YOANA 10
10
1“Omwowokwa nyoman lö chi anka tïkwïl nyo mölïtönye kwegho kechir kuweröy kukat, wölo longöy are anka kï chorin chichoni akï mosin. 2Wölo chi nyo lïtöy kuweröy kukat kï mösöwonto kechir nyinte. 3Yotini nyinte ripinto kukat akïlïmöy kechiryechi kutinyi, kuröy nyinte kaynötutkökwa kwakonga akonga akuntöghoghchï chane. 4Otini kayat kechiryechi kïpka sany, kuntöghoghchï, akïrïpöy kechirye nyinte, ompöwölo nkït kutinyi. 5Mörïpöcha chi nyo le ton, nyinö kötörïpöy, kupertegho nyinte, ompöwölo menkïtcha chane kuti ton.”
6Kimwochï Yeso chane körkeyïnoni, wölo kimöpköchïcha ngalechoni kimwochini nyinte chane.
Yeso kï mösöwon nyo karam
7Kïlenyona kïmwochï Yeso chane ngat lö, “Omwowokwa nyoman lö ochan kuka kechir. 8Chane tïkwïl cho kipka tawunyan kï chorï akï mosï, amelö kilïm kechiryechoni kutingwa. 9Ochan kukat. Ato lït chi anka tïkwïl kuweranïn kesöru, lïtöy nyinte kö akïwetöy sany akïnyoru aketagh. 10Ngwïnöy chorin pat atökïchor akïtïgh, akunyar. Kyangwïnan atömanyïl osïkökwa söpon, asïch nyoni kïmïchï.
11“Ochan mösöwon nyo karam. Tötoy mösöwontö nyo karam söpontanyi ompö kechiryechi. 12Ato sïwa chi suyon kungwïnöy nyo melö mösöwon amelö chechi kyaki, kïpïstoy kechiryechoni akuperta. Kungwïn nyu suyontononi kïnam akutoyö kechirye. 13Pertoy chichoni atökïsugh söpontanyi, ompöwölo kakikir amelö nyinte yongöy kechir. 14Ochan mösöwon nyo karam, ankïtön pikachu kunkïtanïn chane 15#Mat 11:27; Luk 10:22. le wölini nkïtanïn Paponyan ankïtön nyinte, amitan kïpsach amegha chane. 16Mito kechirye chichan walaka cho mömicha kweghonete! Mïchinanïn orongwï chane atökïlïm chane tïkwïl kutinyan akïlïkwï okwot akonga nko mösöwon akonga.
17“Chömanïn Paponyu ompöwölo otötonan söpontanyu atamuk acheng ngat. 18Möminye chi nyo sörenanïn söpontanyu. Otötonan ante ompö machatenyu. Otïngetan owesyö nyo otötoy, atïngetan owesyö nyo ochengo ngat, kimwowanïn Paponyu lenyoni.”
19Kïpesyö ngat pïchay pö Yaudi ompö ngalechoni. 20Kïmwa cho chang lö, “Tïngeto chichï oy akï chepoyï! Kwompö ne toterekwa ngalechi?” 21Wölo kïlö walaka, “Melö ngala chi nyo ipote oy chï. Muköy lö ne chi nyo ipote oy ntökïyotï chi nyo karote konyïn?”
Katagh pipö Yaudi Yeso
22Kitïta asis nyo Wow nyo pö kisoyönoto kanasyanta Yerusalem, ki osiswo kaghïtan atoni. 23Kimito Yeso kïwestegho körköru Solomon nyo kimi Kö pö Tororöt,* 24Otini kïtuyechï pipö Yaudi ato kimi nyinte kuwit, kïlenchï, “Kölö ne teluklukenyi pich nya? Ato ichï Kristo,* kïne memwowecha lasiny.”
25Kuyokyï Yeso chane lö, “Komwowokwa wölo maghananïkwanye. Söwintönchinanïn ighisyewutchoni oghan ompö kaynata Paponyan. 26Wölo moghönekwanye, ompöwölo mochikwanye kechiryechan. 27Teröy kechiryechan kutinyan, ankïtön chane akïrïpanïn chane. 28Otönan chane söpon pö kokay amelö meghsot chane kokay akï möminye chi nyo sörenanïn chane. 29Wow Paponyan nyo kikonanïn chane kïsir löwïr akï möminye chi nyo muköy ntökïsara chane moriko Paponyan. 30Ochan akonga nko Paponyu.”
31Kïkwagh pïchay pö Yaudi köghïn lö tökewira nyinte. 32Kïlenchï Yeso, “Koporwokwa ighisyewut cho chang cho karamach cho kikonanïn Paponyu agha tawunkwa. Chono nyu ompö choni cho keghakwa awirenanïn koghïn?” 33#Law 24:16. Kuyokyï pïchay pö Yaudi lö, “Möminye chi nyo wirinyi ompö ighisyewut cho karamach, poto ompöwölo kechïpönyi Tororöt! Ompöwölo keghanyi kegh lïkuna Tororöt akwanyï ichinyi ptangengmöt pat.” 34#Tum 82:6. Kïwöghökyï Yeso lö, “Mekiratenye sö ompö Kirurutkökwa lö, ‘Kyamwaghan lö, ochikwa tororötin?’ 35Kikurö Tororöt tororötin pichoni kipkonchï lökoyechï akenkïtöcha lö mwoghöy Kikirut cho Tïlilöch man kokay. 36Kikïlanïn Paponyu akuyokwanïn angwïn ngwïny, kwompö ne tolentekwa ochïpan Tororöt, ompöwölo kolan, ‘Ochan Wero Tororöt?’ 37Maghananïn ato moghanye ighisyewutko Paponyan. 38Kwato choni cho oghan akï kïrkegh kömaghananïkwanye, aghan ighisyewutköchan atonkïtunö lö mi Paponyan orinyan, amitan orito Paponyu.” 39Kumukyï ngat lö tökïnam, wölo kïchïwïta nyinte morikwa.
40 #
Yna 1:28. Kïwö Yeso ngat kwoghyö lalwa Yordan atanya kipötisöno Yoana pich tagh akitöpö wöloni. 41Kïpkonchï pich cho chang akïlö, “Kimeghnye Yoana kiporut chonikïny, wölo kilïkwï man kïgh anka tïkwïl nyo kimwa nyinte ompö chichete.” 42Kughan nyu pich cho chang Yeso ompö wölo.
Megha Lasaro
Currently Selected:
YOANA 10: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
