Yohana 7

1Inyima yevindu yivi Yesu ya vaya mu Galilaya: kigira si yenya kuvaya Buyuda, kigira Avayuda venya kumwiita. 2Lilia lya Vayuda lya li himbi, lilia lyevidioli. 3Kigira yaga avamwavo veve va mu volera, Twula hano, u tsie Buvuda, avegidzwi vovo va duke kulola miyinzi gyigyo gya u kolanga. 4Kigira si ha veye nomundu u kola kindu makiriri na mwene yenya kumanyekana. Nu u va nu u kola vindu yivi, wemannye ku avomkivala. 5Kigira kali avamwavo veve si va mu suuvira mba. 6Kigira yaga Yesu ya va volera, Inyinga yange i kikiri kuduka; navutswa inyinga yenyu madiku gosi i duka. 7Avomkivala si va nyala kudunyira mwinye; navutswa inze, va ndunyira, kigira inze ndolekidza miyinzi gyavo ni midamano. 8Mwinye mwanegire mu tsie mu lilia: inze si nyanegira mu lilia yili; kigira inyinga yange i kikiri kuduka. 9Kandi lwa ya mala kuvavolera yaga, ya menva Galilaya.

10Navutswa avamwavo veve lwa va mala kwanegira kutsia mu lilia, mwene kandi yanegira si a tsia habulavu navutswa kuli a tsia ma kiriri. 11Kunangwa Avayuda va mwenya mu lilia, ni va vola, A veye ha li ha? 12Kandi limonya linyingi lya duka mu viduma kuye. Avalala va vola, A veye mundu mulahi; avandi va vola, Auwa, navutswa a gada kiduma. 13Navutswa si ha veye nomundu wa vola kuye habulavu kigira va tia Vayuda.

14Navutswa lwe lilia lya duka hagati, Yesu yanegira mu litempeli, ni yegidza. 15Kigira yaga Avayuda va genya, ni va vola Mundu uyu a manya ndi mang'oda naye na a kikiri kwega? 16Kigira yaga Yesu ya va tivulira, na a vola, Me gidzo gange si ga veye gange, navutswa ga uyu wa ntuma. 17Ku vosi u lalira kukola ubulaliri bwibwe, a la manya megidzo, ni ga va ni ga veye ga Nyasaye, kinga inze mwene mbola. 18Uyu wevolera yenya ubukumi bwibwe bwene: navutswa uyu wenya ubukumi bwa uyu wa mu tuma, uyu a veye weligali, kandi si a veye na ga ta lungiki muye. 19Si ya li Musa wa mu ha lilaga? Navutswa si ha veye nomulala ku mwinye u kola lilaga. Kigira ki mwinye mwenya kunziita? 20Kiduma kya tivula, U veye nelidemone: ibwaha yenya kukwiita? 21Yesu ya tivula na a va volera, Nda kola muyinzi mulala, na mwinye mwosi mwa genya. 22Musa ya mu ha likebwa (navutswa si lya twula ku Musa, navutswa ku vaguga); na mwinye ku lisabato mu keva mundu. 23Ni bu Ii bulahi mundu a kebwa ku lisabato, lilaga ya Musa i tono nywa; kigira ki mwa ndunyira lwa nda kola mundu mulamu ligali ku lisabato? 24Mu ta kalaga vya mu lola, navutswa mu kalage likalaga lyobulungi.

25Avalala ku vandu va Yerusalemi va vola, Uyu si a li wa venya kwiita? 26Kandi henza, u luviriye, navutswa si va mu volera kindu. Avanene va manya ligali, uyu ni Kristo? 27Navutswa ku manya mundu uyu ha ya twula: navutswa Kristo lwa a lidza si ha veye nomundu a manya ha a twula. 28Kigira yaga Yesu ya gamba ni yegidza mu litempeli, na a vola, Inze, mwinye mu mmanya, kandi mu manya ha nda twula; kandi si ntsitsa inze mwene, navutswa uyu wa ntuma noweligali, wa mu ta manya mwinye. 29Inze mmu manya; kigira nda twula kuye, kandi ya ntuma. 30Kigira yaga venya kumugumira: navutswa si ha veye nomundu wa hila kuye mukono, kigira isaa yeye ya li ni i kikiri kuduka. 31Navutswa vanyingi ku kiduma va mu suuvira; ni va vola, Kristo lwa a lidza, a la kola vilolekidzu kuvita vyomundu uyu a kola naho? 32Avafarisayo va hulira kiduma ki monya kuye amakuva yaga; ma vasalisi vanene na Vafarisayo va tuma avasikari kutsia kumugumira. 33Kigira yaga Yesu ya vola, ha tigaye hakekeke ni mbeye na mwinye, kandi nda tsia ku uyu wa ntuma. 34M u la nyenya, kandi si mu li nyola: kandi ha inze mbeye, si mu nyala kuduka ho. 35Kigira yaga Avayuda va volerana avene, Mundu uyu a li tsia ha li ha, ha kwinye ku li vula kumunyola? A la tsia ku avelyavukana lya Vagreki, ni yegidza Avagreki? 36Ni likuva ki lya ya vola, Mu la nyenya, si mu li nyola; kandi ha inze mbeye, si mu nyala kuduka ho?

37Ku lidiku lyekiheri, lidiku linene lyelilia, Yesu ya singira na a gamba, na a vola, Mundu na a va na a veye nobuluhu, yadze ku inze a nwe. 38Uyu u suuvira inze, kuli mang'oda ga vola, Gyi la twula mmwoyo gwi gwe imigera gyamadzi gyelivamwoyo. 39Navutswa yaga ya vola ku Roho, wa va li nyola, yava ava suuvira kuye: kigira Roho ya li na kikiri kuhaanwa; kigira Yesu ya li na a kikiri kuhebwa ubukumi. 40Kigira yaga aralala ku kiduma lwa va hulira amakuva yaga, va vola Uyu ligali a veye muprofeti zana. 41Avandi va vola, Uyu ni Kristo. Navutswa avandi va vola, Kristo a twula Galilaya nkani? 42Mu mang'oda si ga vola, Kristo a livulwa wa Daudi, kandi wa Bethlehemu kadala ka Daudi ya li mu? 43Ku lihangalidzana lya duka mu kiduma kuye. 44Avalala venya kumugumira; navutswa si ha veye nomundu wa hila kuye makono.

45Kunangwa avasikari vadza ku vasalisi vanene na Vafarisayo, ni va va teva, Kigira ki si mu mu leti? 46Avasikari va tivula, Mundu ku vosi a kikiri kuvola kuli uyu. 47Avafarisayo va va tivulira, Kandi mwinye mu goteywi? 48Ku vanene, ibwaha u suuvira kuye, naho ku Vafarisayo ibwaha? 49Navutswa kiduma yiki ki ta manya lilaga, ki laameywi. 50Nikodemo ya va volera, (uyo wa tsia kuye lwambiri, naye nu mulala kuvo), 51Ku lilaga lyetu, ku kalagira mundu, ni ku kikiri kumuhulira nokumanya aga a kola? 52Va tivula ni va mu volera, Ive kandi si u li wa Galilaya? Wenye u lole, si ha veye nomuprofeti u twula Galilaya. 53Kandi va tsia sa mulala mu.

Currently Selected:

Yohana 7: MBE

Highlight

Copy