Luk 21

Yóm kun blay bè Dwata yóm libun bolu

(Mark 12:41-44)

1Ne ton Jisas yóm keblay le ebè Dwata yó kem tau wen kendengen le, gel sù le bè yóm gónó hemsù filak lem yóm Gónô Dwata. 2Ne bud tonen se yóm sotu libun bolu, yóm laen dù gónón ma, gbót bemlay se kun. Yóm kun filak blay yó, tek lewu lad. 3Bè yóm kton Jisas du, yó monen mò kul, “Tódô tulónu kuy ktahuhen, alì bong yóm kun blay nim libun bolu laen dù gónón ma nii senta yóm kul blay yó kem dumu tau. 4Abay se yóm kul blay, olo kem lukas filak le. Okóm kun nim libun bolu ni, balù yóm klaen dù gónón ma, ewenem tódô blayen yóm hol són kun filak.”

Angat kegbà yóm Gónô Dwata

(Matyu 24:1-2; Mark 13:1-2)

5Sentulón yó kem gel lemolò ke Jisas yóm Gónô Dwata, yóm alì klinggel yó kem botu bengen, ne yó kem dê dumu gel blay le ebè Dwata. 6Ne yó mon Jisas mò kul, “Nim kdê ton ye ni, ke sok kól du yóm kdawen laen kô dù tebel bè ni kem beng botu nii, angat tódô gotu lenusok le.”

Ilô yóm hol són kdaw

(Matyu 24:3-14; Mark 13:3-13)

7Ne snólók le bè Jisas, mon le, “Kilón de kdohoen yóm yó, Sér? Tedu se mò ilô me du yóm móyón ksuten nim monem ni?”

8Mon Jisas se mò kul, “Hol ten-gama ye anì laen dù tau gónó ye gsukat. Abay se angat dê tau sut tô hlingu béléu. Yó angat mon le, ‘Ou se yóm Misaya.’ Ne yó sotu mon le, ‘Deng hto ne yóm hol són kdaw.’ Okóm bê ye abay hentahu lu. 9Sok wen gungol ye tau sgida, duhen ke wen kem tau mit sfatay bè yóm tau gónó le kmulu, bê ye abay hlikò. Angat gotu dohò ni kem ni, okóm là yó du he yóm hol són kdaw. 10Angat wen kem benwu mit sgida bè yó kem dumu benwu. 11Angat tey dê benwu gónón mbel yó kem linol bong, ne bitil bong. Ne angat wen des tódô lenngeben klamangen. Ne angat tey dê hentaw ton bè longit yóm knikò tau.

12Bede yóm hanà gu laanen,” mon Jisas, “na le na gotu kenfô yu, ne lel le hmayam kuy lemwót bè yóm klolò ye do. Angat nit le yu ebè yó kem gónô gel stifun yó kem Ju mò gónó le kmukum kuy, ne angat bnanggù le yu. Ne angat hdà le yu bè solu yó kem tau hol geta ne bè solu yó kem gubérnor lemwót bè yóm klolò ye do. 13Ni se yóm kuy kdaw hol tnana kehetngón du yóm Tulón Hyu lemwót béléu. 14Ne yó eles sù ye bè nawa ye,” monen, “bê ye tnafa nawa yóm angat kmò kbalà ye kul. 15Ou he bemlay kuy yóm khulung ye hedem, ne yóm kestulón là gbek hohon ye malà du, ne là kô gehkéng le du snéen. 16Bè yóm kdaw yó,” monen, “mom yó angat kmamo kuy, yó kem kuy tuha ne yó kem dumu ye setwoli kkólen bè yó kem dumu ye setwoli eddoli ne yó kem wè ye. Angat wen se hfatay le bélê ye. 17Angat tey dê kmutó nawa kuy lemwót bè yóm klolò ye do. 18Okóm, balù sbalu wek ye, là kóen na a lana bélê ye. 19Eles ye hol ye hbegel,” mon Jisas, “anì angat guta ye yóm klowil laen dù sónen.”

Yóm angat kegbà Jirusalim

(Matyu 24:15-21; Mark 13:14-19)

20Ne yó bud mon Jisas, “Ke sok deng ton ye senibut kem sendalù nim syudad Jirusalim ni, là hewuhem du deng kdawen meglà ne. 21Bè yóm kdaw yó, yó kem tau menwu bè prubinsya Judiya, eles le hol mlóy elem bulul. Ne yó kem tau nô bè Jirusalim, hol le mlóy se kul. Ne béen abay wen bud husek elemen yó kem tau lemwót gu hilolen. 22Abay se yó yóm kdaw ktafak Dwata yó kem tau, ne gotu dohò eta le yó kem tehe deng eles tulón Dwata bè Sulaten. 23Kodu le yó kem libun mlutut bè yó kem kdaw yó,” mon Jisas, “dalang se yó kem libun tolo semlé ngà. Angat tey hlayam bong sok sut bè nim benwu ni yóm hlayam monu ni, ne angat tey sidek ktafak Dwata yó kem Ju. 24Angat wen se bélê le matay bè bak sudeng. Ne wen se bélê le kenfô le mò nit le ebè yó kem dumu benwu mayuk. Ne angat tódô genlà le Jirusalim yó kem tau là Ju le efet kól bè yóm kdaw keteflok Dwata kul.”

Kmò yóm angat bud kesfulék yóm Ngà Tau

(Matyu 24:29-31; Mark 13:24-27)

25“Ne bè yóm angat bud kesfuléku,” mon Jisas, “angat wen knikò ton ye bè kdaw ne bè bulón ne bè yó kem blotik. Ne dini te tonok, angat tey wen klóngón nawa yóm kdéen tau, knikò le yóm tey lungkul lewók mohin ne yóm tódô kotunen. 26Ne angat wen se kem tau tódô leef bè yóm alì sidek klikò le yóm angat sut bè klamangen benwu. Yó gónó le likò abay se là bud glolò le du yóm sana kul lesang yó kem mnóng bè longit. 27Ominen yó he hegfan yóm Ngà Tau htuntun gu tta mung bè lobun. Angat ton le se yóm tey kfasangen ne yóm tey kegetahen.#21:27 21:27 Danyél 7:13.Ke sok nbuten sut ni kem tulónu kuy ni hol ye hbegel ne temngel ye ebè Dwata, yakà dengen móyón moni yóm kegewà yu. 28Ke sok nbuten sut ni kem tulónu kuy ni hol ye hbegel ne temngel ye ebè Dwata, yakà dengen móyón moni yóm kegewà yu.”

Yóm gdalang tekuy bè koyu fig

(Matyu 24:32-35; Mark 13:28-31)

29Ne bud wen hlingón tulón Jisas kul, yó monen, “Tódô henkna ye bè yó dém koyu fig, dalang se yó kem dumu koyu. 30Sok nbut le tmubed, tódô tngón ye ayawen sut yóm bulónen mnóng kdaw. 31Senged snéen sok deng gotu gfan yó kem ilô deng tulónu kuy ni, yó se ayawen yóm deng moni ne yóm kogot Dwata tau. 32Tódô tulónu kuy ktahuhen,” monen, “ke sok sut nim tulónu kuy ni, tolo wen he bè ni kem tau kmoen ni gmafit mton du. 33Angat tódô kmanas yóm longit dalang se yóm tonok. Okóm yóm dou udél,” monen, “là kóen na a lana.”

Eles ketgama

34Bud mon Jisas mò kul, “Eles ye hol temgama anì là són du yó gónón nô nawa ye bè kken ye ne bè kinum ye ne bè kmò kebel ye klowil ye. Déke tódô mekto ksuten bélê ye yóm kdaw yó igò ye là deng getgama. 35Lómón yóm sdô, song imoen hetngón deng gbunuen yóm holot. Yakà ni du se angat gbunù yóm kdéen tau talak tonok. 36Yó gónó ye eles hol temgama, ne bê ye senkó yóm tendo gel mni bè Dwata anì gbek ye hembala du yóm kdê tulónu kuy ni, ne angat laen kô dù gónó ye myak sok ye mdà bè solu yóm Ngà Tau.”

37Ket kdaw Jisas tendo gel tmolok lem yóm Gónô Dwata. Okóm ket kifuhen gel hetsik ebè Bulul Ulib. 38Bong yó kem tau bè yóm benwu yó, tey tendo gel kehlafus le ebè yóm Gónô Dwata na le e gel hnungol yóm ktolok Jisas.

Currently Selected:

Luk 21: tbl

Highlight

Copy