Yohana 4

1Mwami lwa ya manya Avafarisayo va mali kuhulira Yesu a kola avegidzwi na a va batidza kuvita Yohana 2(navutswa Yesu mwene si ya batidza navutswa avegidzwi veve), 3ya leka Buyuda na a tsia kandi Galilaya. 4Ga mu dukira kuvita hagati ha Samaria. 5Kunangwa ya duka mu lidala lya Samaria lya langwa Sikaru, himbi mulimi gwa Yakobo ya ha Yosefa mwana wewe: 6kidaho kya Yakobo kya li ho. Yesu ya li na a luhi ku lugendo lwilwe, yikala ku kidaho. Inyinga yenya kuduka isaa i kola tsitanu na indala. 7Mukali wa Samaria yadza kudaha madzi: Yesu ya mu volera, Mpe kunwe. 8Ki gira avegidzwi veve va li ni va tsia mu lidala kugula vyokulia. 9Ki gira yaga mukali wa Samaria ya mu volera, Ga veye ndi ive Muyuda u teva inze amadzi, na inze mbeye mukali wa Samaria? (Kigira Vayuda si va hambana na Vasamaria.) 10Yesu ya tivula na a mu volera, Ive nu u manya kihaanwa kya Nya saye, kandi ni bwaha u ku volera Mpe, kunwa; nkano wa ka mu teva naye nkano ya ka ku ha amadzi agelivamwoyo. 11Mukali ya mu volera, Mwami, Si u veye nekyokudahira, nekidaho ki veye hasi: u la nyola ha li ha amadzi yaga gelivamwoyo? 12Ive u veye munene kuvita dada wetu Yakobo, wa ku ha kidaho yiki, na a nwa mu mwene, navana veve, nemitugu gyigye? 13Yesu ya tivula na a mu volera, Amadzi yaga, ku vosi u nwa ku a la lola ubuluhu kandi: 14navutswa ku vosi u nwa ku madzi ga ndi mu ha si a li lola ubu luhu kandi; navutswa amadzi ga ndi mu ha ga la va muye kidaho kya madzi ga senuka livamwoyo li ta hera mba. 15Mukali ya mu volera, Mwami, u mpe amadzi yaga, mbule kulola ubuluhu kandi, kandi mbule kuudza kuduka hano kudaha. 16Yesu ya mu volera, Tsia, u lange musatsa wowo, kandi udze hano. 17Mukali ya tivula na a mu volera, Si mbeye nomusatsa. Yesu ya mu volera, u voye bulahi, Si mbeye nomusatsa: 18kigira wa li nava satsa vatanu; kandi wa u veye naye kalunu, si a li musatsa wowo: yaga u voye ageligali. 19Mukali ya mu volera, Mwami, Ndola u veye muprofeti. 20Vaguga vetu va li ni va kola miluka mu kigulu yiki, navutswa mwinye mu vola mu Yerusalemi nu bulahi avandu va kole miluka. 21Yesu ya mu volera, U nsuuvire, Mukali, isaa yidza ya mu li vula kukola miluka ku Dada mu kigulu yiki, kali mu Yerusalemi. 22Mwinye mu kola miluka ku kya mu vula kumanya: kwinye ku kola miluka ku kya ku manya; kigira ubuhonnyi bu twula ku Vayuda. 23Navutswa isaa yidza nayo i mali kuduka, ya va kola miluka gyeligali va la kola miluka ku Dada na roho kandi nageligali: kigira Dada yenya va zana va ve avakoli vemiluka gyigye. 24Nyasaye ni Roho: navo va kola miluka gyigye, ga va dukira va kole miluka mu roho nomu geligali. 25Mukali ya mu volera, Mmanya Mesia yadza (uyu a langwa Kristo): lwa a duka a la ku volera vindu vyosi. 26Yesu ya mu volera, Inze wa ku volerana nive, niye.

27Hene yaho avegidzwi veve vadza; ni va genya ya volerana nomukali; navutswa mundu si ya mu teva, Wenya ki ive? Kinga, Kigira ki u volerana naye? 28Ku, mukali ya leka isiongo yeye, na a tsia mu lidala, na a volera avandu, 29Hambi mu lole mundu wa mbolera vindu vyosi vya nda kola; a ka veye Kristo naho? 30Va twula mu lidala ni va tsia kuye. 31Inyinga eana avegidzwi va mu gonya, ni va vola, Rabi, u lie: 32Navutswa ya va volera, Mbeye nevyokulia vya mu ta manya. 33Kigira yaga ave gidzwi va volerana, Mundu ya li kumuletera vyokulia naho? 34Yesu ya va volera, Vyokulia vyange nokukola ubulaliri bwa uyu wa ntuma, nokumaliridza miyinzi gyigye. 35Mwinye si mu vola. Gyi tigaye imyeli gyine, ma ligesa li duka? Henza, mmu volera, Mu ginge tsimoni tsyenyu, mu henze mu milimi gyi mali kulava gyi duke kugeswa. 36Mugesi a vugula madanyi, na a vungidza makuyu gelivamwoyo li ta hera mba, mumidzi nomugesi va duke kusangala halala. 37Ku yaga livola yili li veye lyeligali, Mulala a midza, na wundi a gesa. 38Inze nda mu tuma kugesa lya mwa vula kuyinzira ku: avandi va yinzira ku, na mwinye mwingiye mu miyinzi gyavo.

39Avasamaria vanyingi velidala yilyo va suuvira kuye kigira likuva lyomukali ya vola, Ya mbolera vindu vyosi vya nda kola. 40Ku, Avasamaria lwa va duka kuye, va mwenya a menye navo: kandi ya gona yo madiku gaviri. 41Kandi avandi vanyingi va suuvira kigira likuva lilye. 42Ni va volera mu kali, Kalunu si ku suuvira kigira livola lilyo: kigira kwinye avene ku mali kuhulira, kandi ku manya ligali uyu a veye Muhonnyi wavomkivala. 43Inyima ya madiku gaviri yago ya twula yeyo, na a tsia Galilaya. 44Kigira Yesu mwene ya vola, muprofeti si a veye nobwidzominywi mu kivala kikye. 45Kunangwa lwa ya duka Galilaya, Avagalilaya va mu bugirira no buyanzi, kigira va lola vindu vyosi vya ya kola mu Yerusalemi inyinga yelilia: kigira yava kandi va tsia yeyo mu lilia. 46Ya duka kandi mu Kana lidah lya Galilaya, ha ya kola amadzi ga gwe iwaini. Kandi ya li ho munene mulala womwana muyai wewe ya li na a lwala mu Kapernaume. 47Lwa ya hulira Yesu udzi Galilaya kutwula Buyuda, ya tsia kuye na a mwenya a sulungute a tsie kuhonnya muyai wewe; kigira ya li ni yenya kukudza. 48Yesu ya mu volera, Mwinye ni mu ta lola vyokulolekidza nevyokugenya si mu li suuvira mba. 49Munene ya mu volera, Mwami, sulunguta mwana wange na a kikiri kukudza. 50Yesu ya mu volera, U tsie, muyai wowo a veye mwoyo. Mundu uyo ya suuvira likuva lya Yesu ya mu volera, na a tsia. 51Naye lwa ya li na a sulunguta, ya vugana navatugwa veve, ni va vola muyai wewe a veye mwoyo. 52Naye ya va teva inyinga ya ya tanga kusosa. Ni v a mu volera, Mgolova inyinga yesaa i kola tsitanu na tsiviri luhuudza lwa mu leka. 53Ise ya manya niyo isaa ya Yesu ya mu volera, Muyai wowo a veye mwoyo: kandi ya suuvira navenyumba yeye vosi. 54Kandi yiki ni kilolekidzu kya kaviri kya Yesu ya kola inyinga ya twula Buyuda kuduka Galilaya.

Currently Selected:

Yohana 4: MBE

Highlight

Copy