Tekang Kbuten 18
18
Yóm tlu kem tau mauy bè Abraham
1Bè yóm knô Abraham bè yóm benwu moni bè yó kem koyu lembang nfun Mamri, bud hegfan béléen Dwata. Bè yóm kehegfanen béléen yó, deng gtungu kdaw ne tolo myón bè bak dólen. 2Ne yó nmoen, temngel ebè lewà, tódô wen tonen tlu kem tau mdà bè yó. Bè yóm ktonen kul, tódô kendel mdà ne hetlasik mógów ebélê le ne tódô hegdufok ebè tonok bè solu le. 3Yó monen mò kul, “Ó kem Sér, ke hyu bélê ye, na ye hol slob béléu. 4Na ma él mò olob ti ye. Na ye hlun hegnô bè ni laan nim koyu nii. 5Nahe hemtifes bélê ye mò ken ye anì wen kgis ye bè yóm bud kógów ye kedeng. Tey hyu nawaw nim keslob ye béléu ni. Là hyuhen ke là na ye mken béléu.”
Ne mon le se, “Yó sen. Nmoem yóm deng monem.”
6Omin Abraham hetlasik mógów elem gónóen ne monen mò ke tuha libunen, “Ó Sara, hetlasiki kut, mahi sotu lata yóm arina alì hyu, nmoem mambang.” 7Omin Abraham kendel mlóy etu bè kem safien, néléken yóm ngà safì mabù ne blayen bè yóm tóbóng lówóhen anì kendel tnétéen. 8Tikóng deng gotu tógó yóm kdéen, omin Abraham mkay du ebélê le, wen gatas mung du ne wen tsisen,#18:8 Yóm tsis monen yó, nmò le lemwót bè gatas ne gel mung ken le bè mambang. ne mdà klohok le bè yóm igò le mken bè yó laan yóm koyu gónó le nô.
9Ne wen snólók le bè Abraham, mon le, “Nô se tuha libunem du?”
Mon Abraham se, “Nô lem gónô.”
10Sotu bélê le mudél, monen mò ke Abraham, “Bè halay hulihen he, bud kesfuléku edini ne deng mngà logi yóm yehenem Sara.”
Okóm ke Sara kun, nô tekwang yóm tau mudél yó seblà bè bak dól le, hnilungen yóm kestulón le. 11Bè yóm kdaw yó, deng le tey tuha ne le Abraham lewu le Sara, lelen deng teflok yóm kwen hen-gifat Sara. 12Yó gónó Sara gkuli tek sotu, hendemen, “Tedu tô kmò kngau du, blaem teye deng tuha, dalang se kun yóm tuha logihu.”
13Ne mon Dwata mò ke Abraham, “Moen du ke mom knuli Sara, mom monen, ‘Tedu tô kmò kngau du, blaem teye deng tuha.’ 14Laen kô dù là gbek Dwata du. Halay hulihen he bud kesfuléku edini ne deng mngà logi ne Sara, hol lómón yóm deng monu koni.” 15Lemwót bè yóm klikò Sara, yó gónón hmalà yóm kkulihen, monen, “Là kóe kmuli dou.” Ne yó mon Dwata, “Kaem kmulihi koni.”
Yóm kehkodu Abraham du bè Dwata yóm benwu Sodom
16Kewót le bè yó, yó kem tau yó koni, hlós le ebè yóm gónón gedwóng etu bè yóm syudad Sodom. Mung kul Abraham, nan e tolok kul yóm lan etu.
17Ne yó hendem Dwata, “Là gbunihu du bè Abraham yóm nmou bè Sodom ni. 18Blaem yó kem angat lugoden, baling le sotu but tau alì mbegel kbenwu le ne angat mlan béléen gónóhu tmóbóng yóm kdê kay but tau talak tonok. 19Deng néléku mò gel hmau yó kem ngaen ne yó kem fuen anì nimón le ou ne nmò le yóm tedeng. Ke mimón le, angat dnohou yóm deng fasadu ke Abraham.” 20Omin Dwata mon du mò ke Abraham, “Tey sidek yóm gel tifù le kul yó kem tau bè Sodom ne Gomora. Alì sidek bè kdéen yó kem salà nmò le. 21Na mosol etu dé na hnénég ke tahu yó kem tifù le kul yó.”
22Omin le lemwót yó kem lewu tau, mógów le etu bè Sodom, ne fen tebel likót bè Abraham ke Dwata. 23Omin Abraham hloni ne snólóken Dwata, monen, “Bè yóm nmoem bè Sodom yó, homong hnatayem bè yó kem tau sidek nmò le kô yó kem tau tedeng nmò le? 24Mò kmoen se ke wen limu folò tau tedeng nmò le menwu bè yó, genlaem kô klamang yóm syudad yó? Là knamaem du kô yóm syudad yó anì mowil yó kem limu folò tau tedeng nmò le nô lemen? 25Bè ktahuhen là kô na a yó du nmoem ke tô homong hnatayem lu yó kem tau tedeng bè yó kem tau sidek nmò le. Ke yó nmoem, deng le mom gomong megtafak yó kem tau tedeng bè yó kem tau sidek nmò le. Hol mou kun ne yóm fen kmukum yóm kdéen tau bè klamangen benwu ke tô là tedeng kkukumen.”
26Ne yó balà Dwata du, monen, “Ke wen limu folò tau tonu tedeng kmò le bè yó bè Sodom, là kô genlau du yóm syudad yó.”
27Bud mon Abraham, “Olohe tau tonok se do, laen kô dù kwalisu alì smólók kóm. 28Okóm kmoen se ke olon fat folò limu tau mò du yóm tedeng? Ke là gefeten bè limu folò, genlaem kô klamang yóm syudad yó ke tek limu gónón là gefet?”
Bnalà Dwata se, monen, “Ke wen fat folò limu tau tedeng nmò le, là kô genlau du yóm syudad yó.”
29Yó bud mon Abraham, “Kmoen se ke tek fat folò tonem?”
Bud bnalà Dwata, monen, “Là. Là kô genlau du ke wen tonu fat folò.”
30Bud mon Abraham, “Hol béi lembut kut, Dwata, ke bud wen snólóku. Kmoen se ke tek tlu folò tau tedeng nmò le?”
Mon Dwata se, “Ke wen tonu tlu folò tau tedeng nmò le, là kô genlau du.”
31Bud mon Abraham, “Hol bud hnifótem ou, Dwata, bè yóm tendo ksólóku kóm. Kmoen se ke tek olo lewu folò tau tonem tedeng nmò le?”
Mon Dwata se, “Ke wen lewu folò tau tonu tedeng nmò le, là kô genlau du yóm syudad yó.”
32Bud mon Abraham, “Hol béi lembut dou, Dwata, olohu bud smólók sulék ne. Kmoen se ke olo tek sfolò tau tonem tedeng nmoen?”
Mon Dwata se, “Ke wen sfolò tau tonu tedeng nmoen, là kô genlau du.”
33Timbow deng kestulón le Abraham, omin Dwata lemwót ne fen mulék ebè gónóen kun ke Abraham.
Currently Selected:
Tekang Kbuten 18: tbl
Highlight
Share
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
