Mark 14

Kessatul le yóm kmò kekfô le ke Jisas

(Matyu 26:1-5; Luk 22:1-2; Jan 11:45-53)

1Tek lewu kdaw ne duen kehto yóm mò ken bong yó kem Ju, yóm gel mon le Kdaw Khius, ne yó kem kdaw bud kken le du yóm mambang laen dù bulung henoken. Bong yó kem geta bè yó kem tau gel demsù ebè Dwata kkólen bè yó kem tau gel tmolok hlau, sónmò le mebel lan le lemifut hekfô ke Jisas anì ghatay le. 2“Okóm,” mon le, “bê tekuy hesengan bè yóm kmò ken bong, kô wen sidek nmò le bélê tekuy yó kem tau.”

Yóm ketwélen hnolo te kulu Jisas yóm sotu libun bè Bitani

(Matyu 26:6-13; Jan 12:1-8)

3Bè yóm knô Jisas bè Bitani, mken bè gónô yóm sotu tau tehe gemnóm des mifù, boluyen Simun. Bè yóm igoen tolo mken bè yó, sut béléen yóm sotu libun, wen sobuy alabastér nwiten hnok yóm gel hboo alì mebtes, ne alì minggel boohen, boluyen nard, yóm gel hboo laen dù bolen, hono duhen. Ominen temful lihol yóm sobuy yó, ne gotu msulék koken te kulu Jisas. 4Okóm wen se bè yó kem tau nô bè yó, deng le mom lembut, stulón le, mon le, “Moen ke mom namaen yóm hboo yóó? 5Mom hyu he ke tódô hbaluen, ominen bemlay du bè yó kem tau élél yóm blihen. Kóyów sukéy sotu tau mò nmò sfalay btesen yóm hboo namaen yó.” Tey kbólów le du yóm libun yó.

6Okóm mon Jisas mò kul, “Tódô bayà ye du dé. Moen de ke bnólów ye? Igoen tey minggel nim nmoen béléu ni. 7Hyu he kul yó kem tau élél, eles le tendo nô lem blóng ye, mahil bélê ye tmóbóng kul. Là dou. 8Yóm nmoen béléu ni, tódô nmoen yóm hol són gbeken. Yóm deng koken bè lówóhu ni,” mon Jisas, “mò eles hgifaten do bè yóm angat kebeng le dou. 9Tódô tulónu kuy ktahuhen, balù kihu gónón angat e mból bè klamangen benwu yóm Tulón Hyu lemwót bè Dwata, angat tendo gel gboluy snéen kun nim libun ni lemwót bè yóm deng nmoen béléu.”

Keblay Judas sumóng ke Jisas

(Matyu 26:14-16; Luk 22:3-6)

10Kogolen bè yó, lemwót Judas Iskariyut, sotu bè yó kem sfolò lewu gel lemolò ke Jisas, tódô mógów ebè tu kem geta bè yó kem gel demsù ebè Dwata, tulónen kul yóm kmò któbóngen kul anì gekfô le Jisas. 11Ya tey ktimu óyô le bè yóm kungol le du, glok le fmasad du filak mò ofolen. Kewóten bè yó ne, sónmò Judas mebel lanen anì gekfô le Jisas.

Kken le Jisas bè Kdaw Khius

(Matyu 26:17-25; Luk 22:7-14, 21-23; Jan 13:21-30)

12Deng hto yóm tanay kdawen bè yóm kmò le ken bong yó kem Ju, yóm mò ken gónó le gel mken du yóm mambang laen dù bulung henoken. Bè yóm kdaw yó, gel wen ngà ubiha hnatay le mò utón le bè yóm mò ken bè Kdaw Khius. Snólók le bè Jisas yó kem gel lemolò du, mon le, “Gónóm tô hmò du kum de yóm ken tekuy bè nim mò ken bè Kdaw Khius?”

13Omin Jisas mdók lewu bélê le, monen mò kul, “Mógów ye ebè syudad Jirusalim. Ke deng ye kól ditu, angat wen logi semlong kuy mit él. Tódô ye huli du 14efet kól ebè yóm gónô gónón e mulék. Ke sok ye deng kól bè yó, snólók ye yóm fun gónô, mon ye mò du, ‘Hsólók yóm tau gónó tekuy gel htolok yóm dfél mò gónó me sbung mken yóm ken bè Kdaw Khius.’ 15Ne angat toloken kuy yóm dfél bong bè sodò seel le tefi ta. Ne yóm dfél yó, deng eles tódô ket du ne yóm kdê kimu ken nô bè yó. Ne bè yó gónó ye mò du yóm mò ken tekuy.” 16Ne tahu se. Kewót le bè yó ne ebè yóm syudad, ne tódô uliten du se yóm tehe ktulón Jisas du kul. Ne bè yó se gónó le mò du yóm ken le sbung bè yóm ken bè Kdaw Khius yó.

17Timbow deng sdef kdaw, kól bè yó Jisas, mung du yó kem sfolò lewu gel lemolò du. 18Yóm igò le tolo mken, mudél ebélê le Jisas, monen mò kul, “Tódô tulónu kuy ktahuhen, sotu bélê ye mung do mken bè ni angat mlay do sumóng.”

19Ya tey sidek klóngón nawa le, tódô le sket smólók ke Jisas, mon le, “Là ou du kô yó, Sér?”

20Mon Jisas se, “Sotu bélê ye se yó kem sfolò lewu gel lemolò dou, yóm dumuhu segeng mdù yóm mambang elem sóbów, deng duhen yó se. 21Yóm angat hfatay yóm Ngà Tau, tódô uliten bè yóm deng eles tulónen bè Sulat Dwata, bede angat tey tafaken yóm tau angat mlay du sumóng. Tumù ne ke béen tehe dog tau.”

Yóm mò hemget yóm fasad Dwata

(Matyu 26:26-30; Luk 22:14-20; 1 Kurin 11:23-25)

22Yóm igò le tolo mken, nwa Jisas yóm mambang, bede nan na mni bè Dwata, ominen kembéng du, ne blayen yó kem gel lemolò du, yó monen, “Ni, ni se yóm dou lówó. Nwa ye, ne ken ye.”

23Ominen mkay yóm tgayan gónón nô yóm ninum le, nan bud mni bè Dwata, ominen bemlay du kul, ne gotu sensinum le. 24Yó monen, “Ni se dou litô mò hemget du yóm fasad nmò Dwata mò lan tau mógów ebéléen. Ne tey tau wen gónóhen gamà nim litóu ni. 25Tódô tulónu kuy ktahuhen,” mon Jisas, “hatan bud ninumu he dou nim ninum ni ke deng kól bè yóm kdaw bud kinumu yóm ninum lomi bè yóm kun benwu nogot Dwata.”

26Tikóng deng kinum le, omin le gotu semngal yóm sotu sngal dmóyón ke Dwata, ne omin le lemwót ebè Bulul Ulib.

Eles ktulón Jisas yóm kehlalà Pitér du

(Matyu 26:31-35; Luk 22:31-34; Jan 13:36-38)

27Bè yóm tolo lel le mógów, mon Jisas mò yó kem gel lemolò du, monen, “Angat gotu sentagak ye ou kedeng, yakà wen yóm deng monen bè Sulat Dwata, yó monen,

‘Angat hfatay Dwata yóm tau semgyok ubiha,

ne angat gotu sekla yó kem ubihahen.’#14:27 14:27 Sikaraya 13:7.

28Okóm,” mon Jisas, “sok deng bud hlowil Dwata ou, angate gna bélê ye etu bè Galili.”

29Hebkó se Pitér, monen, “Baluen he ke gotu sentagak le uu ni kem dumuhu, Sér, là gmou du dou.” 30Bnalà Jisas se, monen, “Tódô tulónu kóm ktahuhen, Pitér. Gu laanen là deng kmóót onuk bè gewuhen dulék kifu ni kdeng, deng sana tlu dulékem ne hmalà yóm ketngónem dou.”

31Mom duil Pitér mon du, “Baluen he ke munge kóm matay, Sér, là kô naw e hnalà kóm dou.” Ne tódô senged se udél yó kem dumu gel lemolò ke Jisas.

Kni Jisas bè Dwata bè Gitsimani

(Matyu 26:36-46; Luk 22:39-46)

32Ngang le Jisas mógów efet le kól bè yóm sotu ngà hungul koyu boluyen Gitsimani, mon Jisas mò yó kem gel lemolò du, “Na ye myón bè ni bè yóm igou mni bè Dwata.” 33Tlu tau niten, Pitér ne Jim ne Jan. Ne tódô gleket béléen yóm tey ksidek kegnómen du, 34ne monen mò kul, “Tey sidek gnóm yóm gleket béléu ni, là hol tô gbeku hembala du. Nô ye bè ni ne kuy, hol ye mingat.”

35Ominen mógów hlayuk udì, ne tódô gefen bè tonok, ne mni bè Dwata. Hnihen ke wen lan Dwata hkó du béléen yóm nô tahen, monen mò ke Dwata, 36“Ó Mà, laen dù là gbekem du. Hol kóhem tahu dé yóm angat tey hlayamu. Okóm balù wen se ni hem dou kóyô, yó dém kóm kóyô tódô hendengem.”

37Timbow deng knihen, ominen bud mulék ebè yó kem tlu tau nwiten, deng le mom gotu henga tungô. Gotu bentiken lu, ne monen mò ke Pitér, “Ó Simun, dengi tungô kô? Là gbek ye hbala là tungô, balù tek sotu uras?” 38Bud monen mò kul, “Bê ye tagad tungô dé. Hol ye mni bè Dwata anì là wen gónó ye gsindil bè Seitan. Tngónu wen se óyô ye mò du yóm monu mò kuy ni, okóm là gbek lówó ye du.”

39Bud kewót Jisas bè yó, bud mni bè Dwata, tódô nuliten yóm gna kmò knihen. 40Ominen bud mulék ebè yó kem tlu tau niten, deng le mom bud lemnga tungô, là kô dog gukat le du mata le. Bè yóm bud kebtik Jisas kul, là kô le bud gudél ebéléen, deng le mom myak.

41Bud lemwót Jisas na a bud mni bè Dwata. Bè yóm getluhen dulék mulék ebélê le, monen mò kul, “Tolo lel ye he kô tungô ne hegnô? Geblaen ne. Deng duhen ni ne yóm urasen. Ngem ni ne kekfô le du yóm Ngà Tau, ne blay le elem tdok yó kem tau sidek nmò le. 42Btik ye ne. Ngem yó dé yóm tau mlay do sumóng, na tekuy e senlong lu.”

Kekfô le ke Jisas

(Matyu 26:47-56; Luk 22:47-53; Jan 18:3-12)

43Igò Jisas tolo mudél, gdofì bè yó se Judas, yóm sotu bè yó kem sfolò lewu gel lemolò du. Tey tau wen huli du. Wen se lemumak sudeng bélê le, ne wen se kmulóng bogul. Lu se hógów yó kem tau hol geta bè yó kem gel demsù ebè Dwata, ne yó kem tau gel tmolok hlau, ne yó kem tuha gónó le gel galak yó kem Ju. 44Deng eles tulón Judas yó kem tau mung du, monen, “Yó se tau neleku kdeng, yó se yóm tau hnebel ye. Tódô kenfô ye, ne nit ye mulék. Hol bnentey ye bè lan.”

45Timbow gdek Judas, tódô hekteng ebè Jisas, monen, “Na Sér,” ne ominen melek du. 46Omin le gotu demlu kemfô ke Jisas, ya tey kget kogot le du. 47Sotu bè yó kem gel lemolò ke Jisas kendel kemtos dmilot sudeng, tódô tô tnibóhen yóm sotu tau gel dók yóm hol geta bè yó kem gel demsù ebè Dwata, okóm olon sfak doli klinguhen yóm tau tnibóhen yó.

48Omin Jisas mudél ebè yó kem tey tau wen kemfô du, monen, “Tey, glok ye mit suk ne bogul nim ne ye e kekfô dou ni. Ilóem tô hkél ye ou bè yóm tau gel mò sidek. 49Igò sem ket kdawu myón tmolok lem Gónô Dwata, là sem dog kenfô ye do. Okóm nim nmò ye béléu ni, deng gónón dohò yóm tehe monen bè Sulat Dwata.”

50Bè yóm kekfô le ke Jisas yó, deng mom sentagak yó kem gel lemolò du, gotu le mlóy. 51Bè yóm kwit le ke Jisas, wen sotu logi lomi lemnok tendo huli du, tek són kumù legmoten. Ne wen se bè yó kem tau mundug tô kemfô du, 52okóm tódô gtebel lem hólól le yóm kumù tehe legmoten, ne tódô mlóy hlówó laen dù nes.

Kkukum le ke Jisas yó kem Ju

(Matyu 26:57-68; Luk 22:54-55, 63-71; Jan 18:13-14, 19-24)

53Kewót le bè yó ne, nit le Jisas ebè gónô yóm tau hol geta bè yó kem tau gel demsù ebè Dwata. Ne deng le eles gotu stifun bè yó yó kem geta bè yó kem gel demsù ebè Dwata, ne yó kem tuha gónó le gel galak yó kem Ju, ne yó kem tau gel tmolok hlau. 54Bè yóm kwit le ke Jisas, fen holun huli ke Pitér kun, tódô hlós ete klósól yóm tau hol geta bè yó kem gel demsù ebè Dwata. Ne seyón bè yó kem tau gel mentey bè yó, gbót mnalang bélê le.

55Yó kmò le ke Jisas yó kem tau hol geta bè yó kem gel demsù ebè Dwata ne kdê yó kem tau mogot kukum bè yó kem Ju, mebel le lan le hfatay du lemwót bè yó kem tifù le du yó kem dumu tau. Okóm laen kô dù ton le ke mò gónó hmatay du. 56Tey dê tifù le du hono là tahuhen, ne là se ssotuhen yóm gel tulón le. 57Ne wen yó kem dumu tau tmifù du mdà bè yó, bede kéng yóm tulón le, mon le, “Ni se udél gungol me lemwót bè nim tau ni, 58tehe monen, ‘Angat genbau nim Gónô Dwata deng hdà tau, ne angat tek tlu kdawu bud hemdà du, okóm là hlanu du lem tdok tau.’ ” 59Bede bud là ssotuhen yóm tifù le du.

60Hebkó mdà se yóm hol geta bè yó kem gel demsù ebè Dwata, monen mò ke Jisas, “Là bnalaem du kô ni kem tifù le kóm ni?” 61Okóm là dog bnalà Jisas du, tódô neb. Ominen bud mudél yóm tau hol geta yó koni, monen, “Uu kô yóm Misaya, yóm hol Ngà Dwata?”

62Bnalà Jisas se, monen, “Ou se. Angat gotu ton ye yóm Ngà Tau myón fi bè kwanan yóm Dwata laen dù là gbeken du. Ne angat ton ye se yóm kesfuléken edini mung bè lobun.”#14:62 14:62 Lingón 110:1, Danyél 7:13.

63Mung kungolen du nim udél Jisas ni yóm tau hol geta yó koni, botong tódô kenséen nesen, monen, “Omin he ke wen bud dù tifù du. 64Deng tódô gungol tekuy yóm kehsengeden knóen bè Dwata. Tedu se kuy kmò kmon du du yóm tau ni?” Mon le se, “Hyu ke tódô hnatay.”

65Nbut le bè yó ne tendo hemsidek ke Jisas. Wen se bélê le dmulak du. Omin le smefeng uyóhen, ne lel le semsuntuk du, mon le, “Tensob tulónem kum kun mau du nim hemgnóm kóm des ni?” Balù yó kem tau gel mentey bè yó, gotu gbót temfê du.

Kehlalà Pitér yóm ketngónen ke Jisas

(Matyu 26:69-75; Luk 22:56-62; Jan 18:15-18, 25-27)

66Sana tolo kyón Pitér te klósól he kun. Ne mlan bè yó yóm sotu bè yó kem ngà libun gel dók yóm hol geta bè yó kem gel demsù ebè Dwata. 67Timbow tonen Pitér mnalang bè ofi, hnunuhen Pitér, monen mò du, “Kaem uu se sotu gel mung ke Jisas, yóm tau lemwót gu bè Nasarit.”

68Okóm mom hnalà Pitér, monen, “Là kô naw e tngón du dou yóm monem yó.” Ominen mógów etu bè bak tikeb yóm labat, ne tódô sen-gengen se kmóót onuk.

69Ominen bud mton ke Pitér yóm libun yó koni, bud senged se yóm monen bè yó kem tau mdà bè yó, “Kaem ni se yóm sotu tau gel mung kul.” 70Bede mom bud hnalà Pitér.

Tikóng deng legen udì bè yó, mon le mò ke Pitér yó kem tau mdà bè yó, “Tahu se, uu se sotu bélê le, abay se tauhi lemwót bè Galili se kóm.”

71Ne glok Pitér tódô smafà bélê le, monen, “Hol tnafak Dwata ou ne ke kéngu yóm tulónu kuy. Là kô tngónu du dou yóm tau mon ye yó.” 72Ne tódô sen-gengen se kmóót onuk bè gewuhen dulék. Ominen yó gtulón bè nawa Pitér se yóm deng tehe eles mon Jisas mò du, yóm kmonen du, “Gu laanen là deng kmóót onuk bè gewuhen dulék kifu ni kdeng, deng sana tlu dulékem ne hmalà yóm ketngónem do.” Unihen gbel bè nawahen yóm tehe kmon Jisas mò du yó, ya tey kkiken.

Currently Selected:

Mark 14: tbl

Highlight

Copy