Tekang Kbuten 13
13
Keslayuk le Abram ne Lat
1Omin Abram lemwót bè yó bè Idyip, lanen mool efet kól bè lem Kanan fi leged, mung du yehenen ne Lat snéen, ne kdê yó kem deng nfunen. 2Nim Abram ni, tey wen kendengenen. Tey wen ubihahen ne kambingen ne safien ne wen se tahu blówónen ne blówón bukayen. 3Bè yóm kewóten bè yó, tódô henlelen mógów na le na gel kmamfù gu bè lan, hlós le ebè benwu Bétél. Ngangen mógów efet le bud gefet bè yóm tehe gna gónón kmamfù bè gónón sóól Bétél ne Ay, 4bè yóm benwu tehe gna gónón semsodò yó kem botu mò gónón demsù ebè yóm sana Dwata hol gónó mogot. Yóm kkólen bè yó, bud tmaba ebè Dwata.
5Lemwót ke Lat kun, tey wen ubihahen ne kambingen ne safien. Ne wen se kem fes lówóhen ne kem tau mò nmò béléen. 6Yó gónóm mon, laen hol gónó le hótób ógóf le ke hlós keslomong le yóm lewu le, abay se tódô sket kul genged ógóf le. 7Yó se gónó le gel sfatay yó kem tau mentey ógóf Abram ne yó kem tau mentey ógóf Lat. Bè yóm kdaw yó, tolo le menwu bè yó he yó kem tau Kanan ne yó kem tau Pirisayt.
8Ne yó gónó Abram mon du mò ke Lat, “Ó ngà, là hyuhen bè yó kem tau te ke sfatay le abay se tey mget kesdumu te kut. 9Yó hyu ke slayuk te. Méléki mahi du nóyô gónóm menwu. Ke nóyóem fi bè iwóng, dou fi bè kwanan. Ke nóyóem fi bè kwanan, dou fi bè iwóng.”
10Tahu se, temngel gu hilol Lat, tonen yóm klamang datal él Jurdan, tey wen él mlel bè yó efet kól bè Sur, skél bè yóm tehe hungul koyu Dwata ne bud skél bè benwu Idyip snéen. (Nim kestulón le Abram ne Lat ni, là deng genlà Dwata du he yó kem syudad Sodom ne Gomora.) 11Ne yó nélék Lat kun yóm klamang datal hmilol él Jurdan, ne tódô mili fi dmata kdaw bè yóm benwu Kanan yó. Yó se yóm tehe kmò keslayuk le Abram ne Lat. 12Okóm ke Abram kun, tódô hlós nô bè yó bè yóm benwu gónón nô bè Kanan. Bong ke Lat kun, tódô nô lem blóng yó kem syudad nô bè datal, moni bè syudad Sodom yóm gónón kmamfù. 13Yó kem tau bè Sodom yó, hol kem tau gónón smala sidek, kem tau alì gemsalà bè Dwata.
Kili Abram ebè Hibron
14Kogol yóm kewót Lat, yó mon Dwata mò ke Abram, “Ó Abram, lenwóten bè nim gónóhem mdà ni, hol tenngelem gu hilolem bè fi dmata kdaw ne bè fi desdef ne bè fi leged ne bè fi bwak. 15Yó se gónón e són matahem blayu kóm ne bè yó kem semfu gu béléem. Laen sónen yóm kfunem du. 16Angat hol hwenu bólem, laen kô dù gembek msó kul yóm kdê le, lómón ke nsóhem kfung te tonok. 17Yó ne, lemwóti, bniwelem klamang nim tonok ni abay se gotu blayu kóm yóm klamangen.” 18Tahu se, bud nili Abram kamfuen, ne ditu gónón nô moni bè yó kem koyu lembang bè Mamri lem benwu Hibron. Ne bè yó gónóhen bud semsodò yó kem botu mò gónón demsù ebè yóm sana Dwata hol gónó mogot.
Currently Selected:
Tekang Kbuten 13: tbl
Highlight
Share
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
