YOANA 14
14
1Kïlenchï Yeso chane, “Makany kusus kegh mïkuliskökwo, aghanakwa Tororöt, aghananïn tïkwïl. 2Mi korïn cho chang kato Paponyan, ntökömökïlenye nyoni kötomwowokwa. Owetan ye oghwokwa wölo omöngöy. 3Ato owan aghwakwa wölo omöngöy, amïlan nyu ngat atamïtakwa wölini omitan atamukakwa nyu omitenö wöloni omitan. 4Onkïtökwa ore nyo wetöy wölini owetan.”
5Kïlenchï Tomas, “Echotyon, mökinkïtöchanye wölini iwetenyi. Kimukecha lö ne kenkïtune ore?” 6Kïlenchï Yeso, “Ochan ore nko man nko söpon, möminye chi nyo wetöy wölo mi Papo kïpoto ato werwanïn. 7Ntökyonkïtwanïkwa kötökyonkïtukwa Paponyan tïkwïl, wölo kïngeta ye, kyonkïtukwa asïwa nyinte.”
8Kïlenchï Pilipo, “Echotyon, porwecha Papongu, nyoni onkït nyo kïmökecha.” 9Kuyokyï Yeso lö, “Pilipo, kotöpan nko akwa osis cho chang akïtomönye so nkïtwaninyi? Anka tïkwïl nyo kakïsïwanïn kïkakïsïwa Paponyan, imukenyi nyu lö ne mwoghe lö, ‘Porwecha Papongu?’ 10Meghönenyinye so lö omitan orito Paponyu, orinyan? Melö omwoghan ngalechï omwowokwa löwïr ompö owesyenyan kegh, wölo Paponyan nyo mi orinyan nyo ighöy ighisyenyi. 11Aghana lö omitan orito Paponyu, kïmi Paponyan orinyan. Anta mölenye nyona, aghan chini le ighisyewutkö oghan. 12Omwowokwa nyoman lö chi nyo ghönanïn, kwighöy ighisyewutchï oghan, akwighöy ompö cho echön kïsir choni, ompöwölo owetan wölo mi Paponyu. 13Oghwokwa kïgh anka tïkwïl nyo osomekwa ompö kaynatenyan, atökïrumtö oröryeto Paponyan ompö Werïnyi. 14Ato osomökwa kïgh anka tïkwïl ompö kaynenyan, oghwokwa.
Kakiyomisï Mïkulögh nyo Tïlil
15“Akwato achamanïkwa, orïpekwa kirurutköchan. 16Osoman Paponyu kïkonokwa Kingörokinte nyo töpo nko akwa kokay. 17Nyinte kï Mïkulöwu man akïmemukönye ngwïnya kïtoköy ompöwölo mösïwïyinye nyinte anta nkïtï. Wölo onkïtökwa nyinte, ompöwölo mi nyinte nko akwa akïmi orinkwa.
18“Mopïstonokwanye le pönon, omïlonan wölo omitekwa. 19Melö tökïsïwïyanïn ngwïnyinï ngat ato lekït, wölo osïwïyanïkwa, akwompöwölo ochan satate, osöpchokwa tïkwïl. 20Otini ketï asisoni, onkïtukwa nyu lö omitan orito Paponyu, omitekwa orinyan, le wölini omitan orinkwa.
21“Chi anka tïkwïl nyo toköy kirurutköchan akïrïp, kï chichoni nyo chömanïn. Akï nyinte nyo chömanïn, kïchömöy Paponyan tïkwïl, achöman angongchï kegh nyinte.”
22Kïlö Yudas (melö Yudas Iskariote), “Echotyon, muko lö ne ngongwechanyi kegh, amengongchï kegh ngwïny?” 23Kuyokyï Yeso nyinte lö, “Chi anka tïkwïl nyo chömanïn kïrïpöy ngölyontenyan akïchömöy nyinte Paponyan akepkonecha wölo mi nyinte aketïpïyö nko nyinte. 24Mörïpönye ngalechan chi nyo möchamanïnye. Melö nyinyan ngölyontononi kyalïmakwa, wölo pö Paponyan nyo kiyokwanïn.
25“Komwowokwa ngalechï kïtomitan nko akwa 26wölo ato itï Kingörokintö, nyinte kï Mïkulögh nyo Tïlil nyo yonu Paponyan ompö kaynenyan, kunetakwa kïgh anka tïkwïl akunonwokwa ngalechoni löwïr kökomwowokwa.
27“Kopïswokwa kalya, okonokwa kalyenyu. Mokonunanye le wölo konu ngwïnya. Makany kusus kegh mïkuliskökwo, amonyökoröchitu. 28Kyalïmakwa atanya kyomwowokwa lö, ‘Owetan, wölo tomïlonan wöloni omitekwa.’ Ato achamanïkwa, ongörechokwa ompöwölo owetan wölo mi Paponyu, ompöwölo wow nyinte kïsiranïn. 29Kanyaghan omwowokwa ye ngalechoni kïtomö kwighisyö, tö ato itï amukakwa nyu aghan. 30Melö tongölonan nko akwa ngat nyo kogh, ompöwölo mi pöytoghinto ngwïnyinï kungwïnöy, akïmötïngnye nyinte owesyö ompö ani, 31wölo mïchini kunkïtï ngwïnya lö ochöman Paponyu, nka nyete oghan kïgh anka tïkwïl kïrïp kegh nko wölo kömwowanïn nyinte.
“Angeta kepeghena yeteyi.
Yeso kï sapipïyonto man
Currently Selected:
YOANA 14: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
