MARAKUS 10
10
Yesus-nen ”Kwe keya burak pug-o” luk yidnak wene
10:1-12
(Mt 19:1-12; Lk 16:18)
1Yesus na iri me-nen mborosolar-e, o Yurea waring kil kil-e yi Yorodan eyak ele nggwe wok yosola-ge, ap kwarat tuguruk at eram ndok worogola-ge, at-nen-e mul ondoso na nggal-et mul indij-o.
2Mul ondosoma-ge, Parisi nap erep at eram lobok yogolat, at abut mbaruwokluk it-nen kin wok obogolar-e: ”Ap-nen onkwe keya burag-e op, lak?” luk kin wok obogolikma-ge,
3Yesus-nen onggo it kin wok onposolar-e: ”Musa-nen-e iri kwarurak wene-ge no kwarurag-o luk yak kindij-o?” luk kin wok onposoloma-ge,
4it-nen yogolar-e: ”Musa-nen yosolar-e: ’Ap-nen kwe keya bogolar-e, engga mbara wok turuk-nen keya burag-e konag-o luk yij-o’ ” luk yiga-o.
5Yogolikma-ge, Yesus-nen it yak ondosolar-e: ”Kir-e kinndi tulubuk yu ala karuk, Musa-nen: ’Iri kwarurag-o’ luk engga mbal kendamu-o. 6Alat nde, tel korosolat-net yi mende ndi mende ndak worosolar-e, Mbal Pem Nagawan-nen ap min kwe min ndak wat enpamu-o. 7Iri bem-e ap-nen eid ija keya unpuruk, ogwe min misiget nak kwat yogolar-e, 8it enmbereg-e enpe misiget kwat yusu-o. Iri alar-e, ir-e mberen-e lag-o. Alat nde, enpe misiget-nen yusu-o. 9Iri bem-e Mbal Pem Nagawan-nen misiget tak pidnak iri-ge ap-nen pinggirik purag-e mondok meya-o” luk yij-o.
10Yurug-e, it-nen-e ma mbirigarig-e at owosirak-nen wene iri na-ge Yesus na kin wok ibiga-o. 11Kin wok obogolikma-ge, at-nen it yak ondosolar-e: ”Ap-nen at ogwe keya buruk, nin kwe nde wanosola-ge, nanduk ogwe iri na imin-e mbabi-t worasu-o. 12Nde, iri nggal-et kwenen at un keya buruk, ap nin nde wanosola-ge, iri na mbabi-t yusu-o” luk yak indij-o.
Yesus-nen li marik marik imbiringgat tak inpidnak wene
10:13-16
(Mt 19:13-15; Lk 18:15-17)
13Nde, Yesus inggi-nen tena unpuwakluk, ap erep-nen-e li marik marik Yesus eram wok unpuruk lobok yiga-t nde, at owosirak-nen-e ap ereba na met inpiga-o. 14Met onpogolikma karuk, Yesus na isilepma luk, at owosirak yak ondosolar-e: ”Li marik marig-e an neram lobok yuwag-o. Ap inndi-ge li marik yu inndi nggal kwat ma nap-net Mbal Pem Nagawan-nen tenagaidnak wi winde momtak nap-nen yili me, langgal eneyali meyog-o. 15An-e ndemeret yak kundusu-o. Ta-nen nde Mbal Pem Nagawan-nen tenagaidnak wi na li marik-nen wanugwi nggal wanili buk nab-e ar-e iri me mondok ngguwa bug-o” luk yij-o. 16Yurug-e, li marik marik na at inggi-nen manuksa tena unpuruk yarik, imbiringgat tak inpij-o.
Isilobulo worak nap owene
10:17-31
(Mt 19:16-30; Lk 18:18-30)
17Yesus na mbururak sa nggwe mborosoma-ge, ap misik at eram puburak lobok yarik, at urugom endaru yunggusa kore luk-nen kin wok obosolar-e: ”Mul Nondoso Nap, Konak Nap wa-e. Nurug-et woralik nalik wolmomtak waneyek-nen an-e ngge nde kwarimin-o?” luk kin wanij-o.
18Kin wanosoloma-ge, Yesus-nen at yak tosolar-e: ”Kar-e noluk-nen konak nab-o yak nirigen-o? Ap misiget ter-o luk konak nap mbi-ge lag-o. Konag-e Mbal Pem Nagawan ariget nag-o. 19Mbal Pem Nagawan-nen ’Irit kwarurag-o’ yidnak wene-ge: ’Ap wururak pug-o. Ap onkwe yeburak pug-o. Yariya wanurak pug-o. Kenesiget wene bem ap onpok purak pug-o. Ap onmbol pem ludtak pug-o. Keid kija-nen yidnak yidnak kwarurag-o’ luk yidnak wene iri-ge kar-e karu nar-o” luk yak tij-o.
20Yak tosoloma-ge, at iri-nen yosolar-e: ”Mul Nondoso Nap wa-e. An-e li marik pem-net wene iri-ge kwarosolat woraso-o” luk yij-o.
21Yosola-ge, Yesus-nen ap iri na yik karuk, abuwa kasoluk-nen yak tosolar-e: ”Kat-nen kwarurak mende-ge misiget nak keya bigen-o. Kat mburugundik kisilobulo pidsa onggo wanuruk, tol iri-ge insilobulo lak nap tembesa wok unduruk, lobok yosolar-e, an nimin ni-o. Iri yugundik pem-e, aid arem-nen silobulo kwarat wanugun-o” luk yak tij-o. 22Iri wene yak tosola karug-e, at isilobulo kwarat me, at indi kabak luk, indi puru min-et mbirij-o.
23Mborosoloma-ge, Yesus-nen at owosirak na yik eneyasolat-nen yak ondosolar-e: ”Insilobulo worak nap-nen-e Mbal Pem Nagawan-nen tenagaidnak wi-ge nggesa nggal-nen ngguwa-o!” luk yij-o.
24Yosoloma-ge, at owosirag-e wene iri na kulurug-e, wi yiga-t nde, Yesus-nen tuguruk yak ondosolar-e: ”Nowosirak wa-e. It inndi silobulo nak yebet kali nab-e Mbal Pem Nagawan-nen tenagaidnak wi iri me nggurag-e angin kwarar-o! 25Sapi wam-nen-e luruk erel uru nggwe nggurag-e te-t nde, insilobulo worak nap-nen Mbal Pem Nagawan-nen tenagaidnak wi nggurag-e angin-nen yusu-o” luk yij-o.
26Yosoloma-ge, at owosirak-nen wi langgu mbarogolat-nen yak kerak mbogolar-e: ”Iri ala-ge, ab-e ta nggal nak inmiri yuwa kali-o?” luk yak kerak mbiga-o.
27Yogolikma-ge, Yesus-nen it yik eneyasolat-nen yak ondosolar-e: ”Ki nap-nen inmiri yurag-e meya-t nde, Mbal Pem Nagawan-nen perak nde inmiri yurag-e ndak-net yusu-o. Mbal Pem Nagawan-nen yi mende ndi mende kwarurak iri-ge pidsa ndak-nen yusu-o” luk yak indij-o.
28Yak ondosoloma-ge, Peterus-nen Yesus yak tosolar-e: ”Yu nde ki-o. Nir-e kat kimin nurak pem yi mende ndi mende keya bige-o” luk yak tij-o.
29Yak tosoloma-ge, Yesus-nen yosolar-e: ”An-e ndemeret yak kundusu-o. An nebem ala na, aid wene bem ala na ap-nen at uwi nde owe owot nde iridtak nde eid ija nde ilirak nde eyabu nde keya buwa nab-e, 30yawo-nen perak terak mena winde yosolar-e, uwi min owe owot min iridtak min eid ija min ilirak min eyabu min-e winde yuwa-t nde, iri-nen andi bandi min-et wanuwa-o. Nde, abok-nen perak nde unlug-et pem-et wolmomtak elem irit wanuwa-o. 31Alat nde, ap kwarat-nen yawo yu-nen nandug-et yili nab-e abok ma-o. Nde, yawo abok yili nab-e nanduk ma-o” luk yij-o.
Kenan pem tak posolat Yesus-nen at wat momtak wene yij-o
10:32-34
(Mt 20:17-19; Lk 18:31-34)
32Yesus min at owosirak min-e Yerusalem nggwe lagolar-e, Yesus na-ge it lit eneyaruk lasola-ge, owosirak na inndi nggwirik yiga-o. Nde, it inmbirik mbiriga nap-nen na kwiye kwarat kaiga-o. Kagolikma-ge, Yesus na-ge owosirak na lobok yer-o luk enarik mu-nen at kwat uburak wene yak indij-o. 33Yak ondosolar-e: ”Yu nde ker-o. Nir-e Yerusalem lali-o. Nde, Ap Ambara an-e tepan omborak nagawan nagawan nde imiri mbarak pidnak wene enaru nap nde ininggem nubuwama-ge, it-nen-e an nuruwakluk niminep wesera enlem nin nap ininggem nubuwa-o. 34Iri lug-e, it-nen-e an pesel nobogolat, wusi tebal nobogolat, linggamburok norogolat tak nuburuk, e lang pang tak pem nuruwa-t nde, mberen naruk men yimin-o” luk yak indij-o.
Yakobus min Yoanes min-nen nggi yiga wene
10:35-45
(Mt 20:20-28)
35Iri lug-e Sebendeus ilirak Yakobus min Yoanes min Yesus eram lobok yigarik, at yak togolar-e: ”Nggomo Nondoso Nap wa-e. Kat-nen nit kwat nunpurak ninndi peraidnak misik worasu-o” luk yak tiga-o.
36Yak togolikma-ge, Yesus-nen it yak ondosolar-e: ”An-nen kwat kunpurag-e no mende nde yigeb-o?” luk yak indij-o.
37Yak ondosoloma-ge, it-nen at yak togolar-e: ”Kat nagawan yosola tarem-e nir-e kat kinggi kigit nggwe, kware nggwe koreyak nunpurag-e nindingen-o” luk yak tiga-t nde, 38Yesus-nen it yak ondosolar-e: ”Kit-nen nggi yigep iri-ge kenaru buk-nen yigeb-o. Andi bandi kagwi mende yimbe arem kenanggo an namin iri erep kit-nen norag-e ndag-a? Nde, an andi bandi kamin mende iri kit kudtag-e ndag-a?” luk yak indij-o. 39Yak ondosoloma-ge, it-nen yogolar-e: ”Kwarul-er-o” luk yiga-o. Yogolikma-ge, Yesus-nen it yak ondosolar-e: ”Andi bandi kagwi mende yimbe arem kenanggo namin iri-ge kir-e ndemeret nonggolat, nde, andi bandi kamin mende iri na kagolat yugub-et nde, 40an ninggi kigit nggwe, kware nggwe kore yurak iri-ge an nebem-e lag-o. Iri me kore yurak iri-ge Mbal Pem Nagawan nak-nen koreyak unpuwa-o” luk yak indij-o.
41Wene iri na kulurug-e, Yesus owosirak enpe sepulu ereya-nen-e insilepma-ge Yakobus min Yoanes min enpem piga-o. 42Pogolikma-ge, Yesus-nen owosirak wene mbo unpuruk, it yak ondosolar-e: ”Mbal Pem Nagawan enaru buk nap pemerinta-nen-e it-nen tenagaidnak wi woragwi nap teberak onpogolat, nde, it ap yok nggok-nen na it enne amawi bem teberak unpugwi iri-ge kir-e kenaru nar-o. 43Alat nde, kir-e iri nggal kwarurak pug-o. Are, ta-nen nde kit kennggendumu yu me ap nggok yurak perasolar-e, kit ndegel konposo nap irit kwat mag-o. 44Nde, ta-nen nde kit kennngendumu nandug-et yidnak nap kwat momtak perasolar-e, ap pidsa ndegel onposo nap kwat mag-o. 45Nde, Ap Ambara-ge at ndegel ubuwakluk lobok yij-e lag-o. Are, ap ndegel onposolat, ap pidsa inmiri yekluk at iminep wesel korayekluk lobok yamu-o” luk yij-o.
Yesus-nen ap Mbatimeus erengen ngguru na kuwarak pid wene
10:46-52
(Mt 20:29-34; Lk 18:35-43)
46Ir-e o Yeriko wok yiga-o. Wok lug-e, Yesus min at owosirak min ap kwarat min inmin lug-e Yeriko-nen mburukmu-ge, Timeus ambara Mbatimeus, erengen ngguru na-ge tu mbanggo nggwe koreyak woralar-e, silobulo nggi tenak woragij-o. 47Worasoma-ge, ”Yesus Nasaret nap na lobok yusu-o” yogola kulurug-e, at iri na-nen yosolar-e: ”Yesus, Ndaud Ambara wa-e. An nabuwa ki-o” luk ene ngguloksa-t yij-o.
48Yosola-ge, it ap kwarat-nen ”Kene meyog-o” luk yak tiga-t nde, at-nen-e ebem lud nde ene ngguloksa-t yosolar-e: ”Ndaud Ambara wa-e. An nabuwa ki-o” irit yosolat woragaij-o.
49Nde, Yesus na ndong luk-nen yosolar-e: ”At iri wene mbo ber-o” luk yosoloma-ge, it-nen ap erengen ngguru na yak togolar-e: ”Kwiye lag-et men min-o. Wene mbo kubusu-o” luk yak tiga-o.
50Yak togolikma-ge, at na-ge at usum na yonggora mbo buruk, ndaget nak men luk, Yesus eram mbirij-o.
51Mborosola-ge, Yesus-nen at yak tosolar-e: ”An-nen no kwat kuburak perasu-o?” luk kin wok obosoloma-ge, ap erengen ngguru-nen yosolar-e: ”Nggomo Nondoso Nap wa-e. An nerengen-nen kudtak irit nindingen-o” luk yij-o.
52Yosoloma-ge, Yesus-nen at yak tosolar-e: ”Kat kindi angin tubu yigen iri na-net ki rak kebamu me, mbiri-o” luk yak tosoloma ereya na-net erengen-nen kaso kwat luk, Yesus imin mbirij-o.
Currently Selected:
MARAKUS 10: inondx
Highlight
Share
Copy
Want to have your highlights saved across all your devices? Sign up or sign in
@LAI 1992, 1994
