Kul Nmò 8

1,2Wen se kem tau ngelem kehtahu le bè Dwata ne tilob klolò le yó kem hlau Musis, lu fen lembeng ke Stéfén ne tey klangag le du snéen. Okóm ke Sol kun, tey kehyu nawahen bè yóm khatay le ke Stéfén.

Kehsidek Sol yó kem tau hemtahu bè Jisas

Tódô kewóten bè yóm kdaw yó, sónmò le tendo hemsidek kul yó kem tau hemtahu bè Jisas bè Jirusalim. Gotu le sekla mlóy gu bè Jirusalim yó kem tau hemtahu bè Jisas, mlóy le etu bè klamangen prubinsya Judiya ne klamangen Samarya. Són yó kem sfolò lewu tehe nélék Jisas tagak bè Jirusalim.

3Yó nmò Sol, sónmoen tendo tô gemlà yó kem tau hemtahu bè Jisas. Tódô keten gónô mebel kul yó kem tau hemtahu bè Jisas, libun duhen ke logi, gotu kenfóen lu, ne suen lu lem blanggù.

Ktolok Filip bè Samarya

4Yó kem tau hemtahu bè Jisas deng sekla yó koni, balù kihu benwu gónó le e mlóy, là kóen skó tendo kehetngón le du yóm tulón lemwót bè Jisas. 5Lemwót se ke Filip kun, mógów ebè yóm tey syudad bong bè Samarya nan e hetngón bè yó Jisas se yóm Misaya. 6Timbow gungol yó kem tey tau yóm ktolok Filip, ne ton le se yó kem dê hentaw ton gel nmoen, tey khungol le du yóm gel toloken. 7Balù yó kem busaw malak yó kem tau gotu hdóhen lu. Bè yóm gel kehdóhen kul, ya tey sidek klangat le. Ne tey dê se kem tau deng matay sfu lówó le, ne yó kem tau kihod, gotu le tódô bud hyu. 8Ya tey kehligal yó kem tau bè yóm syudad yó.

9Wen sotu tau nô bè yó boluyen Simun. Tey wen nmoen lem blóng yó kem tau bè Samarya lemwót bè yóm kwen lamaten, ne tey gel kehtaw le du snéen. Tey gel kudélen hegeta. 10Tódô kdéen tau bè yóm benwu yó, lenwóten bè yó kem tau glaan kkólen bè yó kem tau hol geta, tey gel khungol le du. Yó gel mon le, “Yóm kun ktulus ni, tódô lemwót bè Dwata, yóm gel mon le, ‘Hol Tahu Tulus Dwata.’ ” 11Tey legen ne gel kmò Simun du lem blóng le yóm gel hentaw le lemwót bè yóm lamaten, yó gónón tey dê tau lemolò du. 12Okóm bè yóm kun ktolok Filip lem blóng le, gel tulónen kul yóm Tulón Hyu gbak ebè yóm kmò kogot Dwata tau, ne yóm deng nmò Jisas Krays. Bè yóm kungol le du, tódô hentahu le, ne tey dê hbabtays ke Filip, kem logi dalang se kem libun. 13Balù se ke Simun, botong gbót hemtahu se kun. Kogol yóm kehbabtaysen, tódô hlós mung ke Filip. Tey kehtawen yó kem hentaw ton gel nmò Filip.

14Tikóng gefet ebè yó kem tehe nélék Jisas bè Jirusalim yóm deng kwen hemtahu du yóm Udél Dwata bè yó bè Samarya, glok le hógów kul le Pitér ne Jan etu bélê le. 15Timbow le gefet ditu, mni le bè Dwata bè yó kem tau deng hemtahu anì blay Dwata kul yóm kun Tulus. 16Abay se là dengen sut bélê le he yóm Tulus Dwata, olo le deng hbabtays bè kun boluy yóm gónó tekuy mogot Jisas. 17Omin le Pitér semket mnok yó kem tau deng hemtahu bè Jisas, ne tódô blay Dwata kul se yóm Tulusen.

18Bè yóm kton Simun du yóm deng ksuten bè yó kem tau hemtahu yóm Tulus Dwata lan le Pitér mnok kul, wen filak tô blayen kul le Pitér ne Jan, 19monen mò kul, “Benlay ye se o dé kfasang mò du yóm nmò ye ni anì yó, ke wen se dou tau nenok, guta le se yóm Tulus Dwata.”

20Okóm mom mon Pitér mò du, “Bong yó dum hendemem yó, angat gmung kóm elem lanaw ofi yó dum filakem yó. Ilóem kmonem ke gbekem bemli du yóm Tulus Dwata. 21Laen kô dù kóm du yóm kum nmò ni, abay se là tedeng kton Dwata du yóm kehedemem. 22Hegseli dé bè yóm tey sidek tô atulem ni,” mon Pitér, “ne holi mni bè Dwata anì hnifóten béléem yóm alì ksidek kehedemem yó. 23Dilóu són sélés nawa nô lem hendemem, tolohi gfét lem salà he.”

24Omin Simun mon du mò kul le Pitér ne Jan, “Hol hni ye se o bè Dwata anì là suten béléu yóm monem yó.”

25Nan na malù legen udì he ktolok Pitér ne Jan bè yóm benwu yó. Tulón le yóm hol kul kmò kton du yóm tehe gel nmò Jisas, ne tulón le se yóm tehe gel toloken. Omin le yó bud mulék ebè Jirusalim, okóm nan dê benwu bè Samarya gónó le na slob tmolok du yóm Tulón Hyu gel nwit le.

Filip ne yóm tau wen glalen lemwót bè Ityupya

26Sotu kdaw bè yó, wen hógów Dwata lemwót gu bè longit gdek bè Filip, ne monen mò du, “Géhéli ne, mógówi mool, loloem yóm lan lemwót bè Jirusalim mógów ebè benwu Gasa.” Uma là klet lolò tau du yóm lan yó ni kmoen ni. 27,28Tahu se, tódô lemwót Filip. Bè yóm kógówen, tódô gtodolen yóm sotu tau lemwót bè tólóng benwu boluyen Ityupya, kól mulék gu bè Jirusalim lanen na a mung tmaba Dwata bè yó. Nim tau ni, bong glalen bè yóm libun boi mogot benwu le. Yó glal nogoten, du fen gel mogot filak bè yóm kul benwu. Yóm igoen myón te klisahen, wen senfalahen bè yóm bok tehe snulat yóm sotu tugod Dwata boluyen Isaya.

29Lemwót yóm Tulus Dwata stulón ke Filip, monen, “Hlonihi ebè tum klisahen.”

30Tahu se, heflóng huli du Filip, ne gungolen yóm senfalahen lemwót bè yóm tehe snulat Isaya. Ne monen mò yóm tau yó, “Tngónem kô lanen yóm senfalahem yó?”

31Mon yóm tau genlal yó koni, “Tô kmò ketngónu du se ke laen dù tau tmulón du dou.” Ne hsakayen Filip ta klisahen. 32Tahu se, motun Filip. Ni sii yóm senfalahen bè yóm udél Dwata, monen,

“Yóm tau hnatay le yó, lómón ke yóm ubiha

nalak le bè yóm gónó le sembalì du,

là kóen dog kmédéw.

Duhen yóm ngà ubiha ke nóngós le béléen yóm bulen,

là kóen dog kmédéw, tódô hbayà.

Lómón yó se kmoen yóm tau hnayam le yó,

là kô nan e bnalà kul, tódô hbayà bélê le.

33Tódô kem henyak le,

là kô dog hlan le du bè yóm kukum tedeng.

Laen se kô dù tau semtulón du ke wen semfu gu béléen,

abay se kendel mom lensón le klowilen.”#8:33 8:32-33 Isaya 53:7-8.

34Yó snólók yóm tau genlal yó bè Filip, monen, “Tulónem do kun, gónón e gbak yóm senfalahu ni koni? Gbak ebè yóm tehe tugod Dwata tehe smulat du kô, duhen ke ebè tólóng tau?” 35Tódô hewót Filip bè yóm udél senfalahen yó koni yóm ktulónen du du yóm Tulón Hyu gbak ebè Jisas.

36Ngang le mógów efet le kól bè yóm gónón wen él, ne mon yóm tau genlal yó mò ke Filip, “Ni wen él, hyu kô ke hbabtayse kóm?” 37Mon Filip se, “Tey hyu se ke gotu nawahem hemtahu ke Jisas.” Monen se kun yóm tau yó koni, “Deng hentahuhu ne Jisas Krays, du yóm hol Ngà Dwata.” 38Ominen na hdà klisahen. Kmó le elaan, ne hlós le elem él. Omin Filip mabtays du.

39Bè yóm deng bud kotun le ete kembu, tódô nwiten Filip yóm Tulus Dwata, ne tódô lana lem mata yóm tau hbabtays yó koni. Kewóten se kun hlós mulék, ya tey kligalen. 40Là seknahem ke Filip kun, deng sana gefet bè yóm benwu Asdod. Yó gel nmoen, tódô keten yó kem benwu gónón tmulón du yóm Tulón Hyu efet kól bè yóm syudad Seseriya.

Currently Selected:

Kul Nmò 8: tbl

Highlight

Copy