TOWUNÖT 20
20
1Kiweghö Apraam Mamre kutang Nekep* akïmang kwenu Kades nko Syur akïmang kite wölnö le Kerar. 2Akwotini kimi wölini, kïmwochï pich Apraam lö ki cheptöngwa Sara nyini kile korkenyi. Kïlenyona, kwip Apimelek nyo kile pöytoghinto Kerar. 3Wölo kungwïn Tororöt wölo mi Apimelek ompö kirwotïtogh akïlenchï, “Ichinyi mïntïrïch ompöwölo kechenganyi kokonï, akï koko chi nyinte.”
4 #
Tow 12:13; 26:7. Wölo melö kökinyorï Apimelek Sara, kïlenyona kïlö Apimelek, “Echotyon, ipörenyi so pich cho puryö lelut? 5Melö Apraam so nyo kimwa lö cheptöngwa nyinte? Akïmwa korkenyi tïkwïl ngat lö werïngwa nyinte? Kaghan ngölyontonete ompö mïkulögh nyo puryö sïmnyontön, puryö kïgh nyo kalelan.”
6Atolapay kïlenchï Tororöt ompö kirwotïtogh, “Owöy, onkïtön lö keghanyi ngölyontononi ompö mïkulögh nyo puryö sïmnyontön, akwani nyini katagheninyi tömeghwanïn ngokï nka nyoni melö kyochömunyi swanga nyinte. 7Kïlenyona ye nyu, yodena nyinte kïwö wölo mi santenyi, werkoyon chichoni nyo muköy kïsoghunyi tömemegh. Wölo ato meyodenyinye, inkïtï lö imeghenyi nyo mötïny nko piköku löwïr.”
8Kïlenyona, kïnget Apimelek nyini le kiwasan akïkur pikachi löwïr cho le kirurichi akïmwochï ngalechay pö kirwotïtogh löwïr, kwotyö pïchay nyoman. 9Ato mi löt kïkur Apimelek Apraam akïtep lö, “Ne kitö nyï keghwechanyi? Kïgh ne nyo kolelunyi tepkaninyi ngokï aipchï paytaghtanyan kinyarat nyo lata nyï? Keghwaninyi ngal cho mömïchinicha nyonikïny.” 10Kïtas tagh Apimelek kïtep ngat lö, “Kenonenyi ne teghanyi lenyoni?”
11Kuyokyï Apraam lö, “Kaghan lenyoni ompöwölo kolentan puryö chi nyo woghöy Tororöt ompö wölete, akolentan ngat töptoy opöranïkwa atachenga korkenyan. 12Amwowokwa nyoman lö cheptöncha nyinte nyo pö paponyan, wölo melö nyo pö yonyan, opön nyu nyinte. 13Kïlenyona, otini kiyonwanïn Tororöt ongetunö koto paponyu, atepan nyinte kungarakanïn kïmwochï pich ompö wop anka tïkwïl nyo kïpetecha lö ochan werïngwa.”
14Kïlenyona, kuyokyï Apimelek Apraam korkenyi Sara akutö kechir nko tïch nko sekey. 15Amelö choni opïn kïlenchï Apraam, “Topöne koronete kïmïkul, nyinyan. Kïla wop anka tïkwïl wölo kemököy mönge.” 16Akïlenchï Sara, “Otöninan werïnkwa ropïyeni silpa cho le 1,000 tökukïniniechï pïchï löwïr mi nko nyi lö metïngetenyinye lelut aichinyi chi pö man ompö wölo mi chane.”
17Atolapay kïsagh Apraam Tororöt kusop Apimelek nko korkenyi nko tipichi cho pö pöghisyö lapay, kïsïch chane monïng. 18Ompöwölo kirat ECHOTYON kor löwïr cho kimi kö pö Apimelek ompö ngal cho kighisyö ompö Sara koko Apraam.
Yiyo Isak
Currently Selected:
TOWUNÖT 20: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
