LUKAS 9
9
Yesus-nen ap duabelas na wirik inpidnak wene
9:1-6
(Mt 10:5-15; Mk 6:7-13)
1Nde, Yesus-nen at owosirak duabelas na wene mbo unpurug-e, kugi pidsa wirik purak amawi min ap ki rak unpurak amawi min wok indij-o. 2Iri lug-e, Mbal Pem Nagawan-nen tenagaidnak wi wene mul ondogolat, ud enpem mbidnak nap ki rak inpil nogolat yuwakluk wirik inpij-o. 3At-nen it yak ondosolar-e: ”Tu waring kagolar-e, silobulo mbi wanurak pug-o. Wangun ala na, kot manik ala na, mburu ala na, uwang ala na, yurugwi sum mberen ala na wanurak pug-o. 4Nde, o mbi-nen wok konpogola-ge, iri me-t woraruk, o siri iri me-nen mborogolat-net keya burag-o. 5Nde, ap-nen wok kinpigit lak yogola-ge, o siri iri me-nen mborogolar-e, it inndi wanuwakluk kunuwok liri pil karuk mberer-o” luk yak indij-o.
6Yak ondosoloma, at owosirak na mborogolar-e, o siri marik ereba na nggwe nogolar-e, aid wene yak indil nogolat ap ki rak onpogolat kwaril niga-o.
Erores indi kabak yid wene
9:7-9
(Mt 14:1-12; Mk 6:14-29)
7Iri kwaril waring kaidnak wene na-ge o Nggalilea nggweyak tena woraso Erores-nen kulurug-e, indi kabak yamu-o. Ap erep-nen yogolar-e: ”Ap yi maroso nap Yoanes na tuguruk uruk yamu-o!” yogolat, 8it erep-nen yogolar-e: ”Lag-o. Elia na nam yamu-o” yagolat, nde, erep-nen yogolar-e: ”Lag-o. Nanduk Mbal Pem Nagawan ene lomboksa yugwi nap ereba na misik uruk yarig-o” yogolat yogola, at indi kabak yamu-o. 9Iri ala-ge, Erores-nen yosolar-e: ”Yoanes urusu mbaruwakluk yak undukmu, urusu mbariga na-t nde, at owene an kwarat kulusu yu-ge ta-o?” yurug-e, Yesus kudtak irit peragaij-o.
Yesus-nen ap limaribu mburu mak indidnak wene
9:10-17
(Mt 14:13-21; Mk 6:30-44; Yo 6:1-14)
10Wirik inpidnak nap na-ge tuguruk Yesus eram wok yigarig-e, kwaril waring kaidnak wene na kiringgiga-o. Iri lug-e, Yesus na it inmin luk, enarik nak o siri Mbetsaira mbiriga-o. 11Mborogola-ge, it mbiriga onpok enaru lug-e, ap kwarat na at imbirik mbiriga-o. Mborogola, Yesus-nen imin tak unpurug-e, Mbal Pem Nagawan-nen tenagaidnak wi wene yak ondosolat, ap kugi worak it ennggendumu ki rak onposolat kwarij-o.
12Nde, o ki yosola-ge, at owosirak duabelas na at eram lobok yigarik-nen yogolar-e: ”O yu-ge ap lak ma me, ap yeba-ge it norak mburu min it nene yurak o min kore yuwakluk, o siri inggi inggi yeba nggwe wirik inpi-o” luk yiga-o.
13Alat nde, Yesus-nen it yak ondosolar-e: ”Kit-net nunggwi mende mak undurag-o” luk yak ondosoloma,
at owosirak-nen yogolar-e: ”Nir-e oroti mburu lima min keyane mberen min nak worasu-o. Nde, nir-e ap kwarat yu enmanggim nunggwi mende onggo pil mburuwakluk-nen yigen-a?” luk yiga-o. 14(Nde, ap nag-e kwarat, limaribu (5,000) nggal iri me woraiga-o.)
Nde, Yesus nen at owosirak yak ondosolar-e: ”Ap yu logona mbo koreyak onpogolar-e, ap limapulu nggal nin me kore yogolat, limapulu nggal nin me kore yogolat mag-o” luk yak indij-o.
15Yak ondosoloma-ge, at owosirak na-nen at-nen yak indid iri na nggal-et koreyak inpil mbiriga-o. 16Iri lug-e, Yesus na-nen oroti mburu lima na min keyane mberen na min wanurug-e, mbal lik karuk, Mbal Pem Nagawan wa yak turuk, mbara mbara ligik puruk, ap na tembesa wok unduwakluk, at owosirak na wok indij-o. 17It pidsa inmbitsa irit ningga-o. Nde, erep minggirig-e, at owosirak-nen yarak pukmu, mul sum duabelas irit kobong yij-o.
Peterus-nen Yesus imin para yidnak wene
9:18-20
(Mt 16:13-19; Mk 8:27-29)
18Misik tarem-e Yesus na arig-et woralat-nen tepan yosoma-ge, at owosirak na eram mbiriga-o. Mborogolikma-ge, Yesus-nen it kin wok onposolar-e: ”Ap kwarat-nen-e an-e ta-o luk neberali-o?” luk yij-o.
19Yosoloma-ge, it-nen yogolar-e: ”Ap erep-nen kar-e ap yi maroso nap Yoanes nde keberali-o. Nde, ap erep-nen-e kar-e Elia nde keberali-o. Nde, arep-nen-e: ’Lag-o. Nanduk Mbal Pem Nagawan ene lomboksa yugwi nap yeba na misik uruk yarik-nen yusu-o’ luk keberali-o” luk yiga-o.
20Yogolikma-ge, at-nen it kin wok onposolar-e: ”Kit-nen-e an-e ta-o luk neberali-o?” luk yosoloma-ge,
Peterus-nen wene erep nggarosolar-e: ”Kar-e Mbal Pem Nagawan eram-nen lobok yidnak Kerisut-nen yusu-o” luk yij-o.
Yesus-nen at andi bandi rak uburak wene min at wat momtak wene min yidnak wene
9:21-27
(Mt 16:20-28; Mk 8:30–9:1)
21Yosoloma-ge, Yesus-nen at owosirak yak ondosolar-e: ”Wene yu-ge ap misiger-o luk tet mondok yak undurak pug-o” yurug-e, 22”Ap Ambara-ge andi bandi kwarat kasolat, ogore yidnak nap min tepan omborak nagawan min imiri mbarak pidnak wene enaru nap min-nen pelek pelek tak uburuk, wuruwa-t nde, mberen naruk, kenan tak purak tarem-e tuguruk uruk tak puwa-o” luk yij-o.
23Iri luk, Yesus-nen it pidsa yak ondosolar-e: ”Ta-nen nde an nimbirik nurak perasolar-e, at-nen nggok tak poso mende pidsa keya buruk, at-nen idnak e lang pang tak na pempa-n kud turuk, an nimbirik nosolat wolmag-o. 24At uruk wolmomtak iri na nggok tak pusu nab-e at uruk wolmomtak iri na lak tak pusu-o. Nde, an nebem ala, at indi abuwa lak tak pusu nab-e uruk wolma-o. 25Ap-nen-e nggweyak ma yu me pidsa winde ma-t nde, at ambik indi pul tak posola-ge, no nde lesa wanuwa-o? 26Ta-nen nde an min an-nen yidnak wene min yurak inggiri pasiyem tak puwa nab-e, Ap Ambara an-nen-e an namawi bem Neid min lenak inpidnak aid nap min enmawi bem lobok yimin tarem-nen-e ap iri na obok para yurak na ninggiri pasiyem tak pimin-o. 27An-e ndemeret yak kundusu-o. Yu me worali nap ereb-e Mbal Pem Nagawan-nen tenagaidnak wi enlengen-e kagit lak ma-nen-e wat ma bug-o” luk yij-o.
Yesus abinal worak yidnak wene
9:28-36
(Mt 17:1-8; Mk 9:2-8)
28Wene na yuruk, tuju nggal nene lug-e, Yesus na Peterus min Yoanes min Yakobus min inmin lug-e, tepan yekluk ndobo be mbirij-o. 29Tepan yosolat worasoma-ge, at erare-ge nin yosolat, at usum-e loro lombok luk, igip kip worak irit agaij-o. 30Ereya na-net mberen nap Musa min Elia min-e 31aid arem yaya bem-nen nam luk, siyag-et woraruk Yesus na Yerusalem mbutluk, iri me wat momtak wene irit Yesus imin mbarogolat woraiga-o. 32Nde, iri tarem-e Peterus anggamirak inmin-e nene yiga-t nde, men yogolat-nen yik kaiganggal-e, Yesus na abinal worak mberen nap inmin irit mendak worakmu eneyaiga-o. 33Iri luk, mberen nap na Yesus keya buruk mborogoloma-ge, Peterus-nen at yak tosolar-e: ”Mul Nondoso Nap wa-e. Nir-e ob-et yu me worali-o. O lije kenan wurul-o. Kat kamanggim, Musa amanggim, Elia amanggim nde wurul-o” luk yij-o. (Wene yid iri-ge at indi-ge yebet kagit lak me, kasa ereya-t yij-o.)
34Nde, Peterus-nen wene na yosoma-ge, nggan nggan misik lobok yosolar-e, it na yemendak onposola, it kwiye kwarat yiga-o. 35Nde, nggan nggan na arem-nen ene iri-nen yosolar-e: ”Yu-ge an Nambara, an-nen len ibidnak nap-nen yusu-o. At-nen yidnak wene nak koler-o!” luk yij-o.
36Ene na yosoloma, it-nen yik kaiganggal-e, Yesus na arig-et worasoma yik kaiga-o. Nde, at owosirak na-nen-e it-nen kulidnak wene-ge iri tarem-nen ap misiget tet yak indigit lak, larok nak yiga-o.
Yesus-nen kugi arem nggwidnak la mbi kugi wirik pid wene
9:37-43a
(Mt 17:14-18; Mk 9:14-27)
37Nene luk, Yesus owosirak inmin ndobo bem-nen mbogola-ge, ap kwarat Yesus eram lobok yiga-o. 38Nde, ap ereba na enggendumu-nen ap misik-nen ene nggoksa yosolar-e: ”Mul Nondoso Nap wa-e. Nap wa-o. An nambara misiget nak nderak yu nde, kat-nen kanokluk pil lobok yigi-o! 39Kugi meya na at arem nggosolar-e, mimo ene nggwa luk, inggi nggo nggo owak nggo nggo, eragup kila kilasa keya boso-o. Nde, kugi iri-nen-e pempa andi bandi rak perenak worasolar-e, at arem-nen mboroso bug-o. 40Nde, kugi iri wirik puwakluk, kat kowosirak enmengen mbarigi-t nde, it-nen wirik pigit lag-o” luk yij-o.
41Yosoloma-ge, Yesus-nen yosolar-e: ”Kit kinndi angin tubu yugwi buk, lugud tak nggwe nak kwarugwi nap wa-e. Kit kinmin nunggwirik tarem nggal woramin-o? Kit kinmin nunggwirik tarem nggal mamak puruk woramin-o?” luk, ”Kambara na waruk lobok yij-o” luk eid na yak tij-o.
42La na Yesus eram mborosoma-ge, kugi na-nen la iri na mbud tak puruk, inggi lele owak lele rak pij-o. Alama-ge, Yesus-nen-e: ”Kar-e mbiri-o” luk kugi na met puruk, la na ki rak puruk, waga eid eram pij-o. 43Iri kwarosola-ge, Mbal Pem Nagawan amawi kwiye worak iri na karug-e, ap pidsa-nen wi yiga-o.
Yesus-nen ”An wat yimin-o” luk tuguruk yid wene
9:43b-45
(Mt 17:22-23; Mk 9:30-32)
43bYesus-nen kwaridnak iri na karuk, ir-e wi langgu mbal tenak irit woragola-ge, Yesus-nen at owosirak yak ondosolar-e: 44”An-nen yak kundusu wene yu-ge keneyanggo-nen kuluruk, kwara yebet ker-o. Ap Ambara na iminep wesera ki nap ininggem ubuwa-o” luk yij-o. 45Alat nde, Yesus owosirag-e wene na-ge yebet kagit lag-o. Wene na it yebet kagit lak makluk, kura bij-o. Nde, ir-e wene na at kin wok uburag-e kwiye-nen larok yiga-o.
”Ta nde kek tak wolma-o?” luk yil lobok yiga wene
9:46-48
(Mt 18:1-5; Mk 9:33-37)
46It ennggendumu-nen ta nde kek tak wolma-o luk wene iri lit lit Yesus owosirag-e yuk puk mbiga-o. 47Nde, Yesus-nen it-nen perali wene na yenggerak purug-e, la marik mbi waga at eralu mendak puruk-nen 48it yak ondosolar-e: ”An nunu bem la marik yu wanuwa nab-e an irit wok nubusu-o. Nde, an wok nubusu nab-e an wirik nibil lobok yidnak nap irit wanusu-o. Kit kennggenggerak marik worasu nap iri-ge nggulok-nen yusu-o” luk yij-o.
”Kit kinmin wene eyak witli buk nab-e kennggam-nen yili-o” luk yid wene
9:49-50
(Mk 9:38-40)
49Yosoloma-ge, Yoanes-nen yosolar-e: ”Mul Nondoso Nap wa-e. Ap misig-e kat kunu bem kugi wirik posola karug-e, ar-e nit ninmin waring kaso buk ala-ge, ’Iri kwarusu meyog-o’ luk yak tige-o” luk yij-o.
50Yosoloma-ge, Yesus-nen Yoanes min at owosirak erep min yak ondosolar-e: ”At imin-e ’Iri kwarusu meyog-o’ luk yak turak pug-o. Kit kinmin wene eyak witli buk nab-e kit kennggam-nen yili-o” luk yij-o.
O Samaria-nen Yesus wok uburak insili rak piga wene
9:51-56
51Yesus na aid arem wok uburuk ludtak tarem panggo yosola, Yerusalem mbururak peragaij-o. 52Perarug-e, at mburuwom nggwe ap mbi nanduk wirik inpij-o. Nde, it na mbirigarik, Samaria nap enma wok lug-e, at amanggim lid lud tak purak mende mbi lid lud tak puwokluk yiga-t nde, 53at indi-ge Yerusalem mbururak wat tak pidnak me, o iri nap-nen Yesus wok uburak insili rak piga-o. 54Iri ala, at ososirak mberen Yakobus min Yoanes min-e iri kwarogola karuk, it-nen yosolar-e: ”Nagawan Indo wa-e. Ap yu lak tak unpuwakluk, nit-nen-e aid arem-nen kanduk mberak pi-o yurag-e kindingen, lak?” luk yiga-o.
55Yogolikma-ge, Yesus na nden karuk, met inpij-o. 56Iri lug-e, o siri misik me mbiriga-o.
Yesus imin nugwi nap kwat momtak yiga wene
9:57-62
(Mt 8:19-22)
57Nde, Yesus owosirak inmin-e tula mburukmu-ge, ap misik-nen Yesus yak tosolar-e: ”Kat mburugun sa na an-e kimin-et mbirimin-o” luk yij-o.
58Yosoloma-ge, Yesus-nen at yak tosolar-e: ”Ndakngge nene yoso ondoro kerep eyanggo worasu-o. Nde, towe nene yoso uwi na worasu-t nde, Ap Ambara mbinggirik woraso ondoro-ge lag-o” luk yij-o. 59Yurug-e, Yesus-nen nin nap yak tosolar-e: ”An nimin ni-o” luk yak tij-et nde, ap iri-nen yosolar-e: ”Nagawan Indo wa-e. An mbirimindik, neid yapma puruk-nen obok yek-nen mbiri-o yak niri-o” luk yij-o.
60Yosoloma-ge, Yesus-nen at yak tosolar-e: ”Ap wat yidnak iri-ge wat yidnak nap-nen yapma puwag-o. Nde, kar-e Mbal Pem Nagawan-nen tenagaidnak wi wene waruk wigaril waring ki-o” luk yak tij-o.
61Yak tosoloma, nin nap-nen yosolar-e: ”Nagawan Indo wa-e. An mbirimindik, nama woragwi nap wa yak unduruk-nen kimin neyak-nen mbiri-o yak niri-o” luk yij-o.
62Yosoloma-ge, Yesus-nen at yak tosolar-e: ”Ap-nen yabu tel kereyekluk, kagweyap sindik nak puruk, imbirik nggwe yik karok wolma nab-e, Mbal Pem Nagawan ilirak kwat momtag-e meya-o” luk yij-o.
Currently Selected:
LUKAS 9: inondx
Highlight
Share
Copy
Want to have your highlights saved across all your devices? Sign up or sign in
@LAI 1992, 1994
LUKAS 9
9
Yesus-nen ap duabelas na wirik inpidnak wene
9:1-6
(Mt 10:5-15; Mk 6:7-13)
1Nde, Yesus-nen at owosirak duabelas na wene mbo unpurug-e, kugi pidsa wirik purak amawi min ap ki rak unpurak amawi min wok indij-o. 2Iri lug-e, Mbal Pem Nagawan-nen tenagaidnak wi wene mul ondogolat, ud enpem mbidnak nap ki rak inpil nogolat yuwakluk wirik inpij-o. 3At-nen it yak ondosolar-e: ”Tu waring kagolar-e, silobulo mbi wanurak pug-o. Wangun ala na, kot manik ala na, mburu ala na, uwang ala na, yurugwi sum mberen ala na wanurak pug-o. 4Nde, o mbi-nen wok konpogola-ge, iri me-t woraruk, o siri iri me-nen mborogolat-net keya burag-o. 5Nde, ap-nen wok kinpigit lak yogola-ge, o siri iri me-nen mborogolar-e, it inndi wanuwakluk kunuwok liri pil karuk mberer-o” luk yak indij-o.
6Yak ondosoloma, at owosirak na mborogolar-e, o siri marik ereba na nggwe nogolar-e, aid wene yak indil nogolat ap ki rak onpogolat kwaril niga-o.
Erores indi kabak yid wene
9:7-9
(Mt 14:1-12; Mk 6:14-29)
7Iri kwaril waring kaidnak wene na-ge o Nggalilea nggweyak tena woraso Erores-nen kulurug-e, indi kabak yamu-o. Ap erep-nen yogolar-e: ”Ap yi maroso nap Yoanes na tuguruk uruk yamu-o!” yogolat, 8it erep-nen yogolar-e: ”Lag-o. Elia na nam yamu-o” yagolat, nde, erep-nen yogolar-e: ”Lag-o. Nanduk Mbal Pem Nagawan ene lomboksa yugwi nap ereba na misik uruk yarig-o” yogolat yogola, at indi kabak yamu-o. 9Iri ala-ge, Erores-nen yosolar-e: ”Yoanes urusu mbaruwakluk yak undukmu, urusu mbariga na-t nde, at owene an kwarat kulusu yu-ge ta-o?” yurug-e, Yesus kudtak irit peragaij-o.
Yesus-nen ap limaribu mburu mak indidnak wene
9:10-17
(Mt 14:13-21; Mk 6:30-44; Yo 6:1-14)
10Wirik inpidnak nap na-ge tuguruk Yesus eram wok yigarig-e, kwaril waring kaidnak wene na kiringgiga-o. Iri lug-e, Yesus na it inmin luk, enarik nak o siri Mbetsaira mbiriga-o. 11Mborogola-ge, it mbiriga onpok enaru lug-e, ap kwarat na at imbirik mbiriga-o. Mborogola, Yesus-nen imin tak unpurug-e, Mbal Pem Nagawan-nen tenagaidnak wi wene yak ondosolat, ap kugi worak it ennggendumu ki rak onposolat kwarij-o.
12Nde, o ki yosola-ge, at owosirak duabelas na at eram lobok yigarik-nen yogolar-e: ”O yu-ge ap lak ma me, ap yeba-ge it norak mburu min it nene yurak o min kore yuwakluk, o siri inggi inggi yeba nggwe wirik inpi-o” luk yiga-o.
13Alat nde, Yesus-nen it yak ondosolar-e: ”Kit-net nunggwi mende mak undurag-o” luk yak ondosoloma,
at owosirak-nen yogolar-e: ”Nir-e oroti mburu lima min keyane mberen min nak worasu-o. Nde, nir-e ap kwarat yu enmanggim nunggwi mende onggo pil mburuwakluk-nen yigen-a?” luk yiga-o. 14(Nde, ap nag-e kwarat, limaribu (5,000) nggal iri me woraiga-o.)
Nde, Yesus nen at owosirak yak ondosolar-e: ”Ap yu logona mbo koreyak onpogolar-e, ap limapulu nggal nin me kore yogolat, limapulu nggal nin me kore yogolat mag-o” luk yak indij-o.
15Yak ondosoloma-ge, at owosirak na-nen at-nen yak indid iri na nggal-et koreyak inpil mbiriga-o. 16Iri lug-e, Yesus na-nen oroti mburu lima na min keyane mberen na min wanurug-e, mbal lik karuk, Mbal Pem Nagawan wa yak turuk, mbara mbara ligik puruk, ap na tembesa wok unduwakluk, at owosirak na wok indij-o. 17It pidsa inmbitsa irit ningga-o. Nde, erep minggirig-e, at owosirak-nen yarak pukmu, mul sum duabelas irit kobong yij-o.
Peterus-nen Yesus imin para yidnak wene
9:18-20
(Mt 16:13-19; Mk 8:27-29)
18Misik tarem-e Yesus na arig-et woralat-nen tepan yosoma-ge, at owosirak na eram mbiriga-o. Mborogolikma-ge, Yesus-nen it kin wok onposolar-e: ”Ap kwarat-nen-e an-e ta-o luk neberali-o?” luk yij-o.
19Yosoloma-ge, it-nen yogolar-e: ”Ap erep-nen kar-e ap yi maroso nap Yoanes nde keberali-o. Nde, ap erep-nen-e kar-e Elia nde keberali-o. Nde, arep-nen-e: ’Lag-o. Nanduk Mbal Pem Nagawan ene lomboksa yugwi nap yeba na misik uruk yarik-nen yusu-o’ luk keberali-o” luk yiga-o.
20Yogolikma-ge, at-nen it kin wok onposolar-e: ”Kit-nen-e an-e ta-o luk neberali-o?” luk yosoloma-ge,
Peterus-nen wene erep nggarosolar-e: ”Kar-e Mbal Pem Nagawan eram-nen lobok yidnak Kerisut-nen yusu-o” luk yij-o.
Yesus-nen at andi bandi rak uburak wene min at wat momtak wene min yidnak wene
9:21-27
(Mt 16:20-28; Mk 8:30–9:1)
21Yosoloma-ge, Yesus-nen at owosirak yak ondosolar-e: ”Wene yu-ge ap misiger-o luk tet mondok yak undurak pug-o” yurug-e, 22”Ap Ambara-ge andi bandi kwarat kasolat, ogore yidnak nap min tepan omborak nagawan min imiri mbarak pidnak wene enaru nap min-nen pelek pelek tak uburuk, wuruwa-t nde, mberen naruk, kenan tak purak tarem-e tuguruk uruk tak puwa-o” luk yij-o.
23Iri luk, Yesus-nen it pidsa yak ondosolar-e: ”Ta-nen nde an nimbirik nurak perasolar-e, at-nen nggok tak poso mende pidsa keya buruk, at-nen idnak e lang pang tak na pempa-n kud turuk, an nimbirik nosolat wolmag-o. 24At uruk wolmomtak iri na nggok tak pusu nab-e at uruk wolmomtak iri na lak tak pusu-o. Nde, an nebem ala, at indi abuwa lak tak pusu nab-e uruk wolma-o. 25Ap-nen-e nggweyak ma yu me pidsa winde ma-t nde, at ambik indi pul tak posola-ge, no nde lesa wanuwa-o? 26Ta-nen nde an min an-nen yidnak wene min yurak inggiri pasiyem tak puwa nab-e, Ap Ambara an-nen-e an namawi bem Neid min lenak inpidnak aid nap min enmawi bem lobok yimin tarem-nen-e ap iri na obok para yurak na ninggiri pasiyem tak pimin-o. 27An-e ndemeret yak kundusu-o. Yu me worali nap ereb-e Mbal Pem Nagawan-nen tenagaidnak wi enlengen-e kagit lak ma-nen-e wat ma bug-o” luk yij-o.
Yesus abinal worak yidnak wene
9:28-36
(Mt 17:1-8; Mk 9:2-8)
28Wene na yuruk, tuju nggal nene lug-e, Yesus na Peterus min Yoanes min Yakobus min inmin lug-e, tepan yekluk ndobo be mbirij-o. 29Tepan yosolat worasoma-ge, at erare-ge nin yosolat, at usum-e loro lombok luk, igip kip worak irit agaij-o. 30Ereya na-net mberen nap Musa min Elia min-e 31aid arem yaya bem-nen nam luk, siyag-et woraruk Yesus na Yerusalem mbutluk, iri me wat momtak wene irit Yesus imin mbarogolat woraiga-o. 32Nde, iri tarem-e Peterus anggamirak inmin-e nene yiga-t nde, men yogolat-nen yik kaiganggal-e, Yesus na abinal worak mberen nap inmin irit mendak worakmu eneyaiga-o. 33Iri luk, mberen nap na Yesus keya buruk mborogoloma-ge, Peterus-nen at yak tosolar-e: ”Mul Nondoso Nap wa-e. Nir-e ob-et yu me worali-o. O lije kenan wurul-o. Kat kamanggim, Musa amanggim, Elia amanggim nde wurul-o” luk yij-o. (Wene yid iri-ge at indi-ge yebet kagit lak me, kasa ereya-t yij-o.)
34Nde, Peterus-nen wene na yosoma-ge, nggan nggan misik lobok yosolar-e, it na yemendak onposola, it kwiye kwarat yiga-o. 35Nde, nggan nggan na arem-nen ene iri-nen yosolar-e: ”Yu-ge an Nambara, an-nen len ibidnak nap-nen yusu-o. At-nen yidnak wene nak koler-o!” luk yij-o.
36Ene na yosoloma, it-nen yik kaiganggal-e, Yesus na arig-et worasoma yik kaiga-o. Nde, at owosirak na-nen-e it-nen kulidnak wene-ge iri tarem-nen ap misiget tet yak indigit lak, larok nak yiga-o.
Yesus-nen kugi arem nggwidnak la mbi kugi wirik pid wene
9:37-43a
(Mt 17:14-18; Mk 9:14-27)
37Nene luk, Yesus owosirak inmin ndobo bem-nen mbogola-ge, ap kwarat Yesus eram lobok yiga-o. 38Nde, ap ereba na enggendumu-nen ap misik-nen ene nggoksa yosolar-e: ”Mul Nondoso Nap wa-e. Nap wa-o. An nambara misiget nak nderak yu nde, kat-nen kanokluk pil lobok yigi-o! 39Kugi meya na at arem nggosolar-e, mimo ene nggwa luk, inggi nggo nggo owak nggo nggo, eragup kila kilasa keya boso-o. Nde, kugi iri-nen-e pempa andi bandi rak perenak worasolar-e, at arem-nen mboroso bug-o. 40Nde, kugi iri wirik puwakluk, kat kowosirak enmengen mbarigi-t nde, it-nen wirik pigit lag-o” luk yij-o.
41Yosoloma-ge, Yesus-nen yosolar-e: ”Kit kinndi angin tubu yugwi buk, lugud tak nggwe nak kwarugwi nap wa-e. Kit kinmin nunggwirik tarem nggal woramin-o? Kit kinmin nunggwirik tarem nggal mamak puruk woramin-o?” luk, ”Kambara na waruk lobok yij-o” luk eid na yak tij-o.
42La na Yesus eram mborosoma-ge, kugi na-nen la iri na mbud tak puruk, inggi lele owak lele rak pij-o. Alama-ge, Yesus-nen-e: ”Kar-e mbiri-o” luk kugi na met puruk, la na ki rak puruk, waga eid eram pij-o. 43Iri kwarosola-ge, Mbal Pem Nagawan amawi kwiye worak iri na karug-e, ap pidsa-nen wi yiga-o.
Yesus-nen ”An wat yimin-o” luk tuguruk yid wene
9:43b-45
(Mt 17:22-23; Mk 9:30-32)
43bYesus-nen kwaridnak iri na karuk, ir-e wi langgu mbal tenak irit woragola-ge, Yesus-nen at owosirak yak ondosolar-e: 44”An-nen yak kundusu wene yu-ge keneyanggo-nen kuluruk, kwara yebet ker-o. Ap Ambara na iminep wesera ki nap ininggem ubuwa-o” luk yij-o. 45Alat nde, Yesus owosirag-e wene na-ge yebet kagit lag-o. Wene na it yebet kagit lak makluk, kura bij-o. Nde, ir-e wene na at kin wok uburag-e kwiye-nen larok yiga-o.
”Ta nde kek tak wolma-o?” luk yil lobok yiga wene
9:46-48
(Mt 18:1-5; Mk 9:33-37)
46It ennggendumu-nen ta nde kek tak wolma-o luk wene iri lit lit Yesus owosirag-e yuk puk mbiga-o. 47Nde, Yesus-nen it-nen perali wene na yenggerak purug-e, la marik mbi waga at eralu mendak puruk-nen 48it yak ondosolar-e: ”An nunu bem la marik yu wanuwa nab-e an irit wok nubusu-o. Nde, an wok nubusu nab-e an wirik nibil lobok yidnak nap irit wanusu-o. Kit kennggenggerak marik worasu nap iri-ge nggulok-nen yusu-o” luk yij-o.
”Kit kinmin wene eyak witli buk nab-e kennggam-nen yili-o” luk yid wene
9:49-50
(Mk 9:38-40)
49Yosoloma-ge, Yoanes-nen yosolar-e: ”Mul Nondoso Nap wa-e. Ap misig-e kat kunu bem kugi wirik posola karug-e, ar-e nit ninmin waring kaso buk ala-ge, ’Iri kwarusu meyog-o’ luk yak tige-o” luk yij-o.
50Yosoloma-ge, Yesus-nen Yoanes min at owosirak erep min yak ondosolar-e: ”At imin-e ’Iri kwarusu meyog-o’ luk yak turak pug-o. Kit kinmin wene eyak witli buk nab-e kit kennggam-nen yili-o” luk yij-o.
O Samaria-nen Yesus wok uburak insili rak piga wene
9:51-56
51Yesus na aid arem wok uburuk ludtak tarem panggo yosola, Yerusalem mbururak peragaij-o. 52Perarug-e, at mburuwom nggwe ap mbi nanduk wirik inpij-o. Nde, it na mbirigarik, Samaria nap enma wok lug-e, at amanggim lid lud tak purak mende mbi lid lud tak puwokluk yiga-t nde, 53at indi-ge Yerusalem mbururak wat tak pidnak me, o iri nap-nen Yesus wok uburak insili rak piga-o. 54Iri ala, at ososirak mberen Yakobus min Yoanes min-e iri kwarogola karuk, it-nen yosolar-e: ”Nagawan Indo wa-e. Ap yu lak tak unpuwakluk, nit-nen-e aid arem-nen kanduk mberak pi-o yurag-e kindingen, lak?” luk yiga-o.
55Yogolikma-ge, Yesus na nden karuk, met inpij-o. 56Iri lug-e, o siri misik me mbiriga-o.
Yesus imin nugwi nap kwat momtak yiga wene
9:57-62
(Mt 8:19-22)
57Nde, Yesus owosirak inmin-e tula mburukmu-ge, ap misik-nen Yesus yak tosolar-e: ”Kat mburugun sa na an-e kimin-et mbirimin-o” luk yij-o.
58Yosoloma-ge, Yesus-nen at yak tosolar-e: ”Ndakngge nene yoso ondoro kerep eyanggo worasu-o. Nde, towe nene yoso uwi na worasu-t nde, Ap Ambara mbinggirik woraso ondoro-ge lag-o” luk yij-o. 59Yurug-e, Yesus-nen nin nap yak tosolar-e: ”An nimin ni-o” luk yak tij-et nde, ap iri-nen yosolar-e: ”Nagawan Indo wa-e. An mbirimindik, neid yapma puruk-nen obok yek-nen mbiri-o yak niri-o” luk yij-o.
60Yosoloma-ge, Yesus-nen at yak tosolar-e: ”Ap wat yidnak iri-ge wat yidnak nap-nen yapma puwag-o. Nde, kar-e Mbal Pem Nagawan-nen tenagaidnak wi wene waruk wigaril waring ki-o” luk yak tij-o.
61Yak tosoloma, nin nap-nen yosolar-e: ”Nagawan Indo wa-e. An mbirimindik, nama woragwi nap wa yak unduruk-nen kimin neyak-nen mbiri-o yak niri-o” luk yij-o.
62Yosoloma-ge, Yesus-nen at yak tosolar-e: ”Ap-nen yabu tel kereyekluk, kagweyap sindik nak puruk, imbirik nggwe yik karok wolma nab-e, Mbal Pem Nagawan ilirak kwat momtag-e meya-o” luk yij-o.
Currently Selected:
:
Highlight
Share
Copy
Want to have your highlights saved across all your devices? Sign up or sign in
@LAI 1992, 1994