38Yesus ombol nggwe men lug-e, yip tosolar-e, yip lengen-nen Yesus ijok piri rak pij-o. Tak purug-e, at anggulsu-nen Yesus ijok iri korak puruk, at ijok na aben porok nasoluk, emben worak amburu na at ijok pem kilik pij-o. 39Yesus imin ”Totno nog-o” yak tid Parisi nap na-ge kwe iri-nen kwaridnak karuk, at arem-nen perasolar-e: ”Ap yu nde ndemeret Mbal Pem Nagawan ene lomboksa yoso nap nggal-e, at tenabusu kwe na aru yosolat, uwingga mbaroso kwe-nen yusu-o luk yenggerak peleb-o!” luk peragaij-o.
40Perasoloma-ge, Yesus-nen at yak tosolar-e: ”Simon wa-e. An-nen kat yak kururak mbi worasu-o” luk yosoloma, Simon-nen-e: ”Mul Nondoso Nap wa-e. Yak niri-o” luk yij-o.
41Yosoloma-ge, Yesus-nen yosolar-e: ”Mberen nap-nen-e ap misik ebem tuguruk uwi yagurak pem uang-e misig-e limaratus urupia nggal, nde, misig-e limapulu urupia nggal wanigarik woraiga-o. 42Nde, it enmbereg-e namat iri na uwi yagurak meya alama-ge, at-nen-e mberen nap na yak ondosolar-e: ’Ereba mag-o. Namat iri onggo purag-e lag-o’ luk yak ondosoloma-ge, orol waniga nap ereya-nen-e ta-nen nde ap iri abuwa kwarat kagaid kasu-o?” luk yij-o.
43Yosoloma-ge, Simon-nen yosolar-e: ”An nindi-nen perasolar-e, namat nggulok mbarak ibidnak nap na-t at abuwa nggulok nde kagaid perasu-o” luk yij-o. Yosoloma-ge, Yesus-nen at yak tosolar-e: ”E! Wene yigen iri-ge ludsa-t yigen-o” luk yak tij-o. 44Yak turug-e, Yesus-nen nden karuk kwe na yik kasolat-nen Simon na yak tosolar-e: ”Kwe yu kasu-a? An-e kat kama yu me ngguwagi-t nde, an nijok marurak yi mbi kat-nen lid lud tak pigit lag-et nde, kwe yu-nen-e at yip lengen pem-nen an nijok marosolat, at anggulsu-nen nijok korosolat yij-o. 45Kat-nen-e wa yak norosolar-e, nerabengen porok ninggit lag-et nde, kwe yu-nen-e an ngguwagirik worala-ge, kundugu kundugu an nijog-e aben porok nasolat worasu-o. 46Kat-nen-e an nanggul pem amburu mbi kilik pigit lag-et nde, kwe yu-nen-e emben worak amburu an nijok pem kilik pij-o. 47Iri bem-e wene yak kereyeg-o. Kwe yu-nen-e an nabuwa nggulok kaidnak pem-e at meya yidnak kwarat iri na-ge namberam tak pigi-o. Nde, at meya yidnak marig-et nak namberam tak pidnak nap-nen-e nabuwa-ge marig-et nak kaso-o” luk yij-o.
48Yuruk, Yesus-nen kwe na yak tosolar-e: ”Kat meya kwaroso-ge namberam tak pigi-o” luk yak tij-o.
49Yak tosoloma-ge, Yesus imin nonggolat koreyak woraidnak nap iri-nen yak kerak mbogolar-e: ”Ap meya yidnak amberam tak poso nap yu-ge ta-nen yusu-o?” luk yak kerak mbiga-o.
50Alat nde, Yesus-nen kwe iri na yak tosolar-e: ”Kat kindi angin tubu yigen iri-nen kimiri yamu me, kindi alen min-et mbiri-o” luk yak tij-o.
Currently Selected:
LUKAS 7: inondx
Highlight
Share
Copy
Want to have your highlights saved across all your devices? Sign up or sign in
@LAI 1992, 1994
